ᤛᤣ᤺ᤰᤕᤢᤰᤔᤡᤒᤠᤜᤠ᤹.
16.
ᤐᤠᤘᤗᤧᤴ ᤍᤷᤒᤡ ᤏᤢ ᤗᤢᤛ᤻ᤋᤪᤠ ᤕᤧᤰᤕᤰᤜᤠ᤹ᤀᤥ ᤋᤩᤧᤖᤥ॥ ᤂᤧᤵᤔᤥ ᤋᤡᤔᤥᤌᤡ ᤔᤧᤵᤔᤏᤠᤒᤠ ᤏᤛᤠᤏᤡᤒᤠᤎᤡᤰ ᤘᤕᤧ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤶᤔᤠ ᤏᤛᤠ᤺ᤴ ᤁᤧᤈᤥ᤺ᤰᤔᤠ ᤕᤜᤢᤍᤡ ᤘᤕᤧ. ᤁᤖ ᤁᤢᤶᤒᤠ ᤃᤪᤡᤁ ᤘᤕᤧ॥ 
ᤗᤢᤛ᤻ᤋᤪᤠ ᤏᤢ ᤀᤠᤀᤡᤁᤥᤏᤡᤕᤶᤒᤠ ᤁᤠᤰ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤀᤥ ᤋᤡᤔᤥᤌᤡ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤢ᤺ᤒᤠ ᤁᤢᤀᤡᤱ ᤛᤧ᤺ᤖᤧᤀᤠᤱ ᤘᤕᤧᤖᤥ॥ 
ᤐᤠᤘᤗᤖᤧ ᤋᤡᤔᤥᤌᤡ᤺ᤴᤏᤠᤱ ᤛᤥᤖᤡᤰ ᤋᤣ᤹ᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤂᤧᤵᤔᤥᤒᤠ ᤁᤠᤰ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠ᤺ᤔᤠ ᤐᤡᤔᤠᤛᤡ ᤑᤠ᤹ᤀᤠᤱ ᤂᤧᤴ ᤜᤷᤍᤥ ᤜᤧᤃᤢ ᤐᤡᤖᤢ. ᤌᤣᤀᤠᤱᤓᤧᤸᤗᤧ ᤂᤧᤴ ᤗᤠᤈᤣ᤹ᤒᤠ ᤁᤠᤰ ᤕᤜᤢᤍᤡᤜᤠ᤹ᤖᤧ ᤋᤡᤔᤥᤌᤡᤖᤧ ᤁᤢᤶᤒᤠ ᤃᤪᤡᤁ ᤘᤕᤧᤒᤠᤴ ᤔᤧᤏᤡ᤺ᤛᤢᤀᤠᤱ ᤔᤧᤘᤕᤧ ᤜᤧᤰᤁᤩᤠᤱ ᤂᤧᤴ ᤜᤷᤍᤥ ᤔᤧᤴᤜᤧᤰᤁᤣ ᤘᤕᤧᤖᤥ॥ 
ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤗᤠᤶᤔᤥ ᤁᤧᤏᤧᤒᤠ ᤐᤠᤱᤈᤢᤶᤜᤠ᤹ ᤌᤵᤔᤣ ᤕᤖᤢᤛᤗᤧᤔᤛ᤻ᤔᤠ ᤛᤣ᤺ᤰᤕᤢᤰᤔᤡᤒᤠ ᤏᤢ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤏᤡ᤺ᤴᤎᤥ ᤔᤧᤈᤥᤃᤢᤒᤠ ᤌᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖᤥ ᤑᤠ᤹ᤀᤠᤱ ᤏᤛᤠᤏᤡᤒᤠᤜᤠ᤹ ᤔᤧᤔᤧᤳᤋᤢᤛᤡᤖᤥ॥ 
ᤜᤧᤰᤁᤣᤗ᤹ᤖᤡᤰ ᤛᤣᤛᤣᤜᤢᤵᤗᤰᤜᤠ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤔᤧᤒᤥ᤺ᤰᤂᤧᤖ ᤌᤡᤰᤕᤠ᤺ᤴᤎᤰ ᤔᤧᤒᤥ᤺ᤖᤧᤖ ᤔᤧᤒᤣᤖᤥ॥ 
