19
Pupia kekarena ma metava komin nap̃a ma e peni taulu make suria
1 Siraun naga nene, nemloge pupia p̃ina ma e peni apion manenea, asape
“Potena pan kieta Ntewa!
Tamaliaena, urarena a m̃areraena naga taaga ga kiena.
2 Kiena nalip̃ereena make ga ape lelaga a amesmesu pap̃isi.
Sira na mrapa la nene anela naga piowa ga,
kiela na kolauena la akila yomarava pimi pe kororaki pap̃isi, ana Ntewa mlip̃ere naga rui.
Ana naga mla pupia nakoaena tai pania komin kuruta kana kiena yar na yum̃aena la nap̃a mlau.”
3 Asum̃a amlolokai m̃a sanene, ana asikol ke sina ga, asape
“Potena pa Ntewa! Kapi kekan ke kororaki la nene rui, yoko kana kapi nena viu lue ga va metava narui.”
4 Ana nasumonena la lualima yam lua pa vari [24] amio sur mali la vari akinai e marana ne Ntewa nap̃a totano teke meta e kiena yo wa, ana amlotun ke naga. Apionia, asape
“Po pap̃isi! Potena pan keviu!”
5 A visen tai molue m̃ena e yo wa nap̃ani, pisa sanini sape
“Kam na yar na kilaen yum̃aena kiena ne Ntewa,
amiu yerkawa lala a yeririna kar ga lala,
kam make ga nap̃a amlogear naga,
nagane kana pog nena napo naieluarena.”
6 Ana nemloge sina pupia p̃ina nap̃a pio nap̃a kiela m̃aagena sa nap̃a sive p̃anpoia mumu, sane polilu. La asape
“Potena pania!
Kieta Sup̃e Ntewa na Mava, naga taulu make sur rui!
7 Teieluar naga,
tevisirlua kiena kia, tekekarania.
Nagane pog wo na kilaen p̃ap̃agena na talopaena kiena narin sipsip narui.
Wona na sira paia ruru naga su ruru ga sike na,
8 a amiyowauia ruru naga e kulmrae viu wo lala, apowo a amerarava pap̃isi.”
Ana kulmrae nowo nap̃a miyuwowo ne nap̃a wona narin sipsip na sira miyenia, naga kana kinas tom̃a ga, kana kinasa sane yum̃aena wo la nap̃a nalelagaena wa lala kiena ne Ntewa la akila rui.
9 Mat 22:2,3Ana navisi nap̃a sike amio inu e pogos nene pis pan inu, sape
“Yoko nevisa kiom̃a visena tai vena osirilua e kiom̃a tus nene. Visena sanini, sane yar nap̃a yoko avio naga vena naga m̃ena va e kinanena na p̃ap̃agena na talopaena kiena Narin Sipsip, yoko naga loge wo na wo vap̃isi.”
A sikol sina visena nene, sape
“Naga visena lelaga tai kiena ne Ntewa nap̃a pe lelaga pap̃isi.”
10 Ana nemloge naga pisa sanene pan inu, nekinai pania, nesape nelotunia, ana naga pisalup̃aria. Pisape “Toko, ve okila re sanene van inu! Monar olotun ga Ntewa naga taaga. In na nepe kiena yar na yum̃aena ga, sane ko, a sa m̃ena wolai tap̃ena la nap̃a apiawa m̃arera ke e visena lelaga lala kiena ne Yesu. A po pap̃isi nap̃a amiu asum̃a akila ke sanene, komin nap̃a purp̃es nen kinas nen navisawalena lelaga make ga nap̃a apisawal nanua pimi, naga Yesu ga ne, amio kiena visena lelaga la nap̃a apuarar ke m̃arera.”
