1 Tǝ tʋ mǝ tɛ pote pǝlɛ kɛ ḿpʋ́ɣʋ́ tɑm nɑ pǝ́ kɔɔ pǝ́ nɩɩ-tʋ ɩlɛnɑ tǝ́ hiki hʋwɛɛ sɩ tɑɑ cɑɣɑ Atɛɛnɩ kɛ tɑ́ tike, 2 nɑ pǝ́ kɑɑsɩ nɑ tǝ́ tili tɑ́ tɑɑpɑlʋ Timotee wei tɑ́ nɑ-ɩ tǝ lɑkɩ Ɩsɔ tǝmlɛ kɛ Kilisiti Lɑɑpɑɑlɩ kʋpɑŋ heeluɣu tɑɑ tɔ. Tǝ kʋsɑ-ɩ nɑ tǝ́ tili-ɩ ḿpʋ́ɣʋ́ sɩ ɩ́ sɔɔsɩ-mɛɣɛ tomɑ nɑ ɑpɑlʋtʋ kɛ mǝ Ɩsɔ mpɑɑʋ tɑɑ, 3 nɑ pǝ́ tɑɑ kɔɔ nɑ kʋnyɔntɔɣɔlɛ nte tǝ tɑɑ tǝ wɛ ɩsǝntɔ tɔ tǝ́ kɔɔ tǝ́ kǝlɩ mǝ tɑɑ nɔɣɔlʋ nɑ ɩ́ lɔ tɔɔŋ. Mǝ mɑɣɑmɑɣɑ ɩ́ nyǝmɑ́ mpʋ, sɩ kʋnyɔntɔɣɔlɛnɑɑ mpɛ pɑ kɛ́ mpi mpi Ɩsɔ kɑ tɔmɑ sɩ pɩɩ mɑɣɑnɑ-tʋ tɔ pǝ tɑɑ lɛmpǝnɑɑ kɛ́. 4 Hɑlǝnɑ pǝ mɑɣɑmɑɣɑ kɛ tǝ heelɑ-mɛɣɛ wɑɑtʋ wei tɑ́ nɑ-mɛ tǝ wɛɛ tɔ, sɩ pɑɑ tʋ-tʋɣʋ kʋnyɔŋ. Mpʋ ɩnɩ pǝ mɑɣɑmɑɣɑ kɛ ɩ́ nɑɑ pǝ kɔmɑ ɩsǝntɔ. 5 Pǝ tɔɔ kɛ́ tǝ tʋɣʋ mǝ tɛ pote pǝlɛ kɛ ḿpʋ́ɣʋ́ tɑm nɑ pǝ́ nɩɩ-tʋ tɔ, mɑ kʋsɑ Timotee sɩ ɩ́ polo nɑ ɩ́ nɑ ɩsǝnɑ mǝ Ɩsɔ mpɑɑ tǝŋʋɣʋ yɑɑsi wɛɛ tɔ. Mɑ nyɑŋ sɩ pǝ́ tɑɑ kɔɔ sɩ Ɩlɔɣɔʋ mɑɣɑsɑ-mɛ nɑ tɑ́ tǝmlɛ sɑɑlɩ yem kɛ́ mǝ kiŋ.

6 Amɑ Timotee kɔmnɑ mǝ tɛ ɩsǝntɔ tɔ ɩ kɛɛsɑ-tʋɣʋ ɩsǝnɑ ɩ́ sǝŋɑ Ɩsɔ mpɑɑʋ tɑɑ kɛ́ teu nɑ ɩ́ tɔkɑ tǝmɑ sɔɔlʋɣʋ tɔm tɔ. Nɑ ɩ heelɑ-tʋ sɩ ɩ́ tɔɔsǝɣɩ tɑ́ tɔm kɛ tɑm nɑ lɑŋhʋlʋmlɛ. Hɑlǝnɑ ɩ́ nyɩɩlǝɣɩ sɩ ɩ́ nɑ-tʋɣʋ teitei ɩsɩɩ tɑ́ nyɩɩlǝɣɩ sɩ tǝ́ nɑ-mɛ tɔ. 7 Tɑ́ tɑɑpɑlɑɑ mɛ, wɑɑtʋ wei tǝ nɩɩ mǝ tɔm tɔ pǝ hɛɛsɑ tɑ́ lɑŋɑ kɛ teu kɛ sɔsɔm kɛ́ tɑ́ wɑhɑlɑnɑɑ nɑ tɑ kʋnyɔntɔɣɔlɛnɑɑ pɑnɛ pɑ tǝnɑ pɑ tɑɑ kɛ́. Ɩsɔ mpɑɑʋ ŋku ɩ́ tɔkɑ teu tɔ ŋkʋ kʋ hɛɛsǝnɑ tɑ́ lɑŋɑ kɛ mpʋ. 8 Nɑ ɩ́ sǝŋʋɣʋ tǝcɑ kɛ Tɑcɑɑ tɔm tɑɑ tɔ tǝ feesɑɑ kɛ́ tǝfʋʋ. 9 Sɛɛtʋ ntiɣi tɩɩ sɛɛ Ɩsɔ nɑ pǝ́ tɑlɑ ɩsɩɩ lɑŋhʋlʋmlɛ nte tǝ hikɑ mǝ́ kiŋ kɛ ɩ ɩsɛntɑɑ tɔ? 10 Tɑ ɩsǝlɛ sɛɛnɑ Ɩsɔ sǝlǝmʋɣʋ kɛ tɑm sɩ ɩ́ yele nɑ tɑ́ nɑ-mɛ tǝ́ nɑ́ tǝmɑ nɑ tɑ́ ɩsǝpee nɑ tǝ́ tɛɛsɩ-mɛɣɛ Ɩsɔ mpɑɑʋ tɔm kɛ hʋ́lʋ́ɣʋ́.

11 Tɑcɑɑ Ɩsɔ mɑɣɑmɑɣɑ nɑ tɑ́ Sɔsɔ Yesu pɑ́ lɑ nɑ tǝ́ hiki mpɑɑʋ nɑ tǝ́ polo nɑ tǝ́ nɑ-mɛ. 12 Tɑ́ Sɔsɔ ɩ́ lɑ nɑ mǝ sɔɔlʋɣʋ sɔɔsǝɣɩ tɑm kɛ́ tǝmɑ kiŋ nɑ yǝlɑɑ tǝnɑ kiŋ, hɑlǝnɑ kʋ tɑlɑ ɩsɩɩ tɑ́ mɑɣɑmɑɣɑ tǝ sɔɔlʋɣʋ-mɛ tɔ. 13 Ye tɑ́ Sɔsɔ ɩnɩ ɩ lɑpɑ mpʋ, mɛ ɩ́ kɑ́ hiki tomɑ kɛ hɑtuu mǝ hʋwɛɛ tɑɑ nɑ ɩ́ pǝsɩ Ɩsɔ nyǝ́mɑ, nɑ ɩ́ te tǝkpɑtɑɑ kɛ́ Tɑcɑɑ Ɩsɔ ɩsɛntɑɑ kɛ́ kʋyɑŋku tɑ́ Sɔsɔ Yesu nɑ ɩ nyǝ́mɑ pɑɑ kɔɔ tɔ.