ᤗᤢᤁᤠ.
17.
ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤗᤠᤕᤥᤀᤥ ᤁᤧᤎᤠ᤺ᤒᤠ ᤐᤠ᤺ᤴᤜᤠ᤹ ᤋᤠ᤺ᤀᤣᤖᤥ. ᤁᤖ ᤂᤧᤴ ᤐᤠ᤺ᤴᤜᤠ᤹ ᤁᤧᤍᤠ᤺ᤵᤐᤠ ᤔᤏᤠᤜᤠ᤹ᤃ ᤔᤧᤈᤡ᤺ᤳᤋᤧ ᤔᤧᤛᤩᤧᤖᤥ॥ 
ᤁᤴ ᤆᤢᤰᤛᤠ ᤜᤡᤴᤈᤠ᤹ᤎᤡᤰ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤒᤠᤱᤃ ᤁᤢᤏᤡ᤺ᤱᤔᤥ ᤗᤢᤶᤛᤢᤶᤔᤡᤴ ᤑᤥ᤺ᤶᤔᤠᤀᤠᤱ ᤘᤖᤰᤁᤥ ᤗᤠᤵᤑᤢᤔᤠᤸᤗᤧᤀᤣ ᤏᤢ᤺ᤒᤠ ᤐᤥ᤺ᤱᤗᤥ॥ 
ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ᥄ ᤁᤧᤴᤛᤠ᤹ᤖᤧ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢᤏᤧ ᤑᤠ᤹ᤃᤪ ᤂᤧᤴ ᤑᤧ᤺ᤰᤋᤧ᤹. ᤜᤧᤰᤁᤩᤠᤱ ᤁᤢᤗᤠᤕᤥᤗᤠᤶ ᤜᤡᤴᤇᤡᤱᤏᤧ ᤑᤠ᤹ᤃᤪ ᤗᤧᤵᤔᤡ ᤐᤡᤖᤧ᤹ᤀᤥ॥ 
ᤜᤧᤰᤁᤩᤠᤱ ᤂᤢᤏᤧ᤹ ᤌᤡᤰ ᤕᤧᤴᤏᤥ ᤏᤢᤛᤡ ᤗᤧᤱ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢᤀᤠᤱ ᤏᤢᤛᤡᤗᤧᤱᤅᤣ ᤀᤡᤱᤃᤠ᤹ ᤜᤡᤴᤍᤠᤱ ᤑᤠ᤹ᤀᤠᤱ ᤐᤠ᤺ᤳᤋᤢ᤹ᤏᤧ ᤑᤠ᤹ᤃᤪ ᤗᤧᤵᤔᤡ ᤐᤡᤖᤧ᤹ᤀᤥ॥” 
ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤍᤠᤱᤒᤠ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤏᤡᤃᤧ ᤏᤛᤠ᤺ᤴᤏᤡᤴ ᤑᤥ᤺ᤛᤧ ᤀᤠᤒᤡᤖᤧ᤹ᤀᤥ॥” 