ᤐᤠᤘᤗ ᤏᤢ ᤁᤢᤴᤍᤣ᤺ᤱᤜᤠ᤹ ᤑᤪᤡᤃᤡᤕᤠ ᤏᤢ ᤃᤗᤠᤋᤡᤕᤠᤛ᤻ᤔᤠ ᤌᤢᤶᤔᤥ ᤗᤠᤶᤍᤡ᤺ᤰ ᤔᤧᤈᤥᤃᤧ. ᤌᤣᤀᤠᤱᤓᤧᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤂᤧᤴ ᤕᤧᤶᤔᤥ ᤂᤧᤱᤜᤠ᤹ ᤀᤣᤛᤡᤕᤠᤛ᤻ᤔᤠ ᤋᤧᤱᤃᤵᤐᤥ ᤛᤢᤏᤠᤀᤡᤱ ᤛᤧ᤺ᤔᤠ ᤛᤠᤰᤋᤢᤛᤡᤀᤠᤱ ᤘᤕᤧᤖᤥ॥ 
ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤠᤀᤡᤛᤡᤕᤠᤛ᤻ᤔᤠ ᤀᤡ᤺ᤴᤎᤥᤀᤥ ᤔᤧᤃᤧᤖᤧᤀᤠᤱ ᤒᤡᤌᤠᤏᤡᤕᤠᤛ᤻ᤔᤠ ᤌᤢᤶᤔᤥ ᤐᤣ᤺ᤰᤔᤠ ᤋᤶᤛᤡᤴ ᤔᤧᤈᤥᤃᤧ. ᤁᤖ ᤕᤧᤛᤢᤖᤧ ᤁᤢᤛᤣᤛᤣᤔᤠᤱᤅᤡᤸᤗᤧ ᤜᤧᤰᤁᤣ ᤆᤥ᤺ᤰᤔᤠ ᤂᤧᤱᤜᤠ᤹ ᤔᤧᤒᤠᤱᤄᤢᤴᤛᤡᤴᤗᤥ॥ 
ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤏᤠᤶᤎᤠ ᤐᤡᤛᤠᤱᤒᤠ ᤔᤠᤀᤡᤛᤡᤕᤠ ᤔᤧᤒᤥ᤺ᤰᤂᤧᤖ ᤋᤪᤥᤀᤠᤛ ᤕᤧᤰᤕᤰᤁᤥ ᤔᤧᤒᤣ॥ 
ᤂᤧᤵᤔᤥ ᤂᤧᤴ ᤛᤧᤴᤍᤡᤰ ᤐᤠᤘᤗᤖᤧ ᤋᤠᤍᤡᤃᤧᤴ ᤛᤢᤑᤥᤎᤡᤰ ᤏᤡ᤺ᤛᤢ॥ ᤂᤧᤵᤔᤥ ᤔᤧᤛᤣᤍᤥᤏᤡᤕᤠᤛ᤻ᤔᤠ ᤔᤏᤠᤎᤡᤰ ᤔᤧᤛᤣᤍᤥᤏᤡᤕᤠᤀᤥ ᤌᤠᤅᤧᤀᤠᤱ ᤀᤠᤏᤡᤃᤧ ᤕᤠᤵᤔᤡ ᤁᤢᤓᤠ᤹ ᤀᤠᤒᤡᤖᤧ᤹ ᤗ᤹ᤖᤡᤰ ᤐᤣᤗᤡ ᤑᤠᤰᤋᤢᤖ ᤕᤧᤒᤧᤒᤠ ᤏᤡ᤺ᤛᤢᤖᤥ॥ 
ᤐᤠᤘᤗᤖᤧ ᤁᤴ ᤋᤠᤍᤡᤃᤧᤴ ᤛᤢᤑᤥ᤺ᤴ ᤏᤡ᤺ᤛᤢᤀᤠᤱ ᤀᤠᤏᤡᤃᤧ ᤂᤡᤔᤥ ᤔᤧᤛᤣᤍᤥᤏᤡᤕᤠᤀᤥ ᤐᤣ᤺ᤰᤔᤠ ᤕᤠᤖᤡᤵ ᤐᤥ᤺ᤰᤂᤡᤃᤧ. ᤌᤣᤀᤠᤱᤓᤧᤸᤗᤧ ᤁᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤵᤔᤥᤒᤠ ᤔᤏᤠᤜᤠ᤹ᤀᤥ ᤛᤢᤏᤠᤀᤡᤱ ᤛᤧ᤺ᤔᤠ ᤕᤠᤵᤔᤡ ᤀᤢ᤺ᤳᤋᤧᤒᤠ ᤑᤠ᤹ᤀᤠᤱ ᤏᤡ᤺ᤴᤎᤥ ᤆᤥ᤺ᤰᤔᤏᤠᤖᤥ॥ 
ᤀᤠᤏᤡᤃᤧ ᤋᤪᤥᤀᤠᤛ ᤗᤧᤵᤔᤏᤠᤀᤠᤱ ᤘᤠᤗᤠᤎᤠᤗᤠᤶ ᤛᤠᤔᤥᤌᤪᤧᤛ ᤘᤠᤃᤵᤂᤠᤶ ᤐᤣ᤺ᤰᤔᤏᤠ॥ ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤏᤡᤕᤠᤐᤥᤗᤡᤛ ᤁᤧᤖᤡᤃᤧᤖᤥ॥ 
