ᤜᤡᤒᤪᤢ.
7.
ᤁᤴ ᤔᤸᤁᤡᤛᤧᤍᤧᤰᤁᤡᤱᤃ ᤛᤠᤗᤧᤶ ᤕᤧᤰᤕᤰᤐᤠ ᤜᤠᤱ ᤏᤢ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤘᤕᤧᤖᤥ॥ ᤀᤒᤪᤠᤜᤠᤶᤔᤡᤸᤗᤧ ᤜᤠᤱᤜᤠ᤹ ᤌᤱ ᤌᤰᤔᤠ ᤏᤠ᤺ᤴᤍᤢᤛᤡᤀᤠᤱ ᤏᤢ᤺ᤰᤂᤧᤖ ᤐᤳᤇᤧᤸᤗᤧ ᤔᤸᤁᤡᤛᤧᤍᤧᤰᤁᤡᤸᤗᤧ ᤂᤢᤏᤧ᤹ ᤋᤢᤔᤢᤀᤠᤱ ᤔᤢ᤹ᤀᤡᤛᤠᤶ ᤐᤡᤖᤢ॥ 
ᤜᤧᤰᤁᤩᤠᤱ ᤀᤒᤪᤠᤜᤠᤔᤖᤧᤀᤠᤱ ᤜᤠᤱᤜᤠ᤹ ᤏᤠᤵᤋᤢᤛᤡᤒᤠ ᤁᤠᤰ ᤆᤡᤃ᤺ᤰᤘᤠᤜᤠ᤹ᤖᤧᤴ ᤌᤡᤒᤥ᤺ᤱᤗᤰ ᤂᤢᤏᤧ᤹ ᤐᤡᤖᤢᤖᤥ॥ ᤔᤸᤁᤡᤛᤧᤍᤧᤁᤖᤧ ᤁᤢᤔᤡᤱᤅᤡᤸᤗᤧ ᤁᤢᤒᤣ᤺ᤱᤃ “ᤛᤠᤶᤕᤥᤏᤡᤒᤠ ᤜᤠᤱ” ᤐᤥ᤺ᤱ. ᤜᤧᤰᤁᤩᤠᤱ ᤛᤠᤗᤣᤶᤔᤥᤒᤠ ᤜᤠᤱᤖᤧ ᤁᤢᤒᤣ᤺ᤱᤃ “ᤛᤏᤠᤖᤢᤱ ᤜᤠᤱ” ᤐᤥ᤺ᤱᤗᤥ॥ 
ᤂᤢᤏᤧ᤹ ᤁᤢᤶᤒᤠ. ᤁᤢᤶᤔᤠ. ᤁᤢᤛᤢᤎᤧᤒᤠ ᤁᤢᤎᤠ᤺ᤰᤌᤧᤒᤠᤜᤠ᤹ ᤜᤧᤰᤁᤩᤠᤱ ᤁᤢᤛᤠᤘᤠ᤺ᤴᤇᤡᤱᤔᤠᤴ ᤏᤢ ᤁᤢᤛᤡ᤺ᤔᤠᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤛᤠᤵᤋᤧᤒᤠ ᤜᤥ᤺ᤵᤗᤥ॥ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤛᤠ᤺ ᤁᤢᤀᤡᤛᤡ᤺ᤰ ᤛᤍᤠᤍᤡᤱ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤖᤥ॥ 
ᤀᤠᤸᤗ ᤔᤸᤁᤡᤛᤧᤍᤧᤰᤁᤡᤴ ᤀᤠᤏᤡ᤹ ᤋᤠᤰᤌᤧᤒᤠ ᤀᤒᤪᤠᤜᤠᤔᤖᤧᤀᤣ ᤜᤠᤱᤜᤠ᤹ ᤏᤠᤵᤋᤢᤛᤡᤒᤠ ᤁᤠᤰ ᤐᤠ᤺ᤴᤜᤠ᤹ᤖᤧᤴ ᤌᤡᤒᤥ᤺ᤱᤗᤰ ᤐᤡᤖᤢᤒᤠᤸᤗᤧ ᤂᤢᤏᤧ᤹ ᤀᤠᤰᤂᤧᤴ ᤕᤶᤒᤠ ᤆᤥᤃᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥ 
