ᤗᤢᤁᤠ.
16.
ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤁᤴ ᤂᤧᤍᤠ᤹ᤀᤡᤴᤏᤠᤱ ᤔᤧᤳᤋᤢᤛᤡ. “ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤏᤠᤎᤡᤰ ᤘᤕᤧ॥ ᤂᤧᤸᤗᤧ ᤁᤢᤜᤡᤶ ᤁᤢᤎᤠ᤺ᤱ ᤀᤥᤔᤧᤵᤔᤠ ᤂᤠᤖᤠ᤺ᤳ ᤁᤧᤕᤢᤱᤒᤠᤎᤡᤰ ᤁᤳᤋᤢ॥ ᤁᤖ ᤜᤠᤖᤠᤀᤣ ᤔᤏᤠᤜᤠ᤹ᤖᤧ ᤂᤧᤸᤗᤧ ᤁᤢᤴᤍᤠᤱᤒᤠᤴ ᤁᤴ ᤂᤠᤖᤠ᤺ᤳ ᤁᤧᤕᤢᤱᤒᤠᤸᤗᤧ ᤁᤧᤕᤠᤱᤛᤠᤁᤢᤴᤎᤣᤜᤠ᤹ ᤐᤡᤷᤒᤣ᤺ᤴ ᤆᤥᤃᤢᤖ ᤐᤳ ᤗ᤹ᤖᤡᤰ ᤆᤧ᤹ᤕᤠ ᤐᤠ᤺ᤴ ᤔᤧᤈᤧᤰᤋᤢ॥ 
ᤜᤧᤰᤁᤩᤠᤱ ᤁᤢᤴᤍᤠᤱᤒᤠᤸᤗᤧ ᤂᤧᤴ ᤂᤠᤖᤠ᤺ᤳ ᤁᤧᤕᤢᤱᤒᤠᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. ‘ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤑᤧᤴ ᤐᤠ᤺ᤴᤜᤠ᤹ ᤂᤧᤵᤛᤢᤱᤗ ᤐᤳᤋᤠᤖᤥ॥ ᤂᤧᤏᤧ᤹ ᤁᤧᤕᤢᤰᤂᤢᤒᤠ ᤂᤠᤖᤠ᤺ᤳᤋᤡᤴ ᤁᤠᤰ ᤀᤥᤛᤣ᤺ᤴᤎᤠᤰᤋᤠᤱᤅᤧ᤹. ᤌᤣᤀᤠᤱᤓᤧᤸᤗᤧ ᤀᤠᤸᤗᤀᤠᤱᤎᤥ ᤂᤧᤏᤧ᤹ ᤂᤠᤖᤠ᤺ᤳ ᤕᤢᤱᤔᤠ ᤕᤠ᤺ᤶᤒᤰᤁᤡᤴ ᤁᤧᤱᤄᤥ᤺ᤛᤢᤴᤗᤥ॥’ 
ᤜᤧᤰᤁᤩᤠᤱ ᤂᤧᤴ ᤂᤠᤖᤠ᤺ᤳ ᤁᤧᤕᤢᤱᤒᤠᤸᤗᤧ ᤁᤢᤏᤡᤱᤘᤠ᤹ᤒᤥ ᤀᤠᤒᤠᤅᤣ ᤀᤰᤂᤣ ᤔᤧᤳᤇᤡᤱ. ‘ᤀᤠᤸᤗ ᤀᤡᤱᤃᤠ᤹ ᤁᤴ ᤂᤠᤖᤠ᤺ᤳ ᤕᤢᤱᤔᤠ ᤕᤠ᤺ᤶᤒᤰᤁᤥᤗᤠᤶ ᤗ᤺ᤳᤋᤠᤍᤣ᤺ᤀᤠᤸᤗᤧ ᤌᤣ ᤆᤥᤃᤢᤱᤒᤠᤒᤣ᥅ ᤀᤡᤱᤃᤠ᤹ ᤕᤠ᤺ᤴᤔ᤺ᤔᤠᤀᤠᤱ ᤔᤧᤛᤢᤰᤁᤠᤴ. ᤆᤠᤏᤠ᤺ᤰᤔᤠ ᤆᤠᤔᤠᤀᤠᤱ ᤏᤢ᤺ᤴᤏᤠ᤹ᤖᤥ॥ 
