NAKILOLOGIAENA
Nap̃a Yoane Pisuia
Ana Siriyuia
Visayuena Na Tusi Nene
Suniena plas na tusi nini
E tusi nini, Yoani siriyu suri la nap̃a Yesu Kristo kila meraravan pania. Tusi nene, kiena kia na plas “Nakilologiaena”.
Yoane siri tusi nini e pogos nap̃a le Rom lala akila suri m̃arera manene la pap̃isi pa li nalelagaena lala, a asum̃a am̃em̃om̃ari la ke amarmare, komin nap̃a amlelaga e Yesu Kristo. Yoane siri m̃aki nini vena visirplanen sitomiena kiena la nene, vena asum̃alu m̃arera e pogos m̃arera lala.
E tusi nini, tekilia teulo suri la nap̃a sane m̃eniena nap̃a Yesu kila meraravan pa Yoane, naga pisayu totou na suri lala vena li nalelagaena la e pogos nene akilia alogekilalea kana kinasa. Ana yaru tap̃ena lala tap̃atete akilia kana kinasa. Sitomien kiena totou lala na tusi nene sanini. Yesu Kristo, naga pe Ntewa namava, a pe kieta Sup̃e, a e limana, Ntewa yoko kila kare make nena Yermare amio nasinekar tap̃ena lala. Pogos nap̃a kila make yum̃aena nene, yoko naga la nalaena kiena yaru la nap̃a asum̃alu m̃arera e kiela lelagaena lala. Yoko were la ava asike amio naga mae peni viu a e yomarava viu nap̃a naga kila ruru make rui.
Komp̃asnen tusi la na nini
Visena p̃esa 1:1-8
Suri p̃esa nap̃a Yoane m̃enia pisuia, ana lum̃aki lala pae sum̃are olua 1:9—3:11
Tusi nap̃a ve yaru vike re, nap̃a suri la olua sike ea 4:1—8:1
Kumasua olua 8:1—11:19
Alkita amio suri mali lua nap̃a la apiowa pap̃isi 12:1—13:18
Suri na m̃eniena tap̃ena la nap̃a Yoane pisuia 14:1—15:8
Pialora olua nap̃a apulen sinemimiena kiena Ntewa 16:1-21
Ntewa kila kare pulkumali nap̃a P̃apilon a taulu surmali nap̃a piowa, amio navisaluaena kokani, amio Yermare 17:1—20:10
Ntewa la nakoaena va yaru lala e legiena maro 20:11-15
Peni viu amio yomarava viu, a Yerusalem viu 21:1—22:5
Visena maro 22:6-21
1
Navisa meraravanen tus nini
1 Tus nini naga nakilologiaena na sur ya la nap̃a yoko aim am̃aliv e legiena la nap̃a pimi ke na wa. Ntewa sinenan yar la nap̃a amiyum̃ae kiena ke e yomarava la monar akilia ruru sur la nini, ana naga mla nakiliaena la nene pa Yesu Kristo, yoko Yesu pitetalia kiena navisi tai pimi m̃alivin kiena yar na yum̃aena nap̃a Yoane, kila sur la nene pimi p̃arpoyo e kiena m̃enien tai. 2 Yoane tol m̃eniena nene, ana pisu kilale sape nanene visena kiena ne Ntewa pe lelaga, pe visena lelaga nena napo nap̃a navisa meraravanen ya nap̃a yoko Yesu Kristo yum̃aen sirau, kila narui siriwal ruru make sur nap̃a naga pisuia, vena nasirau takilia tauloia.
3 Ana yoko yar a nap̃a wolo visena na visawalen la nene, pona yagogonia, ligan ruru teke e sinena, yoko na visaruruena kiena ne Ntewa ve keviu e kiena malena, komin nap̃a pogos na legiena keviu nene pimi ke lavis manene laa narui.
Yoane siar visawalen kiena m̃eniena e visen tai nayeluaren Ntewa
4 Nakilol 4:5In na Yoane, nesiri plan visena la nini im̃asu van amiu p̃egas na lelagaena la olua nap̃a asike e pulkumali lala e pupia lepas nap̃a tepio tesape Esia. Nekekaran nap̃a nevitawe amiu e kia kien naga nap̃a sike na konua rui, sike nanagane, a yoko sike sike lue. Nemlen wo amiu ke nesape pupia lemamiena a sum̃are sike e kiamiu malena la silaga, nap̃a yoko tol amiu imi kome kieta Ntewa nene amio kiena ninuna olua nap̃a asm̃al asike vamon kiena lele wa na totanoena. 5 A kilia imi m̃ena kome Yesu Kristo, nap̃a naga masisu m̃a pano kana kuruta mlau, siraunia naga p̃es nap̃a mal si petan marena, nap̃a nagane naga pe p̃arin sup̃e kiena ne p̃arin sup̃e na yomarava lala.
Ee, Yesu Kristo ke nanene narui nap̃a naga sinen sii ita pap̃isi pano-o tam̃an kana kuruta mlau vena ul plan ita vetan koaena na kieta mlamulen viowa lala, 6 Nakilol 5:10ana naga pisirlua ita teim teve mratava ve taaga na lus kiena ne kiena narin sup̃e lala, a naga mligan plan ita vena teiila naga sa nap̃a tepe yar wa na yum̃aena kiena ne arimana, nane Ntewa na mava.