ᤜᤧᤰᤁᤣ᤺ᤸᤗᤧ ᤍᤠᤱᤒᤠᤸᤗᤧ ᤔᤧᤳᤋᤢᤛᤡ. “ᤂᤡᤏᤡ᤹ ᤏᤛᤠ᤺ᤴᤏᤡᤴ ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠᤎᤡᤰ ᤕᤠ᤺ᤳᤇᤠᤱ ᤁᤴ ᤂ᤺ᤰᤛᤣ᤹ᤒᤢᤱᤔᤠᤴ ‘ᤜᤠ᤹ᤕᤠᤰ ᤀᤠᤃᤧ᤹ᤀᤠᤱ ᤘᤠᤜᤱᤅᤥ ᤗᤠᤵᤑᤢᤛᤡᤱᤅᤧ᤹’ ᤁᤧᤔᤧᤳᤋᤢᤶᤏᤧ ᤑᤠ᤹ᤃᤪ ᤂᤧᤸᤗᤧ ᤁᤧᤔᤧᤳᤋᤢᤶᤒᤠ ᤁᤢᤀᤡᤛᤡ᤺ᤰ ᤆᤥᤃᤢ᤹ᤖᤥ॥” 
“ᤂᤡᤏᤡ᤹ᤀᤥ ᤜᤠ᤺ᤳᤗᤧ ᤁᤧᤰᤆᤢ ᤁᤧᤎᤥ᤺ᤱᤒᤠ ᤛᤣᤘᤠᤖᤥᤒᤠᤴ ᤀᤡᤃᤪ ᤔᤧᤸᤗᤢᤰ ᤆᤠᤃᤧᤖᤠᤶᤒᤧᤴ ᤕᤠ᤺ᤶᤒᤰᤁᤥᤗᤠᤶ ᤏᤢ᤺ᤱ ᤋᤠ᤺ᤸᤗᤧ ‘ᤜᤠᤖᤠ᤹ ᤑᤧᤖᤧ᤹ᤀᤠᤱ ᤆᤠᤈᤠᤛᤧ ᤕᤢᤱᤛᤡᤱᤅᤧ᤹’” ᤁᤧᤔᤧᤳᤋᤢᤶᤒᤣ᥅ 
ᤂᤧᤸᤗᤧ ᤁᤢᤗᤧᤰᤘᤠ “ᤆᤠᤔᤠ ᤌᤢᤱᤔᤠ ᤕᤠᤖᤡᤵ ᤆᤥᤃᤧ᤹ ᤜᤧᤰᤁᤩᤠᤱ ᤑ᤹ᤀᤡ ᤕᤢᤵᤛᤡᤱᤅᤧ᤹ᤀᤠᤱ ᤀᤡᤱᤃᤠ᤹ ᤆᤠᤔᤠ ᤌᤢᤱᤔᤠ ᤔᤧᤴᤇᤢ᤺ᤳᤋᤣ ᤌᤠᤖᤡᤰ ᤜᤠᤱᤄᤠᤱᤅᤧ᤹ ᤜᤧᤰᤁᤩᤠᤱᤗᤰ ᤂᤧᤏᤧ᤹ ᤆᤧ᤹ ᤁᤧᤶᤔᤧᤳᤋᤢᤶᤔᤡᤶᤒᤡ᥅ 
ᤁᤢᤛᤣᤘᤠᤖᤥᤒᤠᤸᤗᤧ ᤏᤢ᤺ᤖᤡᤰ ᤕᤠ᤺ᤶᤒᤰ ᤆᤥᤃᤢ ᤑᤠ᤹ᤀᤠᤱ ᤁᤢᤴᤍᤠᤱᤒᤠᤸᤗᤧ ᤁᤢᤛᤣᤘᤠᤖᤥᤒᤠᤴ ᤀᤥᤒᤧ ᤏᤢ᤺ᤖᤡᤰ ᤛᤣᤘᤠ ᤁᤧᤔᤧᤳᤋᤠᤱᤗᤥ ᤑᤠ᤹ᤀᤠᤱ ᤔᤧᤳᤋᤢᤒᤡ᥅” 
“ᤂᤡᤏᤡ᤹ᤀᤠᤱ ᤔᤧᤵᤔᤏᤠᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶ ᤁᤧᤛᤢᤖᤢᤶᤏᤧ ᤑᤠ᤹ᤃᤪ ᤀᤰᤂᤣ ᤐᤠ᤺ᤳᤋᤧᤶᤔᤧ᤹. ‘ᤀᤠᤏᤡᤃᤧᤃ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤁᤧᤛᤣᤘᤠᤖᤥᤒᤠᤛᤡᤃᤧᤖᤥ॥ ᤀᤠᤏᤡᤃᤧᤃ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣᤖᤰ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ॥’” 
ᤜᤧᤰᤁᤩᤠᤱ ᤕᤧᤛᤢ᤺ᤴ ᤕᤖᤢᤛᤗᤧᤶᤔᤥ ᤐᤣᤖ ᤐᤳᤇᤧᤸᤗᤧ ᤃᤠᤗᤡᤗ ᤏᤢ ᤛᤠᤔᤖᤡᤕᤠᤖᤧ ᤁᤢᤗᤢᤶᤔᤥ ᤐᤥ᤺ᤰᤂᤧᤖ ᤐᤣ॥ 
