1 Tɑ́ tɔnʋɣʋ kʋnɛ, kʋ wɛ kɛ́ ɩsɩɩ cokǝle nte tǝ tɑɑ tǝ sʋʋkɩ tɔ. Nɑ tǝ nyǝmɑ́ sɩ sɑŋɑ ye pɑ yɔkɑ cokǝle ńtɛ́, tǝ wɛnɑ tǝsʋʋlɛ kɛ ɩsɔtɑɑ nte Ɩsɔ tɑŋnɑ-tʋ tɔ. Nɑ lonte ńtɛ́ Ɩsɔ mɑɣɑmɑɣɑ tɑɣɑnnɑ-tɛ, nɑ tɩɩ wɛɛ tɑm tɔɔ. 2 Amɑ pǝnɛntɛ tǝ tɔŋnɑ mɔlɑ kɛ́ nɑ tǝ́ tɑŋɑɑ tǝtɛɣɛtɛɣɛ sɩ pǝ́ tʋ-tʋɣʋ tɑ́ ɩsɔtɑɑ wɛɛtʋ. 3 Pǝ tɑɣɑ pʋlʋ tɔɔ, ye pǝ tʋ-tʋɣʋ tɑ́ ɩsɔtɑɑ wɛɛtʋ tǝ fɛɩ yem se, pǝlɛ pǝ tɔnǝŋ wɛɛ tɔtɔɣɔ. 4 Kʋpɑm ye tǝ wɛ tɑm kɛ́ tɑ́ ɑtɛ cokɑ ɑnɛ ɑ tɑɑ tǝ mɔlǝɣɩ kɛ́ ɩsɩɩ sǝɣǝlɑ nɩɩ-tʋ. Pǝ tɑɣɑ ɩsɩɩ tǝ cɑɑ sɩ tǝ́ lɩɩ tɑ́ ɑtɛ tɔnǝŋ ɩnɛ ɩ tɔm tɑɑ tǝkpɑtɑɑ se. Amɑ tǝ kooliɣi kɛ́ sɩ pǝ́ tʋ-tʋɣʋ ɩsɔtɑɑ nyǝŋ tɔtɔ, ɩlɛnɑ weesuɣu nyǝm li mpi pǝ sǝkɩ tɔ. 5 Ɩsɔ mɑɣɑmɑɣɑ tɑɣɑnnɑ-tʋ nɑ ɩ́ yele sɩ pǝ́ lɑɣɑsɩ-tʋɣʋ mpʋ nɑ ɩ́ sɩɩ-tʋɣʋ ɩ Feesuɣu kɛ tɔlʋmɑ sɩ tǝ́ nyǝnɑ sɩ ɩ sɩɩ-tʋɣʋ kʋpɑm.

6 Pǝ tɔɔ kɛ́ tǝ nyɑkɩ ɑpɑlʋtʋ kɛ tɑm. Nɑ tǝ́ nyǝmɑ́ sɩ ye tǝ wɛnɑ tɔnǝŋ ɩnɛɣɛ ḿpʋ́ɣʋ́ tɑm, tǝ hɑtǝlǝnɑ timpi Tɑcɑɑ wɛɛ tɔɣɔ. 7 Tǝ tɛmɑ Ɩsɔ nɑ tɑ́ tɑɑ tɔɣɔ tǝ tɔŋ, ɑmɑ tǝ tɑ nɑtɑ nɑ tɑ́ ɩsɛ se. 8 Tǝ nyɑkɩ ɑpɑlʋtʋ kɛ teu kɛ́ nɑ tǝ́ sɔɔlɑ teu sɩ tǝ́ lɩɩ tɔnʋɣʋ kʋnɛ kʋ tɑɑ nɑ tǝ́ polo tǝ́ cɑɣɑ Tɑcɑɑ cɔlɔ. 9 Mpi tǝ nyɩɩlǝɣɩ sɔsɔm tɔɣɔlɛ sɩ pɑɑ tǝ wɛnɑ tɑ́ ɩsɛ pɑɑ tǝ fɛɩ, ɩ́ lɑ-tʋɣʋ luɣu. 10 Pǝ tɑɣɑ pʋlʋ tɔɔ, pɑɑ pǝ kpɑ nɑ pǝ́ tii pǝ wɛɛ sɩ tɑ́ tǝnɑ tǝpɑɩ tɩɩ sǝŋ Kilisiti ɩsɛntɑɑ kɛ́ nɑ ɩ́ hʋʋnɑ-tʋ, nɑ pǝ́cɔ́ pǝ́ lɛɛtɩ pɑɑ wei kɛ mpi ɩ kɑ wɛnɑ ɩ ɩsɛ nɑ ɩ́ lɑ tɔ, ye kʋpɑntʋ kɛ ɩ kɑ lɑpɑ, pǝ lɛɛtɩ-ɩ kʋpɑntʋ, ye ɩsɑɣɑtʋ pǝ lɛɛtɩ-ɩ tǝlɛ.