ᤂᤧᤵᤔᤥᤗᤠᤶ ᤀᤠᤏᤡᤃᤧ ᤗᤠᤱᤄᤣ᤺ᤰᤔᤏᤠᤀᤠᤱ ᤑᤡᤗᤡᤵᤐᤡᤀᤥ ᤁᤧᤵᤔᤏᤠᤖᤥ॥ ᤂᤧᤱᤃ ᤔᤧᤛᤣᤍᤥᤏᤡᤕᤠᤛ᤻ᤔᤠ ᤌᤢᤶᤔᤥᤒᤠ ᤁᤧᤕᤧᤰᤐᤠ ᤕᤧᤰᤕᤰ ᤏᤢ ᤖᤥᤔᤡ ᤕᤰᤗᤠᤈᤣ᤹ᤀᤠᤱ ᤘᤕᤧᤖᤥ॥ ᤂᤧᤵᤔᤥ ᤀᤠᤏᤡᤃᤧ ᤁᤢᤓᤠ ᤕᤧᤴ ᤘᤕᤡᤃᤧᤖᤥ॥ 
ᤜᤧᤰᤁᤩᤠᤱ ᤘᤣ᤹ᤛ᤻ᤔᤠ ᤏᤠ᤺ᤶᤛᤡᤱ ᤕᤧᤴᤏᤥ ᤀᤠᤏᤡᤃᤧ ᤕᤧᤰᤕᤰᤁᤥᤛ᤻ᤔᤠ ᤘᤠᤜᤱ ᤗᤧᤵᤔᤠᤱᤒᤠ ᤁᤢᤕᤠᤀᤥ ᤐᤣ᤺ᤰᤔᤏᤠ॥ ᤁᤴ ᤋᤧᤴᤏᤡᤴ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤋᤢᤘᤠ ᤆᤥ᤺ᤰᤔᤠᤍᤧᤴ ᤑᤠ᤹ᤀᤠᤱ ᤀᤠᤏᤡᤃᤧ ᤏᤡᤱᤘᤠ᤹ ᤀᤡ᤺ᤵᤔᤏᤠᤖᤥ॥ ᤀᤠᤏᤡᤃᤧ ᤂᤧᤵᤔᤥ ᤛᤣᤘᤠ ᤆᤥ᤺ᤰᤛᤧ ᤁᤧᤈᤢᤶᤔᤠ ᤔᤧᤴᤇᤢᤔᤠᤜᤠ᤹ᤏᤢ ᤋᤠ᤹ᤈᤧᤱᤔᤏᤠᤖ ᤕᤢᤱᤔᤏᤠᤖᤥ॥ 
ᤂᤧᤵᤔᤥ ᤛᤢᤏᤠᤀᤡᤱ ᤁᤧᤄᤧᤶᤔᤠᤜᤠ᤹ᤀᤥ ᤗᤡᤍᤡᤕᤠ ᤔᤧᤵᤔᤏᤠᤔᤠ ᤌᤡᤕᤠᤋᤡᤖᤠ ᤕᤧᤰᤕᤰᤁᤥᤛ᤻ᤔᤠ ᤐᤖᤠᤴᤗᤠ ᤋᤣ᤺ᤳ ᤗᤧᤱᤜᤱ ᤁᤧᤈᤥ᤺ᤰᤔᤠᤎᤡᤰ ᤘᤕᤧ॥ ᤜᤧᤰᤁᤩᤠᤱ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤁᤧᤈᤥ᤺ᤰᤔᤠ ᤌᤡᤶᤔᤧᤴᤍᤱ ᤛᤢᤘᤠᤱᤛ᤻ᤔᤠ ᤘᤕᤧ॥ ᤐᤠᤘᤗᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤏᤛᤠ᤺ᤴ ᤆᤥᤃᤢᤖ ᤑᤠ᤹ᤀᤠᤱ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ᤀᤡᤴ ᤜᤴᤍᤢ ᤐᤡᤖᤢ॥ 
ᤜᤧᤰᤁᤩᤠᤱ ᤂᤢᤏᤧ᤹ ᤏᤢ ᤁᤠᤰ ᤁᤢᤜᤡᤶᤛᤕᤱᤜᤠ᤹ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧ॥ ᤜᤧᤰᤁᤩᤠᤱ ᤂᤧᤸᤗᤧ ᤀᤡᤱᤃᤠ᤹ ᤛᤧᤰᤂᤠᤀᤣ ᤍᤠᤱᤒᤠᤸᤗᤧ ᤁᤢᤏᤛᤠᤏᤡᤔᤠ ᤑᤠ᤹ᤀᤠᤱ ᤕᤠᤵᤔᤡ ᤁᤧᤀᤡ᤺ᤳᤋᤡᤏᤧ ᤑᤠ᤹ᤃᤪ ᤀᤠᤜᤡᤶᤔᤥ ᤋᤩᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹ᤀᤥ ᤗ᤹ᤖᤡᤰ ᤕᤠᤵᤔᤡ ᤀᤢ᤺ᤳᤋᤧᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤜᤡᤶᤔᤥ ᤕᤠᤵᤔᤡ ᤋᤣ᤹ᤔᤠ ᤑᤠ᤹ᤀᤠᤱ ᤛᤠᤰᤁᤧᤸᤗᤧᤰ ᤆᤥᤃᤧᤖᤥ॥ 