Yar m̃arera nap̃a kus wosi na miyuwowo
11 Ana e pogos nene, ma e peni pietava pan inu, nekira pa loyum̃a, nepisu wosi yuwowo tai nap̃a po pap̃isi sum̃alar ga sike na, a yar m̃arera tai nap̃a kusa totano teke ea. Naga ke narui nap̃a kila mara suwo napiowaena, pona pogos nap̃a kila kiena nalip̃ereena, ana naga miyum̃ae nena mesmes pap̃isi. Yar nena, apio kiena kia asape P̃arin Sup̃e Lelaga Naviawaena. 12 Ana kiena kia tap̃ena m̃ena tai asiri sike ea pe yar tai kilia re kana kinas poli, naga taaga manene kilia. Kilamarana pilavila sane kap nap̃a pivaga, a e p̃arina miyen ke karo na p̃arila kiena ne p̃arin sup̃e lala. 13 Naga miyen m̃ena m̃ana kulkota viavi tai nap̃a aputon pito e kuruta vena kila ve maran la ea, ana naga kiena kia si tai na nap̃a asum̃a apio naga ea, naga sanini, asape Visena Wa kiena ne Ntewa.
14 Ana e pogos nene, p̃egas nen yar na mara lala nae ma e peni, amiyowau ruruia e kulmrae yuwowo a akus kiela wosi yuwowo lala, asum̃a ataveve ke kiela nasumonena nene apano. 15 Nakilol 14:20Naga p̃ere la apano, kiena visena molue ke kome gona sane playu na mara nap̃a mal ga lepas luwoka, nap̃a yoko te plan purvanua na yomarava la akekapil. A siraun nap̃a yoko naga taulu la, yoko naga sum̃alu ve sup̃en la, a naga p̃uarar ke plaki e limana, pototo tai nap̃a urmi. Nakoaena m̃arera ya nap̃a sinemimiena kiena ne Ntewa na mava ligan va yar la akusia, ana yerkawa ne nanene narui yoko naga war imi m̃alivi.
16 Ana naga kiena kia tap̃ena sike ga wa, nap̃a asiri e m̃ana kulkota a e lana, sape
“P̃arin Sup̃e kiena ne p̃arin sup̃e lala, Yerkawa kiena ne yerkawa lala.”
17 Nepisu navisi tai sum̃alar sike na nap̃a yepisun tegolia, naga pion pa manu lala nap̃a akaka ke metava ne, sape “Ei, kam punu ga aim lele taaga e pupia p̃ap̃agena kiena ne Ntewa. 18 Kam manu na kanen tata lala, yoko ve ve piavi re ayum̃aen kinanena tai torokin amiu nenaga, nap̃a tas nen yar mare lala kiena ne nasinekar kiena ne Ntewa. P̃arin sup̃e lala, pupia yerkawa na mara lala, yar m̃arera lala, wosi na mara lala, amio la nap̃a ap̃erela ke ne, amio yeririna kar ga lala la nap̃a ape yerkawa pona ape yar ve torokaki na yum̃aena ga lala, la make ga asum̃alu vena akila mara va Ntewa, ana naga taulu la kila mom̃ar la pa ke ne.”
19 Ana nepisu surmal viowa amio p̃arin sup̃e na yomarava amio kiela p̃egas na kilaen mara lala, apim amiyuwon vain la ke lele taaga. A sinelan asape akila mara amio nap̃a kus ke wosi yuwowo ne amio kiena yar na kilaen mara lala.
20 Nakilol 13:1-18Ana asape akila mara narui, ana yar viowa lala amilan ga nap̃a lepas kiena ne Ntewa asum̃al veraga apa atarar kiela na sumonen luwoka nap̃a atarar ruru la nenaga, nane sur mal viowa amio navisawalena nap̃a pisosokan ga ne na pe yar naiilaena e kimi lala a sur nailanena lala. Sumo, naga miyum̃aen sur la nene pisa kotalia ruru nena yar lala nap̃a p̃ere kiela sitomena pano atam̃an am̃e tatu na sur mal viowa pa e piamenala, apa amlot wowe pa kiena nono.
Ana la atarar ruru nena nasumon-ena luwoka na p̃egas viowa nene, ana akuwanpran luwoka pito e pulukapi nap̃a mumu ke ne.
21 Ana tap̃ena la pe akila re mara poli wa, amilan ga playu na mara tai molue kome gona nap̃a kus ke wosi yuwowo ne, pa sanene, pa sanene, te mom̃ar kare la amarmar pa ke ne. Ana taveve ya nap̃a nepisuia, manu na kanen kilam̃iu lala apim atewowa tas nen marena la nap̃ani, akan pano-o mep̃ela la puleule.