ᤜᤡᤒᤪᤢ. 10. ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶᤔᤡᤱᤃ ᤋᤠ᤺ᤴᤍᤡ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤏᤢ᤺ᤒᤠ ᤐᤠ᤺ᤴᤜᤠ᤹ ᤀᤥᤛᤣ᤺ᤴᤁᤧᤎᤠᤰᤐᤠ ᤛᤠᤶᤒᤪᤡ᤺ᤵᤐᤠ ᤁᤢᤀᤡᤛᤡ᤺ᤰᤗᤰᤗᤥ. ᤛᤧᤰᤂᤠᤒᤠ ᤐᤠ᤺ᤴ ᤔᤧ᤺ᤴᤗᤥ॥ ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤔᤡᤸᤗᤧ ᤏᤠ᤺ᤰᤋᤢᤒᤠ ᤋᤱᤒᤣ ᤌᤵᤔᤣ ᤀᤧᤳᤗᤧᤱ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤂᤧᤴ ᤛᤣᤛᤣ ᤔᤠᤱᤃᤧᤄᤒᤠᤜᤠ᤹ ᤀᤠᤵᤑᤠᤸᤗᤧᤀᤠᤱ ᤁᤢᤗᤡᤱᤎᤥ ᤔᤧᤃᤧᤳᤋᤢᤴᤇᤡᤴᤗᤥ॥ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤗᤡᤱᤎᤥ ᤁᤧᤵᤔᤠ ᤛᤢᤰᤋᤢᤛᤡᤸᤗᤧᤃ ᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤆᤰ ᤗ᤹ᤖᤧᤒᤠᤖᤥ॥ ᤜᤧᤰᤁᤣ᤺ᤸᤗᤧ ᤛᤣᤘᤠ ᤁᤧᤈᤥ᤺ᤰᤐᤠᤜᤠ᤹ ᤌᤡᤰᤗᤧᤱᤔᤥ ᤁᤠᤰ ᤐᤖᤡᤰᤗᤧ ᤛᤢᤳᤌᤥ ᤔᤧᤒᤥ᤺ᤰᤂᤧᤔᤧᤴ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤗᤠᤕᤥ ᤔᤧᤈᤥᤃᤢᤸᤗᤧ ᤂᤢᤏᤡ᤹ ᤏᤡᤱᤘᤠ᤹ ᤔᤧᤗᤥ᤺ᤖᤧᤴᤒᤠᤔᤧᤴ॥ ᤁᤖ ᤂᤧᤴ ᤛᤡᤍᤢᤱᤈᤓᤠᤜᤠ᤹ᤖᤧ ᤗᤠᤕᤥ᤺ᤴ ᤋᤱᤒᤣ ᤌᤵᤔᤣ ᤏᤡᤱᤘᤠ᤹ᤛᤢᤶᤔᤥ ᤋᤠᤖᤢᤖᤥ. ᤌᤣᤀᤠᤱᤓᤧᤸᤗᤧ ᤁᤢᤶᤒᤠᤒᤠ ᤐᤡᤳ ᤏᤢ ᤔᤧᤴᤍᤠᤰ ᤔᤠᤰᤂᤡ᤹ᤀᤡᤸᤗᤧ ᤗᤠᤕᤥᤜᤠ᤹ ᤘᤠᤍᤣ᤹ᤔᤠ ᤔᤧᤛᤢᤰᤋᤢᤴᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤪᤡᤛ᤻ᤋᤧᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤧ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤰᤂᤣ ᤔᤧᤳᤋᤢ. “ᤛᤡᤍᤢᤱᤈᤓᤠ ᤏᤢ ᤆᤥᤓᤠ᤹ᤜᤠ᤹ ᤂᤧᤏᤧ᤹ ᤏᤡᤱᤘᤠ᤹ ᤁᤧᤴᤈᤥᤃᤢᤴᤗᤥ. ᤁᤖ ᤏᤠᤛᤡᤱᤃᤧᤴ ᤌᤰᤁᤡᤴ ᤋᤥ᤺ᤶᤔᤠ ᤑᤠ᤹ᤀᤠᤱ ᤁᤧᤒᤡᤖᤠᤱᤗᤥ॥ ᤔᤡᤎᤡᤱᤔᤏᤠᤀᤠᤱ ᤋᤥ᤺ᤶᤔᤏᤠᤒᤠ ᤏᤢ ᤗᤠᤕᤥᤖᤧ ᤗᤠᤃᤡ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ᤖᤧ ᤂᤧᤏᤧ᤹ ᤁᤧᤏᤡᤱᤘᤠ᤹ ᤔᤧᤍᤩᤧᤏᤧᤴᤗᤥ॥ ᤜᤧᤰᤁᤩᤠᤱ ᤕᤠᤶᤔᤥ ᤀᤡᤱᤃᤠ᤹ ᤐᤠ᤺ᤳᤋᤢᤱ. ‘ᤀᤥᤔᤧᤳᤋᤧ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤣ. ᤛᤠᤶᤕᤥᤛᤠᤵᤗᤠᤀᤥ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤛᤠᤵᤋᤧᤀᤠᤱ ᤐᤵᤐᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ ᤁᤧᤏᤡᤱᤘᤠ᤹ ᤜᤧᤰᤁᤣ ᤆᤥ᤺ᤰᤛᤧ ᤁᤵᤔᤥ ᤋᤩᤠᤱᤅᤠᤱ ᤘᤠ᤹ᤀᤠᤖᤥ॥’” ᤂᤪᤡᤛ᤻ᤋᤖᤧ ᤋᤃᤡ ᤐᤠ᤺ᤳᤋᤢ. “ᤂᤧᤏᤧ᤹ ᤛᤡᤍᤢᤱᤈᤓᤠ ᤏᤢ ᤋᤥ᤺ᤶᤔᤏᤠᤒᤠ ᤜᤧᤰᤁᤩᤠᤱ ᤔᤡᤎᤡᤱᤔᤏᤠᤀᤠᤱ ᤋᤥ᤺ᤶᤔᤏᤠᤒᤠ ᤏᤢ ᤗᤠᤕᤥᤖᤧ ᤗᤠᤃᤡ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ ᤋᤠ᤺ᤰᤔᤠ ᤏᤡᤱᤘᤠ᤹ ᤁᤧᤴᤈᤥᤃᤢᤴᤗᤥ ᤜᤧᤰᤁᤩᤠᤱ ᤁᤧᤏᤡᤱᤘᤠ᤹ᤀᤠᤱ ᤔᤧᤍᤩᤧᤏᤧᤴᤗᤥ॥” (ᤜᤧᤰᤁᤣᤛᤠᤱ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ ᤔᤧᤍᤥ᤺ᤴᤍᤢᤖᤥ)॥ ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢ. “ᤀᤥᤔᤧᤳᤋᤧ᤹ᤀᤥ. ᤀᤡᤱᤃᤠ᤹ ᤁᤧᤏᤡᤱᤘᤠ᤹ ᤜᤧᤰᤁᤣ ᤆᤥ᤺ᤰᤛᤧ ᤁᤵᤔᤥ ᤋᤩᤠᤱᤅᤠᤱ ᤘᤠ᤹ᤀᤠᤖᤥ॥” ᤂᤢᤏᤧ᤹ ᤁᤢᤛᤱ ᤔᤠᤱᤜᤢᤵᤐᤡᤴ ᤕᤢᤰᤛᤡᤱ ᤆᤥ᤺ᤰᤛᤧ ᤋᤃᤡᤛ᤻ᤔᤠ ᤔᤠᤱᤜᤢᤵᤐᤡᤴ ᤂᤠᤖᤥ᤺ᤳᤋᤡ ᤆᤥᤃᤢᤖᤥ॥ ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ᤗᤠᤶᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤏᤠᤛᤡᤱᤃᤧᤴ ᤁᤢᤎᤰᤁᤡᤴ ᤌᤡᤰᤗᤧᤱᤔᤥ ᤛᤍᤠᤍᤡᤱᤗᤧ ᤗᤠᤃᤡ ᤋᤥ᤺ᤴᤍᤢᤒᤠ ᤛᤡᤍᤢᤱᤈᤓᤠᤗᤠᤶ ᤀᤠᤏᤡ᤹ ᤛᤣᤛᤣ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤠ᤹ᤖᤥ॥ ᤋᤃᤡᤒᤠ ᤔᤠᤱᤜᤢᤵᤐᤥᤃ ᤏᤡᤱᤘᤠ᤹ᤑᤢᤛᤠᤶᤒᤠ ᤁᤧᤖᤧᤰᤗᤧ ᤌᤡᤰᤕᤠ᤺ᤴᤎᤰ ᤛᤠᤶᤕᤥᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤖ ᤗᤳᤇᤠ ᤐᤖᤡᤰᤐᤠ ᤛᤡᤍᤢᤱᤈᤓᤠ᤺ᤴ ᤀᤧᤳᤗᤧᤱ ᤔᤧᤍᤥ᤺ᤴᤍᤢᤖᤥ. ᤁᤖ ᤂᤧᤸᤗᤧᤃ ᤀᤠᤵᤑᤠᤸᤗᤧᤀᤠᤱ ᤗᤠᤕᤥ᤺ᤴ ᤋᤣ᤹ᤔᤠ ᤔᤧᤛᤢᤰᤋᤢᤴᤗᤥ॥ ᤁᤖ ᤀᤠᤏᤡ᤹ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤕᤧᤛᤢ ᤂᤪᤡᤛ᤻ᤋᤖᤧᤃ ᤏᤡᤱᤘᤠ᤹ᤑᤢᤔᤠᤱᤅᤥ ᤌᤡᤰᤗᤧᤱᤔᤥ ᤛᤍᤠᤍᤡᤱᤗᤧ ᤗᤠᤃᤡ ᤗᤠᤕᤥ᤺ᤴ ᤋᤣ᤹ᤔᤠ ᤑᤠ᤹ᤀᤠᤱ ᤀᤠᤒᤠᤅᤣ ᤛᤡᤍᤢᤱᤈᤓᤠ ᤐᤥ᤺ᤰᤂᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤛᤡᤱᤗᤥ॥ ᤂᤧᤴ ᤕᤧᤶᤔᤠᤱᤎᤥ ᤂᤢᤏᤧ᤹ ᤁᤢᤏᤡᤱᤔᤡᤜᤠ᤹ ᤁᤢᤕᤢᤰᤁᤥ ᤔᤧᤴᤍᤠ᤺ᤳᤇᤡᤱᤅᤣ ᤌᤠᤖᤡᤰ ᤜᤠᤱᤄᤢᤛᤡᤖ ᤕᤢᤱᤗᤥ॥ ᤌᤣᤀᤠᤱᤓᤧᤸᤗᤧ ᤁᤴ ᤗᤳᤌᤡᤰ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤕᤥᤗᤠᤶ ᤛᤣᤛᤣ ᤁᤧᤒᤥ᤺ᤱᤒᤠᤖ ᤁᤧᤒᤵᤐᤠᤜᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤆᤥᤃᤢᤛᤡᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧᤀᤠᤱ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤏᤡ᤹ ᤀᤰᤂᤣ ᤀᤠᤔᤧᤳᤗᤥ. “ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ. ‘ᤂᤧᤴ ᤀᤣᤃᤠᤱ ᤂᤧᤱᤜᤠ᤹ᤏᤢ ᤆᤥᤃᤢᤱᤒᤠ ᤁᤢᤛᤱ ᤔᤠᤱᤜᤢᤵᤐᤡᤴ ᤒᤠ ᤁᤴᤗᤥ–ᤀᤡᤱᤃᤠ᤹ ᤀᤠᤎᤡᤶᤜᤠ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰᤗᤢᤱᤔᤥ ᤕᤢᤰᤂᤢᤱ ᤐᤡᤖᤢᤱᤛᤡᤱ. ᤜᤧᤰᤁᤩᤠᤱ ᤂᤢᤏᤡ᤹ ᤏᤡᤱᤘᤠ᤹ᤒᤥ ᤛᤠᤵᤋᤢᤱ ᤐᤡᤖᤢᤱᤛᤡᤱᤗᤥ॥’” ᤂᤢᤏᤧ᤹ ᤕᤠᤶᤔᤥᤀᤠᤱ ᤐᤠ᤺ᤳᤋᤢ. “ᤀᤡᤱᤃᤠ᤹ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤗᤠᤕᤥᤜᤠ᤹ ᤏᤢ ᤑᤧᤴ ᤕᤠ᤺ᤶᤒᤰᤜᤠ᤹ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤱᤅᤡᤴᤗᤥ॥” ᤀᤠᤸᤗ ᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤕᤠᤶᤔᤥ ᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤱᤔᤠ ᤑᤠ᤹ᤀᤠᤱ ᤛᤡᤍᤢᤱᤈᤓᤠ ᤆᤠᤜᤠᤒᤠ ᤔᤧᤈᤥ᤺ᤰᤏᤧᤴᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤀᤠᤔᤡ᤺ᤶ ᤏᤧ᤹ᤏᤢᤛᤠ᤹ ᤏᤢ ᤑᤢ᤹ᤏᤢᤛᤠ᤹ᤛᤣ. ᤀᤠᤏᤡ᤹ᤃ ᤁᤠᤰᤏᤢ᤺ᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤛᤣᤛᤣᤒᤠ ᤋᤧᤴᤏᤥ ᤕᤧᤛᤢᤖᤧ ᤁᤢᤔᤠᤰᤂᤡ᤹ᤗᤠᤶ ᤜᤠᤱᤜᤠᤱᤅᤠᤱ ᤗᤠ᤺ᤵᤔᤠ ᤀᤠᤄᤥ᤺ᤛᤢᤶ॥ ᤁᤴ ᤁᤢᤛᤱ ᤏᤢ ᤜᤡᤱᤔᤴ ᤁᤧᤒᤡᤒᤠ ᤗᤠᤶᤔᤡᤴ ᤀᤠᤏᤡ᤹ ᤗᤠᤃᤡ ᤛᤣᤛᤣ ᤑᤥ᤺ᤴᤍᤠ᤺ᤴ ᤜᤶᤒᤠ ᤁᤢᤀᤡᤛᤡ᤺ᤰ ᤜᤖᤧᤀᤠᤱ ᤘᤠ᤹ᤖᤥ–ᤂᤧᤴ ᤛᤣᤛᤣ ᤑᤥ᤺ᤴᤍᤠ᤺ᤱᤃ ᤕᤧᤛᤢᤖᤧ ᤏᤠᤛᤡᤱᤃᤧᤴ ᤁᤢᤎᤰᤗᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶ ᤛᤶᤍᤠᤱ ᤕᤢᤰ ᤁᤧᤃᤵᤐᤠ ᤀᤠᤏᤡ᤹ ᤐᤕᤶ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤀᤠᤃᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ. ᤀᤠᤏᤡ᤹ ᤋᤥ᤺ᤴᤍᤥ᤺ᤶᤒᤠ ᤛᤣᤛᤣ ᤛᤡᤰᤗᤢᤱᤔᤠᤴᤏᤢ ᤜᤧᤰᤁᤩᤠᤱ ᤜᤠᤱᤜᤠᤱᤒᤠ ᤏᤛᤠ᤺ᤴᤏᤡᤴᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤣᤛᤠᤱ ᤐᤣᤃᤡᤖᤥ॥ ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤛᤣᤛᤣ ᤆᤥ᤺ᤰᤛᤧ ᤂᤪᤡᤛ᤻ᤋᤖᤧ ᤁᤢᤔᤠᤰᤂᤡ᤹ᤀᤡᤸᤗᤧ ᤀᤠᤏᤡ᤹ ᤋᤠᤵᤑᤧ᤺ᤶᤒᤠ ᤂᤠᤛᤡᤱᤅᤡᤴ ᤛᤠᤰᤂᤢᤀᤠᤱ ᤘᤠ᤹ ᤜᤧᤰᤁᤩᤠᤱ ᤀᤠᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤴ ᤛᤣᤛᤣᤒᤠ ᤆᤫᤠ᤺ᤳᤋᤡᤸᤗᤧ ᤘᤠᤜᤵᤋᤢᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤀᤠᤏᤡ᤹ ᤀᤠᤃᤳᤋᤢᤶ ᤗ᤹ᤖᤡᤰ ᤋᤧᤴᤍᤡᤱ ᤀᤠᤈᤥᤃᤢᤶᤒᤠ ᤏᤡᤱᤛᤠᤱᤅᤡᤴ ᤔᤧᤸᤗᤧᤳᤋᤣ ᤁᤳᤋᤢᤶᤗᤥ. ᤌᤣᤀᤠᤱᤓᤧᤸᤗᤧ ᤔᤠᤱᤜᤧᤰ ᤁᤧᤈᤥ᤺ᤰᤐᤠᤱᤃ ᤏᤛᤠ᤺ᤴᤛᤠᤒᤠ ᤆᤥ᤺ᤰᤗᤥ॥ ᤀᤠᤸᤗ ᤀᤠᤏᤡ᤹ ᤗᤢᤶᤔᤥ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤏᤢ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤀᤥ ᤜᤠᤱᤜᤠᤱ ᤔᤧᤳᤇᤡᤱᤔᤠ ᤀᤠᤰᤂᤣᤀᤠᤱ ᤀᤠᤛᤢᤰᤋᤢᤶ ᤂᤧᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤶᤗᤥ॥ ᤁᤢᤓᤠ ᤏᤛᤠᤏᤡᤒᤠᤜᤠ᤹ᤖᤧ ᤛᤥᤖᤡᤰ ᤆᤢᤶᤔᤠ ᤕᤧᤵᤗᤧᤰ ᤔᤧᤱᤃᤳᤋᤢᤴ. ᤁᤖ ᤀᤠᤏᤡ᤹ᤃ ᤛᤥᤖᤡᤰ ᤆᤢᤶᤔᤠ ᤗᤧᤖᤢᤶ ᤔᤧ᤺ᤴᤗᤥ॥ ᤁᤖ ᤍᤠᤱᤒᤠᤸᤗᤧ ᤁᤢᤕᤢ᤺ᤔᤠ ᤕᤧᤴᤏᤡᤴ ᤏᤡ᤺ᤳᤋᤠᤱ ᤋᤠᤖ ᤐᤵᤐᤠ ᤂᤡᤏᤡ᤹ ᤁᤧᤏᤡ᤺ᤛᤢᤶᤒᤠᤸᤗᤧ ᤆᤥᤃᤢᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤜᤠᤱᤜᤠᤱ ᤔᤧᤳᤋᤠᤛᤡ᤹ᤖᤥ॥ ᤀᤠᤏᤡ᤹ ᤛᤧᤰᤂᤠ᤺ᤴ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤛᤠᤱ ᤏᤡ᤺ᤏᤡ᤺ᤒᤠᤀᤣ ᤗᤠᤕᤥ ᤀᤠᤈᤥᤃᤢᤶᤗ ᤀᤠᤘᤠ᤹ᤏᤧ ᤑᤠ᤹ᤃᤪ ᤂᤧᤴ ᤗᤠᤕᤥᤗᤠᤶ ᤗᤧᤵᤔᤡ ᤐᤡᤔᤠ ᤁᤧᤛᤢᤰᤐᤠ ᤛᤡᤍᤢᤱᤈᤓᤠ ᤌᤣᤀᤠᤱ ᤜᤥ᤺ᤵᤗᤥ॥ ᤁᤖ ᤂᤧᤸᤗᤧ ᤁᤢᤗᤧᤰᤘᤠ ᤂᤧᤴ ᤜᤧᤰᤋᤱᤒᤠ ᤗᤠᤕᤥ ᤁᤧᤈᤥ᤺ᤰᤐᤠᤸᤗᤧ ᤁᤡᤵᤔᤠ ᤁᤧᤄᤢ᤺ᤒᤠ ᤂᤢᤶᤍᤡᤱᤅᤡᤴ ᤛᤧᤰᤂᤠᤀᤣ ᤂᤥ᤺ᤛᤢ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠ ᤂᤧᤴ ᤔᤏᤠ᤺ᤴ ᤜᤢᤖᤢᤖᤢᤏᤠ ᤁᤧᤍᤡ᤺ᤵᤐᤠ ᤔᤡ᤺ᤸᤗᤧ ᤔᤧᤰᤂᤢ᤹ᤖᤥ॥ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶᤔᤡᤴ ᤁᤧᤏᤠ᤹ᤒᤠ ᤔᤏᤠ᤺ᤴ ᤏᤧᤳᤇᤡ ᤀᤡᤃᤪ ᤛᤢᤶᤛᤡᤖᤧ ᤔᤧᤒᤡᤖᤢᤒᤠ ᤐᤷᤔᤠᤱᤃᤡ ᤘᤠ᤹ᤏᤧ ᤑᤠ᤹ᤃᤪ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤔᤧ᤺ᤴᤏᤧ ᤛᤡ᤺ᤔᤠ ᤐᤥ᤺ᤱ॥ ᤏᤡᤱᤘᤠ᤹ᤑᤢᤛᤠ᤺ᤴ ᤁᤢᤏᤠᤔᤧᤴᤇᤠ᤹ ᤁᤧᤔᤧᤵᤐᤧᤴ. ᤀᤠᤒᤠᤅᤣ ᤛᤣᤛᤣ ᤁᤧᤈᤥ᤺ᤰᤐᤠ ᤔᤠᤱᤜᤢᤵᤐᤡᤸᤗᤧᤴ ᤔᤠᤰᤂᤡ᤹ᤀᤡᤴ ᤀᤠᤛᤢᤳᤌᤥ ᤁᤧᤈᤥ᤺ᤰᤐᤧᤴ ᤜᤧᤰᤁᤩᤠᤱ ᤗᤢᤱᤃᤢᤶ ᤁᤧᤒᤡᤒᤠ ᤛᤣᤛᤣᤔᤠᤱᤅᤡᤴ ᤁᤧᤀᤵᤐᤧᤴ ᤂᤧᤴᤏᤢ᤺ᤸᤗᤧᤀᤠᤱ ᤁᤧᤛᤠᤰᤐᤠ ᤂᤢᤶᤍᤡᤱ ᤂᤥ᤺ᤔᤠ ᤗᤠ᤹ᤖᤢᤖᤥ॥ ᤌᤣᤀᤠᤱᤓᤧᤸᤗᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤧᤴ ᤂᤢᤶᤍᤡᤱ ᤐᤡᤔᤠ ᤀᤠᤗᤰᤐᤧᤴᤗᤥ. ᤀᤡᤱᤃᤠ᤹ᤀᤣ ᤁᤢᤗᤧᤰᤘᤠ ᤏᤢ᤺ᤰᤋᤢᤱ ᤐᤡᤖᤢᤱ ᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠᤴ ᤀᤠᤏᤡ᤹ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ॥ ᤀᤰᤂᤣᤀᤠᤱ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ. “ᤕᤜᤘᤣ ᤍᤠᤱᤒᤠᤸᤗᤧ ᤀᤠᤒᤠᤅᤣ ᤁᤢᤔᤏᤠᤜᤠ᤹ ᤂᤠᤛᤧᤴ ᤗᤥ᤺ᤴᤍᤢᤛᤡ᤹ᤖᤥ॥” ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤢᤰᤁᤥ ᤌᤠᤔᤠᤃ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢ᤺ᤒᤠ ᤐᤠ᤺ᤴᤗᤥ᥄ ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤥ᤺ᤳᤋᤡ᤺ᤴ ᤁᤧᤏᤡ᤺ᤛᤢᤶᤔᤠᤱ ᤏᤛᤠ᤺ᤴ ᤁᤧᤈᤥᤃᤢᤶᤒᤠ ᤋᤃᤡᤒᤠ ᤕᤧᤴᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ ᤂᤡᤏᤡ᤹ ᤛᤠ᤹ᤖᤡᤰ ᤀᤡᤏᤥᤃᤧᤴ ᤋᤢᤰᤂᤣ ᤁᤧᤍᤢᤔᤢᤶᤛᤠᤱ ᤏᤛᤠ᤺ᤴᤏᤥ ᤀᤕᤠᤰ ᤔᤧᤸᤗ᤹ᤀᤣ ᤁᤧᤘᤕᤡᤒᤠᤴ ᤀᤡ᤺ᤳᤋᤧᤶᤔᤧ᤹ᤀᤥ॥ ᤁᤢᤓᤠ ᤕᤧᤶᤔᤥᤃ ᤂᤡᤏᤡ᤹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤜᤡᤏᤠ᤺ᤶ ᤁᤧᤶᤔᤧᤳᤋᤡᤀᤠᤱ ᤋᤢᤰᤂᤣ ᤁᤧᤶᤈᤠ᤺ᤳᤋᤡ᤹॥ ᤜᤧᤰᤁᤩᤠᤱ ᤁᤢᤓᤠ ᤕᤧᤶᤔᤥᤃ ᤜᤧᤰᤋᤱᤒᤠ ᤐᤠ᤺ᤴᤏᤥ ᤁᤧᤎᤠ᤺ᤒᤠᤜᤠ᤹ᤏᤢ ᤛᤥᤖᤡᤰ ᤁᤧᤘᤕᤡᤀᤠᤱ ᤁᤢᤓᤠ᤹ ᤁᤧᤒᤡᤖᤢᤶᤛᤡᤶᤗᤥ॥ ᤂᤡᤏᤡ᤹ᤃ ᤐᤢᤱᤗᤠᤜᤡᤶᤔᤥ ᤁᤧᤎᤠ᤺ᤒᤠᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶ॥ ᤔᤏᤠᤜᤠ᤹ᤖᤧ ᤂᤡᤏᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤁᤧᤶᤏᤠᤵᤋᤡ ᤁᤧᤶᤍᤣ᤹ᤖᤡᤛᤠᤱ ᤁᤧᤛ᤺ᤳᤋᤡᤖ ᤏᤠᤛᤡᤁᤧᤎ᤺ᤳᤋᤢᤶ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤁᤧᤃᤳᤋᤢᤶᤒᤠ ᤐᤠ᤺ᤴᤜᤠ᤹ᤏᤢ᤺ᤸᤗᤧᤀᤠᤱ ᤏᤢ᤺ᤒᤠ ᤏᤢ ᤛᤍᤠᤍᤡᤱ ᤁᤧᤘᤠ᤹ᤒᤠ ᤕᤠᤶᤛᤠᤶᤃᤧᤴ ᤕᤠᤱᤛᤠᤁᤢᤴᤎᤣ᤺ᤴ ᤁᤧᤃᤳᤋᤢᤶ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤏᤡᤛ᤻ᤛᤣᤒᤠ ᤏᤛᤠ᤺ᤴᤏᤡᤴ ᤔᤧᤗᤧᤖᤧᤶᤔᤡᤶᤏᤧ᤹ᤀᤥ॥ ᤂᤧᤸᤗᤧ ᤕᤶᤒᤠ ᤜᤠᤱᤛᤧᤶᤔᤡᤴ ᤋᤠᤖᤢᤖᤥ॥ ᤂᤡᤏᤡ᤹ ᤏᤠᤛᤡᤁᤧᤎ᤺ᤳᤋᤢᤶᤗ ᤐᤥ᤺ᤱᤗᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤁᤧᤈᤥᤃᤢᤶᤔᤡᤸᤗᤧ ᤂᤢᤏᤧ᤹ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤁᤧᤄᤥ᤺ᤛᤢᤶᤗᤥ॥ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤐᤠ᤺ᤳᤋᤢ᤹. “ᤀᤠᤰᤂᤥ ᤛᤵᤔᤠᤀᤠᤱ ᤁᤧᤍᤠ᤺ᤒᤠᤖ ᤁᤧᤒᤵᤐᤧᤴ ᤋᤠ᤺ᤀᤣᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤛᤢ᤺ᤏᤧᤴᤗᤥ॥ ᤁᤖ ᤀᤡᤱᤃᤠ᤹ ᤀᤠᤛᤠᤶᤕᤥᤏᤡᤒᤠ ᤔᤏᤠᤜᤠ᤹ ᤏᤛᤠ᤺ᤴᤗᤠᤶᤒᤠᤀᤣ ᤔᤧᤜᤡᤱᤗᤥ॥ ᤂᤧᤱᤜᤠ᤹ ᤀᤡᤱᤃᤠ᤹ᤗᤠᤶ ᤔᤧᤏᤢ᤺ᤱ ᤔᤧᤒᤣ᤺ᤰᤏᤧ ᤑᤠ᤹ᤃᤪ ᤂᤧᤱᤜᤠ᤹ᤏᤢ ᤀᤠᤛᤡᤰ ᤂᤧᤱᤗᤥ॥” ᤁᤖ ᤀᤠᤏᤡ᤹ᤃ ᤁᤧᤏᤢ᤺ᤱᤒᤠ ᤁᤧᤒᤣ᤺ᤰᤐᤠᤀᤠᤱ ᤁᤧᤔᤧᤰᤐᤠ ᤔᤏᤠᤛᤡ ᤔᤧ᤺ᤴᤗᤥ. ᤁᤖ ᤀᤠᤏᤡ᤹ᤃ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤀᤠᤱ ᤔᤧᤰᤔᤠᤗᤠᤶ ᤋᤠᤱᤛᤧ᤺ᤵ ᤁᤧᤄᤥ᤺ᤒᤠᤛᤡᤖᤥ॥