7
Ntewa pisaar kiena pupia p̃egas nen yeririna tai vena ave kiena
1 Siraun sur la nene, nepisu navisi la vari asum̃al asike e mrapun yomarava varoka, asum̃a akilawo ke lagi vari nap̃a amiyui ke e yomarava, vena lagi la nene ve ayui re si e sive, pona e porotano, pona meta e lak lala. 2 Yoko nepisu ke sina navisi tap̃ena, p̃ar sur na ween totou kiena ne Ntewa mali van kiena yeririna lala, ana naga molue e nap̃a mrae pa meta ea pimi. Naga kilia m̃a sape navisi vari nene, la ap̃ar ke nam̃areraena nap̃a akilia akila kare porotano a akilia akila kare sive, ana naga pion manene pan la, pisalup̃ar pan la vena ve akila re si sur tai. 3 Pisa sanini, sape “Ei, toko, ve akila kare re sive pona porotano pona lak lala, vano vano tol nap̃a teligan totou tai te piamenan yar mesmes lala nap̃a ape kiena ne kieta Ntewa.”
4-8 E pogos nene narui nemloge ga na wa nap̃a apisawal nena maran la nap̃a amligan totou e la. La nene amolue akom e lus nae Israel la lualima taaga pa lua, naga lus la nap̃a ap̃ar kia kiena yermarua apua kan la nene, nane Suta, Rupen, Kat, Asa, Naptali, Manasa, Simion, Levi, Isak, Sepulan, Sosep, a Pensiman. Ana e lus make la nene, tai kana manu lala tol lualima taaga pa lua [12,000] amolue komea, kila la punu ga tol sane kana manu ne lala tol ponotia lualima yam vari pa vari [144,000].
Pupia p̃egas tap̃ena lala nap̃a amiyen kulsota yuwowo lala
9 Ana siraunia, nekira pa vamon inu narui nom̃al pupia p̃ina na yeririna lala, nap̃a moki na moki, tap̃atete auloia, la ke nap̃a amolue akom e lus tap̃ena la narui. La ke nap̃a ape yeririna tap̃ena lala na purvanua tap̃ena lala, amio kiela visena tap̃ena lala, apim asum̃al asike vamon pupia lele na totanoena nap̃a narin sipsip totano teke ea. La make ga amien kulmrae yuwowo nowo lala, a ap̃arar m̃am̃ela lala, 10 a apio manene pa metava, asape “Kieta Ntewa teke e kiena lelena wa, naga ga amio narin sipsip, lalua ape purp̃es nen kieta natamaliaena.”
11 Ana amio la nene, navisi m̃ena lala asum̃al amiyervivi yo wa, a amiyervivi m̃ena nasumonena lala amio yar mal la vari nap̃ani, ana la m̃ena akinai ap̃an p̃arila pito tano vamon yo wa, amlotun Ntewa, 12 asape
“Ee, lelaga pa!
Nayeluarena make ga, a naurarena, a namanmaruaena, a navisaen potena, a navisirluaena, a puriukawaena, a nam̃areraena,
la punu ga nene ape kiena ne kieta Ntewa naga taaga, a yoko ve sanene sulue na sike ne.
Yeluaren van Ntewa!”
13 Ana e pogos nene, nasumonena la tai piun tan inu, sape “Pupia p̃ina nap̃a amiyen kulumrae yuwowo la ne, okilia osape a la nene, a okilia osape la asu pe na apimi?”
14 Mat 24:21; Mak 13:19Ana nesape “E peraga, ana ko ope yerkawa nae e nini tai, ko okilia m̃a yo?”
Ana pisatam̃ea sape “Ore, la ke nene narui nap̃a ap̃aro e pupia pogos naloge viowaena. Kulsota la ne amiyen ke ne, akevanla e kuruta kana narin sipsip nap̃ani, nane apim amiyuwowo ruru sane opisu ke ne. 15 La na kiela yum̃aena sanini, sane
‘La asike vamon yo wa kiena ne Ntewa, legiena a lemalo amiyum̃ae kiena ke loyum̃a e m̃ana yum̃a wa,
a naga nap̃a totano teke meta ne, naga yoko visuar la,
16 Yoko tap̃atete si viso kar la,
yoko ve moto karla re si narui,
mrae ve kila kare la re sina,
a pupia kapi ve visun la re sina,
17 komin narin sipsip nap̃a teke likan yo wa meta ne,
naga yoko vagan la,
naga yoko sumon la ava e purp̃es nen wii na malena,
a yoko Ntewa yumu plan make wamarala.’ ”