1 Mɑ kooliɣi kɛ́ sɩ ɩsɔwɛɛ ɩ́ tɩɩ nyǝnɩ-m pǝcɔɣɔ kpɑŋtʋ. Pǝ wɛ mpʋ mɛɛ, ɩ́ nyǝnǝɣɩ-m mpʋ. 2 Mɑ wɛnɑ ɩsɛsɛɛmlɛ kɛ mǝ tɔm tɑɑ kɛ́, ɩlɛ Ɩsɔ tʋnɑ-m ɩsɛsɛɛmlɛ ńtɛ́. Pǝ tɑɣɑ pʋlʋ tɔɔ, ɩ́ wɛɛ kɛ́ ɩsɩɩ pɛɛlɔ wei ɩ tɑ nyǝntɑ ɑpɑlʋ kɛ pɑɑ pǝcɔ nɑ mɑ́ tɔ sɩ ɑpɑlʋ kʋlʋm koŋ kɛ mɑɑ hɑ-ɩ tɔ, ɑpɑlʋ ɩnǝɣǝlɛ Kilisiti. 3 Amɑ mɑ nyɑŋ kɛ́ sɩ pǝ́ tɑɑ kɔɔ nɑ mǝ lɑɣɑtʋ sɑɑlɩ nɑ ɩ́ lɔ mǝ nɑ Kilisiti ɩ́ kpɛntʋɣʋ tɑm nɑ pǝ wɛ teu kɛ ɩsǝnɑ mpi tɔ. Nɑ pǝ́ kɔɔ pǝ́ lɑ́ ɩsɩɩ Ɩfɑ kɑ yeluɣu nɑ tʋm mɑpɩ-ɩ pɔpɔtʋ tɔm kɛ ɩ nɔɣɔ tɑɑ nɑ ɩ́ tolisi-ɩ tɔ. 4 Pǝ tɑɣɑ pʋlʋ, ɩ́ tɛmɑ mǝ tɑɑ sɩ nɔɣɔlʋ ɩ́ kɔɔ ɩ́ kpɑɑlɩ-mɛɣɛ nyɛntɛ Yesu nɔɣɔlʋ ɩ tɔm nɑ pǝ́ tɑ́ kɛnɑ Yesu wei ɩ tɔm tɑ́ kpɑɑlɑ-mɛ tɔ. Nɑ ɩ́ tɑŋɑɑ tǝtɛɣɛtɛɣɛ sɩ ɩ́ mʋɣɩ nyɛntɛ feesuɣu nɑkʋlɩ kʋ tɔm nɑ pǝ́ tɑ́ kɛnɑ Ɩsɔ Feesuɣu ŋku kʋ tɔm tǝ heelɑ-mɛ tɔ, nɑ nyɛntɛ Lɑɑpɑɑlɩ nɔɣɔlʋ nɑ pǝ́ tɑ́ kɛnɑ Lɑɑpɑɑlɩ Kʋpɑŋ wei tǝ heelɑ-mɛ tɔ.

5 Mɑ tɑ hʋʋ sɩ mǝ nyɛntɛ tillɑɑ tɑɑ sɔsɑɑ mpɛ pɑ tɛɛ-m pʋlʋ tɑɑ se. 6 Amɑ pǝ pǝsǝɣɩ pǝ wɛɛ yɔɣɔtɑɣɑ wɑwɑwɑ wei mɑ tɑ nyɩ tɔ. Tɔfɔ pɑ tɑ kǝlɩ-m nyǝm. Tǝ hʋlɑ-mɛɣɛ ḿpʋ́ɣʋ́ tǝcɛɩcɛɩ kɛ́ pɑɑ mpi pǝ tɑɑ kɛ́ nɑ pɑɑ timpi.