ᤁᤖ ᤁᤴ ᤂᤠᤖᤠ᤺ᤳ ᤕᤢᤱᤔᤠ ᤕᤠ᤺ᤶᤒᤰᤁᤥᤗᤠᤶ ᤗ᤺ᤳᤋᤠᤸᤗᤧ ᤀᤠᤰᤂᤣᤗ᤹ᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤜᤡᤶᤔᤥ ᤔᤧᤀᤢ᤺ᤳᤋᤠ ᤔᤧᤍᤠ᤺ᤰᤁᤠᤖ ᤑᤠ᤹ᤀᤠᤱ ᤆᤥ᤺ᤰᤔᤠᤛᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤡᤱᤃᤠ᤹ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤠ᤹ᤀᤠ॥’ 
ᤜᤧᤰᤁᤣ᤺ᤸᤗᤧ ᤂᤧᤸᤗᤧ ᤁᤢᤴᤍᤠᤱᤒᤧᤸᤗᤧ ᤁᤢᤛᤡᤱᤏᤠ᤺ᤳ ᤁᤧᤒᤵᤐᤠ ᤔᤏᤠᤜᤠ᤹ ᤌᤡᤰ ᤌᤡᤰ ᤗ᤹ᤖᤡᤰ ᤀᤢ᤺ᤳᤋᤢᤛᤡ. ᤜᤧᤰᤁᤩᤠᤱ ᤌᤡᤰᤛᤡᤃᤣ᤺ᤰᤐᤧᤴ ᤛᤣ᤺ᤴᤍᤥᤛᤢ. ‘ᤂᤧᤏᤧ᤹ ᤀᤠᤰᤂᤧᤶᤔᤩᤠᤰ ᤀᤠᤴᤍᤠᤱᤒᤠᤸᤗᤧ ᤁᤢᤛᤡᤱᤏᤠ᤺ᤳ ᤁᤧᤒᤵᤐᤣ᥅’ 
ᤂᤧᤴ ᤔᤏᤠ᤺ᤸᤗᤧ ‘ᤀᤡᤱᤃᤠ᤹ ᤁᤢᤃᤡᤵ ᤕᤧᤳᤇᤡ (᥎᥆᥆) ᤑᤥᤗᤰ ᤏᤡ᤺ᤱᤃᤣ᤹ ᤐᤳᤋᤠᤖᤥ’ ᤔᤧᤳᤋᤢ॥ ᤂᤧᤴ ᤂᤠᤖᤠ᤺ᤳ ᤁᤧᤕᤢᤱᤒᤠᤸᤗᤧ ᤂᤧᤴ ᤔᤧᤳᤋᤢ. ‘ᤁᤧᤍᤧᤶᤛᤰᤁᤡᤴ ᤁᤳᤏᤠ ᤑᤧᤳᤋᤧ᤹᥄ ᤜᤠᤖᤠ. ᤁᤢᤃᤡᤵ ᤕᤧᤳᤇᤡᤖᤧ ᤁᤢᤗᤧᤰᤘᤠ ᤁᤢᤃᤡᤵ ᤗᤡᤛᤡ (᥊᥆᥆) ᤑᤥᤗᤰ ᤗ᤹ᤖᤡᤰ ᤛᤠᤵᤋᤧ᤹॥’ 
ᤂᤧᤴ ᤂᤠᤖᤠ᤺ᤳ ᤁᤧᤕᤢᤱᤒᤠᤸᤗᤧ ᤘᤣ᤹ᤛ᤻ᤔᤠ ᤔᤏᤠ᤺ᤴ ᤛᤣ᤺ᤴᤍᤥᤛᤢ. ‘ᤂᤧᤏᤧ᤹ ᤀᤠᤰᤂᤧᤶᤔᤩᤠᤰ ᤛᤡᤱᤏᤠ᤺ᤳ ᤁᤧᤒᤳ᥅’ ᤂᤧᤸᤗᤧ ᤏᤥᤃᤵ ᤐᤡᤖᤢ. ‘ᤀᤡᤱᤃᤠ᤹ᤃ ᤑᤥᤗᤰ ᤜᤧᤴᤇᤡᤱ (᥇᥆᥆᥆) ᤛᤡ᤺ ᤛᤡᤱᤏᤠ᤺ᤳ ᤜᤢᤱᤔᤠ ᤁᤳᤋᤢᤱᤗᤥ॥’ ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤸᤗᤧ ᤂᤧᤴ ᤔᤧᤳᤋᤢ. ‘ᤂᤧᤏᤧ᤹ ᤁᤧᤍᤧᤶᤛᤰᤁᤥ ᤜᤠᤖᤠ ᤜᤧᤴᤇᤡᤱᤎᤡᤰᤗᤧ ᤁᤢᤗᤧᤰᤘᤠ ᤁᤢᤃᤡᤵ ᤕᤧᤳᤇᤡ (᥎᥆᥆) ᤛᤠᤵᤋᤧ᤹॥’ 