ᤌᤡᤰᤕᤧᤴ ᤀᤠᤏᤡᤃᤧ ᤋᤢᤘᤠ ᤆᤥ᤺ᤰᤔᤠᤍᤧᤴᤏᤥ ᤐᤣ᤺ᤰᤔᤏᤠᤖ ᤐᤵᤔᤏᤠ᤺ᤸᤗᤧ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤔᤠ ᤕᤥ᤺ᤰᤔᤠᤎᤡᤰ ᤋᤢᤶᤏᤠ॥ ᤂᤧᤸᤗᤧ ᤂᤠᤀᤡᤃᤢᤀᤠᤱ ᤁᤢᤴᤍᤠᤱᤒᤠᤜᤠ᤹ ᤕᤖᤡᤰ ᤕᤠᤱ ᤌᤃᤢ ᤐᤡᤖᤢᤛᤡᤖ ᤘᤕᤧᤖᤥ॥ 
ᤂᤧᤸᤗᤧ ᤐᤠᤘᤗ ᤏᤢ ᤀᤠᤏᤡᤃᤧ ᤀᤰᤂᤣᤗ᤹ᤖᤡᤰ ᤀ᤺ᤰᤋᤧᤖ ᤕᤠᤵᤔᤡ ᤋᤡᤶᤍᤧᤖᤥ. “ᤁᤴ ᤔᤏᤠᤜᤠ᤹ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤛᤡᤖᤥ॥ ᤁᤱᤜᤠ᤹ᤖᤧ ᤀᤠᤰᤂᤣᤗ᤹ᤖᤡᤰ ᤛᤧᤴᤗᤵ ᤁᤧᤄᤥ᤺ᤛᤢᤶ ᤂᤧᤴ ᤂᤡᤏᤡ᤹ ᤁᤧᤶᤔᤧᤳᤋᤡᤖᤥ॥” 
ᤂᤧᤸᤗᤧ ᤕᤖᤡᤰ ᤕᤧᤴ ᤌᤠᤖᤡᤰ ᤜᤧᤰᤁᤣ ᤆᤥᤃᤢᤖ ᤏᤧᤛ᤻ᤛᤧ॥ ᤜᤧᤰᤁᤩᤠᤱ ᤐᤠᤘᤗᤧᤴ ᤁᤢᤏᤡᤱᤄᤧᤴᤍᤢᤒᤠᤸᤗᤧ ᤆᤥᤃᤢᤸᤗᤧ ᤜᤡᤛᤡᤱᤅᤠᤱ ᤂᤧᤴ ᤕᤥ᤺ᤰᤔᤠᤀᤥ ᤁᤧᤕᤠᤰᤐᤠ ᤑᤧᤴᤛᤠᤶᤔᤡᤴ ᤀᤰᤂᤣ ᤔᤧᤳᤋᤢᤖ ᤑᤧ᤺ᤰᤋᤢᤖᤥ. “ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤢᤰᤛᤠᤶᤔᤡᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤥᤗᤠᤶ ᤗ᤺ᤴᤍᤧ ᤐᤣᤃᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤏᤧ॥” ᤂᤡᤔᤥ ᤂᤧᤴ ᤑᤧᤴᤛᤠᤶᤔᤡᤴᤏᤠᤱ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤐᤰᤌ᤺ᤀᤠᤱ ᤐᤣᤖᤥ॥ 
ᤜᤧᤰᤁᤩᤠᤱ ᤂᤧᤴ ᤕᤥ᤺ᤰᤔᤠᤸᤗᤧ ᤁᤢᤴᤍᤠᤱᤒᤠᤜᤠ᤹ᤖᤧ ᤀᤠᤸᤗ ᤕᤠᤱᤌᤰᤔᤠ ᤗᤠᤶᤔᤡᤴ ᤏᤢᤒᤧᤒᤠ ᤔᤧᤏᤡ᤺ᤛᤢᤀᤠᤱ ᤐᤠᤘᤗ ᤏᤢ ᤛᤡᤗᤠᤛᤧᤴ ᤔᤧᤍᤧᤶᤛᤢᤛᤡᤀᤠᤱ ᤔᤧᤀᤢ᤺ᤰᤂᤢᤛᤡᤖ ᤕᤧᤰᤕᤰᤛ᤻ᤔᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤥ ᤔᤧᤍᤠᤖᤢᤛᤡᤖᤥ॥ 
