1 Mɑ tɑɑpɑlɑɑ, nyɛntɛ yǝlɑɑ mpɑ sɩ Ɩsɔ Feesuɣu tii mpɛ pɑ tɔɔ tɔ ɩ́ tɑɑ mʋɣɩ pɑ tǝnɑ pɑ tɔm kɛ yem. Ɩ́ tɛɛ pɑ wɑɑlɩ nɑ ɩ́ nɑ́ sɩ feesuɣu ŋkʋ kʋ kɛ́ Ɩsɔ nyǝŋkʋ yɑɑ ŋku. Pǝ tɑɣɑ pʋlʋ, Ɩsɔ kʋyɔɣɔtʋtʋ tɛlǝsǝlɑɑ pɔpɔtʋnɑɑ kʋpiŋ yɑnɑ nɑ ɑntulinyɑ. 2 Ɩsǝnɑ ɩ́ kɑ́ nyǝnɑ sɩ Ɩsɔ Feesuɣu nyǝ́mɑ tɔɣɔlɔ, ye wei ɩ tɔŋ sɩ Yesu Kilisiti pǝsɑ yʋlʋ nɑ tɑmpɑnɑ ɩlɛ Ɩsɔ Feesuɣu tʋ ntɛ́. 3 Amɑ wei ɩɩ tisiɣi sɩ Yesu pǝsɑ yʋlʋ nɑ tɑmpɑnɑ tɔ Ɩsɔ Feesuɣu fɛɩ ɩ kiŋ. Kilisiti kolontu nyǝŋkʋ tʋ ntɛ́ pʋntʋ. Ɩ́ kɑ́ nɩɩwɑ sɩ ɩ kɑ́ kɔɔ tɔ, ɩ tɛmɑ kɔntɛ kɛ ɑntulinyɑ tɑɑ.

4 Amɑ mɑ piyɑ mɛ mǝ kɛ́ Ɩsɔ nyǝ́mɑ kɛ́ nɑ ɩ́ kǝlɑ Ɩsɔ kʋyɔɣɔtʋtʋ tɛlǝsǝlɑɑ pɔpɔtʋnɑɑ. Pǝ tɑɣɑ pʋlʋ, Feesuɣu ŋku kʋ wɛ mǝ kiŋ tɔ kʋ kǝlɑ feesuɣu ŋku kʋ wɛ ɑntulinyɑ nyǝ́mɑ kiŋ tɔ. 5 Antulinyɑ yɔɣɔtɑɣɑ kɛ pɑ yɔɣɔtǝɣɩ, nɑ ɑntulinyɑ nyǝ́mɑ nɩɩkɩ pɑ tɔm kɛ pɑ kɛ́ ɑntulinyɑ nyǝ́mɑ tɔ pǝ tɔɔ. 6 Amɑ tɑ́ ɩlɛ, Ɩsɔ tǝnnɑ tɑ́. Nɑ wei ɩ nyǝmɑ́ Ɩsɔ tɔ ɩnɩ ɩ nɩɩkǝnɑ tɑ́ tɔm, wei ɩ tɑ kɛ Ɩsɔ nyǝŋ tɔ ɩɩ nɩɩkɩ tɑ́ tɔm. Mpi pɩɩ yele nɑ tǝ́ nyǝŋ tɑmpɑnɑ Feesuɣu nɑ feesuɣu ŋku kʋ tolisiɣi yǝlɑɑ tɔɣɔlɛ.

7 Mɑ tɑɑpɑlɑɑ, ɩ́ yele nɑ tǝ́ sɔɔlǝɣɩ tǝmɑ, pǝ tɑɣɑ pʋlʋ Ɩsɔ kiŋ kɛ sɔɔlʋɣʋ lɩɩnɑɑ. Nɑ wei ɩ sɔɔlǝɣɩ ɩ yʋlʋtɔɣɔntǝlɛ tɔɣɔlɛ Ɩsɔ pǝyɑɣɑ nɑ pʋntʋ nyǝmɑ́ Ɩsɔ kɛ́. 8 Amɑ wei ɩɩ sɔɔlǝɣɩ ɩ yʋlʋtɔɣɔntǝlɛ tɔ, pʋntʋ tɑ nyɩ Ɩsɔ. Pǝ tɑɣɑ pʋlʋ Ɩsɔ nɑ́ kɛ́ sɔɔlʋɣʋ tɔ se. 9 Ɩsɔ tilinɑ ɩ Pǝyɑɣɑ ɩkpɑmlɛ kɛ ɑntulinyɑ tɑɑ sɩ tǝ́ nɑ́ weesuɣu kɛ kɑ tɔɔ. Tɔʋ, mpi Ɩsɔ hʋlǝnɑɑ sɩ ɩ sɔɔlɑ-tʋ tɔɣɔlɛ. 10 Nɑ ɩsǝnɑ pǝ hʋlɑɑ sɩ sɔɔlʋɣʋ tɔm tǝkpem tɔɣɔlɛ timpi tɑ́ tɑ́ sɔɔlɩ Ɩsɔ nɑ ɩnɩ ɩ sɔɔlɩ-tʋ nɑ ɩ́ tili ɩ Pǝyɑɣɑ sɩ pǝ́ hɩɩsɩ tɑ́ ɩsɑɣɑtʋ kɛ kɑ tɔɔ tɔ.

