ᤔᤳᤋᤡ.
15.
ᤜᤧᤰᤁᤩᤠᤱ ᤁᤢᤓᤠ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤕᤖᤢᤛᤗᤧᤔ ᤕᤧᤰᤕᤰᤗᤠᤶ ᤔᤧᤍᤩᤧᤀᤠᤱ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. 
“ᤌᤣᤀᤠᤱ ᤁᤧᤜᤢ᤹ᤛᤠᤶᤒᤠᤜᤠ᤹ᤖᤧ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤈᤥᤃᤢ ᤔᤧᤕᤢᤖᤢᤒᤠ ᤌᤡᤶᤔᤡᤴ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴᤒᤠᤒᤣ᥅ ᤂᤧᤱᤜᤠ᤹ᤖᤧ ᤆᤠᤔᤠᤏᤢ᤺ᤸᤗᤧ ᤋᤃᤡ ᤆᤥ᤺ᤰᤌᤡᤶ ᤁᤢᤀᤡᤛᤡ᤺ᤰ ᤜᤢᤰ ᤘᤠᤔᤧᤴᤜᤵᤋᤢᤴᤗᤥ॥” 
ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ᤀᤠᤱ ᤐᤠᤎᤧᤒᤠᤜᤠ᤹ᤖᤧ ᤔᤧᤈᤥᤃᤢ ᤔᤧᤕᤢᤖᤢᤒᤠ ᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴ ᤌᤣᤀᤠᤱ ᤁᤧᤓᤣ᤺ᤴᤍᤢᤶᤒᤠᤒᤣ᥅ 
ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ᤹. ‘ᤁᤧᤶᤒᤠ ᤁᤧᤶᤔᤠᤛᤡ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤧᤛᤧ᤹’ ᤜᤧᤰᤁᤩᤠᤱ ‘ᤀᤠᤳᤋᤡᤸᤗᤧ ᤁᤢᤶᤒᤠ ᤁᤢᤶᤔᤠᤛᤡ ᤛᤠᤱᤃᤪᤠ ᤔᤧᤳᤋᤢᤛᤡ᤹. ᤂᤧᤱᤃ ᤛᤧᤵᤔᤠᤀᤣ ᤐᤥ᤺ᤱᤗᤥ॥’ 
ᤁᤖ ᤀᤠᤳᤋᤡᤸᤗᤧ ᤁᤢᤶᤒᤠ ᤁᤢᤶᤔᤠᤛᤡ ᤀᤡᤱᤃᤠ᤹ᤗᤠᤶ ᤂᤡᤴᤇᤡ᤹ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤁᤢᤓᤠ᤹ᤀᤡᤴ. ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤡᤖᤢᤱ ᤛᤢᤖᤢᤱᤅᤠᤱ ᤘᤠ᤹ ᤗ᤹ᤖᤡᤰ ᤐᤠ᤺ᤳᤋᤢ᤹. 
ᤂᤧᤸᤗᤧ ᤀᤠᤒᤠᤅᤣ ᤁᤢᤶᤒᤠ ᤁᤢᤶᤔᤠᤛᤡ ᤁᤢᤓᤠ᤹ ᤐᤡᤔᤠᤛᤡᤀᤠᤱ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤔᤠᤛᤡ ᤔᤧᤒᤥ᤺ᤱᤏᤧᤴ ᤗ᤹ᤖᤡᤰ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤔᤠᤱ ᤀᤠᤵᤑᤣ᤺ᤰ ᤂᤡᤏᤡ᤹ ᤆᤥ᤺ᤰᤌᤡᤶᤔᤡᤸᤗᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤌᤣᤏᤠ-ᤎᤣᤒᤠ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤖᤥ॥ 
ᤂᤡᤏᤡ᤹ ᤏᤡᤱᤘᤠ᤹ ᤁᤧᤈᤡ᤺ᤵᤐᤠᤛᤣ. ᤂᤡᤏᤡ᤹ ᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤛᤠᤵᤋᤢᤒᤠᤱᤃ ᤛᤧᤰᤂᤠᤀᤣ ᤗᤠ᤹ᤖᤢᤖᤥ. 
‘ᤁᤴ ᤔᤏᤠᤜᤠ᤹ᤖᤧᤃ ᤂᤢᤏᤡ᤹ ᤔᤢᤖᤠ᤺ᤸᤗᤧᤖᤰ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤒᤡᤀᤠᤖᤥ. ᤁᤖ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤀᤡᤱᤃᤠ᤹ ᤗᤧᤵᤔᤠᤱ ᤜᤥ᤺ᤵᤗᤥ. 
ᤁᤱᤜᤠ᤹ᤖᤧ ᤜᤏᤧᤀᤣ ᤛᤣᤘᤠ ᤔᤧᤈᤥ᤺ᤰᤁᤠ. ᤁᤖ ᤔᤧᤜᤢ᤹ᤖᤢᤛᤡᤒᤠ ᤏᤡᤛᤠᤶᤔᤡᤱᤃ ᤔᤧᤴᤇᤠᤶ ᤕᤠᤵᤔᤡᤖᤧ ᤀᤠᤵᤑᤣ᤺ᤰ ᤔᤧᤈᤥᤃᤢᤒᤠ ᤌᤡᤶᤖᤰᤗᤥ॥’” 
ᤕᤧᤛᤢᤖᤧ ᤔᤏᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥ 
ᤔᤏᤠ᤺ᤸᤗᤧ ᤁᤢᤔᤢᤖᤠᤀᤥᤗᤠᤶ ᤁᤧᤗᤠ᤺ᤵᤐᤠ ᤆᤠ᤺ᤸᤗᤧ ᤂᤢᤏᤧ᤹ ᤀᤠᤛᤢᤳᤌᤥ ᤔᤧᤈᤥᤃᤢᤴ. ᤁᤖ ᤁᤢᤔᤢᤖᤠᤀᤥᤗᤠᤶ ᤁᤧᤗ᤺ᤶᤒᤠ ᤐᤠ᤺ᤴᤏᤡᤸᤗᤧ ᤂᤢᤏᤧ᤹ ᤀᤠᤛᤢᤳᤌᤥ ᤆᤥᤃᤢᤖᤥ॥” 
ᤜᤧᤰᤁᤩᤠᤱ ᤜᤢ᤹ᤛᤠᤶᤒᤠᤜᤠ᤹ ᤂᤢᤏᤧ᤹ᤀᤥ ᤔᤧᤍᤩᤧᤀᤠᤱ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤸᤗᤧ ᤑᤖᤡᤛᤡᤜᤠ᤹ ᤗᤰᤋᤢᤛᤡᤒᤠ ᤏᤡᤱᤘᤠ᤹ ᤁᤧᤄᤥ᤺ᤛᤢᤒᤡ᥅” 
ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤔᤧᤗᤣ᤺ᤳᤋᤢᤴᤒᤠ ᤁᤧᤖᤧᤰ ᤛᤡᤱᤒᤢᤱᤜᤠ᤹ ᤂᤢᤏᤡ᤹ ᤛᤠ᤺ᤵᤐᤥᤏᤢᤀᤣ ᤔᤧᤀᤠ᤺ᤰᤂᤢ᤹ᤖᤥ. 
ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤧᤶᤔᤡᤴᤏᤧ᤹ᤀᤥ॥ ᤂᤧᤱᤜᤠ᤹ᤃ ᤔᤡᤰᤑ᤺ᤶᤒᤠ ᤗᤠᤶᤗᤥ᤺ᤒᤠᤛᤡᤖᤥ॥ ᤔᤡᤰᤑ᤺ᤶᤒᤠᤸᤗᤧ ᤔᤡᤰᤑ᤺ᤶᤒᤧᤴ ᤗᤠᤶᤗᤥᤛᤢᤏᤧ ᤑᤠ᤹ᤃᤪ ᤏᤧᤵᤔᤠᤱ ᤗᤢᤶᤒᤠ᤺ᤳᤋᤥ ᤁᤧᤱᤛᤡ ᤗᤠ᤺ᤳᤇᤡ᤹ᤖᤥ॥” 
ᤐᤋᤪᤢᤛᤖᤧ ᤔᤧᤳᤋᤢ. “ᤁᤴ ᤂᤧᤍᤠ᤹ᤀᤥ ᤁᤧᤔᤧᤳᤋᤢᤛᤡᤒᤠ ᤐᤠ᤺ᤴᤏᤡᤸᤗᤧ ᤁᤢᤒᤣ᤺ᤴ ᤕᤠᤵᤔᤡ ᤀᤠᤈᤧᤰᤋᤧ᤹ᤀᤥ॥” 
ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤸᤗᤛᤠᤱ ᤂᤡᤏᤡ᤹ ᤏᤡᤱᤘᤠ᤹ ᤐᤠ᤺ᤰᤐᤡ᥅ 
ᤔᤢᤖᤠᤀᤥᤗᤠᤶ ᤁᤧᤗᤠ᤺ᤵᤐᤧᤱᤃ ᤛᤠᤵᤐᤥ᤺ᤰᤁᤥ ᤐᤣ᤺ᤰᤁᤠᤱ ᤗᤠ᤺ᤰᤁᤠᤳ ᤗ᤺ᤴᤒᤣ᤺ᤰ ᤑᤠ᤹ᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤡ᥅ 
ᤁᤖ ᤔᤏᤠ ᤔᤢᤖᤠᤀᤥᤗᤠᤶ ᤗᤠ᤺ᤰᤁᤠᤳ ᤁᤧᤗ᤺ᤶᤒᤠ ᤐᤠ᤺ᤴᤏᤡᤱᤃ ᤛᤡᤰᤗᤢᤱᤔᤠᤗᤠᤶ ᤗ᤺ᤴᤗᤥ॥ ᤂᤧᤸᤗᤧᤀᤣ ᤔᤏᤠ᤺ᤱᤃ ᤀᤠᤛᤢᤳᤌᤥ ᤆᤥᤃᤢᤖᤥ. 
ᤌᤣᤀᤠᤱᤓᤧᤸᤗᤧ ᤑᤧᤴ ᤏᤡᤱᤘᤠ᤹ ᤀᤡ᤺ᤵᤔᤠ. ᤔᤏᤠ ᤛᤧᤵᤔᤠ. ᤆᤠᤖᤠᤶᤔᤠ ᤕᤠ᤺ᤶᤒᤰ. ᤕᤠᤶᤒᤥ᤺ᤵᤔᤠ. ᤂᤢ᤺ᤶᤔᤠ. ᤑᤥᤋᤩᤠᤒᤠ ᤋᤥ᤺ᤴᤍᤡ ᤐᤡᤔᤠ. ᤔᤠᤱᤆᤧ᤹ᤕᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ᤒᤥᤗᤠᤶ ᤗ᤺ᤴᤗᤥ॥ 
ᤁᤴ ᤐᤠ᤺ᤴᤜᤠ᤹ᤖᤧᤃ ᤔᤏᤠ᤺ᤴ ᤀᤠᤛᤢᤳᤌᤥ ᤆᤥᤃᤢᤖᤥ॥ ᤁᤖ ᤜᤢᤰ ᤘᤠᤔᤧᤴᤜᤵᤐᤣ ᤆ᤺ᤸᤗᤧ ᤂᤧᤴ ᤀᤠᤛᤢᤳᤌᤥ ᤔᤧᤒᤥ᤺ᤱᤅᤡᤴᤗᤥ॥” 
ᤜᤧᤰᤁᤩᤠᤱ ᤕᤧᤛᤢ᤺ᤴ ᤃᤠᤗᤡᤗᤗᤠᤶ ᤀᤡᤛᤪᤠᤀᤡᤗ ᤗᤠ᤺ᤰᤁᤠᤳᤐᤠ ᤋᤠᤕᤖ ᤏᤢ ᤛᤡᤍᤥᤏ ᤕᤧᤰᤕᤰ ᤂᤡᤖᤡᤒᤠ ᤌᤢᤶᤜᤠ᤹ᤀᤥ ᤐᤣ॥ 
ᤂᤧᤵᤔᤥᤒᤠ ᤁᤏᤠᤏᤡ ᤛᤢᤘᤠᤱᤛ᤻ᤔᤠ ᤔᤧᤴᤇᤢᤔᤠ᤹ᤎᤡᤰ ᤂᤢᤏᤧ᤹ᤀᤥ ᤋᤩᤧᤀᤠᤱ ᤀᤰᤂᤣ ᤔᤧᤳᤋᤢᤖ ᤐᤣᤗᤡ ᤑᤠᤰᤋᤢ. “ᤍᤠᤀᤢᤍᤖᤧ ᤁᤢᤛ᤻ᤛᤠ᤺ ᤀᤠᤍᤠᤱᤒᤣ. ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ᥄ ᤀᤠᤛ᤻ᤛᤠ᤺ ᤆᤢᤰᤔᤧᤴ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤀᤠᤱ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤺ᤳᤋᤢ᤹ᤖᤥ॥” 