ᤜᤧᤰᤁᤣᤗ᤹ᤖᤡᤰ ᤁᤢᤴᤍᤠᤱᤒᤠᤸᤗᤧ ᤂᤧᤴ ᤋᤠᤵᤑᤧ᤺ᤶᤒᤠ ᤂᤠᤖᤠ᤺ᤳ ᤁᤧᤕᤢᤱᤒᤠᤸᤗᤧ ᤀᤡᤛᤫᤠᤒᤠ ᤁᤢᤕᤠ᤺ᤶᤒᤰᤁᤡᤴ ᤏᤡ᤺ᤛᤢᤀᤠᤱ ᤁᤢᤏᤠᤖᤠ ᤑᤥ᤺ᤛᤢᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤸᤗᤧ ᤁᤢᤛ᤻ᤛᤠ᤺ᤜᤠ᤹ᤏᤢ᤺ᤸᤗᤧ ᤆᤠ᤺ᤵᤐᤠ ᤔᤧᤈᤥ᤺ᤰᤗᤥ॥ 
ᤜᤧᤰᤁᤩᤠᤱ ᤂᤡᤏᤡ᤹ ᤔᤧᤳᤏᤡᤱᤗᤥ. ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤠᤱᤛᤠᤁᤢᤴᤎᤣᤖᤧ ᤋᤣ᤺ᤱᤈᤢᤶ ᤆᤥᤃᤧᤶᤛᤡᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤁᤴ ᤕᤠᤱᤛᤠᤁᤢᤴᤎᤣ᤺ᤴ ᤔᤠ᤺ᤳᤋᤡᤸᤗᤧ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤔᤧᤴᤏᤢᤵᤔᤏᤠᤒᤠ ᤜᤡᤶᤔᤥ ᤗᤠᤶᤍᤠ᤺ᤰᤔᤠ ᤁᤧᤶᤒᤡᤖᤡ᤹ᤖᤥ॥ 
ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠ᤺ᤴ ᤆᤢᤰᤛᤠ ᤐᤠ᤺ᤴᤏᤥ ᤗᤰᤐᤧᤴᤛᤠᤒᤠ ᤆᤥ᤺ᤰ. ᤂᤧᤸᤗᤧ ᤕᤶᤒᤠ ᤐᤠ᤺ᤴᤏᤥ ᤗᤰᤐᤧᤴ ᤂᤥ᤺ᤛᤢ᤹ᤖᤥ॥ ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠ᤺ᤴ ᤆᤢᤰᤛᤠ ᤐᤠ᤺ᤴᤏᤥ ᤏᤛᤠ᤺ᤴᤛᤠᤒᤠ ᤔᤧᤈᤥ᤺ᤰᤏᤧᤴ. ᤂᤧᤴ ᤕᤶᤒᤠ ᤐᤠ᤺ᤴᤏᤥᤀᤠᤱ ᤏᤛᤠ᤺ᤴᤛᤠᤒᤠ ᤔᤧᤒᤥ᤺ᤱᤏᤧᤸᤗᤥ॥ 