ᤜᤧᤰᤁᤩᤠᤱ ᤌᤡᤰ ᤐᤠᤱᤓᤣ᤹ ᤁᤢᤒᤣᤛᤠᤱ ᤁᤧᤖᤧᤸᤗᤧ ᤂᤧᤵᤔᤥ ᤌᤡᤒᤥ᤺ᤱ ᤗᤥᤃᤣ᤹ ᤋᤢᤰᤔᤠᤸᤗᤧ ᤕᤠᤱᤄᤢᤛᤡᤒᤠᤜᤠ᤹ ᤋᤢᤔᤢᤛᤡ॥ ᤂᤧᤱᤜᤠ᤹ ᤔᤠ᤺ᤱᤄᤠ ᤔᤧᤕᤧᤶᤛᤡᤱᤅᤠᤱ 
ᤕᤶᤒᤠ ᤀᤡᤰᤗᤠᤀᤥ ᤔᤧᤀ᤺ᤰᤋᤧ. “ᤍᤠᤱᤒᤠ ᤕᤧᤛᤢᤀᤣ. ᤀᤠᤏᤡᤃᤧ ᤗᤢᤱᤔᤠ᤹ ᤀᤠᤍᤢᤰᤋᤧ᤹ᤀᤠᤱ ᤀᤠᤏᤢ᤺ᤛᤧ᤹ᤀᤥ॥” 
ᤕᤧᤛᤢᤖᤧᤀᤠᤱ ᤂᤧᤱᤜᤠ᤹ ᤀᤥᤔᤧᤳᤋᤢᤛᤡᤖ ᤔᤧᤳᤋᤢᤛᤡ. “ᤐᤣᤃᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤥ ᤀᤥᤛᤣ᤺ᤴᤎᤠᤰᤁᤠᤛᤡᤶᤔᤧ᤹ᤀᤥ॥” ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣᤖ ᤔᤧᤒᤳᤇᤧᤸᤗᤧᤛᤠ ᤗᤥᤃᤣ᤹ ᤋᤢᤰᤔᤥᤗᤠᤶ ᤔᤧᤏᤢ᤺ᤖᤧᤖᤥ॥ 
ᤜᤧᤰᤁᤩᤠᤱ ᤌᤡᤰ ᤁᤧᤍᤢᤰᤐᤠᤸᤗᤧ ᤂᤢᤏᤧ᤹ ᤏᤢ᤺ᤖᤧᤒᤠ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤖ ᤏᤢ᤺ᤰᤂᤧ ᤋᤩᤧᤖᤥ॥ 
ᤂᤧᤴ ᤕᤧᤛᤢᤖᤧ ᤁᤢᤗᤠᤱᤈᤰᤐᤥ ᤛᤠᤶᤒᤥ᤺ᤴ ᤑᤴᤇᤡᤱᤗ ᤏᤥᤃᤧᤴ ᤐᤡᤖᤢᤖᤥ॥ ᤂᤧᤱᤃ ᤛᤠᤔᤖᤡ ᤛᤢᤘᤠᤱᤛ᤻ᤔᤠ ᤘᤕᤧᤖᤥ॥ 
ᤕᤧᤛᤢᤖᤧ ᤐᤠ᤺ᤳᤋᤢ. “ᤁᤴ ᤋᤢᤰᤔᤥᤗᤠᤶ ᤁᤧᤘᤣ᤺ᤵᤐᤠᤜᤠ᤹ᤃ ᤌᤡᤒᤥ᤺ᤱᤏᤧ (᥇᥆) ᤔᤧᤘᤕᤧ. ᤁᤖ ᤘᤣ᤹ ᤑᤠᤱᤛᤡᤜᤠ᤹ (᥏) ᤀᤠᤳᤋᤠᤴ ᤔᤧᤒᤣᤒᤣ᥅ 
ᤀᤠᤰᤂᤣᤀᤠᤱ ᤁᤴ ᤗᤳᤇᤠ ᤌᤡᤶᤔᤧᤴᤍᤱ ᤔᤏᤠ᤺ᤴᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤔᤡᤍᤡᤱ ᤐᤡᤛᤧ ᤏᤢ᤺ᤰᤂᤧ ᤋᤩᤧᤒᤣ᥅” 
ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤐᤥᤃᤧ᤹ᤀᤠᤱ ᤐᤣᤃᤧ᤹ᤀᤥ॥ ᤁᤧᤏᤛᤠ᤺ᤴᤏᤡᤸᤗᤧ ᤂᤧᤏᤧ᤹ ᤁᤧᤏᤢ᤺ᤛᤧᤖᤥ॥” 
ᤌᤡᤰ ᤕᤧᤴ ᤑᤖᤡᤛᤡᤜᤠ᤹ᤖᤧ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤀᤠᤵᤑᤠᤸᤗᤧ ᤋᤠ᤺ᤒᤣ᥅” ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤏᤡ᤺ᤔᤏᤠᤒᤠ ᤔᤡᤰᤛᤣ᤺ᤴᤏᤢ ᤔᤧᤍᤠᤏᤧᤴ॥ 
ᤜᤠ᤺ᤳᤗᤧᤀᤠᤱ ‘ᤂᤧᤴ ᤂᤧᤳᤏᤠ ᤘᤠ᤹. ᤁᤳᤏᤠ ᤘᤠ᤹’ ᤑᤠ᤹ᤀᤠᤱ ᤐᤠ᤺ᤵᤔᤠ ᤔᤧᤛᤢᤰᤋᤢᤴ॥ ᤀᤥᤔᤧᤳᤋᤧᤶᤔᤧ᤹. ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤱᤃ ᤂᤡᤏᤡ᤹ ᤗᤢᤶᤔᤥᤀᤣ ᤘᤠ᤹ᤖᤥ॥” 
ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤸᤗ ᤀᤰᤋᤱᤒᤠ ᤕᤧᤶᤔᤡᤴ ᤋᤠ᤺ᤖ ᤐᤳᤗᤥ. ᤂᤧᤴ ᤕᤧᤶᤔᤥᤃ ᤔᤧᤴᤇᤠᤶᤛᤠ᤺ᤴ ᤁᤢᤕᤧᤴᤏᤥ ᤜᤧᤰᤁᤣᤀᤣ ᤂᤡᤏᤡ᤹ ᤀᤥᤔᤧᤵᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶ. ᤁᤖ ᤁᤧᤱᤄᤥ᤺ᤛᤢᤶᤔᤡᤴᤗᤥ॥ 
ᤔᤏᤠᤜᤠ᤹ᤖᤧ ᤂᤢᤏᤧ᤹ ᤂᤧᤳᤏᤠ ᤘᤠ᤹. ᤂᤢᤏᤧ᤹ ᤁᤳᤏᤠ ᤘᤠ᤹ ᤗ᤹ᤖᤡᤰ ᤁᤧᤶᤔᤧᤳᤋᤡᤸᤗᤧ ᤂᤢᤏᤧ᤹ ᤁᤢᤀᤥᤔᤧᤳᤇᤧ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ॥ 
ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤧᤶᤔᤡᤱᤃ ᤛᤠ᤺ᤶᤓᤣ ᤗᤧᤰᤁᤡᤸᤗᤧ ᤋᤠᤱᤛᤠᤰᤐᤠᤸᤗᤧ ᤌᤡᤰ ᤁᤢᤕᤠᤀᤥᤏᤢ ᤘᤣ᤹ᤛ᤻ᤔᤠ ᤁᤢᤕᤠᤀᤥ ᤌᤠᤖᤡᤰ ᤌᤥ᤹ᤖᤢᤒᤠ ᤁᤢᤀᤡᤛᤡ᤺ᤰ ᤁᤧᤖᤧᤰᤗᤧ ᤔᤧᤏᤡ᤺ᤛᤢ᤹ᤖᤥ॥ 
