ᤜᤡᤒᤪᤢ.
4.
ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠ᤺ᤶᤛᤡᤱᤍᤧᤴᤏᤥ ᤗᤠ᤺ᤵᤔᤠ ᤔᤠᤱᤜᤧᤰ ᤘᤠ᤹ᤖᤀᤣ ᤂᤡᤏᤡ᤹ ᤗᤢᤶᤔᤥ ᤀᤠᤳᤋᤡᤴᤜᤠ᤹ᤀᤠᤱ ᤁᤴ ᤔᤠᤱᤜᤧᤰᤁᤡᤴ ᤔᤧᤱᤄᤥ᤺ᤔᤏᤠᤒᤠ ᤔᤧᤶᤒᤥ᤺ᤱᤏᤧᤴᤗ ᤑᤠ᤹ᤀᤠᤱ ᤀᤠᤏᤡ᤹ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤡᤖᤥ॥ 
ᤀᤠᤏᤡ᤹ᤀᤥ ᤁᤢᤀᤡᤛᤡ᤺ᤰᤁᤣ ᤂᤧᤱᤜᤠ᤹ᤖᤥᤀᤠᤱ ᤛᤢᤏᤠᤀᤡᤱ ᤀᤡᤱᤓᤥ᤺ᤛᤧᤀᤠᤱ ᤘᤕᤧ. ᤁᤖ ᤂᤧᤱᤜᤠ᤹ᤖᤧ ᤂᤧᤴ ᤔᤧᤄᤧᤵᤛᤢᤒᤠ ᤐᤠ᤺ᤴᤏᤡᤴ ᤏᤛᤠ᤺ᤴ ᤔᤧᤴᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤌᤣᤀᤠᤱ ᤀᤡᤴᤎᤠ᤺ᤱ ᤔᤧᤱᤄᤥ᤺ᤛᤢᤴᤗᤥ॥ 
ᤁᤖ ᤀᤠᤏᤡ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤰ ᤁᤴ ᤏᤠ᤺ᤶᤛᤡᤱᤍᤧᤴᤏᤥ ᤀᤠᤗᤠ᤺ᤳᤗᤥ॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹. “ᤀᤠᤛᤡᤰ ᤐᤥᤃᤧᤀᤠᤱ ᤂᤧᤱᤜᤠ᤹ᤃ ᤀᤡᤱᤃᤠ᤹ ᤕᤠᤖᤡᤵ ᤆᤥᤃᤢᤱᤒᤠ ᤏᤠ᤺ᤶᤛᤡᤱᤍᤧᤴᤏᤥ ᤀᤠᤵᤑᤠᤸᤗᤧᤀᤠᤱ ᤗᤠ᤺ᤵᤔᤠ ᤔᤧᤱᤄᤥᤏᤧᤴ ᤑᤠ᤹ᤀᤠᤱ ᤔᤠᤱᤜᤧᤰᤛᤡᤱᤅᤠᤱᤗᤥ॥” ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠ᤺ᤶᤛᤡᤱᤍᤧᤴᤏᤡᤱᤃ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤸᤗᤧᤛᤠ ᤆᤥᤃᤧ ᤛᤢᤖᤧᤀᤠᤱ ᤘᤕᤧᤖᤥ॥ 
ᤗᤳᤇᤠ ᤛᤠᤶᤕᤥᤛᤠᤵᤗᤠ ᤗᤰᤁᤥ ᤏᤢᤛᤡᤃᤣ᤺ᤰᤐᤠ ᤕᤧᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤐᤳ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤕᤠ᤺ᤶᤒᤰᤁᤥᤏᤢ ᤏᤢᤛᤡᤃᤣ᤺ᤰᤐᤠ ᤕᤧᤴᤏᤥ ᤏᤠ᤺ᤶᤛᤡᤱᤗᤥ॥” 
ᤜᤧᤰᤁᤩᤠᤱ ᤕᤠᤶᤔᤥ ᤂᤧᤴ ᤘᤣ᤹ᤛ᤻ᤔᤠ ᤗᤰᤁᤥ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢ. “ᤂᤧᤱᤜᤠ᤹ᤃ ᤀᤡᤱᤃᤠ᤹ ᤕᤠᤖᤡᤵ ᤆᤥᤃᤢᤱᤒᤠ ᤏᤠ᤺ᤶᤛᤡᤱᤍᤧᤴᤏᤥ ᤀᤠᤵᤑᤠᤸᤗᤧᤀᤠᤱ ᤗᤠ᤺ᤵᤔᤠ ᤔᤧᤱᤄᤥᤏᤧᤴᤗᤥ॥” 