ᤀᤠᤸᤗ ᤏᤡᤱᤘᤠ᤹ᤑᤢᤛᤠᤶᤒᤠ ᤗ᤹ᤖᤡᤰ ᤛᤣ᤺ᤰᤕᤢᤰ ᤁᤧᤒᤥ᤺ᤱᤒᤠ ᤗᤧᤒᤡᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤑᤢ᤹ᤏᤢᤛᤠ᤹ ᤀᤒᤪᤠᤜᤠᤔᤖᤧ ᤁᤢᤔᤢᤀᤡᤍᤠᤱᤛᤠᤜᤠ᤹ᤗᤠᤶᤒᤠᤀᤣ ᤌᤡᤒᤥ᤺ᤱᤗᤰ ᤋᤠ᤺ᤰᤔᤠ ᤛᤠᤶᤕᤥᤌᤡᤶᤔᤡᤸᤗᤧ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥ 
ᤁᤖ ᤁᤴ ᤔᤸᤁᤡᤛᤧᤍᤧᤰᤁᤡᤱᤃ ᤗᤧᤒᤡᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤜᤥ᤺ᤵᤋᤧᤛᤠᤱ ᤂᤧᤸᤗᤧ ᤀᤒᤪᤠᤜᤠᤔᤗᤠᤶ ᤌᤡᤒᤥ᤺ᤱᤗᤰ ᤋᤠ᤺ᤰᤋᤢᤀᤠᤱ ᤔᤠᤱᤜᤧᤰ ᤁᤧᤄᤥ᤺ᤒᤠ ᤀᤒᤪᤠᤜᤠᤶᤔᤡᤴ ᤔᤢ᤹ᤀᤡᤛᤠᤶ ᤌᤠ᤺ᤛᤢ ᤐᤡᤖᤢᤖᤥ॥ 
ᤀᤠᤸᤗ ᤆᤢᤰᤐᤠ ᤔᤏᤠ᤺ᤸᤗᤧ ᤕᤶᤒᤠᤗᤠᤶ ᤔᤢ᤹ᤀᤡᤛᤠᤶ ᤂᤥ᤺ᤛᤢ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤳᤋᤡᤸᤗᤧᤀᤠᤱ ᤔᤧᤀᤳᤋᤢᤴᤗᤥ॥ 
ᤁᤧᤛᤡ᤺ᤒᤠ ᤁᤧᤒᤣ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤌᤡᤒᤥ᤺ᤱᤗᤰ ᤔᤧᤍᤠ᤺ᤰᤋᤢ. ᤁᤖ ᤔᤸᤁᤡᤛᤧᤍᤧᤰᤁᤡᤱᤃ ᤂᤧᤱᤜᤠ᤹ᤏᤢ᤺ᤸᤗᤧᤀᤠᤱ ᤕᤶᤒᤠ ᤆᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤍᤠᤍᤡᤱ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠ ᤗ᤹ᤖᤡᤰ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤀᤠᤔᤧᤳᤗᤥ॥ 
ᤜᤧᤰᤁᤩᤠᤱ ᤌᤡᤒᤥ᤺ᤱᤗᤰ ᤁᤧᤍᤠ᤺ᤰᤐᤠ ᤗᤧᤒᤡ᤺ᤸᤗᤧ ᤀᤒᤪᤠᤜᤠᤶᤗᤠᤶᤒᤠ ᤌᤡᤒᤥ᤺ᤱᤗᤰ ᤔᤸᤁᤡᤛᤧᤍᤧᤰᤁᤡᤴ ᤜᤢᤅᤢᤖᤥ ᤐᤠ᤺ᤵᤔᤠᤀᤠᤱ ᤀᤠᤛᤢᤰᤋᤢᤶᤗᤥ. 
