M̃aki Nap̃a Pol
Siria Pan
TAETAS
Visayuena Na Tusi Nene
Suniena plas na tusi nini
Taetas, naga pe yaru viu nap̃a naga pe pe lus nae re Israel tai poli, ana naga pimi pe yaru tai nap̃a mlelaga e Yesu, ana naga sum̃a taveve Pol vena iila naga e yum̃aena a na visawalen lologena wo kiena Yesu Kristo. Pol mligan Taetas sike e purvanua nap̃a Krit vena visuar yum̃aena na sum̃are e yo nene, a naga siri m̃aki nini pania vena visayuen suri telu.
Nasumo, Pol pisa pa Taetas vena sitom̃al p̃elaga nap̃a nasumonena na sum̃are la monar atavevea. Naga pisa sanene, komin le Krit la moki, kiela p̃elaga a kiela maliena pe mesmesu re poli.
A na lua, Pol pisawal mrapa pa Taetas nap̃a monar tavevea vena vianen yaru lala e p̃egas tap̃ena lala loyum̃a e sum̃are. Nane yermarua lala, a sira marua lala, a yaru viu amio yaru na yum̃ae korenen lala. A naga sape sira marua lala monar avian ruru sira m̃ee lala.
A namaro, Pol pisawal pa Taetas e navianena nap̃a naga monar la van yaru lala, a monar ave erau ruru wo amio la, nap̃a asum̃a ve apeveveyu re, a yaru na sum̃are lala monar ve alip̃erela re.
Komp̃asnen tusi la na nini
Visena p̃esa 1:1-4
Na sumonena na sum̃are lala 1:5-16
Yum̃aena kiena yaru tap̃ena lala loyum̃a e sum̃are 2:1-15
Visena na vianen yaru lala 3:1-11
Visena maro 3:12-15
1
Pol porworun Taetas
1 Kiau erau Taetas,
In na Pol, nekekaran nevitawe ko sina e m̃aki nini, e kia kiena ne Ntewa, nap̃a in na kiena yar na yum̃aena, a e kia kiena ne Yesu Kristo, nap̃a in na nepe kiena nalologena.
Nesike e yo nini, nesum̃a nemiyum̃ae ke ga wa, nemio yeririna la nap̃a Ntewa pisaar la sape ape kiena, komin sineun nesape popon kiela viawaena imi m̃arera laa ga wa, a kiela nakiliaena e visena lelaga imi ve keviu laa ga wa. Visae ve sa nene, yoko kiela p̃elaga kilia imi torokin p̃elaga kiena yar wa tap̃ena lala kiena ne Ntewa, 2 a yoko akilia atol malena nap̃a ve uro re.
Kieta sitomena m̃arera pa rui sape yoko tetol malena nene, komin Ntewa pisaar na konua konua rui sape yoko monar ve sa nene, a tekilia sane naga pe pisokan li re pogos tai poli. 3 Naga pe kieta Ntewa natamaliaena, ana pogos nap̃a pisu sane kana pog ruru napo, naga mligan kiena visena imi m̃alivi vena kilaen mrapa na kieta malena, a nagane mligan sike e inu vena neva nelologon va e yo make ga.
4 2Kor 8:23; Kal 2:3; 2Tim 4:10Ana Taetas, nane kiau m̃aki nene pan ko. Nepisu ko sane ope naruu ruru nenaga nap̃a ita lua kieta naviawaena taaga, ana kiau leniena pan ko pa sanini, sane lemamiena a sum̃arena kiena ne Ntewa Arimata a Kristo Yesu kieta natamaliaena sike amio ko.
Yum̃aena kiena Taetas e purvanua nap̃a Krit
5 Nesiri pim̃asu pan ko, sineun iilar koena e yum̃aena nap̃a omiyum̃aen ke gar Krit wa. Nanua sumo, ita lua top̃ar p̃esan lologena wo pimi m̃aliv e yo nini, ana pogos nap̃a nepetan ko, pupia yum̃aena komp̃as m̃eke ga wa, ana nemligan ko osun ke nap̃a okila ruru ke ne yum̃aena la imi wo laa sane wa.
Sa nap̃a nepisa pan ko e poglis nene, sineun nesape ova oteliv make e kumali lala, owu p̃arin kiela yaru lap̃as, aim ave li nasumonena wa lala.