ᤁᤖ ᤕᤧᤛᤢᤖᤧ ᤂᤧᤴ ᤌᤣᤀᤠᤱ ᤏᤥᤃᤵ ᤔᤧᤒᤡᤖᤢᤴ॥ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤀᤰᤂᤣ ᤔᤧᤔᤧᤳᤋᤢᤖ ᤂᤢᤏᤧ᤹ᤏᤢ ᤐᤣᤗᤡ ᤔᤧᤓᤠᤰᤋᤢ. “ᤀᤠᤍᤠᤱᤒᤣ. ᤂᤧᤴ ᤐᤠᤱᤄᤧᤍᤣ᤺ᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤧᤳᤗᤧᤱ ᤐᤣᤗᤡ ᤑᤠᤰᤋᤢᤀᤠᤱ ᤀᤠᤏᤡᤃᤧ ᤏᤡᤱᤎᤧᤴᤍᤢᤖᤥ॥” 
ᤜᤧᤰᤁᤣ᤺ᤸᤗᤧ ᤂᤧᤴ ᤔᤧᤳᤋᤢ. “ᤀᤡᤱᤃᤠ᤹ᤃ ᤀᤡᤛᤪᤠᤀᤡᤗᤛ᤻ᤔᤠ ᤁᤧᤔᤠᤒᤠ ᤔᤧᤸᤗᤢᤰᤜᤠ᤹ᤖᤧ ᤗᤠᤃᤡᤖᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤠᤱᤒᤠᤖᤥ॥” 
ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤌᤢᤱᤒᤥᤜᤈ᤹ ᤕᤢᤱᤛᤡᤱᤗ ᤀᤰᤂᤣ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤁᤢᤓᤠ᤹ ᤐᤡᤖᤠᤱᤅᤧ᤹ᤀᤥ॥” 
ᤕᤧᤛᤢᤖᤧ ᤔᤧᤳᤋᤢ. “ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧ ᤂᤢᤏᤡ᤹ ᤂᤖᤧ᤺ᤱᤅᤡᤴ ᤏᤠᤵᤔᤠᤛᤡᤀᤠᤱ ᤁᤥ᤺ᤳᤆᤥᤜᤠ᤹ ᤐᤡᤔᤠᤛᤡ ᤏᤢ᤺ᤒᤠ ᤔᤧ᤺ᤴᤗᤥ॥” 
ᤂᤧᤸᤗᤧ ᤔᤧᤳᤋᤢ. “ᤛᤧᤰᤂᤠᤀᤣᤖᤥ ᤀᤠᤍᤠᤱᤒᤣ. ᤁᤖ ᤁᤥ᤺ᤳᤆᤥᤜᤠ᤹ᤖᤧᤀᤠᤱ ᤂᤢᤏᤡ᤹ ᤍᤠᤱᤒᤠᤸᤗᤧ ᤆᤠᤔᤠᤍᤧᤴᤏᤥᤗᤠᤶ ᤔᤰᤁᤧᤎᤠ᤺ᤒᤠ ᤁᤢᤈᤡᤜᤠ᤹ ᤔᤧᤈᤖᤥ॥” 
ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤏᤥᤃᤵ ᤐᤡᤖᤢ. “ᤂᤧᤏᤧ᤹ᤃ ᤛᤧᤰᤂᤠᤀᤣ ᤕᤶᤒᤠ ᤏᤛᤠ᤺ᤴ ᤁᤧᤃᤵᤔᤠ ᤔᤧᤴᤇᤢᤔᤠ᤹ᤏᤧᤴᤏᤧᤖᤥ᥄ ᤂᤧᤏᤧ᤹ ᤁᤧᤏᤠ᤺ᤰᤋᤢᤒᤧᤴ ᤁᤧᤄᤥ᤺ᤛᤢ᤹ᤖᤥ॥” ᤜᤧᤰᤁᤩᤠᤱ ᤒᤠ ᤂᤧᤴ ᤕᤧᤶᤔᤥ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤛ᤻ᤛᤠ᤺ ᤆᤢᤰᤔᤧᤴ ᤏᤢ᤺ᤖᤧᤖᤥ॥ 