ᤌᤣᤀᤠᤱᤓᤧᤸᤗᤧ ᤔᤸᤁᤡᤛᤧᤍᤧᤁᤖᤧ ᤀᤒᤪᤠᤜᤠᤶᤔᤡᤴ ᤋᤢᤔᤢᤸᤗᤧ ᤗᤧᤒᤡ᤺ᤱᤃ ᤛᤠᤔᤧᤴᤘᤠ᤺ᤴᤇᤡᤱᤅᤣ ᤘᤕᤧ ᤁᤖ ᤋᤠ᤺ᤴᤍᤡ ᤀᤒᤪᤠᤜᤠᤔᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤐᤥ᤺ᤱᤗᤥ॥ 
ᤜᤠᤖᤢᤏᤖᤧ ᤁᤢᤎᤠ᤺ᤰ ᤗᤧᤒᤡᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤕᤢᤰ ᤔᤧᤄᤥ᤺ᤛᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤗᤠᤶ ᤔᤏᤠᤜᤠ᤹ᤖᤧ ᤛᤠᤶᤕᤥᤌᤡᤶ ᤔᤧᤄᤥ᤺ᤛᤢᤀᤠᤱ ᤔᤧᤘᤕᤧ॥ ᤀᤠᤸᤗ ᤜᤠᤖᤢᤏᤖᤧ ᤁᤢᤎᤠ᤺ᤰᤗᤠᤶᤒᤠᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤸᤗᤧ ᤔᤏᤠᤜᤠ᤹ ᤁᤢᤗᤡᤱᤎᤥ ᤁᤧᤵᤔᤠ ᤛᤢᤰᤋᤢᤛᤡᤀᤠᤱ ᤘᤕᤧᤸᤗᤧᤃ ᤔᤸᤁᤡᤛᤧᤍᤧᤁ ᤁᤢᤀᤡᤛᤡ᤺ᤰᤐᤠ ᤘᤣ᤹ᤛ᤻ᤔᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤆᤠᤜᤠᤒᤠ ᤔᤧᤈᤥᤃᤧᤶᤒᤠᤔᤧᤴᤗᤥ॥ 
ᤜᤧᤰᤁᤩᤠᤱ ᤘᤣ᤹ ᤐᤖᤡᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤋᤠ᤺ᤸᤗᤧ ᤛᤠᤶᤕᤥᤌᤡᤶᤔᤡᤴᤏᤠᤱ ᤗᤧᤰᤔᤠᤀᤣ ᤐᤥ᤺ᤱᤗᤥ॥ 
ᤀᤠᤏᤡᤃᤧ ᤐᤠ᤺ᤳᤋᤢᤶᤒᤧᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤘᤣ᤹ᤛ᤻ᤔᤠ ᤌᤠ᤺ᤰᤗᤠᤶᤒᤠᤒᤠᤖᤥ. ᤁᤖ ᤂᤧᤴ ᤌᤠ᤺ᤰᤁᤥᤗᤠᤶ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤔᤧᤘᤠ᤹ᤖᤥ॥ 
ᤀᤠᤏᤡ᤹ ᤍᤠᤱᤒᤠᤱᤃ ᤕᤜᤢᤍᤠ᤺ᤸᤗᤧ ᤁᤢᤎᤠ᤺ᤰᤗᤠᤶᤒᤠ ᤛᤠᤘᤠ᤺ᤴᤇᤡᤱᤅᤧᤒᤠ ᤑᤠ᤹ᤀᤠᤱ ᤁᤧᤖᤧᤰᤗᤧ ᤔᤧᤏᤡ᤺ᤛᤢᤀᤣᤖᤥ ᤁᤖ ᤕᤜᤢᤍᤠ᤺ᤸᤗᤧ ᤁᤢᤎᤠ᤺ᤰᤗᤠᤶᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤛᤣ᤺ᤰᤔᤏᤠᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤥᤛᤠᤖᤧ ᤌᤣᤀᤠᤱ ᤔᤧᤒᤠ᤺ᤳᤋᤢᤴᤗᤥ॥ 
ᤀᤠᤸᤗ ᤔᤸᤁᤡᤛᤧᤍᤧᤁ ᤁᤢᤀᤡᤛᤡ᤺ᤰᤐᤠ ᤘᤣ᤹ᤛ᤻ᤔᤠ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤋᤠ᤺ᤸᤗᤧ ᤁᤴ ᤛᤠᤶᤕᤥᤌᤡᤶ ᤗᤧᤰᤋᤧᤒᤠ ᤐᤠ᤺ᤴᤏᤡᤴ ᤀᤠᤸᤗᤛᤠᤱ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤋᤧᤳᤗᤥ॥ 
ᤂᤢᤏᤧ᤹ᤃ ᤔᤧᤴᤇᤠᤶ ᤌᤠ᤺ᤰᤐᤠ ᤛᤠᤰᤌᤡᤶ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤰᤂᤧᤒᤠ ᤔᤧ᤺ᤴ. ᤁᤖ ᤔᤧᤶᤔᤧᤰᤔᤏᤠᤒᤠ ᤜᤡᤱᤔᤴᤗᤧᤴ ᤔᤢᤰᤛᤠᤶᤗᤠᤶᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤰᤂᤧᤒᤠᤖᤥ॥ 
ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ. “ᤂᤧᤏᤧ᤹ᤃ ᤔᤸᤁᤡᤛᤧᤍᤧᤁ ᤁᤢᤀᤡᤛᤡ᤺ᤰᤐᤠ ᤛᤍᤠᤍᤡᤱ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤏᤧᤖᤥ॥” 
ᤀᤰᤂᤣᤗ᤹ᤖᤡᤰ ᤋᤃᤡᤛ᤻ᤔᤠ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤡᤴ ᤂᤠᤖᤥ᤺ᤳᤋᤡ ᤐᤥ᤺ᤰᤂᤧᤀᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤌᤣᤀᤠᤱ ᤆᤥ᤺ᤰᤔᤠ ᤔᤧᤴᤇᤢᤰᤔᤏᤠ ᤏᤢ ᤕᤖᤡᤰ ᤁᤢᤛᤢᤶᤔᤧᤴᤍᤶᤔᤏᤠᤒᤠ ᤆᤥᤃᤧᤖᤥ॥ 
ᤛᤠᤶᤕᤥᤌᤡᤶᤔᤡᤸᤗᤧ ᤌᤣᤀᤠᤱ ᤁᤢᤗᤡᤱᤎᤥ ᤁᤧᤵᤔᤠ ᤔᤧᤛᤢᤰᤋᤢᤴ. ᤁᤖ ᤏᤡᤱᤛᤠᤱ ᤀᤠᤈᤥᤃᤢᤶᤒᤠ ᤐᤠ᤺ᤴᤏᤡᤴ ᤂᤧᤴᤏᤢ᤺ᤸᤗᤧᤀᤠᤱ ᤏᤢ᤺ᤒᤠ ᤆᤥ᤺ᤰ. ᤜᤧᤰᤁᤩᤠᤱ ᤂᤧᤸᤗᤧᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤣᤛᤠᤱ ᤀᤠᤍᤣ᤹ᤖᤥ॥ 
ᤂᤪᤡᤛ᤻ᤋᤧᤴ ᤛᤍᤠᤍᤡᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤱᤗᤥ ᤗ᤹ᤖᤡᤰ ᤔᤠᤱᤜᤧᤰᤛᤡᤱᤗᤥ. ᤁᤖ ᤘᤣ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤗᤠᤃᤡ ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤧᤰᤁᤣᤗ᤹ᤖᤡᤰ ᤔᤠᤱᤔᤧᤜᤧᤰᤛᤡᤱᤅᤡᤴᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥᤖᤰ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ. “‘ᤂᤧᤏᤧ᤹ᤃ ᤛᤍᤠᤍᤡᤱ ᤏᤡᤱᤘᤠ᤹ᤑᤢᤛᤠᤶᤒᤠᤏᤧᤖᤥ’ ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤀᤠᤱ ᤀᤠᤏᤡᤱᤘᤠ᤹ ᤔᤧᤗᤧᤱᤅᤠᤴᤗᤥ ᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤴ ᤔᤠᤱᤜᤧᤰᤛᤡᤱᤅᤠᤱ ᤘᤠ᤹ᤖᤥ॥” 
ᤒᤠ ᤁᤴ ᤔᤠᤱᤜᤧᤰᤁᤡᤸᤗᤧ ᤆᤥᤃᤢᤸᤗᤧ ᤋᤃᤡᤒᤠ ᤔᤠᤱᤜᤢᤵᤐᤡᤴᤏᤢ᤺ᤸᤗᤧᤀᤠᤱ ᤐᤏᤢᤏᤢ᤺ᤒᤠ ᤔᤠᤱᤜᤢᤵᤐᤡᤴ ᤕᤧᤛᤢᤖᤧᤀᤣ ᤏᤡ᤺ᤴᤎᤥ ᤆᤥᤃᤢᤀᤠᤱ ᤘᤠ᤹ᤖᤥ॥ 
ᤋᤃᤡᤛ᤻ᤔᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤕᤖᤡᤰ ᤔᤧᤘᤕᤧ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤧᤛᤩᤧᤀᤠᤱ ᤛᤍᤠᤍᤡᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴᤗᤥ॥ 