11 Mɑ tɑɑpɑlɑɑ, Ɩsɔ nɑ́ tɑ́ kisi-tʋɣʋ mpʋɣʋlɛ sɔɔlʋɣʋ, ɩlɛ pǝ wɛɛ kɛ́ sɩ tɑ́ tɔtɔ tɑɑ sɔɔlǝɣɩ ḿpʋ́ɣʋ́ tɑ́ tǝmɑ. 12 Nɔɣɔlʋ tɑ keesitɑ Ɩsɔ se. Amɑ ye tǝ sɔɔlǝɣɩ tɑ́ tǝmɑ, Ɩsɔ wɛ tɑ́ wɑɑlɩ kɛ́ nɑ ɩ sɔɔlʋɣʋ nɑɑ tɑ́ kiŋ tǝkelekele.

13 Ɩsɔ hɑ-tʋɣʋ ɩ Feesuɣu tɔɣɔ tǝ nyǝmɑ́ sɩ tǝ kpɛntǝnɑ-ɩ nɑ ɩ wɛ tɑ́ wɑɑlɩ. 14 Tǝ nɑnɑ tɑ ɩsǝlɛ kɛ́ nɑ tǝ́ heeliɣi tǝfoo sɩ Tɑcɑɑ tilɑ ɩ Pǝyɑɣɑ sɩ kɑ́ lɑ ɑntulinyɑ Yɑtʋ. 15 Ye wei ɩ yɔɣɔtǝɣɩ sɩ Yesu kɛ́ Ɩsɔ Pǝyɑlʋ, Ɩsɔ wɛ ɩ wɑɑlɩ kɛ́ nɑ pʋntʋ kpɛntǝnɑ-ɩ. 16 Sɔɔlʋɣʋ mpi Ɩsɔ sɔɔlɑ-tʋ tɔ tǝ nyǝmɑ-wɩ, nɑ tǝ tɛmɑ-wɩ nɑ tɑ́ tɑɑ.

Ɩsɔ kɛ́ sɔɔlʋɣʋ tʋ kɛ́, ɩlɛ ye wei ɩ sɔɔlǝɣɩ ɩ lɛlʋ, pʋntʋ nyǝmɑ́ Ɩsɔ nɑ Ɩsɔ wɛ ɩ wɑɑlɩ. 17 Mpi pǝ hʋ́lǝ́ɣɩ́ sɩ tɑ tǝmɑ sɔɔlʋɣʋ tɩɩ fɛɩ pɑ́ yɔɣɔtɩ tɔɣɔlɛ sɩ tǝ kɑɑ nyɑnɑ pʋlʋɣʋ pɑɑ pǝcɔɣɔ Ɩsɔ hʋʋlɛ ńtɛ́ tǝ wule. Pǝ tɑɣɑ pʋlʋ, ɩsǝnɑ Yesu Kilisiti tɔmɑ ɑntulinyɑ tɑɑ tɔ ḿpʋ́ɣʋ́ tɑ́ tɔmɑ. 18 Sɔɣɔntʋ sɔɔlʋɣʋ tɑ kɛ sɔɔlʋɣʋ. Amɑ sɔɔlʋɣʋ mpi pǝ kɛ́ tɑmpɑnɑ nyǝm tɔ pǝ yɑsǝɣɩ sɔɣɔntʋ kɛ́. Pǝ tɔɔ kɛ́ sɔɣɔntʋ sɔɔlʋɣʋ tɑ kɛ sɔɔlʋɣʋ kʋpɑŋkʋ nɑkʋlɩ. Pǝ tɑɣɑ pʋlʋ, sɑlǝkɑ kɔŋnɑ nɑ sɔɣɔntʋ.

19 Ye tɑ́, Ɩsɔ lɑɑlǝnɑ-tʋɣʋ sɔɔlʋɣʋ ɩlɛnɑ tɑɑ sɔɔlɩ-ɩ. 20 Ye nɔɣɔlʋ nɔɣɔ tɑɑ lɩɩwɑ sɩ: Mɑ sɔɔlɑ Ɩsɔ. Amɑ ye ɩ yʋlʋtɔɣɔntǝlɛ, ɩɩ sɔɔlǝɣɩ ɩ́lɛ́, pʋntʋ kɛ́ pɔpɔtʋ kɛ́. Ye ɩ tɑ sɔɔlɩ ɩ yʋlʋtɔɣɔntǝlɛ wei ɩ nɑɑkɩ tɔ ɩsǝnɑɣɑ ɩ kɑ́ sɔɔlɩ Ɩsɔ wei ɩɩ nɑɑkɩ tɔ? 21 Kʋsǝsɩɩtʋ nti Kilisiti tʋ-tʋ tɔɣɔlɛ sɩ: Pǝ wɛɛ sɩ ye wei ɩ sɔɔlɑ Ɩsɔ, pʋntʋ ɩ́ sɔɔlɩ ɩ yʋlʋtɔɣɔntǝlɛ tɔtɔɣɔ.