ᤗᤢᤁᤠ. 21. ᤕᤧᤛᤢᤖᤧ ᤔᤠᤱᤜᤡᤶᤔᤥ ᤜᤢᤰᤛᤥᤕᤠᤱ ᤋᤥ᤺ᤶᤔᤠᤍᤧᤴᤏᤥ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤛᤥᤕᤠᤱᤅᤡᤴ ᤔᤧᤃᤣ᤺ᤳᤋᤢᤖ ᤔᤧᤒᤳᤇᤧᤒᤠᤴ ᤀᤥᤔᤧᤳᤋᤢᤛᤡᤖ ᤕᤢᤅᤧ॥ ᤂᤧᤵᤔᤥ ᤗᤳᤇᤠ ᤕᤠᤱᤃᤧᤛᤠ᤹ᤔᤠ ᤔᤣᤔᤣᤍᤢᤔᤠᤎᤡᤰᤗᤧ ᤕᤠᤱ ᤏᤧᤳᤇᤡ ᤁᤣ᤺ᤳᤋᤢᤒᤠ ᤏᤡ᤺ᤛᤢᤀᤠᤱ ᤐᤠ᤺ᤳᤋᤢ. “ᤛᤧᤰᤂᤠᤀᤣ ᤁᤴ ᤕᤠᤱᤃᤧᤛᤠ᤹ᤔᤠ ᤔᤣᤔᤣᤍᤢᤔᤠᤸᤗᤧ ᤘᤣ᤹ᤜᤠ᤹ᤏᤢ᤺ᤸᤗᤧ ᤕᤖᤡᤰ ᤜᤢᤰᤛᤥᤕᤠᤱ ᤁᤣ᤺ᤳᤋᤢᤀᤠᤱ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤁᤴ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ᤖᤧᤃ ᤂᤢᤏᤡ᤹ ᤁᤧᤕᤥᤒᤠᤀᤠᤱ ᤁᤧᤏᤶᤒᤠ ᤕᤠᤱᤜᤠ᤹ᤀᤣ ᤔᤧᤕᤠᤰᤋᤢ. ᤁᤖ ᤕᤠᤱᤃᤧᤛᤠ᤹ᤔᤠ ᤔᤣᤔᤣᤍᤢᤔᤠᤸᤗᤧᤃ ᤂᤢᤏᤧ᤹ ᤁᤢᤕᤠᤱᤛᤠ᤹ᤔᤥ ᤁᤳᤋᤢᤒᤠ ᤆᤠᤔᤠ ᤌᤢᤱᤔᤠᤗᤠᤶ ᤕᤠᤰᤋᤢᤀᤠᤱ ᤘᤠ᤹ᤖᤥ॥” ᤜᤧᤰᤁᤩᤠᤱ ᤁᤢᤓᤠ ᤜᤢ᤹ᤛᤠᤶᤒᤠᤜᤠ᤹ᤖᤧ ᤔᤠᤱᤜᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤴ ᤏᤢ᤺ᤒ᤻ ᤏᤢ᤺ᤒᤠ ᤗᤢᤱᤜᤠ᤹ ᤏᤢ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤧᤍᤥ᤺ᤴᤍᤢᤒᤠ ᤁᤧᤄᤧᤶᤒᤠ ᤁᤧᤗᤠ᤹ᤒᤠ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤔᤧᤒᤠ᤺ᤳᤋᤢᤖᤥ॥ ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤠᤸᤗᤥ ᤁᤧᤏᤡ᤺ᤛᤢᤶᤒᤠᤴ ᤌᤡᤰ ᤗᤢᤱᤛᤶᤍᤠᤱ ᤘᤣ᤹ ᤗᤢᤱᤎᤡᤰᤁᤠᤱ ᤔᤧᤴᤏᤧᤀᤣ ᤕ᤺ᤔᤠ ᤕᤧᤶ ᤋᤠᤖ ᤐᤳᤗᤥ॥” ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤁᤴ ᤀᤠᤵᤑᤠᤸᤗᤧ ᤐᤥ᤺ᤱᤒᤠᤒᤣ᥅ ᤁᤴ ᤐᤥ᤺ᤱᤔᤠᤏᤢ᤺ᤸᤗᤧ ᤋᤃᤡ ᤌᤣ ᤔᤡᤰᤛᤣ᤺ᤴ ᤐᤥ᤺ᤱᤒᤣ᥅” ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤀᤠᤳᤋᤡᤸᤗᤧᤀᤠᤱ ᤂᤡᤏᤡ᤹ ᤀᤡᤱᤃᤧᤴᤗᤧᤰᤋᤡᤸᤗᤖᤥ. ᤌᤣᤀᤠᤱᤓᤧᤸᤗᤧ ᤕᤖᤡᤰ ᤔᤏᤠᤜᤠ᤹ ᤀᤡᤱᤃᤠ᤹ ᤀᤠᤔᤡᤱᤅᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤀᤡᤱᤃᤠ᤹ᤀᤣᤖᤥ. ᤜᤧᤰᤁᤩᤠᤱ ᤀᤠᤸᤗᤥ ᤕᤧᤶᤔᤡᤴ ᤋᤩᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢ᤹. ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤧᤶᤔᤡᤴᤏᤧ᤹ᤀᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤌᤱᤜᤠ᤹ ᤏᤢ ᤁᤧᤈᤡᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤁᤧᤄᤧᤵᤛᤢᤶ. ᤁᤖ ᤏᤡᤱᤘᤠ᤹ ᤔᤧᤔᤕᤧᤶᤔᤡᤴᤏᤧ᤹ᤀᤥ॥ ᤁᤱᤜᤠ᤹ᤃ ᤐᤥ᤺ᤱᤔᤠᤀᤣ ᤐᤥ᤺ᤱ. ᤁᤖ ᤒᤠ ᤂᤧᤴ ᤕᤧᤶᤔᤥᤀᤣᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠᤴ ᤔᤧᤍᤠᤏᤧᤴᤗᤥ॥” ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤢ ᤗᤠᤈᤣ᤹ᤜᤠ᤹ ᤗᤢᤶᤔᤥ ᤌᤱ ᤐᤥ᤺ᤰ॥ ᤜᤧᤰᤁᤩᤠᤱ ᤕᤖᤡᤰ ᤋᤧᤴᤏᤥ ᤐᤕᤶ ᤕᤶᤒᤠ ᤗᤢᤵᤗᤡ ᤌᤠᤱ. ᤕᤶᤒᤠ ᤛᤠᤰ ᤐᤥ᤺ᤰ ᤜᤧᤰᤁᤩᤠᤱ ᤕᤶᤒᤠ ᤔᤡᤴᤍᤣ᤹ᤜᤠ᤹ ᤐᤥ᤺ᤰᤁᤠᤱ ᤁᤡᤵᤔᤠ ᤁᤧᤄᤢ᤺ᤒᤠ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤋᤠᤱᤛᤠᤰᤐᤥ ᤔᤧᤎᤠ᤺ᤵᤗᤥ॥ ᤁᤴ ᤐᤥ᤺ᤱᤔᤠᤏᤢ᤺ᤸᤗᤧ ᤋᤃᤡᤃ ᤂᤡᤏᤡ᤹ ᤜᤢᤰ ᤁᤧᤶᤕᤠᤰᤋᤡᤀᤠᤱ ᤏᤡᤱᤄᤢᤶ ᤁᤧᤶᤔᤧᤳᤋᤡ᤹ᤖᤥ॥ ᤜᤧᤰᤁᤩᤠᤱ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤂᤠᤛᤧᤴ ᤁᤧᤶᤗᤥ᤺ᤴᤍᤡᤀᤠᤱ ᤐᤢᤱᤗᤠᤜᤡᤶᤔᤥ ᤁᤧᤶᤎᤧᤰᤋᤡ᤹ᤖᤥ॥ ᤀᤠᤔᤡᤱᤅᤡᤸᤗᤧ ᤆᤥᤃᤢᤸᤗᤧ ᤜᤠᤱᤜᤠ᤹ ᤏᤢ ᤛᤢᤜᤠᤱᤃᤧᤶᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤧᤶᤕᤧᤵᤛᤡ᤹ᤖᤥ॥ ᤁᤱᤃ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤐᤠ᤺ᤵᤔᤠ ᤁᤧᤄᤥ᤺ᤛᤢᤶᤒᤠ ᤛᤢᤕᤧᤶᤗᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤌᤧᤔᤠ ᤐᤠ᤺ᤵᤔᤠᤒᤣ ᤑᤠ᤹ᤀᤠᤱ ᤋᤃᤡᤛᤠ ᤏᤡᤱᤛᤠᤶᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤂᤡᤏᤡ᤹ ᤐᤠ᤺ᤵᤔᤠ ᤁᤧᤒᤥ᤺ᤱᤒᤠ ᤛᤢᤳᤗᤠᤜᤠ᤹ ᤏᤢ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤐᤡᤏᤡᤱᤗᤥ॥ ᤜᤧᤰᤁᤣ᤺ᤸᤗᤧ ᤀᤠᤳᤋᤡᤴᤏᤠᤱ ᤂᤡᤏᤡ᤹ ᤒᤡᤑᤩᤢᤱᤜᤠ᤹ᤖᤧ ᤀᤵᤔᤠ ᤏᤢ ᤐᤠ᤺ᤴᤎᤰᤔᤠ ᤔᤧᤴᤇᤢᤰᤋᤢᤴᤗᤥ॥ ᤂᤡᤏᤡ᤹ ᤐᤠ-ᤔᤠᤜᤠ᤹. ᤑᤢ᤹ᤏᤢᤛᤠ᤹ᤜᤠ᤹. ᤁᤠ᤹ᤀᤡ ᤛᤥ᤹ᤎᤥ᤺ᤰᤜᤠ᤹ ᤏᤢ ᤋᤣ᤺ᤱᤈᤢᤶᤜᤠ᤹ᤖᤧ ᤀᤡᤱᤃᤧᤶᤗᤧᤰᤋᤡᤀᤠᤱ ᤋᤧᤶᤔᤠ ᤁᤧᤶᤒᤠᤱᤄᤡ᤹ᤖᤥ॥ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤁᤢᤓᤠᤃ ᤁᤧᤶᤛᤧᤖᤡ᤹॥ ᤂᤡᤏᤡ᤹ ᤕᤠᤵᤔᤡ ᤏᤛᤠ᤺ᤴ ᤁᤧᤈᤥᤃᤡᤒᤠᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤡᤏᤡ᤹ ᤁᤧᤶᤈᤡ᤺ᤳᤋᤡ᤹. ᤜᤧᤰᤁᤣᤛᤠᤱ ᤂᤡᤏᤡ᤹ ᤌᤧᤃᤣ᤺ᤰᤀᤡᤎᤡᤰᤁᤠᤱ ᤔᤰᤔᤧᤎᤠᤏᤧᤴᤗᤥ॥ ᤂᤡᤏᤡ᤹ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤎᤖᤢᤶᤔᤡᤸᤗᤧᤀᤣ ᤂᤡᤏᤡ᤹ ᤜᤡᤱᤔᤴᤏᤡᤴ ᤋᤠᤱᤗᤥ॥” ᤀᤠᤸᤗ ᤕᤖᤢᤛᤗᤧᤶᤔᤡᤴ ᤏᤡᤱᤔᤡ ᤌᤰᤛᤢᤒᤠᤜᤠ᤹ᤖᤧ ᤔᤧᤃᤒᤢᤒᤠ ᤁᤧᤏᤡ᤺ᤛᤢᤶᤔᤡᤸᤗᤧ ᤀᤠᤸᤗ ᤁᤢᤔᤧᤰᤔᤠᤴ ᤏᤡ᤺ᤳᤋᤠᤱᤅᤣ ᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤕᤜᤢᤍᤡᤕᤠᤒᤠ ᤔᤏᤠᤜᤠ᤹ ᤁᤥ᤺ᤰᤔᤠ ᤑᤠᤱᤈᤱ ᤜᤧᤱᤄᤠ᤺ᤳᤋᤡ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗ. ᤕᤧᤰᤕᤰᤁᤥ ᤁᤧᤘᤠ᤹ᤒᤠᤜᤠ᤹ ᤗᤠ᤺ᤰᤁᤠᤳ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗ. ᤜᤧᤰᤁᤩᤠᤱ ᤐᤠᤱᤓᤣ᤹ᤀᤥ ᤁᤧᤕᤢᤱᤒᤠᤜᤠ᤹ ᤕᤠᤶᤔᤥ ᤕᤧᤰᤕᤰᤁᤥ ᤔᤧᤴᤍᤠᤏᤧᤴᤗᤖᤥ॥ ᤌᤣᤀᤠᤱᤓᤧᤸᤗᤧ ᤛᤠᤶᤕᤥ ᤛᤠᤵᤗᤠᤀᤥ ᤁᤴ ᤛᤠᤵᤋᤧᤀᤠᤱ ᤐᤵᤐᤠ ᤐᤠ᤺ᤴᤏᤡᤴ ᤁᤧᤳᤗ ᤑᤠ᤹ᤀᤠᤱ ᤁᤱᤃ ᤂᤢᤶᤍᤡᤱᤗᤧᤴ ᤕᤧᤴᤜᤠ᤹ ᤐᤥ᤺ᤱᤗᤥ॥ ᤁᤴ ᤕᤧᤶᤔᤡᤱᤃ ᤔᤧᤴᤇᤢᤰᤔᤠ ᤁᤧᤘᤠ᤹ᤔᤠ ᤏᤢ ᤛᤠᤘᤠᤔᤠᤜᤠ᤹ᤖᤧ ᤗᤠᤃᤡ ᤀᤠᤰᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤐᤥ᤺ᤱᤅᤡ᥄ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤶᤒᤠ ᤋᤢᤰᤂᤣ ᤌᤠ᤺ᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤢᤶᤍᤡᤱᤅᤡᤴ ᤁᤴ ᤔᤏᤠᤜᤠ᤹ᤀᤥ ᤆᤢᤰᤗᤥ॥ ᤂᤧᤱᤜᤠ᤹ ᤋᤠᤓᤣ᤺ᤸᤗᤧ ᤔᤧᤈᤧᤵᤋᤢ ᤔᤧᤛᤧᤖᤢᤛᤡ᤹ ᤜᤧᤰᤁᤩᤠᤱ ᤕᤖᤡᤰ ᤗᤠᤈᤣ᤹ᤀᤥ ᤐᤢᤱᤗᤠᤎᤠᤒᤠ ᤔᤧᤒᤥ᤺ᤱᤅᤠᤱ ᤔᤧᤒᤣ᤺ᤰᤗᤥ॥ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤕᤧᤶ ᤔᤧᤱᤃᤧᤳᤋᤣ ᤌᤠᤖᤡᤰ ᤂᤧᤱᤜᤠ᤹ᤖᤧ ᤕᤖᤢᤛᤗᤧᤶᤔᤡᤴ ᤔᤧᤍᤥ᤹ᤖᤢ ᤔᤧᤛ᤹ᤖᤢ᤹ᤖᤥ॥ “ᤜᤧᤰᤁᤩᤠᤱ ᤏᤠᤶ. ᤗᤠᤒᤠ ᤏᤢ ᤂᤣ᤺ᤶᤛᤡᤰᤜᤠ᤹ᤀᤥ ᤕᤶᤒᤠ ᤔᤡᤰᤛᤣ᤺ᤴᤜᤠ᤹ ᤔᤧᤎᤠ᤺ᤵᤗᤥ॥ ᤜᤧᤰᤁᤩᤠᤱ ᤘᤠᤜᤱᤅᤡᤸᤗᤧ ᤁᤢᤛ᤺ᤰᤔᤠᤴ ᤏᤢ ᤕᤶᤒ᤻ ᤕᤶᤒᤠ ᤘᤠᤓᤧᤸᤗᤧᤱᤅᤡᤸᤗᤧ ᤆᤥᤃᤢᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤛᤠ᤹ᤖᤡᤰ ᤁᤡ᤺ᤔᤠᤀᤥ ᤏᤢ ᤏᤡᤱᤛᤠᤶᤔᤥ ᤔᤧᤎᤠ᤺ᤖᤥ॥ ᤀᤠᤸᤗ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤔᤧᤀᤡ᤺ᤳᤋᤢᤀᤠᤱ ᤔᤏᤠᤜᤠ᤹ ᤂᤢᤏᤡ᤹ ᤛᤠᤶ ᤔᤡᤰᤁᤡᤸᤗᤧ ᤐᤰᤌᤛᤡ. ᤌᤣᤀᤠᤱᤓᤧᤸᤗᤧ ᤋᤠᤱᤛᤠᤰᤐᤥᤒᤠ ᤔᤢᤰᤛᤠᤶᤜᤠ᤹ ᤏᤢ ᤂᤣ᤺ᤶᤛᤡᤰᤜᤠ᤹ ᤔᤧᤕᤱᤗᤥ॥ ᤜᤧᤰᤁᤩᤠᤱ ᤔᤧᤴᤇᤠᤶᤛᤠ᤺ᤴ ᤂᤠᤵᤔᤡ᤺ᤳᤋᤥ ᤕᤶᤒᤠ ᤔᤢᤰᤛᤠᤶ ᤜᤧᤰᤁᤩᤠᤱ ᤔᤡᤔᤡᤍᤡᤱᤏᤢ ᤕᤢ᤺ᤖ ᤐᤵᤐᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤏᤡ᤺ᤛᤢ᤹ᤖᤥ॥ ᤀᤠᤸᤗ ᤁᤴ ᤁᤧᤖᤧᤰ ᤐᤥ᤺ᤱᤅᤡᤸᤗᤧ ᤂᤡᤏᤡ᤹ ᤌᤧᤃᤣ᤺ᤰᤐᤧᤴ ᤑᤥ᤺ᤰᤂᤧᤶᤔᤧ᤹ᤀᤠᤱ ᤌᤠ᤺ᤱ ᤀᤥᤔᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤧᤴᤗᤵᤐᤡᤴ ᤏᤡ᤺ᤳᤋᤠᤱ ᤋᤠᤖ ᤐᤳᤗᤥ॥” ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤁᤴ ᤂᤧᤍᤠ᤹ᤀᤡᤴ ᤔᤧᤳᤋᤢᤛᤡ. “ᤀᤠᤸᤗ ᤐ᤺ᤳᤇᤣ᤹ᤒᤢᤱᤔᤠᤴ ᤏᤢ ᤘᤣ᤹ ᤛᤡᤱᤒᤢᤱᤜᤠ᤹ ᤀᤥᤔᤧᤳᤋᤧᤶᤔᤧ᤹॥ ᤀᤠᤸᤗ ᤁᤢᤛᤱ ᤁᤢᤓᤧᤰᤘᤠ ᤗ᤺ᤴᤏᤡᤸᤗᤧ ᤜᤠᤱᤘᤠ᤺ᤶᤔᤠ ᤕᤧᤶᤔᤡᤴ ᤏᤡ᤺ᤳᤋᤠᤱ ᤋᤠᤖ ᤐᤳ ᤑᤠ᤹ᤀᤠᤱ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤴ ᤁᤠᤰ ᤐᤠ᤺ᤴᤜᤠ᤹ ᤁᤧᤳᤗ ᤐᤣ᤺ᤰᤐᤠ ᤁᤧᤏᤡ᤺ᤛᤢᤶᤔᤡᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤏᤡ᤺ᤳᤋᤠᤱ ᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤶᤒᤥ᤺ᤱᤅᤣ ᤌᤠᤖᤡᤰ ᤁᤴ ᤔᤧᤴᤇᤠᤶ ᤌᤠ᤺ᤰᤜᤠ᤹ ᤔᤧᤴᤇᤡ᤺ᤏᤧᤴᤗᤥ॥ ᤋᤠᤱᤛᤠᤰᤐᤠᤴ ᤏᤢ ᤂᤠᤶᤒᤣ᤺ᤰᤔᤠᤴ ᤗᤧᤰᤁᤠᤱ ᤐᤣ᤺ᤰ. ᤁᤖ ᤀᤡᤱᤃᤠ᤹ ᤀᤠᤒᤠ᤺ᤴᤈᤠᤰᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤰᤏᤧᤴ ᤔᤧᤒᤣ᤺ᤰᤏᤧᤴᤗᤥ॥ ᤂᤡᤏᤡ᤹ ᤕᤠᤶᤍᤠᤍᤠ ᤛᤢᤰᤂᤣᤘᤠ ᤏᤢ ᤆᤠᤔᤠ ᤌᤢᤱᤔᤠ ᤜᤧᤰᤁᤩᤠᤱ ᤁᤴ ᤜᤡᤱᤔᤴᤗᤧᤴ ᤏᤡᤱᤛᤠᤶ ᤆᤥ᤺ᤰᤔᤥ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤔᤧ᤺ᤴᤏᤧ ᤑᤠ᤹ᤃᤪ ᤜᤰᤆᤄᤳ ᤌᤰᤛᤠ ᤐᤢᤛᤠ ᤀᤡᤈᤥᤀᤥ ᤔᤧᤎᤠ᤺ᤒᤠ ᤜᤧᤰᤁᤣ ᤁᤴ ᤕᤧᤴᤜᤠ᤹ᤀᤥ ᤂᤡᤏᤡ᤹ᤀᤠᤱ ᤁᤧᤎᤩᤧ᤹ᤀᤡᤖᤥ॥ ᤌᤣᤀᤠᤱᤓᤧᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤏᤢᤀᤠᤱ ᤜᤧᤰᤁᤣᤗ᤹ᤖᤡᤰᤁᤣ ᤐᤥ᤺ᤱᤗᤥ॥ ᤁᤧᤖᤧᤰ ᤕᤧᤶᤔᤥ ᤀᤠᤵᤑᤠᤸᤗᤧᤛᤠᤱ ᤁᤴ ᤁᤧᤍᤠ᤺ᤒᤠ ᤐᤠ᤺ᤴᤏᤥᤗᤠᤶ ᤂᤧᤳᤇᤡᤱᤔᤠ ᤐᤣ᤺ᤰᤔᤠ ᤔᤢᤰᤛᤠᤶ ᤁᤧᤄᤥ᤺ᤛᤢᤶᤗ ᤜᤧᤰᤁᤩᤠᤱ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤍᤃᤡ ᤕᤧᤵᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤰᤂᤡᤖ ᤑᤠ᤹ᤀᤠᤱ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤖ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥” ᤜᤧᤰᤁᤩᤠᤱ ᤕᤧᤛᤢᤖᤧ ᤌᤡᤰᤕᤠ᤺ᤴᤎᤰ ᤔᤠᤱᤜᤡᤶᤔᤥ ᤜᤢ᤹ᤖᤢᤛᤡᤖ ᤘᤕᤧ. ᤁᤖ ᤛᤧᤴᤍᤡᤰ ᤕᤠᤱᤎᤥ᤺ᤰᤛᤧ ᤈᤤᤋᤢᤏ ᤁᤥ᤺ᤰᤔᤠᤀᤥ ᤐᤣᤖ ᤘᤕᤧᤖᤥ॥ ᤜᤧᤰᤁᤩᤠᤱ ᤋᤠᤏᤠᤶᤛᤠ ᤔᤠᤱᤜᤡᤶᤔᤥ ᤂᤢᤏᤧ᤹ ᤁᤢᤒᤠ᤺ᤴᤈᤠᤰ ᤂᤧᤶᤛᤧ ᤔᤏᤠᤜᤠ᤹ ᤔᤧᤍᤩᤧᤖᤥ॥