1 Pǝ tɔɔ kɛ́ mɑ tʋwɑ mɑ tɑɑ sɩ mɑ kɑɑ kɔɔ mǝ tɛ, pǝ́cɔ́ mɑ́ tɑɑ kɔɔ mɑ́ tɑsɑ mǝ lɑŋɑ wɑkǝlʋɣʋ. 2 Pǝ tɑɣɑ pʋlʋ tɔɔ, ye mɑ wɑkǝlɑ mǝ lɑŋɑ, ɑwe kɑ́ hɛɛsǝnɑ mɑ nyǝntɛ tɔtɔ? Ye pǝ tɑɣɑ mpɑ pɑ nyǝnɑ mɑ wɑkǝlǝɣɩ tɔ pɑ tike? 3 Pǝ tɔɔ kɛ́ mɑɑ ŋmɑɑ-mɛɣɛ mpʋ. Mɑ tɑɑ cɑɑ sɩ ye mɑ kɔmɑ nɑ mɑ́ tɑlɑ mǝ tɛ, mpɑ pǝ mʋnɑ pɑ́ hɑ-m lɑŋhʋlʋmlɛ tɔ pɑ́ mǝlɩ-m lɑŋwɑkǝllɛ hɑʋ. Mɑ nyǝmɑ́ teu sɩ ye mɑ wɛnɑ lɑŋhʋlʋmlɛ, mǝ tǝnɑ tǝpɑɩ mǝ nyǝnɑ nɑ́ hʋlʋmɑɑ tɔtɔɣɔ. 4 Pɔpɔtʋ fɛɩ, piti sɔsɔ nɑ lɑŋwɑkǝllɛ sɔsɔɔlɛ nɑ ɩsǝlʋm pǝ tɑɑ kɛ́ mɑ ŋmɑɑnɑ-mɛɣɛ tɑkǝlɑɣɑ ŋkɛ, nɑ pǝ tɑɣɑ sɩ mɑ́ tɑɣɑnɩ mǝ lɑŋɑ wɑkǝlʋɣʋ. Amɑ sɩ ɩ́ nyɩ kɛ́ sɩ mɑ sɔɔlɑ-mɛ pǝ tɩɩ fɛɩ.

5 Wei ɩ yelɑɑ nɑ piti kɔɔ mǝ hɛkʋ tɔ pǝ tɑɣɑ mɑ lɑŋlɛ kɛ ɩ wɑkǝlɑɑ, ɑmɑ mǝ tǝnɑ mǝ lɑŋɑ kɛ ɩ wɑkǝlɑɑ. Nɑ pɑɑ pǝ tɑ tɩɩ kɛʋ mǝ tǝnɑ, mǝ tɑɑ pɑɣɑlɛ lɑŋɑ kɛ ɩ wɑkǝlɑɑ. 6 Mǝ tɑɑ pɑɣɑlɛ tisɑɑ sɩ pɑ́ hɔ yʋlʋ ɩnɛ ɩ ŋkpɑŋʋɣʋ tɔ, pǝ mɑɣɑɑ kɛ́. 7 Amɑ pǝnɛntɛ ɩ́ cɛpɩ-ɩ mpʋ, nɑ ɩ́ sɔɔsɩ-ɩ ɑpɑlʋtʋ, pǝ́cɔ́ pǝ́ tɑɑ kɔɔ nɑ ɩ lɑŋlɛ wɑkǝlɩ sɔsɔm nɑ ɩ́ lɔ tɔ́ɔ́ŋ. 8 Pǝ tɔɔ kɛ́ mɑ sɛɣɛsǝɣɩ-mɛ sɩ ɩ́ lɑnɑ yɑɑsinɑɑ mpɑ pɑɑ hʋ́lɩ́-ɩ sɩ ɩ́ sɔɔlɑ-ɩ tɔ. 9 Mɑ cɑɑkɑɣɑ kɛ́ sɩ mɑ́ mɑɣɑsɩ-mɛ nɑ mɑ́ nɑ mǝ wɑɑlɩ, sɩ mǝ luɣu wɛ tɑm kɛ́ mɑ kʋsɛɣɛsǝtʋ tǝŋʋɣʋ yɑɑ mǝ luɣu fɛɩ. Pǝ mɑɣɑmɑɣɑ pǝ nyʋɣʋ tɔɔ kɛ́ mɑɑ ŋmɑɑ-mɛ. 10 Ye nɔɣɔlʋ ɩ́ pǝntɑ nɑtǝlɩ nɑ mɩɩ cɛpɩ-ɩ mɑ mɑɣɑmɑɣɑ mɑ cɛkɩ-ɩ tɔtɔɣɔ. Pǝ tɑɣɑ pʋlʋ, ye yʋlʋ pǝntɑ nɑtǝlɩ nɑ mɑ́ cɛpɩ-ɩ ɩsɩɩ mɑ cɛpʋ ɩsǝntɔ tɔ, mǝ tɔɔ kɛ́ mɑ lɑkɩ ḿpʋ́ɣʋ́ Kilisiti ɩsɛntɑɑ, 11 pǝcɔ Sɑtɑnɩ ɩ́ tɑɑ kɔɔ nɑ ɩ́ kǝlɩ-tʋ. Anɩ tǝ nyǝmɑ́ ɩsǝnɑ ɩ kʋlɑpʋtʋ wɛɛ tɔ.