ᤂᤧᤱᤜᤠ᤹ᤖᤧ ᤖᤥᤔᤡ ᤛᤢᤜᤠᤱᤕᤢᤰᤐᤠᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡ. “ᤁᤴ ᤔᤏᤠᤜᤠ᤹ ᤕᤜᤢᤍᤡᤛᤡᤖᤥ. ᤜᤧᤰᤁᤩᤠᤱ ᤁᤱᤜᤠ᤹ᤖᤧ ᤀᤠᤏᤡ᤹ ᤕᤧᤰᤕᤰᤁᤥ ᤜᤕᤱᤁᤡᤸᤗᤡᤱ ᤆᤥ᤺ᤰᤛᤢᤖ ᤕᤠᤰᤛᤡᤖᤥ॥ 
ᤂᤧᤱᤜᤠ᤹ᤖᤧ ᤀᤠᤏᤡ᤹ ᤖᤥᤔᤡ ᤌᤡᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥᤒᤠ ᤛᤠᤰᤌᤡᤶᤜᤠ᤹ ᤜᤢ᤹ᤛᤢᤛᤡᤖ ᤕᤠᤰᤛᤡᤖᤥ॥ ᤀᤠᤏᤡ᤹ ᤖᤥᤔᤡᤜᤠ᤹ᤖᤧᤃ ᤂᤧᤴ ᤋᤧᤴᤍᤡᤱ ᤆᤥ᤺ᤰᤔᤠ ᤏᤢ ᤀᤡ᤺ᤵᤔᤠ ᤏᤠ᤺ᤵᤔᤠ ᤛᤢᤰᤔᤧᤍᤧᤳᤋᤡᤴᤗᤥ॥” 
ᤜᤧᤰᤁᤣ᤺ᤸᤗᤧ ᤂᤧᤵᤔᤥ ᤁᤧᤈᤢᤶᤒᤠᤀᤠᤱ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤂᤢᤴᤇᤡ᤹ ᤜᤡᤵᤛᤧ ᤔᤧᤓᤢᤱᤛᤡᤱ ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤧᤀᤠᤱ ᤐᤠᤘᤗ ᤏᤢ ᤛᤡᤗᤠᤛᤖᤧ ᤂᤢᤴᤇᤡ᤹ ᤆᤠᤱᤍᤣ᤺ᤳᤜᤠ᤹ ᤑᤧᤶᤔᤠᤀᤠᤱ ᤜᤡᤵᤔᤠ ᤔᤧᤒᤠᤱᤄᤢᤛᤡ॥ 
ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤋᤧ᤺ᤶᤓᤢᤰ ᤔᤧᤕᤠᤰᤋᤢᤛᤡᤀᤠᤱ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤢᤛᤡᤖᤥ॥ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤐᤢᤱᤗᤠᤀᤡᤱᤒᤠᤴ ᤏᤢ᤺ᤖᤡᤰᤁᤠᤱ ᤂᤧᤱᤜᤠ᤹ ᤁᤥᤔᤠ ᤐᤠᤱᤄᤧᤛᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤔᤧᤒᤡᤖᤢᤖᤥ॥ 
ᤀᤰᤋᤱᤒᤠ ᤀᤡᤱᤈᤠ᤺ᤱ ᤂᤥ᤺ᤛᤢᤀᤠᤱ ᤐᤢᤱᤗᤠᤀᤡᤱᤒᤠᤸᤗᤧ ᤂᤧᤱᤜᤠ᤹ ᤐᤢᤱᤗᤠᤜᤡᤶᤔᤥᤒᤠ ᤛᤡᤃᤠᤱᤛ᤻ᤔᤠ ᤕᤠᤰᤑᤠᤀᤥ ᤂᤢᤴᤇᤡ᤹ ᤗᤠᤱᤜᤠ᤹ ᤑᤧᤴᤌᤰᤁᤪᤱᤅᤥ ᤕᤠᤰᤐᤠᤱᤄᤢᤛᤡᤀᤠᤱ ᤛᤠᤰᤋᤢᤛᤡᤖᤥ॥ 