ᤀᤠᤳᤋᤡᤴ ᤔᤏᤠ᤺ᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤠᤱᤛᤠᤁᤢᤴᤎᤣᤀᤥᤀᤣ ᤏᤛᤠ᤺ᤴᤛᤠᤒᤠ ᤔᤧᤒᤥ᤺ᤱᤏᤧᤴ. ᤂᤧᤴ ᤜᤠ᤺ᤳᤗᤧ ᤛᤧᤰᤂᤠᤛ᤻ᤔᤠ ᤕᤠᤱᤛᤠᤁᤢᤴᤎᤣᤀᤥ ᤗᤰᤐᤧᤴ ᤐᤡᤖᤢᤒᤣ᥅ 
ᤂᤡᤏᤡ᤹ ᤘᤣ᤹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤆᤡᤃ᤺ᤰᤘᤠᤀᤥᤀᤣ ᤏᤛᤠ᤺ᤴᤛᤠᤒᤠ ᤁᤧᤶᤒᤥ᤺ᤰᤂᤡᤴᤏᤧ ᤑᤠ᤹ᤃᤪ. ᤂᤡᤏᤡ᤹ ᤀᤠᤒᤠᤅᤣᤀᤡᤴᤏᤠᤱ ᤜᤠ᤺ᤳᤗᤧ ᤁᤧᤒᤡᤖᤡ᤹ᤒᤣ᥅ 
ᤀᤠᤳᤋᤡᤴ ᤛᤣᤘᤠᤖᤥᤒᤠᤸᤗᤧᤀᤠᤱ ᤏᤧᤵᤑᤢ ᤍᤠᤱᤒᤠᤜᤠ᤹ᤖᤧᤴ ᤌᤡᤰᤗᤧᤱᤔᤥ ᤛᤣᤘᤠ ᤆᤥ᤺ᤰᤔᤠ ᤔᤧᤛᤢᤰᤋᤢᤴᤗᤥ॥ ᤂᤧᤸᤗᤧ ᤌᤡᤰᤁᤡᤴ ᤆᤡ᤺ᤳᤋᤢᤀᤠᤱ ᤘᤣ᤹ᤛ᤻ᤔᤠᤴ ᤔᤡ᤺ᤶᤈᤡ ᤔᤧᤳᤋᤢ᤹ ᤀᤡᤃᤪ ᤌᤡᤰᤁᤡᤴ ᤀᤡᤱᤎᤠ᤺ᤱ ᤐᤡᤖᤢᤀᤠᤱ ᤘᤣ᤹ᤛ᤻ᤔᤠᤴ ᤜᤡᤏᤠ᤺ᤶ ᤔᤧᤳᤋᤢᤖᤥ॥ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤕᤠᤱᤛᤠᤁᤢᤴᤎᤣ᤺ᤴ ᤌᤡᤰᤗᤧᤱᤔᤥ ᤛᤣᤘᤠ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤶᤔᤡᤸᤗᤥ॥” 
ᤂᤧᤵᤔᤥ ᤑᤖᤡᤛᤡᤜᤠ᤹ᤖᤧ ᤕᤧᤛᤢᤖᤧ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤁᤡᤏᤠ᤺ᤴᤍᤡ ᤔᤧᤒᤡᤖᤢ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤂᤡ᤺ᤶᤕᤰᤐᤠ ᤔᤧᤘᤕᤧ॥ 
ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ᤃ ᤛᤍᤠᤍᤡᤱ ᤗᤠ᤺ᤰᤁᤠᤳᤗᤰ ᤏᤢ᤺ᤒᤠ ᤌᤠ᤺ᤶᤛᤡᤱᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤛᤡᤰᤗᤢᤱᤔᤥᤒᤠ ᤐᤠ᤺ᤴᤏᤡᤴ ᤏᤡ᤺ᤛᤢ᤹ᤖᤥ॥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤔᤧᤴᤇᤠᤶᤃᤧᤴ ᤕᤠᤵᤔᤡᤖᤧ ᤂᤢᤏᤡ᤹ ᤏᤡ᤺ᤔᤠᤀᤥ ᤕᤶᤗᤠᤒᤠ ᤆᤥ᤺ᤰ. ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤛᤡᤰᤁᤧᤗᤧ᤺ᤱᤒᤠ ᤆᤥ᤺ᤰᤗᤥ॥ 
ᤜᤧᤰᤁᤩᤠᤱ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤕᤧᤶ ᤌᤠᤖᤡᤰ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤀᤡᤱᤈᤠ᤺ᤱᤜᤠ᤹ ᤀᤡᤱᤓᤴ ᤐᤥ᤺ᤰᤂᤧ. ᤁᤖ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧᤴ ᤛᤢᤏᤠᤀᤡᤱᤅᤡᤴ ᤛᤧ᤺ᤖᤧᤀᤠᤱᤎᤥ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤛᤠᤰᤁᤧᤸᤗᤧᤰ ᤗᤠ᤺ᤵᤔᤠ ᤔᤧᤃᤥ᤺ᤳᤗᤥ॥ 
ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤋᤠᤱᤛᤠᤰᤐᤧᤴ ᤗᤧᤰᤔᤠ ᤐᤣ᤺ᤰᤔᤠ ᤀᤢᤛᤢᤖᤢ ᤆᤥ᤺ᤰᤐᤡᤗᤠ. ᤁᤖ ᤛᤠᤶᤕᤥᤌᤡᤶ ᤛᤠᤵᤗᤠᤀᤥ ᤁᤧᤒᤵᤐᤠ ᤆᤢᤰᤛᤠ ᤁᤢᤛᤠᤵᤌᤡᤰᤁᤠᤱ ᤔᤧᤔᤠ᤺ᤏᤧᤴᤗᤥ॥ 