ᤁᤖ ᤕᤧᤛᤢ᤺ᤴ ᤀᤠᤵᤑᤠᤸᤗᤧᤀᤠᤱ ᤔᤧᤛᤡ᤺ᤏᤧᤴᤒᤠᤸᤗᤧ ᤆᤥᤃᤢᤸᤗᤧ ᤛᤍᤠᤍᤡᤱᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤱᤗᤥ॥ 
ᤂᤧᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤁᤧᤍᤠ᤺ᤒᤠᤜᤠ᤹ ᤂᤢᤏᤧ᤹ ᤛᤍᤠᤍᤡᤱ ᤋᤠᤱᤛᤧ᤺ᤵᤔᤠ ᤛᤢᤰᤋᤢᤛᤡ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤗᤠᤃᤡ ᤐᤣᤗᤡᤃᤧᤴ ᤋᤢᤘᤠ ᤆᤥ᤺ᤰᤛᤧ ᤛᤍᤠᤍᤡᤱ ᤜᤡᤱᤗᤥ॥ 
ᤂᤢᤏᤧ᤹ᤃ ᤀᤠᤏᤡ᤹ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤛᤣᤛᤣ ᤏᤢ ᤑᤥᤋᤩᤠ ᤔᤧ᤺ᤴᤏᤣ. ᤗᤠᤕᤥ᤺ᤸᤗᤧ ᤔᤧᤍᤧᤳᤋᤢᤶᤒᤠ ᤆᤥ᤺ᤰᤗᤥ॥ ᤂᤢᤏᤧ᤹ᤃ ᤗᤠᤕᤥᤒᤠᤜᤠ᤹ᤗᤠᤶ ᤛᤧᤴᤍᤧᤀᤠᤱ ᤘᤠ᤹ ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤠᤰᤏᤢ᤺ᤸᤗᤧ ᤕᤶᤒᤠ ᤔᤡᤱᤛᤥ ᤀᤡᤱᤎᤠ᤺ᤱᤗᤧ ᤕᤢᤰᤏᤠ᤺ᤴ ᤂᤥ᤺ᤛᤢᤀᤠᤱ ᤘᤠ᤹ᤖᤥ॥ 
ᤂᤢᤏᤧ᤹ᤃ ᤘᤣ᤹ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤁᤢᤀᤡᤛᤡ᤺ᤰ ᤌᤡᤰᤕᤠ᤺ᤴᤎᤰ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤔᤧᤒᤥ᤺ᤱᤏᤧᤸᤗᤥ॥ ᤂᤧᤱᤜᤠ᤹ᤖᤧᤃ ᤁᤠᤰᤏᤢ᤺ᤸᤗᤧ ᤋᤃᤡ ᤀᤠᤒᤠᤅᤣ ᤗᤠᤕᤥᤜᤠ᤹ᤖᤧ ᤗᤠᤃᤡ ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤜᤠ᤹ᤖᤧ ᤗᤠᤃᤡ ᤛᤡᤍᤢᤱᤈᤓᤠ ᤔᤧᤈᤥᤃᤢᤖᤥ॥ ᤁᤖ ᤕᤧᤛᤢᤖᤧᤃ ᤌᤡᤰᤗᤧᤱᤔᤠᤀᤥ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤐᤡᤛᤧ ᤀᤠᤒᤠᤅᤣ ᤋᤥ᤺ᤴᤇᤡᤱᤅᤠᤱ ᤛᤡᤍᤢᤱᤈᤓᤠ ᤐᤥ᤺ᤰᤂᤧᤖᤥ॥ 
ᤛᤠᤶᤕᤥᤌᤡᤶᤔᤡᤸᤗᤧ ᤐᤠ᤺ᤴ ᤑᤣ᤺ᤶᤔᤠ ᤁᤧᤛᤢᤰᤐᤠ ᤔᤧᤴᤇᤠᤶ ᤕᤠᤵᤔᤡ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤣ᤺ᤰᤕᤢᤰ ᤆᤥᤃᤢᤛᤡ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤌᤡᤶ ᤐᤡᤖᤢᤛᤡᤀᤠᤱ ᤀᤣᤃᤠᤱ ᤔᤠᤱᤜᤧᤰᤛᤡᤱᤒᤠ ᤐᤠ᤺ᤴᤏᤡᤸᤗᤧ ᤀᤠᤒᤠᤅᤣ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤛᤍᤠᤍᤡᤱᤗᤧ ᤗᤠᤃᤡ ᤁᤢᤗᤡᤱᤎᤥ ᤁᤧᤳᤋᤢᤀᤠᤱ ᤛᤣ᤺ᤰᤕᤢᤰ ᤆᤥᤃᤢᤖᤥ॥