11 Tǝ nyǝmɑ́ mpi pɑ yɑɑ Tɑcɑɑ sɔɣɔntʋ tɔ mɛɛ, nɑ tǝ cɑɑ tǝ́ hʋ́lɩ́ yǝlɑɑ kɛ́ nɑ pɑ́ cɛkǝnɑ nɑ pɑ́ tisi. Ɩsɔ nyǝmɑ-tʋɣʋ teu, nɑ mɑ hʋʋ sɩ mǝ nyǝmɑ-m mpʋ tɔtɔɣɔ hɑtuu mǝ tɑɑ. 12 Pǝ tɑɣɑ tǝ tɑsǝɣɩ-mɛɣɛ tɑ́ mɑɣɑmɑɣɑ kɛ hʋ́lʋ́ɣʋ́ sɩ ɩ́ nɑ́ tɑ́ teu. Amɑ tǝ pɛɛkǝɣɩ kɛ́ sɩ tǝ́ hʋ́lɩ́-mɛɣɛ tɑmpɑnɑ nnɑ ɑ tɔɔ ɩ́ kɑ́ yɔɔlǝnɑ-tʋ, nɑ pǝ́cɔ́ ɩ́ pǝsɩ nɑ ɩ́ cɔ mpɑ pɑ yɔɔlǝɣǝnɑ tɔnǝŋ tɔɔ kʋlɑpǝm nɑ pɑ pɑɑ fɛɩnɑ tɑɑ nyǝm tɔ. 13 Ye tɑmpɑnɑ sɩ tǝ kɛ́ kpɑŋtʋnɑɑ ɩlɛ Ɩsɔ tɔɔ kɛ́ tǝ kɛ́ kpɑŋtʋnɑɑ. Amɑ ye tǝ wɛnɑ tɑ́ ɩsɛ, mǝ tɔɔ kɛ́ tǝ wɛnɑ tɑ́ ɩsɛ. 14 Pǝ tɑɣɑ pʋlʋ tɔɔ, Kilisiti sɔɔlʋɣʋ cɑɑlǝɣǝnɑ tɑ́ mpɑ tǝ tɛmɑ tɑ́ tɑɑ sɩ yʋlʋ kʋlʋm sǝpɑ yǝlɑɑ tǝnɑ tɔɔ tɔ, nɑ mpʋ ɩnɩ pǝ hʋ́lǝ́ɣɩ́ kɛ́ sɩ ɩ́ nɑ pɑɑ wei pɑ kpɛntǝnɑ sǝm. 15 Yǝlɑɑ tǝnɑ tɔɔ kɛ́ ɩ sǝpɑ sɩ pǝ́ hʋ́lɩ́ sɩ mpɑ pɑ wɛnɑ pɑ ɩsɛ tɔ pɑ́ nyɩ sɩ pǝ tɑɣɑ pɑ mɑɣɑmɑɣɑ pɑ tɔɔ kɛ́ pɑ wɛɛ. Amɑ wei ɩ sǝpɑ nɑ ɩ́ fe pɑ tɔɔ tɔ ɩ tɔɔ kɛ́.

16 Pǝ tɔɔ kɛ́ tɩɩ tɑsǝɣɩ yʋlʋhʋwɛɛ tǝŋʋɣʋ kɛ yem nɑ pǝ́cɔ́ tǝ́ nyɩ yʋlʋwɛɛtʋ, pɑɑ ɩsɩɩ tuu ḿpʋ́ɣʋ́ tɩɩ lɑkɑɣɑ nɑ tǝ́ hʋʋkɩ hʋwɛɛ kɛ Kilisiti tɔɔ tɔ, kɑɣɑnɑ tɩɩ lɑkɩ mpʋ tɔtɔ. 17 Ye yʋlʋ nɑ Kilisiti pɑ́ kpɛntɑɑ te, pǝ lɑɣɑsɑ-ɩ wɛɛtʋ kʋfɑtʋ kɛ́. Wɛɛtʋ kʋpǝntʋ mʋkɑ yem, wɛɛtʋ kʋfɑtʋ lɑɣɑsǝnɑ. 18 Pǝ tǝnɑɣɑ mpʋ Ɩsɔ kiŋ kɛ pǝ lɩɩnɑɑ, nɑ Kilisiti tɔɔ kɛ́ ɩ ciikɑ tɑ́ nɑ-ɩ nɑ ɩ́ tʋ-tʋɣʋ tǝmlɛ sɩ tǝ́ lɑ nɑ ɩ́ nɑ yǝlɑɑ lɛlɑɑ pɑ́ ciiki. 19 Pǝ tɑɣɑ pʋlʋ tɔɔ, Kilisiti kiŋ kɛ Ɩsɔ lɑpǝnɑɑ nɑ ɩ́ nɑ ɩ yǝlɑɑ tǝnɑ pɑ́ ciiki, ɩ tɑ hʋʋ pɑ ɩsɑɣɑtʋ tɔm tɔɔ. Nɑ tɑɣɑ ɩ tʋwɑ sɩ tǝ́ kpɑɑlǝɣɩ ciikuɣu tɔm tǝnɛ.

20 Tǝ kɛ́ Kilisiti tǝmlɛ nyǝ́mɑ sɔsɑɑ kɛ́, nɑ pǝ cɑɣɑ kɛ́ ɩsɩɩ Ɩsɔ yɑɑ-mɛ nɑ tɑ́ nɔɔsɩ. Hɑɩ tǝ wiikǝnɑ-mɛ, Kilisiti tɔɔ ɩ́ yele nɑ mǝ nɑ Ɩsɔ ɩ́ ciiki. 21 Ɩsɑɣɑtʋ tɑɑ wɛɛ Kilisiti kiŋ se, ɑmɑ Ɩsɔ pǝsǝnɑ-ɩ ɩsɑɣɑʋ kɛ tɑ́ tɔɔ. Mpʋ pǝ yelinɑ tɑ́ nɑ Kilisiti tɑ́ kpɛntʋɣʋ tɔɔ, Ɩsɔ lɑpɑ nɑ tǝ́ pǝsɩ yʋlʋpɑmɑ.