ᤜᤠ᤺ᤳᤗᤧ ᤁᤢᤔᤣ᤺ᤳᤋᤡᤴ ᤏᤠ᤹ᤖᤢᤀᤠᤱ ᤘᤣ᤹ ᤔᤧᤴᤇᤢᤔᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤆᤥᤃᤢ᤹. ᤂᤧᤸᤗᤧ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥ ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤕᤧᤶᤒᤠ᤺ᤸᤗᤧ ᤏᤠ᤹ᤖᤢᤔᤠ ᤔᤧᤴᤇᤢᤔᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤆᤥᤃᤢ᤹. ᤂᤧᤸᤗᤧᤀᤠᤱ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥” 
ᤕᤧᤛᤢᤖᤧ ᤕᤠᤶᤔᤥ ᤔᤧᤳᤋᤢᤛᤡ. “ᤀᤢᤴᤇᤣ᤺ᤴ ᤌᤡᤰᤗᤧᤱ ᤕᤠᤱᤛᤠᤁᤢᤴᤎᤣᤛᤠᤒᤠᤎᤡᤰ ᤘᤕᤧ॥ ᤂᤧᤸᤗᤧ ᤐᤖᤠᤴᤗᤠ ᤋᤣ᤺ᤳ ᤆᤠᤰᤂᤢᤖ ᤌᤡᤰᤕᤠ᤺ᤴᤎᤰ ᤆᤠᤔᤢᤰ ᤌᤡᤔᤢᤰ ᤆᤖ ᤘᤕᤧ॥ 
ᤔᤏᤠᤜᤠ᤹ᤖᤧ ᤗᤠᤈᤖᤛ ᤔᤧᤵᤔᤏᤠᤒᤠ ᤕᤠᤱᤄᤣ᤺ᤰ ᤀᤡᤛᤣ᤺ᤱᤒᤠ ᤕᤠᤱᤃᤧᤛᤠ᤹ᤒᤠ ᤔᤏᤠ᤺ᤴ ᤔᤧᤍᤠᤖᤢᤀᤠᤱ ᤁᤢᤗᤠᤶᤎᤣ᤺ᤵᤐᤥ ᤔᤧᤕᤢᤰᤂᤢᤖᤥ॥ 
ᤂᤧᤸᤗᤧ ᤆᤠᤔᤠᤍᤧᤴᤏᤥᤗᤠᤶ ᤔᤰᤁᤧᤎᤠ᤺ᤒᤠ ᤁᤢᤈᤡᤜᤠ᤹ ᤆᤠᤔᤠᤀᤠᤱ ᤂᤠ᤺ᤳᤇᤡᤱᤔᤠ ᤏᤡᤱᤛᤠᤱ ᤆᤥᤃᤢᤀᤠᤱ ᤘᤕᤧᤖᤥ॥ ᤁᤥ᤺ᤳᤆᤥᤜᤠ᤹ᤖᤧᤀᤠᤱ ᤁᤢᤕᤠᤱᤄᤣ᤺ᤰᤁᤡᤴ ᤔᤧᤗᤠᤃᤢ ᤔᤧᤒᤡᤖᤢᤖᤥ॥ 
ᤂᤧᤴ ᤕᤠᤱᤁᤧᤛᤠ᤹ᤒᤠ ᤗᤠᤈᤖᤛᤧᤴ ᤛᤩᤧᤀᤠᤱ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤒᤰᤂᤢ ᤔᤧᤍᤣ᤹ᤖᤢᤀᤠᤱ ᤀᤒᤪᤠᤜᤠᤔᤖᤧ ᤁᤢᤒᤣᤛᤠᤱ ᤔᤧᤕᤢᤰᤂᤢ॥ ᤂᤧᤴ ᤕᤠᤱᤛᤠᤁᤢᤴᤎᤣᤛᤠᤒᤧᤴᤏᤠᤱ ᤛᤩᤧᤀᤠᤱ ᤔᤧᤗᤢᤵᤋᤢ. 