ᤁᤢᤓᤠᤖᤧᤃ ᤀᤠᤸᤗᤛᤠᤱ ᤂᤧᤴ ᤏᤠ᤺ᤶᤛᤡᤱᤍᤧᤴᤏᤥ ᤗᤠ᤺ᤵᤔᤠ ᤔᤧᤄᤥ᤺ᤛᤢ᤹॥ ᤁᤖ ᤘᤣ᤹ᤜᤠ᤹ᤖᤥᤃ ᤛᤢᤏᤠᤀᤡᤱᤅᤡᤴ ᤋᤃᤡ ᤀᤡᤱᤓᤥ᤺ᤛᤧᤀᤠᤱ ᤘᤕᤧᤛᤠᤱ ᤂᤧᤱᤜᤠ᤹ ᤀᤡᤱᤈᤠ᤺ᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤴᤍᤧᤴᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤔᤧᤴᤗᤠ᤺ᤛᤧᤴᤗᤥ॥ 
ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠ᤺ᤶᤛᤡᤱᤍᤧᤴᤏᤥ ᤗᤠ᤺ᤵᤔᤠ ᤘᤣ᤹ᤛ᤻ᤔᤠ ᤕᤧᤴᤎᤡᤰ ᤏᤡ᤺ᤴᤎᤥ ᤆᤥᤃᤢᤀᤠᤱ ᤘᤠ᤹॥ ᤂᤧᤴ ᤕᤧᤴᤏᤡᤱᤃ ᤀᤠᤀᤡᤴᤏᤣᤖᤥ॥ ᤂᤧᤴ ᤋᤃᤡ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤍᤠᤀᤢᤍ ᤜᤠᤱᤗᤠᤶ ᤂᤢᤏᤧ᤹ ᤕᤖᤡᤰ ᤕᤧᤶ ᤀᤣᤃᤠᤱ ᤕᤠᤶᤔᤥ ᤐᤠ᤺ᤳᤋᤢ. “ᤀᤠᤀᤡᤴ ᤂᤢᤏᤧ᤹ ᤁᤢᤀᤡᤰᤗᤠ᤺ᤴ ᤁᤧᤄᤧᤵᤛᤢᤶᤔᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤀᤡᤴ ᤁᤧᤎ᤺ᤵᤐᤠ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥” 
ᤌᤣᤀᤠᤱᤓᤧᤸᤗᤧ ᤕᤜᤥᤛᤢᤖᤧ ᤂᤧᤱᤜᤠ᤹ ᤁᤴ ᤏᤠ᤺ᤶᤛᤡᤱᤔᤠ ᤋᤧᤴᤏᤡᤴ ᤐᤡᤖᤢᤛᤡᤀᤠᤱ ᤘᤕᤧᤸᤗᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤧᤰᤁᤣᤗ᤹ᤖᤡᤰ ᤘᤣ᤹ᤛ᤻ᤔᤠ ᤏᤠ᤺ᤶᤛᤡᤱ ᤕᤧᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤠᤱᤛᤡ ᤔᤧᤒᤠ᤺ᤳᤋᤢᤴᤒᤠ ᤔᤧᤴ॥ 
ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤏᤠ᤺ᤶᤛᤡᤱ ᤕᤧᤴᤏᤡᤴ ᤋᤠ᤺ᤔᤠ ᤁᤧᤒᤥ᤺ᤱᤒᤠ ᤘᤠ᤹ᤖᤥ॥ 
ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤕᤠ᤺ᤶᤒᤰᤗᤠᤶᤒᤠ ᤏᤠ᤺ᤶᤛᤡᤱᤒᤠ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠ᤺ᤶᤛᤡᤱᤍᤧᤴᤏᤥ ᤁᤧᤗᤠ᤺ᤵᤐᤠᤜᤠ᤹ᤀᤠᤱ ᤂᤢᤏᤡ᤹ ᤕᤠ᤺ᤶᤒᤰᤗᤠᤶᤒᤠ ᤔᤧᤏᤠ᤺ᤶᤛᤡᤱᤗᤥ॥ 
ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤂᤧᤴ ᤏᤠ᤺ᤶᤛᤡᤱᤔᤥ ᤗᤠ᤺ᤵᤔᤠ ᤛᤡᤰ ᤛᤶᤗ ᤏᤡᤱᤘᤠ᤹ ᤆᤥᤃᤢᤶᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤛᤪᤠᤀᤡᤗᤡᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱ ᤔᤧᤓᤣ᤺ᤴᤍᤢᤀᤠᤱ ᤔᤧᤔᤧᤃᤧᤒᤠ ᤁᤢᤀᤡᤛᤡ᤺ᤰ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤶᤔᤧᤰᤏᤧᤴᤗᤖᤥ॥ 
ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤱᤃ ᤁᤢᤜᤡᤱᤘᤧᤳ ᤏᤢ ᤆᤥ᤺ᤰᤛᤠᤶᤒᤠ ᤆᤥ᤺ᤰᤗᤥ॥ ᤂᤧᤱᤃ ᤏᤧᤵᤈᤠᤱ ᤗᤧᤵᤔᤠᤱ ᤁᤢᤕᤠ ᤁᤧᤒᤵᤐᤠ ᤂᤠᤃᤧᤛᤢᤰᤐᤠ ᤋᤠᤓᤣ᤺ᤴᤏᤢ᤺ᤸᤗᤧᤀᤠᤱ ᤂᤠᤃᤧᤛᤢᤰᤐᤠ ᤆᤥ᤺ᤰᤗᤥ॥ ᤂᤧᤸᤗᤧ ᤛᤰᤔᤠᤛᤠᤶᤔᤡᤴᤏᤢ ᤕᤠᤶᤛᤠᤶᤔᤡᤴ ᤛᤧᤴᤍᤢ᤹ ᤜᤧᤰᤁᤩᤠᤱ ᤕᤧᤵᤐᤠᤸᤗᤧ ᤁᤢᤍᤢᤶᤒᤧ᤹ ᤏᤢ ᤁᤢᤛᤡ᤺ᤴ ᤗᤛ᤻ᤛᤢᤀᤠᤱ ᤛᤧᤴᤍᤢ᤹॥ ᤀᤠᤏᤡ᤹ ᤏᤡᤱᤘᤠ᤹ᤛᤢᤶᤔᤡᤴ ᤏᤢ ᤏᤡᤱᤘᤠ᤹ ᤀᤡ᤺ᤵᤔᤠᤴ ᤛᤧᤶᤔᤠ ᤛᤢᤰᤋᤢ᤹ᤖᤥ॥ 
ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥᤗᤠᤶᤒᤠ ᤁᤠᤰ ᤏᤠᤘᤠᤃᤧᤴ ᤆᤀᤡ᤺ᤳᤋᤥ ᤌᤧᤔᤠ᤺ᤴᤏᤠᤱ ᤆᤡᤱᤛᤡᤱᤔᤠ ᤔᤧᤛᤢᤰᤏᤧᤴᤗᤥ॥ ᤂᤢᤏᤧ᤹ ᤁᤢᤍᤃᤡ ᤁᤠᤰ ᤐᤠ᤺ᤴᤜᤠ᤹ ᤏᤢ᤺ᤖᤡᤰᤁᤠᤱ ᤏᤡᤎᤠ᤺ᤵᤗᤥ. ᤜᤧᤰᤁᤩᤠᤱ ᤀᤠᤏᤡ᤹ ᤀᤠᤈᤥᤃᤢᤶᤒᤠ ᤁᤠᤰ ᤐᤠ᤺ᤴᤜᤠ᤹ᤖᤧᤴ ᤂᤠᤖᤠ᤺ᤳ ᤂᤢᤏᤧ᤹ᤀᤣ ᤀᤠᤏᤡ᤹ ᤐᤡᤔᤠ ᤐᤥ᤺ᤱᤗᤥ॥ 
ᤀᤠᤸᤗ. ᤀᤠᤏᤡ᤹ ᤋᤧᤴᤍᤡᤱ ᤀᤠᤈᤥᤃᤢᤶᤒᤠ ᤏᤛᤠ᤺ᤴᤏᤡᤴ ᤌᤖᤢᤶᤗᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤒᤣ᤺ᤰᤐᤠᤀᤠᤱ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤛᤠ᤺ ᤕᤧᤛᤢ ᤐᤕᤶ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴ ᤀᤠᤏᤡ᤹ ᤀᤠᤃᤳᤋᤢᤶᤗᤥ॥ 
ᤀᤠᤏᤡ᤹ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤀᤠᤴᤈᤥ᤺ᤰᤏᤧᤶᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤀᤠᤱ ᤀᤠᤏᤡ᤹ ᤜᤧᤰᤁᤣᤀᤣ ᤁᤠᤰ ᤐᤖᤡᤰᤐᤠ ᤜᤱᤛᤠ᤹ᤔᤠᤴ ᤋᤠ᤺ᤰᤋᤢ. ᤁᤖ ᤂᤢᤏᤧ᤹ ᤗᤠᤕᤥ ᤔᤧᤈᤥᤃᤢᤴᤗᤥ॥ 
ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤔᤧᤱᤃᤡᤀᤣ ᤔᤧᤴᤏᤢ᤺ᤴᤏᤣ ᤗᤢᤱᤃᤢᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤠᤱᤕᤢᤰᤏᤠᤀᤥ ᤋᤩᤧ᤹ᤀᤡᤖᤥ॥ ᤂᤧᤵᤔᤥᤃ ᤀᤠᤏᤡ᤹ ᤆᤠᤜᤠᤒᤥ ᤀᤠᤎᤠ᤺ᤸᤗᤧ ᤁᤢᤓᤠ᤹ ᤂᤥ᤺ᤔᤠ ᤑᤠ᤹ᤀᤠᤱ ᤗᤢᤱᤍᤢᤰ ᤏᤢ ᤗᤢᤱᤃᤢᤶᤔᤡᤴ ᤀᤠᤄᤥ᤺ᤛᤢᤶᤗᤥ॥