Yesu na kila po pan ita sanene wa, ana popon teyeluar kiena kia, tevisirlua naga va manene laa metava, vano vano-o ve p̃isi re pogos tai, sanene.
7 Mat 24:30; Mak 13:26; Luk 21:27; 1Tes 4:17, Yoan 19:34,37, Mat 24:30Avisu ruruia! Naga ke narui nap̃a sum̃a kupanpo lul la metava m̃alivin sape vitom tano! Yoko ita make ga kilamarata visuia, ore, amio m̃ena la nap̃a asuar naga e lak torovia, la m̃ena yoko avisu kilale si naga. Ana yoko pupia sineyeena a tagena molue e yeririna na yomarava lala pogos nap̃a asitom̃al si e ya nap̃a la akila pan nanua sumo. Yoko ve sa ke nene narui, nevisa “sanene” ea.
8 Nakilol 22:13Popon tevatanon Sup̃e Ntewa, Ntewa na m̃areraena nae meta manenea, naga nap̃a sike kemua rui, sike nagane, a yoko sike sike lue, nap̃a kiena visena urmi tai pisa sanini, sape
“In na nepe purp̃esa, in na neve luasa.”
Yoane pisu totou na Yesu
9 Kam erau make lala, in Yoane in na nepe wenla amiu, nap̃a nevisawal sur make van amiu. Nesape nevisawal van amiu komin nap̃a ita ke narui nap̃a tepe kiena ne Yesu, ita ke narui nap̃a tesike vatanon kiena nasup̃enena, ita ke narui nap̃a tesum̃a top̃ar pae ke nalogeen viowa na pog m̃arera nene, a ita ke narui nap̃a tesum̃a takawean ita ke temio sitomena napiayavi.
Pogaga, kiau sunena va sanini, sane nanua sumo, nesum̃a nepisawal ke visen kiena ne Ntewa, nemlologon m̃a Yesu Kristo pano-o, le Rom la amla nakoaena pan inu, amligan inu nepim nemiyum̃ae korena e narin purvanua nini, kien kia Patmos. 10 Ana e Legiena Wa tai, nesum̃a sane nemloge sane Ninuna pimi e inu, nemloge pulgo tai varaun inu, pulgon keviu sane kumasua mielu, pisa sanini sape
11 “Ya ne yoko ovisu ne,
ovisuia osirilua va e tus tai,
yoko oligan va teliliv viora e sum̃are punu ga na lepas nae Esia,
vena akilia auloia.
Sum̃are la nene, la olua, nane Episas, Sum̃ana, Pekam̃am, Taeatara, Satis, Pilatelpia, a Laotisia.”
12 Pulgo nene sum̃a pis pan inu sanene, ana sineun nesape nevisu ane sanene, nop̃arpu inu sane nepisu lan kantel ga la sike na, la olua nap̃a amiyum̃aen e kol. 13 Lan kantel la asm̃al ga asike sanene, ana yoko nom̃al yar tai sum̃al sike likan la, nap̃a naga sanena nap̃a asape Narina ne Yeririna. Naga miyen kulsota piavi tai, amio kulmrae tai nap̃a amiyum̃aen e kol, atelan p̃aro e yerena. 14 Vilp̃arina, miyuwowo na miyuwowo manene laa, a kilamarana tego sane kap nap̃a mluamene. 15 Lana m̃arera ruru po, sane pototo nap̃a m̃arera ruru po, pilavila, a pogos nap̃a naga pis, pulgona m̃aaga sane sii nap̃a p̃anpo e piam̃e.
16 Naga sum̃alar sum̃a ga sa nap̃a e limana marua, mlarar ke verue olua, a playu na mara nap̃a mal na mal e lepas luwoka molue ke kome logona. Marana m̃ena ga, suwala, miyuwowo na miyuwowo, sa nap̃a mrae tego m̃arera kolpae.
17 Nakilol 2:8, 22:13Nepisu sanene, lelaga, kila narui nemare nenaga, nemlor nena e mialana. Ana kian limana marua pimi tol inu, pisape
“Ve omarau re, in nap̃a nepe nasiarena a nepe naluasa.
18 Naga nap̃a pe purp̃es nen malena, inu, komin nemali, p̃isna nemare, p̃isna nemal sina, ana nemal lue narui.
In ke narui nap̃a ki namarena amio ki na pulukapi viowa kiena ne yar na marena lala sike e lum̃au.
19 Ana marauen toko, osiri plan ga ya nap̃a opisu ke ne, nap̃a lepas nanagane, p̃arar lepas nap̃a na legiena la nap̃a pimi ke na wa.
20 A nevisa sur ta van ko sumo wa, e lepas na verue olua nap̃a opisu e lum̃au, amio purp̃es nen kantel olua nap̃a amiyum̃aen e kol. Sur la nene sane kiliaen tai nap̃a tapolou, ana kala kinasa sanini, verue olua nene, naga navisi la olua vena visuaren sum̃are la olua.”