ᤁᤖ ᤁᤠᤰᤏᤢ ᤋᤃᤡ ᤔᤧᤴᤇᤠᤶᤛᤠ᤺ᤴ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤹᤺. ᤜᤧᤰᤁᤩᤠᤱ ᤁᤴ ᤕᤧᤶᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤏᤠ᤹ᤖᤢᤖᤥ॥ 
ᤜᤧᤰᤁᤩᤠᤱ ᤔᤧᤴᤇᤠᤶᤛᤠ᤺ᤴ ᤏᤢ᤺ᤱ ᤕᤢ᤺ᤸᤗᤧ ᤏᤢᤜᤠᤖᤧ ᤁᤢᤕᤧᤶ ᤜᤧᤰᤁᤣᤀᤣ ᤐᤥ᤺ᤱᤗᤥ॥ 
ᤏᤢᤜᤠ᤺ᤴ ᤘᤠᤗᤠᤎᤠᤀᤥ ᤗᤠ᤺ᤛᤧᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤶᤒᤠ ᤘᤠᤍᤥ᤺ᤰᤔᤠ ᤌᤠᤅᤧᤀᤠᤱ ᤁᤠᤰ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ ᤔᤧᤏᤡ᤺ᤒᤧ ᤔᤧᤛᤩᤧ. ᤁᤖ ᤂᤢᤏᤧ᤹ ᤘᤠᤗᤠᤎᤠᤀᤥ ᤗᤠ᤺ᤛᤧᤒᤠ ᤕᤧᤴ ᤌᤠᤖᤡᤰ ᤔᤏᤠᤜᤠ᤹ ᤔᤧᤈᤖ ᤔᤧᤎᤢᤅᤢᤖ ᤜᤧᤰᤁᤩᤠᤱ ᤔᤣ᤺ᤰᤂᤡᤶ ᤔᤧᤈᤥᤃᤢᤖ ᤔᤧᤘᤕᤧ॥ 
ᤜᤧᤰᤁᤩᤠᤱ ᤗᤢᤋᤧᤸᤗᤧ ᤁᤢᤕᤧᤶᤔᤥᤀᤠᤱ ᤜᤧᤰᤁᤣᤀᤣ ᤐᤥ᤺ᤰᤂᤧ॥ ᤔᤏᤠᤜᤠ᤹ᤖᤧ ᤔᤧᤈᤖ ᤔᤧᤎᤢᤅᤢᤖ ᤔᤧᤘᤕᤧ. ᤂᤧᤱᤜᤠ᤹ ᤆᤡᤃ᤺ᤰᤘᤠ ᤛᤱ­-ᤀᤡᤱᤏᤢ. ᤀᤡᤰ ᤔ᤺ᤏᤢ. ᤜᤡᤶᤎᤠ᤺ᤱ ᤆᤥ᤺ᤰᤏᤢ ᤔᤧᤘᤕᤧᤖᤥ॥ 
ᤁᤖ ᤗᤢᤋᤖᤧ ᤛᤍᤥᤔ ᤕᤧᤰᤕᤰᤁᤡᤴ ᤗᤧᤖᤢᤀᤠᤱ ᤐᤣ᤺ᤸᤗᤧ ᤋᤠᤱᤛᤠᤰᤐᤥᤗᤠᤶ ᤔᤡᤖᤠ᤺ᤰ ᤏᤢ ᤌᤠᤒᤢ᤺ᤴ ᤌᤩᤧᤀᤠᤱ ᤁᤠᤰ ᤔᤏᤠᤜᤠ᤹ ᤔᤧᤰᤂᤢᤛᤡᤖᤥ॥ 
ᤜᤧᤰᤁᤣᤗ᤹ᤖᤡᤰᤁᤣ ᤔᤏᤠᤜᤠ᤹ ᤕᤠᤖᤡᤵ ᤔᤧᤒᤥ᤺ᤱᤅᤣ ᤔᤧᤘᤠ᤹ᤀᤡᤸᤗᤧ ᤔᤧᤴᤇᤠᤶᤛᤠ᤺ᤴ ᤀᤥᤛᤣ᤺ᤴᤍᤠᤱ ᤐᤥ᤺ᤱᤗᤥ॥ 