ᤛᤧᤳᤗᤢᤶ ᤑᤰᤋᤧᤖ ᤐᤳᤇᤧᤸᤗᤧ ᤐᤠᤘᤗ ᤏᤢ ᤛᤡᤗᤠᤛᤧᤴ ᤋᤢᤘᤠ ᤆᤥᤃᤢᤛᤡᤖ ᤛᤠᤶᤗᤥᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤧᤳᤇᤢᤖ ᤕᤠᤃᤧᤳᤇᤡᤖᤥ॥ ᤘᤣ᤹ ᤐᤢᤱᤗᤠᤎᤠᤒᤠᤜᤠ᤹ᤖᤧᤀᤠᤱ ᤂᤧᤱᤜᤠ᤹ ᤔᤧᤄᤧᤵᤛᤢᤛᤡᤖ ᤔᤧᤕᤢᤅᤧᤖᤥ॥ 
ᤜᤰᤆᤄᤳ ᤁᤡᤵᤔᤠ ᤁᤧᤄᤢ᤺ᤒᤠ ᤗᤢᤵᤗᤡ ᤌᤠᤅᤧᤀᤠᤱ ᤐᤢᤱᤗᤠᤜᤡᤶ ᤕᤰᤜᤠ᤹ᤀᤣ ᤕᤰᤂᤢᤖ ᤗᤠᤶᤎᤣ᤺ᤵᤜᤠ᤹ ᤜᤸᤗᤧᤰ ᤘᤖᤧᤰ ᤜᤖᤧᤀᤠᤱ ᤁᤧᤖᤧᤰ ᤐᤢᤱᤗᤠᤎᤠᤒᤠᤜᤠ᤹ᤖᤧ ᤂᤢᤏᤡ᤹ ᤀᤡᤄᤣ᤺ᤱᤜᤠ᤹ ᤐᤠ᤺ᤰᤂᤧᤖᤥ॥ 
ᤜᤧᤰᤁᤣ᤺ᤸᤗᤧ ᤐᤢᤱᤗᤠᤀᤡᤱᤒᤠᤴ ᤁᤢᤔᤡᤰ ᤛᤥᤖᤧᤀᤠᤱ ᤐᤢᤱᤗᤠᤜᤡᤶᤔᤥᤒᤠ ᤗᤠᤶᤎᤣ᤺ᤵᤜᤠ᤹ ᤜᤖᤧᤀᤠᤱ ᤐᤳᤇᤧᤒᤠ ᤏᤡ᤺ᤛᤢ ᤜᤧᤰᤁᤩᤠᤱ ᤐᤢᤱᤗᤠᤎᤠᤒᤠᤜᤠ᤹ ᤔᤧᤄᤧᤳᤇᤡᤱ ᤔᤧᤒᤣᤒᤡᤗᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤢ॥ ᤜᤧᤰᤁᤣ᤺ᤸᤗᤧ ᤜᤣ᤺ᤛᤢᤒᤠ ᤋᤠᤓᤣ᤺ᤴ ᤋᤖᤵ ᤑᤡ᤺ᤰᤂᤢᤀᤠᤱ ᤛᤧᤳᤇᤡᤱᤔᤠ ᤁᤥ᤺ᤳᤋᤢᤖᤥ॥ 
ᤁᤖ ᤐᤠᤘᤗᤖᤧ ᤀ᤺ᤰᤋᤧᤖ ᤀᤰᤂᤣ ᤔᤧᤳᤋᤢ. “ᤀᤠᤍᤠᤱᤒᤠᤀᤣ. ᤌᤣᤀᤠᤱ ᤔᤧᤔᤧᤳᤇᤡᤅᤧᤴᤏᤧ᤹ᤀᤥ᥄ ᤀᤠᤏᤡᤃᤧᤃ ᤂᤠ ᤁᤵᤔᤥᤀᤣ ᤕᤠᤃᤡᤃᤧ᤹ᤖᤥ॥” 
ᤂᤧᤴ ᤐᤢᤱᤗᤠᤀᤡᤱᤒᤠᤸᤗᤧ ᤛᤣᤔᤡ᤺ᤴ ᤜᤠ᤺ᤶᤔᤠ ᤐᤠᤱᤄᤢᤛᤡᤀᤠᤱ ᤛᤡᤃᤠᤱ ᤗᤥ᤺ᤰᤋᤧᤖ ᤋᤩᤧ॥ ᤂᤧᤴ ᤕᤰᤂᤧᤖ ᤐᤠᤘᤗ ᤏᤢ ᤛᤡᤗᤠᤛᤖᤧ ᤂᤢᤴᤇᤡ᤹ ᤗᤠᤱᤈᤰᤐᤥ ᤌᤢᤱᤒᤥᤜᤈ᤹ ᤕᤢᤱᤛᤡᤱᤗᤥ॥ 
ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤠ᤺ᤰᤁᤠᤳ ᤗ᤺ᤳᤋᤢᤛᤡᤀᤠᤱ ᤛᤣ᤺ᤴᤍᤥᤛᤢᤛᤡ. “ᤀᤠᤍᤠᤱᤒᤠᤛᤣ. ᤀᤡᤱᤃᤠ᤹ ᤌᤣ ᤆᤥᤃᤢᤱᤅᤡᤸᤗᤧ ᤛᤧᤴᤗᤵ ᤂᤥᤀᤠᤒᤣ᥅” 