ᤜᤧᤰᤁᤩᤠᤱ ᤂᤧᤴ ᤂᤧᤔᤠᤕᤱᤛᤱᤅᤥ ᤐᤣᤀᤠᤱ ᤛᤠ᤹ᤖᤡᤰ ᤋᤢᤰᤂᤣ ᤆᤩᤧ॥ ᤂᤧᤴ ᤔᤠ᤺ᤱᤄᤠ ᤀᤥᤔᤕᤧᤸᤗᤧ ᤗᤠᤈᤖᤛᤧᤴ ᤀᤒᤪᤠᤜᤠᤔᤖᤧ ᤁᤢᤓᤰᤋᤢᤱᤅᤥ ᤕᤢᤅᤧᤒᤠ ᤏᤡ᤺ᤛᤢᤖᤥ॥ 
ᤜᤧᤰᤁᤩᤠᤱ ᤂᤧᤴ ᤕᤠᤱᤛᤠᤁᤢᤴᤎᤣᤛᤠᤒᤠᤸᤗᤧ ᤀ᤺ᤰᤋᤧᤖ ᤔᤧᤳᤋᤢ. ‘ᤐᤠᤏᤢᤍᤡᤱ ᤀᤠᤶᤒᤣ. ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤠᤱ ᤗᤠᤈᤖᤛᤧᤴ ᤁ᤹ᤕᤥ ᤐᤠᤱᤄᤧ ᤕᤢ᤺ᤛᤧ᤹ᤀᤥ॥ ᤁᤢᤜᤢᤰᤆᤥ᤺ᤴ ᤆᤫᤠ᤺ᤳᤋᤥ ᤏᤡ᤺ᤵᤛᤢᤀᤠᤱ ᤀᤠᤸᤛᤥ᤺ᤵᤐᤠᤸᤗᤧ ᤁᤢᤛᤶᤔᤥ ᤌᤠ᤺ᤛᤢ ᤐᤡᤀᤠᤏᤡᤖᤥ. ᤌᤣᤀᤠᤱᤓᤧᤸᤗᤧ ᤁᤴ ᤔᤡᤖᤠ᤺ᤰᤁᤥ ᤀᤡᤱᤃᤠ᤹ ᤛᤠ᤹ᤖᤡᤰ ᤋᤢᤰᤂᤣ ᤆᤠᤀᤠᤖ ᤕᤠ᤺ᤰᤁᤠᤖᤥ॥’ 
ᤁᤖ ᤀᤒᤪᤠᤜᤠᤶᤔᤡᤸᤗᤧ ᤂᤢᤏᤧ᤹ ᤔᤧᤳᤋᤢ. ‘ᤀᤠᤛ᤻ᤛᤠ᤺ᤀᤣ. ᤏᤡᤱᤘᤠ᤹ ᤀᤡ᤺ᤳᤋᤧ ᤛᤠ᤹ᤖᤧ. ᤂᤧᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤕᤧᤸᤗᤧ ᤛᤢᤰᤂᤣᤘᤠᤀᤥ ᤁᤧᤘᤕᤧ. ᤜᤧᤰᤁᤩᤠᤱ ᤁᤴ ᤗᤠᤈᤖᤛᤧᤴ ᤋᤢᤰᤂᤣᤘᤠᤀᤥᤀᤣ ᤘᤕᤧ. ᤁᤖ ᤀᤠᤸᤗᤥ ᤂᤢᤏᤧ᤹ ᤛᤢᤰᤂᤣᤘᤠᤀᤥ ᤘᤠ᤹. ᤂᤧᤏᤧ᤹ ᤋᤢᤰᤂᤣ ᤁᤧᤈᤖ ᤁᤧᤕᤠᤰᤗᤥ॥ 
ᤂᤧᤴᤏᤢ᤺ᤸᤗᤧᤀᤠᤱ ᤂᤡᤏᤡ᤹ ᤁᤧᤘᤕᤡᤒᤠᤍᤧᤴᤏᤥ ᤀᤠᤏᤡᤃᤧ ᤕᤢ᤺ᤔᤠ ᤔᤧᤛᤢᤰᤋᤢᤶᤒᤠᤴ. ᤜᤧᤰᤁᤩᤠᤱ ᤂᤡᤏᤡ᤹ᤀᤠᤱ ᤀᤠᤏᤡᤃᤧ ᤘᤕᤡᤃᤧᤒᤠᤍᤧᤴᤏᤥ ᤌᤠᤱᤔᤠ ᤁᤧᤴᤇᤢᤰᤋᤢᤶᤔᤡᤴᤗ ᤑᤠ᤹ᤀᤠᤱ ᤀᤠᤏᤡ᤹ ᤗᤢᤶᤔᤥ ᤁᤢᤍᤪᤥ᤺ᤶ ᤔᤧ᤺ᤴᤏᤣᤒᤠ ᤗᤢᤶᤒᤠ᤺ᤳ ᤏᤧᤖᤥ॥’ 