12 Wɑɑtʋ wei mɑ tɑlɑ Tʋlʋwɑsɩ sɩ mɑ kpɑɑlǝɣɩ Kilisiti tɔɔ Lɑɑpɑɑlɩ Kʋpɑŋ tɔ, Tɑcɑɑ tɔɔ mɑ mɑɣɑnɑɑ sɩ mpɑɑʋ wɛɛ fɑɑ sɩ mɑ́ lɑ tǝmlɛ kɛ teu. 13 Pɑɑ nɑ mpʋ tɔ, ɩsɩɩ mɑ tɑ mɑɣɑnɑ tɑ́ tɑɑpɑlʋ Titʋ tɔ mɑ lɑɑkɑlɩ kʋlɑ sɔsɔm kɛ́. Pǝ tɔɔ kɛ́ mɑ yelɑ Tʋlʋwɑsɩ nyǝ́mɑ nɑ mɑ́ tɛɛ Mɑsetoni.

14 Ɩsɔ fɔɔ, pǝ tɑɣɑ pʋlʋ tɔɔ, tɑ́ nɑ Kilisiti tɑ́ kpɛntʋɣʋ tɔɔ ɩ tʋ-tʋɣʋ ɩ ɑkɑɩtʋ looŋɑ tɑɑ kɛ́ nɑ ɩ́ tɛɛnɑ-tʋɣʋ tɑm. Kʋlʋm ɩnɩ ɩ mɑɣɑmɑɣɑ ɩ yekinɑ sɩ tǝ́ lɑ nɑ pɑ́ nyɩ Kilisiti kɛ pɑɑ timpi ɩsɩɩ tulɑɑlʋ sɔɔsʋŋ nɩɩkʋɣʋ pɑɑ le tɔ. 15 Mpɑ pɑ wɛ mpɑɑʋ kʋwɑɑsʋɣʋ tɑɑ nɑ mpɑ pɛlɛ pɑ tɔŋnɑ lepu tɔ, tǝ wɛ pɑ tǝnɑ pɑ kiŋ kɛ́ ɩsɩɩ tulɑɑlʋ kʋpɑŋ wei Kilisiti hɑwɑ Ɩsɔ tɔ ɩ sɔɔsʋŋ. 16 Mpɑ pɑ tɔŋnɑ lepu tɔ tǝ wɛ pɛlɛ pɑ kiŋ kɛ́ ɩsɩɩ sǝm sɔŋ wei ɩ kɔŋnɑ sǝm tɔ. Amɑ mpɑ pɑ wɛ mpɑɑʋ kʋwɑɑsʋɣʋ tɑɑ tɔ tǝ wɛ pɛlɛ pɑ kiŋ kɛ́ ɩsɩɩ weesuɣu sɔɔsʋŋ, wei ɩ hɑɑkɩ weesuɣu tɔ. Awe pǝsǝɣɩ nɑ ɩ́ lɑ tǝmlɛ tǝnɛ tǝ tɑkɑ? 17 Tɑ́ fɛɩ ɩsɩɩ lɛlɑɑ pɑɣɑlɛ kpɑkʋɣʋʋ Ɩsɔ Tɔm nɑ pɑ́ kɛɛkɩ sɩ pǝ́ lɑnɑ-wɛ tɔ. Amɑ tɑmpɑnɑ kɛ tɑ́ yɔɣɔtǝɣɩ nɑ Ɩsɔ nɑɑ mpʋ. Pǝ tɑɣɑ pʋlʋ tɔɔ, ɩnɩ ɩ tilinɑ-tʋ, nɑ Kilisiti tǝmlɛ kɛ tǝ lɑkɩ.