ᤕᤧᤛᤢ᤺ᤴ ᤂᤧᤴ ᤋᤧᤴᤏᤥᤗᤠᤶ ᤃᤠᤗᤡᤗ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤐᤥ᤺ᤰᤂᤧᤖ ᤏᤢ᤺ᤰᤂᤧ ᤐᤣ. ᤜᤧᤰᤁᤩᤠᤱ ᤁᤥ᤺ᤰᤔᤠᤀᤥ ᤌᤥ ᤐᤣᤀᤠᤱ ᤂᤧᤵᤔᤥ ᤕᤢᤱᤛᤡᤱᤗᤥ॥ 
ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤗᤠᤱᤛᤰᤐᤠᤜᤠ᤹. ᤔᤡᤰᤑ᤺ᤶᤒᤠᤜᤠ᤹. ᤗᤠᤱ ᤜᤢᤰ ᤑᤧᤳᤁᤧᤗᤠ᤹ᤒᤠᤜᤠ᤹. ᤂᤢᤏᤡ᤹ ᤐᤠ᤺ᤴ ᤔᤧᤴᤗ᤺ᤶᤔᤏᤠᤒᤠᤜᤠ᤹ ᤏᤢ ᤘᤣ᤹ ᤕᤖᤡᤰ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤔᤧᤍᤠᤖᤢᤛᤡᤀᤠᤱ ᤁᤢᤗᤠᤱᤒᤢᤱᤔᤥ ᤔᤧᤕᤢᤰᤂᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤕᤧᤛᤢᤖᤧ ᤏᤢᤛᤢᤛᤡᤖᤥ॥ 
ᤂᤧᤴ ᤔᤏᤠᤜᤠ᤹ᤖᤧ ᤐᤠ᤺ᤵᤔᤠ ᤔᤧᤴᤇᤢᤰᤔᤏᤠᤒᤠᤜᤠ᤹ ᤔᤧᤒᤠᤖᤧᤒᤠ. ᤗᤠᤱ ᤜᤢᤰ ᤑᤧᤳᤁᤧᤗᤠ᤹ᤒᤠᤜᤠ᤹ ᤔᤧᤏᤢᤖᤧᤒᤠ. ᤗᤠᤱᤛᤰᤐᤠᤜᤠ᤹ ᤗᤠᤱᤔᤧᤄᤣᤃᤧᤒᤠ ᤏᤢ ᤔᤡᤰᤑ᤺ᤶᤒᤠᤜᤠ᤹ᤖᤧ ᤏᤡ᤺ᤔᤠ ᤔᤧᤛᤢᤰᤋᤢᤒᤠ ᤔᤧᤏᤡ᤺ᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤡᤛᤪᤠᤀᤡᤗᤛ᤻ᤔᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤠᤖᤠ ᤔᤧᤓᤥ᤺ᤛᤢᤖᤥ॥ 
ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤁᤴ ᤔᤏᤠᤜᤠ᤹ ᤀᤠᤗᤢᤱᤔᤠ᤹ ᤔᤧᤍᤢᤰᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤛᤢᤶᤕᤧᤴᤏᤠᤱᤎᤥ ᤀᤡᤱᤃᤠ᤹ᤏᤢᤀᤣ ᤔᤧᤘᤠ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤆᤠᤔᤠ ᤌᤢᤱᤔᤠ ᤌᤣᤀᤠᤱ ᤔᤧᤱᤃᤳᤋᤢᤴᤗᤥ॥ ᤂᤧᤱᤜᤠ᤹ ᤒᤠ ᤜᤧᤰᤁᤣ ᤛᤠᤰᤔᤧᤴᤈᤠ ᤐᤠᤱᤔᤠᤛᤡ ᤀᤠᤏᤡᤱᤘᤠ᤹ ᤜᤥ᤺ᤵᤗᤥ. ᤔᤧ᤺ᤴᤏᤧ ᤑᤠ᤹ᤃᤪ ᤔᤧᤒᤣ᤺ᤰᤗ ᤔᤧᤒᤳᤋᤡᤸᤗᤧᤛᤠ ᤛᤠᤰᤗᤠᤶᤒᤳᤋᤢᤛᤡᤖᤥ॥” 
ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤰᤋᤱᤒᤠ ᤀᤣ᤺ᤰᤛᤠᤍᤧᤴᤏᤥ ᤁᤶᤔᤩᤠᤰ ᤕᤖᤡᤰ ᤔᤏᤠᤜᤠ᤹ ᤆᤠ᤺ᤵᤔᤠᤛᤡᤖᤧ ᤗᤠᤃᤡ ᤂᤖᤧ᤺ᤱᤅᤡᤴ ᤀᤠᤳᤋᤠᤴᤏᤢ ᤂᤥ᤺ᤔᤠ ᤛᤢᤰᤋᤧᤵᤐᤠᤒᤣ᥅” 
ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤠᤰᤂᤧᤶᤔᤩᤠᤰ ᤂᤖᤧ᤺ᤱ ᤁᤧᤃᤳᤋᤢᤶᤒᤣ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤏᤢᤛᤡ ᤂᤖᤧ᤺ᤱ ᤏᤢ ᤆᤢᤈᤢᤰᤛᤠ ᤁᤢᤓᤠ ᤅᤠᤖᤰ ᤁᤳᤋᤢᤶᤒᤧᤖᤥ॥” 
ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤏᤠᤜᤠ᤹ ᤂᤠᤶᤒᤠᤱᤅᤥ ᤕᤢᤱ ᤐᤠᤱᤄᤢᤛᤡ॥ 
ᤂᤧᤴ ᤏᤢᤛᤡ ᤂᤖᤧ᤺ᤱᤅᤡᤴ ᤏᤢ ᤅᤠ᤺ᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤖ ᤂᤧ᤺ᤰᤂᤢ. ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤡᤖᤢᤛᤡᤀᤠᤱ ᤔᤏᤠᤜᤠ᤹ ᤔᤧᤜᤠ᤺ᤳᤋᤢᤛᤡᤖᤥ॥ 
ᤜᤧᤰᤁᤩᤠᤱ ᤂᤧᤴ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤠᤄᤠ ᤔᤧᤈ॥ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤢᤈᤡ ᤁᤧᤏᤶᤒᤧᤴ ᤔᤧᤛᤢᤵᤛᤢᤸᤗᤧ ᤏᤢᤛᤡ ᤏᤀᤡᤔᤠ ᤕᤥᤖᤧᤖᤥ॥ 
ᤂᤧᤴ ᤁᤧᤈᤠᤒᤠᤜᤠ᤹ᤀᤥᤃ ᤔᤧᤴᤇᤢᤔᤠᤜᤠ᤹ ᤏᤢ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤔᤧᤴᤏᤡ᤺ᤳᤇᤡᤱᤅᤣ ᤕᤧᤶᤒᤡᤳᤇᤠ᤹ᤜᤠ᤹ᤖᤰ ᤜᤧᤴᤇᤡᤱ ᤗᤡᤛᤡ (᥊᥆᥆᥆) ᤕᤠᤖᤡᤰ ᤔᤧᤘᤕᤧᤖᤥ॥ 
ᤕᤧᤛᤢᤖᤧ ᤂᤧᤴ ᤔᤏᤠᤜᤠ᤹ ᤐᤠᤱᤄᤢᤍᤣ᤺ᤛᤢᤛᤡ. ᤜᤧᤰᤁᤩᤠᤱ ᤂ᤺ᤱᤒᤣᤀᤥ ᤗᤠ᤺ᤛᤧᤀᤠᤱ ᤔᤃᤠᤍᤠᤴ ᤐᤠᤱᤈᤢᤶ ᤂᤡᤖᤡᤒᤠ ᤋᤧᤴᤏᤥ ᤐᤣᤖᤥ॥