ᤂᤧᤱᤜᤠ᤹ᤖᤧ ᤏᤥᤃᤵ ᤐᤡᤖᤧᤳᤇᤢ. “ᤍᤠᤱᤒᤠ ᤕᤧᤛᤢ᤺ᤴ ᤏᤛᤠ᤺ᤴ ᤆᤥᤃᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤛᤧᤴᤗᤵ ᤁᤧᤄᤥ᤺ᤛᤢ᤹. ᤜᤧᤰᤁᤣᤗ᤹ᤖᤡᤰᤁᤣ ᤁᤧᤜᤡᤶᤛᤕᤱᤜᤠ᤹ᤖᤧᤀᤠᤱ ᤏᤛᤠ᤺ᤴ ᤔᤧᤈᤥᤃᤢᤏᤧ ᤑᤠ᤹ᤃᤪ ᤛᤧᤴᤗᤵ ᤔᤧᤄᤥ᤺ᤛᤢ᤹ᤖᤥ॥” 
ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤂᤢᤏᤧ᤹ ᤏᤢ ᤁᤢᤜᤡᤶᤛᤕᤱᤜᤠ᤹ ᤆᤧᤰᤋᤧᤳᤇᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤏᤛᤠ᤺ᤴ ᤔᤧᤈᤥᤃᤢᤖᤥ॥ 
ᤛᤧᤴᤍᤡᤰ ᤒᤠᤂᤧᤴ ᤕᤧᤶᤔᤥ ᤐᤢᤱᤗᤠᤀᤡᤱᤒᤠᤸᤗᤧ ᤂᤧᤱᤜᤠ᤹ ᤋᤣ᤹ᤖᤢᤛᤡᤀᤠᤱ ᤂᤢᤴᤇᤡ᤹ ᤕᤠᤱᤄᤣ᤺ᤰᤜᤠ᤹ ᤘᤠᤜᤵᤋᤢ ᤐᤡᤖᤢᤛᤡ. ᤜᤧᤰᤁᤩᤠᤱ ᤐᤢᤱᤗᤠᤀᤡᤱᤒᤠᤴ ᤏᤢ ᤁᤢᤜᤡᤶᤛᤕᤱᤜᤠ᤹ ᤂᤡᤔᤥ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤖᤥ॥ 
ᤂᤧᤸᤗᤧ ᤐᤠᤘᤗ ᤏᤢ ᤛᤡᤗᤠᤛᤧᤴ ᤁᤢᤜᤡᤶᤔᤥ ᤋᤣ᤹ᤖᤢᤛᤡᤀᤠᤱ ᤆᤠᤔᤠ ᤌᤢᤱᤔᤠ ᤐᤡᤖᤢᤛᤡ॥ ᤂᤢᤏᤧ᤹ ᤏᤢ ᤁᤢᤜᤡᤶᤛᤕᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤛᤠ᤹ᤖᤡᤰ ᤀᤥᤔᤢ ᤔᤧᤗ᤹ᤖᤧᤖᤥ॥ 
ᤁᤢᤍᤠ᤺ᤴᤍᤡᤰᤔᤠ ᤒᤠ ᤂᤧᤴ ᤕᤧᤰᤕᤰᤁᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤜᤠᤖᤠ᤹ ᤐᤢᤱᤗᤠᤀᤡᤱᤒᤠᤸᤗᤧ ᤂᤧᤴ ᤔᤏᤠᤜᤠ᤹ ᤐᤢᤱᤗᤠᤜᤡᤶᤔᤥᤗᤠᤶ ᤐᤣ᤺ᤰᤔᤠ ᤐᤠᤱᤄᤢᤛᤡᤏᤡ ᤑᤠ᤹ᤀᤠᤱ ᤋᤡᤗᤡᤱᤃᤠᤜᤠ᤹ᤗᤠᤶ ᤀᤡᤱᤈᤠ᤺ᤱ ᤔᤧᤜᤠᤰᤋᤢᤖᤥ॥ 
ᤜᤧᤰᤁᤣ᤺ᤸᤗᤧ ᤐᤢᤱᤗᤠᤀᤡᤱᤒᤠᤸᤗᤧ ᤐᤠᤘᤗᤧᤴ ᤀᤰᤂᤣ ᤔᤧᤳᤋᤢ. “ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤧᤏᤧ᤹ ᤏᤢ ᤛᤡᤗᤠᤛᤧᤴ ᤗᤧᤵᤔᤠᤍᤣ᤺ᤔᤠᤏᤧᤛᤡᤱ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤔᤧᤜᤠᤅᤢᤀᤠᤱ ᤔᤧᤘᤠ᤹॥ ᤜᤧᤰᤁᤣ᤺ᤸᤗᤧ ᤂᤡᤴᤇᤡ᤹ ᤐᤣ᤺ᤰᤔᤠ ᤁᤧᤛᤢᤰᤛᤢᤖᤥ॥ ᤏᤢ᤺ᤖᤡᤰᤁᤠᤱ ᤐᤣᤛᤧᤳᤇᤧ᤹ᤀᤥ॥” 