6 1Tim 3:2-7La nene, la monar ave yaru la nap̃a pe naviowaena re e kiela malena poli, monar atalopa amio wola ve taaga ga, a narila lala, la m̃ena monar alelaga e Yesu, pe pon re tevisu la ave p̃ar m̃arera poli, pona asum̃a apilon ke visena kiena kiela yermarua luwoka. 7 Monar ve sa nene komin nap̃a ape yerkawa na sum̃are lala. La ape yar na visuaren yum̃aena wa kiena ne Ntewa, ana monar ave yar mesmesu. Ve asitom re asave la na yar tai ne, ve sinela mimi koskos re, monar ve amun manene re wii m̃arera, monar ve ave yar na kilaen re mara, a monar ve asitom manene re sur lala toko.
8 Ana visae ve sa nene, yoko nasumonena naga kiena malena ve sanape? Yoko popon naga kekaran visuaren wolawa lala e m̃ana um̃a, amio p̃elaga wo tap̃ena la ne sanene. Popon naga sumon ruru yum̃aena lala, ve manmarua ruruia, kiena sitomena mekik ruruia, a naga kawe ruru kiena malena mesmesu. 9 Visena lelaga la nap̃a apian ea, naga monar uarar ruru m̃arera, vena kila sane naga towe kilia vian liluen vano.
Ovisuar lelagaena navisokanena lala
Yeririna la p̃asa asitom asape kieta lelagaena pe navisokanena ga, ana kieta navianena wo lala kilia kila kiela visena lala tap̃atete sum̃al ruruia.
10 Yar la mok liu asike ne nap̃a yepel mavin loge itaena, ana apis m̃arera pap̃isi, pona asum̃a akilali ke nap̃a aure sitomen kien yar la va ve tap̃ena. Garu e nem̃a Krit, ita lua tekekara pap̃isi pan le Yu la moki nap̃a tetaulula apim ape yeririna kiena Yesu rui, ana nagane li tap̃ena la nene sinelan asape aure kare la ava aviowa sina. 11 Sa nene, popon sa sur tai mono logola, komin akila kare ke mratava wetelu lap̃as rui. Asum̃a apian ke sur lap̃as nap̃a pe mesmesun re nap̃a avisayu poli, ana asum̃a am̃areran ga asape akila, pe na sitomen wo re poli, ana komin ga sitomena viowa nap̃a asape pona ala narin kilavaru la e yo.
12 Pona le Krit lala, kiela p̃elaga sa ga nene yo, komin yar nasirien suniena tai nanua sumo, nap̃a naga pe yar nae nena kiela yo tai, pogos tai pisayu la sape
“Le Krit lala, la ape yar na visokanena, apiowa taulu nompui, ape yar na yowena, ape yar na sitom̃alen ga m̃ep̃ela.”
13 Yar nene, kiena visena m̃arera li m̃aga, ana in na nepisu sane pona lelaga yo, ana po pap̃isi nap̃a ovis m̃arera van la, visae peraga, yoko kiela nalelagaena tap̃atete imi wo ruru pogos tai. 14 Nagane asum̃a apuarar ke sunena marua na sumo kiena le Yu lala, asum̃a akekaran ke visen kiena ne yerkawa tap̃ena la nap̃a akoven lua visen lelaga, ana komin ya ne pe sinelan re lelagaen e visen wo kiena ne Ntewa nap̃a tesum̃a temla ke pan la?
15 Yar nap̃a kiena sitomena merarava ruru nena po, sur nap̃a namname pe torokin re kila kiena sitomena imi namname poli, ana sur make ga merarava ga pania. Ana yar nap̃a pe mlelaga re poli, nap̃a kiena sitomena namname, pona sur tai merarava m̃a yo, ana tap̃atete kilia kila kiena sitomena imi merarava, a pe sur re tai nap̃a merarava ruru e naga poli. Nanene komin nap̃a kiena sitomena pona losinena apa apiowa rui.
16 Yar la nap̃a nesiriyu la ke ne, asum̃a apisawal ke asape akilia Ntewa, ana kiela yum̃aena lala kila meraravan pan ita sape pe akilia re nenaga. Losinela la menun a melkalka, ape p̃ar m̃arera pap̃isi, pe atorokin re nena kilaen si sur wo ta poli.