1 Ḿpʋ́ɣʋ́ Tɑfiiti mɑɣɑsɑ ɩ tɑɑ sɩ: Kʋyɑkʋ nɑkʋlɩ Sɑyuli tɛŋ nɑ ɩ́ kʋ-m yoo. Ɩlɛ sɑnɑ kɛlɛ sɩ mɑ́ polo mɑ́ tʋ kpʋlʋɣʋ kɛ Filiisi nyǝ́mɑ tɛtʋ tɑɑ. Wɑɑtʋ ɩnǝɣɩ ɩ kɑ́ yele-m pɛɛkʋɣʋ kɛ Ɩsɛɣɛlɩ tɛtʋ tɑɑ cǝnɛ. Ɩlɛ mɑ fitɑ ɩ niŋ tɑɑ kɛlɛ. 2 Pǝ tɔɔ kɛ́ ɩ nɑ ɩ yǝlɑɑ nɑsǝtoso (600), pɑ kʋlɑɑ. Ḿpʋ́ɣʋ́ pɑ tǝŋnɑ Mɑwɔkɩ pǝyɑlʋ Akisi wei ɩ kɛ́ Kɑtɩ nyǝ́mɑ wulɑʋ tɔ ɩ tɛ. 3 Ɩlɛnɑ pɑ́ kpɑɣɑ pɑ ɑlɑɑ, nɑ pɑ piyɑ, nɑ pɑ́ polo pɑ́ cɑɣɑ tǝnɑ. Pɑɑ nɑ Tɑfiiti nɑ ɩ́lɛ́ ɩ ɑlɑɑ nɑɑlɛ, Sisilee tʋ Ahinowɑm, nɑ Kɑmɛɛlɩ tʋ Apikɑɑlɩ wei ɩ kɛ́ Nɑpɑɑlɩ leelu tɔ. 4 Sɑyuli nɩɩwɑ sɩ Tɑfiiti tʋ kpʋlʋɣʋ kɛ Kɑtɩ, ɩlɛnɑ ɩ́ yele-ɩ pɛɛkʋɣʋ.

5 Ḿpʋ́ɣʋ́ kʋyɑkʋ nɑkʋlɩ Tɑfiiti tɔmɑ wulɑʋ Akisi sɩ: Hɑɩ, tɑ cɑɑ, ye n lɑpɑ-m nɑɑni, ɩlɛ n nyǝnɩ ɩcɑliyɑ nɑkǝlǝɣɩ nyɑ́ tɛtʋ tɑɑ cǝnɛ nɑ mɑ́ cɑɣɑ tǝnɑ. Tɔfɔ pǝ fɛɩ sɩ mɑ́ nɑ-ŋ tǝ́ cɑɣɑ nyɑ́ kɑwulɑɣɑ ɩcɑtɛ tɑɑ kɛ́ mpʋ?

6 Ɩlɛnɑ Akisi hʋlɩ-ɩ ɩcɑtɛ nte pɑ yɑɑ sɩ, Sikǝlɑkɩ tɔɣɔ kʋyɑkʋ ŋkʋ kʋ mɑɣɑmɑɣɑ. Pǝ tɔɔ kɛ́ ɩcɑtɛ ntɛ́ tǝ pǝsɑ Yutɑ nyǝ́mɑ wulɑʋ nyǝntɛ kɛ hɑlǝnɑ sɑŋɑ.

7 Pǝnɑɣɑ nɑ ɩsɔtʋnɑɑ liɣiti tǝcu kɛ Tɑfiiti cɑɣɑ Filiisi nyǝ́mɑ tɛtʋ tɑɑ. 8 Tɑfiiti pɑ lɩɩkɑɣɑ kʋlɩɩʋ kɛ Kesuli nyǝ́mɑ, nɑ Kiiisi nyǝ́mɑ, nɑ Amɑleke nyǝ́mɑ kɛ́. Mpi tɔ, piitimnɑɑ mpɛ pɑɑ cɑɣɑnɑ hɑtoo lɔŋ tɑɑ kɛ́ Suli kɔŋkɔŋ tɑɑ. Hɑlǝnɑ pǝ́ polo Icipiti tɛtʋ tɑɑ. 9 Pɑ kʋkɑɣɑ yǝlɑɑ tǝnɑɣɑ hɔɣɔlʋɣʋ ŋkʋ kʋ tɑɑ kɛ́. Pǝ kpɑɣɑʋ ɑpɑlɑɑ nɑ ɑlɑɑ tɔ. Ɩlɛnɑ pɑ́ kpɑkǝɣɩ pɑ tɔlɑ nɑ pɑ nyǝm nɑ pɑ́ pukinɑ Akisi. 10 Ye ɩ́lɛ́ ɩ pɔɔsɑ-ɩ sɩ: Leɣe ɩ polɑ mǝ kʋlɩɩʋ kɛ sɑŋɑ? Ɩlɛ ntɑnyɩ ɩ looli sɩ Yutɑ tɛtʋ ilim mpǝtǝŋ tɔɔ. Yɑɑ ɩ tɔ sɩ Yelɑmeli tɛtʋ tɑɑ, yɑɑ Keni tɛtʋ tɑɑ kɛ́ tǝ polɑɑ. 11 Tɑfiiti ɩɩ yeki ɑpɑlʋ yɑɑ ɑlʋ nɑ ɩ weesuɣu, sɩ pǝ́ tɑɑ kɔɔ nɑ pɑ́ tɑɣɑsɩ Akisi kɛ nti ɩ lɑkɩ tɔ. Ɩsǝnɑ Tɑfiiti lɑkɑɣɑ sɑɑ wei ɩ kɑ wɛ Filiisi nyǝ́mɑ tɛtʋ tɑɑ tɔɣɔlɛ. 12 Akisi kɑ lɑpɑ Tɑfiiti kɛ nɑɑni kɛ́ teu kɛ́ nɑ ɩ́ tɔŋ sɩ: Nɔɔnɔɔ Ɩsɛɣɛlɩ nyǝ́mɑ tɑɑ kpɑɑnɑ Tɑfiiti. Mpʋ tɔ, tǝlɑsɩ ɩ kɑ́ pǝsɩ mɑ tǝmlɛ tʋ kɛ tɑm tɔɔ kɛ́.