ᤁᤖ ᤐᤠᤘᤗᤖᤧ ᤂᤧᤴ ᤋᤡᤗᤡᤱᤃᤠᤜᤠ᤹ ᤔᤧᤳᤋᤢᤛᤡ. “ᤀᤠᤴᤇᤡᤃᤧᤃ ᤖᤥᤔᤡ ᤕᤰᤕᤢᤱᤒᤠᤛᤡᤃᤧᤛᤠᤱ ᤌᤧᤔᤠᤀᤠᤱ ᤋᤢ᤺ᤴᤍᤣ᤹ ᤔᤧ᤺ᤴᤏᤣ ᤔᤏᤠᤗᤢᤶᤔᤥ ᤀᤠᤴᤇᤡᤃᤧ ᤕᤠᤵᤔᤡ ᤋᤧ᤺ᤶᤓᤢᤰ ᤔᤧᤕᤠᤰᤋᤧᤳᤇᤡᤃᤧᤀᤠᤱ ᤐᤢᤱᤗᤠᤜᤡᤶᤔᤥ ᤕᤠᤵᤔᤡ ᤔᤧᤛᤠᤰᤋᤧ॥ ᤀᤠᤸᤗ ᤂᤧᤱᤜᤠ᤹ᤖᤧ ᤛᤫᤠ᤺ᤳᤋᤠᤱ ᤗᤧᤵᤔᤠᤍᤣ᤺ᤔᤠ ᤔᤧᤃᤥ᤺ᤳᤋᤧᤳᤇᤡᤃᤧᤒᤠᤒᤡ᥅ ᤁᤱᤃ ᤐᤥ᤺ᤱᤔᤠ ᤔᤧᤛᤢᤰᤏᤧᤴᤗᤥ᥄ ᤜᤠᤖᤠ᤹ ᤛᤢᤜᤠᤱᤕᤢᤰᤐᤠᤜᤠ᤹ᤀᤣ ᤁᤵᤔᤥ ᤔᤧᤍᤠᤀᤠᤱ ᤔᤧᤗᤧᤳᤇᤡᤃᤧᤖ ᤐᤥ᤺ᤱᤗᤥ॥” 
ᤜᤧᤰᤁᤩᤠᤱ ᤋᤡᤗᤡᤱᤃᤠᤜᤠ᤹ᤖᤧ ᤛᤢᤜᤠᤱᤕᤢᤰᤐᤠᤜᤠ᤹ ᤒᤠᤁᤴ ᤐᤠ᤺ᤴᤜᤠ᤹ ᤔᤧᤔᤧᤳᤋᤢᤛᤡ॥ ᤂᤧᤱᤜᤠ᤹ᤖᤧ ᤐᤠᤘᤗ ᤏᤢ ᤛᤡᤗᤠᤛᤧᤴ ᤖᤥᤔᤡ ᤕᤰᤕᤢᤱᤒᤠᤛᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥ᤺ᤛᤢᤀᤠᤱ ᤂᤧᤱᤜᤠ᤹ ᤔᤧᤃᤡᤛᤧᤖᤥ॥ 
ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥ ᤔᤧᤍᤩᤧᤀᤠᤱ ᤔᤧᤏ᤺ᤶᤛᤡᤱᤗ ᤂᤧᤱᤜᤠ᤹ᤏᤢ ᤗᤧᤵᤔᤡ ᤔᤧᤏᤠ᤺ᤰᤋᤧᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤢᤱᤗᤠᤜᤡᤶᤔᤥᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤛᤡᤀᤠᤱ ᤀᤠᤸᤗ ᤁᤴ ᤕᤧᤰᤕᤰᤁᤥᤗᤠᤶ ᤐᤣᤛᤧᤇᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤛᤡᤖᤥ॥ 
ᤜᤧᤰᤁᤩᤠᤱ ᤐᤠᤘᤗ ᤏᤢ ᤛᤡᤗᤠᤛᤧᤴ ᤂᤧᤵᤔᤥᤗᤠᤶ ᤗᤡᤍᤡᤕᤠᤖᤧ ᤁᤢᤜᤡᤶᤔᤥ ᤐᤣᤛᤡ॥ ᤂᤧᤵᤔᤥ ᤂᤧᤱᤜᤠ᤹ᤖᤧ ᤗᤡᤍᤡᤕᤠ ᤏᤢ ᤘᤣ᤹ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤋᤢᤔᤧᤳᤇᤢᤖ ᤀᤠ᤺ᤴᤇᤡᤱᤔᤠ ᤐᤡᤖᤧᤳᤇᤢᤀᤠᤱ ᤂᤧᤵᤔᤥᤗᤠᤶ ᤐᤣᤛᤡᤖᤥ॥