ᤂᤧᤴ ᤕᤧᤶᤔᤥ ᤜᤡᤶ ᤛᤶᤍᤠᤱ ᤁᤧᤘᤠ᤹ᤒᤠ ᤔᤏᤠ᤺ᤴ ᤆᤡᤃ᤺ᤰᤘᤠ ᤗᤠ᤺ᤛᤧ ᤜᤡᤶ ᤛᤡᤃᤠᤱ ᤔᤧᤗᤠ᤺ᤳᤏᤧᤴᤗ. ᤜᤧᤰᤁᤩᤠᤱ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤁᤧᤘᤠ᤹ᤒᤠ ᤔᤏᤠ᤺ᤴ ᤆᤡᤃ᤺ᤰᤘᤠ ᤗᤠ᤺ᤛᤧ ᤜᤡᤶᤔᤥ ᤔᤧᤏᤢ᤺ᤱᤏᤧᤴ ᤔᤧᤒᤣ᤺ᤰᤏᤧᤴᤗᤖᤥ॥ 
ᤗᤢᤋᤖᤧ ᤁᤢᤔᤣ᤺ᤳᤋᤡᤴ ᤕᤢᤶ ᤛᤡᤳᤗᤠᤱ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ᥄ 
ᤜᤠ᤺ᤳᤗᤧ ᤁᤢᤜᤡᤱᤔᤴᤏᤡᤴ ᤛᤧ᤺ᤵᤋᤢᤱ ᤗ᤹. ᤂᤧᤸᤗᤧ ᤂᤧᤴᤏᤠᤱ ᤔᤠᤛᤢ᤹ᤖᤥ. ᤁᤖ ᤜᤠ᤺ᤳᤗᤧ ᤁᤢᤜᤡᤱᤔᤴᤏᤡᤴ ᤔᤠᤛᤢ᤹. ᤂᤧᤸᤗᤧ ᤛᤧ᤺ᤵᤋᤢ᤹ᤖᤥ॥ 
ᤂᤧᤴ ᤛᤧᤴᤍᤡᤰ ᤏᤧᤵᤑᤢ ᤔᤏᤠᤜᤠ᤹ ᤛᤥᤖᤡᤰ ᤏᤧᤛᤡ᤹. ᤌᤡᤰᤁᤡᤴ ᤋᤣ᤹. ᤘᤣ᤹ᤛ᤻ᤔᤠᤴ ᤏᤧ ᤗᤠ᤺ᤳᤗᤥ॥ 
ᤜᤧᤰᤁᤩᤠᤱ ᤏᤧᤵᤑᤢ ᤔᤧᤴᤇᤢᤔᤠᤜᤠ᤹ ᤗᤢᤱᤛᤢᤶᤔᤥ ᤕᤠ᤹ᤕᤢ᤺ᤳᤏᤢ ᤕᤢᤱᤛᤡᤸᤗᤧ ᤌᤡᤰᤁᤡᤴ ᤋᤣ᤹. ᤘᤣ᤹ᤛ᤻ᤔᤠᤴ ᤕᤢᤱ ᤗᤠ᤺ᤳᤗᤥ॥ 
((ᤏᤧᤵᤑᤢ ᤔᤏᤠᤜᤠ᤹ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤆᤥ᤺ᤰᤛᤡᤖ ᤕᤠᤰᤛᤡ᤹. ᤌᤡᤰᤁᤡᤴ ᤋᤣ᤹. ᤘᤣ᤹ᤛ᤻ᤔᤠᤴ ᤘᤠ᤹ ᤗᤠ᤺ᤳᤗᤥ॥))” 
ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤁᤴ ᤀᤠᤳᤋᤥ ᤐᤥ᤺ᤱᤒᤠᤒᤣ᥅” ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤡᤍᤠᤒᤠᤜᤠ᤹ ᤔᤧᤈᤢᤶᤔᤡᤸᤗᤧ ᤂᤧᤵᤔᤥ ᤛᤡᤏᤢ᤺ᤴ ᤏᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤵᤔᤏᤠᤒᤠ ᤜᤧᤰᤁᤣ. ᤁᤴ ᤔᤡᤰᤛᤣ᤺ᤴᤜᤠ᤹ ᤐᤥ᤺ᤱᤅᤡᤸᤗᤧ ᤁᤢᤏᤢᤵᤔᤠ ᤕᤧᤶᤔᤡᤴ ᤏᤡ᤺ᤳᤋᤠᤱ ᤘᤠ᤹ ᤑᤠ᤹ᤀᤠᤱ ᤁᤧᤏᤡ᤺ᤛᤢᤶᤗᤥ॥”