ᤜᤧᤰᤁᤣ᤺ᤸᤗᤧ ᤂᤧᤸᤗᤧ ᤐᤠ᤺ᤳᤋᤢ. ‘ᤀᤠᤶᤒᤣ. ᤜᤧᤰᤁᤣᤏᤧ ᤑᤠ᤹ᤃᤪ ᤂᤧᤴ ᤀᤠᤶᤒᤠᤖᤧ ᤁᤢᤜᤡᤶᤔᤥ ᤐᤠᤱᤄᤧ ᤀᤠᤒᤡᤖᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧ᤹ᤖᤥ॥ 
ᤂᤧᤵᤔᤥ ᤅᤠᤛᤡ ᤀᤠᤶᤓᤢ᤹ ᤀᤠᤴᤛᤠ᤹ᤛᤡ ᤔᤧᤘᤠ᤹. ᤜᤠᤖᤠ᤹ ᤂᤧᤱᤜᤠ᤹ ᤁᤴ ᤋᤢᤰᤂᤣᤘᤠᤍᤧᤴᤏᤥ ᤔᤧᤴᤍᤠ᤺ᤏᤧᤴᤗ ᤑᤠ᤹ᤀᤠᤱ ᤛᤠᤶᤍᤡᤱ ᤐᤡᤖᤢᤛᤡᤏᤡᤖᤥ॥’ 
ᤁᤖ ᤀᤒᤪᤠᤜᤠᤔᤖᤧ ᤂᤧᤴ ᤏᤥᤃᤵ ᤐᤡᤖᤢ. ‘ᤂᤧᤱᤜᤠ᤹ᤖᤧ ᤔᤥᤛᤠ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧᤴ ᤛᤠᤵᤐᤴᤜᤠ᤹ ᤔᤧᤃᤳᤋᤢ᤹. ᤜᤠᤖᤠ᤹ ᤂᤧᤴ ᤔᤧᤄᤧᤵᤛᤢᤏᤡᤖᤥ॥’ 
ᤁᤖ ᤂᤧᤸᤗᤧ ᤏᤥᤃᤵ ᤐᤡᤖᤢ. ‘ᤜᤧᤰᤁᤣ ᤔᤧ᤺ᤴ ᤀᤠᤶᤒᤣ. ᤁᤢᤓᤠ ᤔᤏᤠᤜᤠ᤹ ᤁᤧᤛᤡ᤺ᤒᤥᤗᤠᤶ ᤁᤢᤜᤡᤱᤘᤧᤳ ᤔᤧᤒᤥ᤺ᤱᤅᤠᤱ ᤔᤧᤒᤣ᤺ᤰᤏᤧ ᤑᤠ᤹ᤃᤪ ᤂᤧᤱᤜᤠ᤹ᤖᤧ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤂᤢᤏᤡ᤹ ᤗᤠᤕᤥᤗᤠᤶ ᤔᤧᤜᤡᤴᤏᤠᤱ ᤔᤧᤜᤡᤱᤗᤥ॥’ 
ᤁᤖ ᤀᤒᤪᤠᤜᤠᤔᤖᤧ ᤂᤧᤴ ᤏᤥᤃᤵ ᤐᤡᤖᤢ. ‘ᤔᤥᤛᤠ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤛᤠᤵᤐᤴᤜᤠ᤹ ᤔᤧᤄᤧᤵᤛᤢᤀᤠᤱ ᤏᤛᤠ᤺ᤴ ᤔᤧᤴᤈᤥᤃᤢᤴᤏᤧ ᤑᤠ᤹ᤃᤪ. ᤁᤢᤓᤠ ᤔᤏᤠᤜᤠ᤹ ᤁᤧᤛᤡ᤺ᤒᤥᤗᤠᤶ ᤁᤢᤜᤡᤱᤘᤧᤳ ᤔᤧᤒᤥ᤺ᤱᤅᤠᤱ ᤔᤧᤒᤣ᤺ᤰᤛᤠᤱ ᤏᤛᤠ᤺ᤴ ᤔᤧᤴᤈᤥᤃᤢᤴᤗᤥ॥’”