7 Wɑɑtʋ wei mɑ kpɑɑlɑɣɑ-mɛɣɛ Ɩsɔ Lɑɑpɑɑlɩ Kʋpɑŋ tɔ, fɑɑlɑɑ kɛ mɑ kpɑɑlɑɣɑ. Mɑ pɑsɑ mɑ tǝɣɩ ḿpʋ́ɣʋ́ sɩ pǝ́ kʋsɩ-mɛ. Yɑɑ mɑ lɑpɑ mpʋ tɔ kɑwɑlɑɣɑ ntɛ́? 8 Mɑ tisɑɑ sɩ Yesu sɛɛlɑɑ kpekɑ lɛnnɑ ɩ́ fɛlǝɣɩ-m, ɩlɛ pǝ wɛ ɩsɩɩ mɑ hʋlʋsɑ ɑlɛɣɛlɛ nɑ mɑ́ sǝnɑ-mɛ. 9 Wɑɑtʋ wei mɑɑ wɛ mǝ tɛ nɑ kʋnyɔŋ wɛnɑ-m tɔ mɑ tɑ sʋkɩ mǝ tɑɑ nɔɣɔlʋɣʋ sǝɣǝlɑ. Pǝ tɑɣɑ pʋlʋ, tɑ́ tɑɑpɑlɑɑ mpɑ pɑ lɩɩnɑ Mɑsetoni tɔ pɑ kɔnɑ-m pǝ tǝnɑ mpi pǝ lɑŋɑ-m tɔ. Mɑ tɔkɑ mɑ tǝɣɩ sɩ pǝ́ tɑɑ kɔɔ nɑ mɑ́ sʋkɩ mǝ tɑɑ nɔɣɔlʋɣʋ sǝɣǝlɑ. Nɑ mpʋ ɩnǝɣɩ mɑɑ tɔkǝɣɩ mɑ tǝɣɩ tɑm. 10 Nɑ Kilisiti tɑmpɑnɑ nnɑ mɑ tɔkɑ ɩsǝntɔ tɔ mɑ kɑɑ yele mpi mɑ yɔɔlǝɣǝnɑ ɩsǝntɔ tɔɣɔ yɔɔlǝnɑʋ kɛ Akɑyi tɛtʋ tǝnɑ tɑɑ. 11 Pepe yelinɑ nɑ mɑ yɔɣɔtǝɣɩ mpʋ? Mɑ tɑ sɔɔlɩ-mɛ tɔ pǝ tɔɔ yɑɑ? Ɩsɔ nyǝmɑ́ teu sɩ mɑ sɔɔlɑ-mɛ.

12 Ɩsɩɩ mɑ lɑkʋɣʋ pǝnɛntɛ tɔ ḿpʋ́ɣʋ́ mɑɑ lɑkɩ, ɩlɛnɑ mɑ́ lǝsɩ mpɑ pɑ hɔŋ pɑ tɩ nɑ pɑ́ tɔŋ sɩ tɑ́ nɑ-wɛ tǝ kɑɑ tǝmlɛ tɔɣɔ pǝ tɑɑ. 13 Yǝlɑɑ mpɛ pɑ́ kɛ́ tillɑɑ pɔpɔtʋnɑɑ kɛ́. Pɑ looliɣi nti pɑ lɑkɩ tɔ tǝ tɑɑ nɑ pɑ́ cɛsǝɣǝnɑ pɑ tɩ ɩsɩɩ Kilisiti tillɑɑ. 14 Nɑ tǝlɛ tǝ fɛɩ piti mɛɛ, ḿpʋ́ɣʋ́ Sɑtɑnɩ mɑɣɑmɑɣɑ nɑ́ cɛsǝɣǝnɑ ɩ tɩ ɩsɩɩ ɩsɔtɑɑ tillu kʋpɑŋ nɔɣɔlʋ. 15 Ye mpʋ pǝ fɛɩ piti sɩ ɩ tǝmlɛ nyǝ́mɑ ɩ́ cɛsǝnɑ pɑ tɩ ɩsɩɩ siɣisuɣu lɑtɑɑ. Amɑ te, pɩɩ tɛ nɑ pǝ́ fɛlɩ-wɛɣɛ mpi pɑ lɑkɩ tɔ.

16 Mɑ tɑsǝɣɩ-tǝɣɩ yɔɣɔtʋɣʋ kɛ́, nɔɣɔlʋ ɩ́ tɑɑ nyǝnɩ-m ɩsɩɩ mɑ kɛ́ kpɑŋtʋ. Yɑɑ ye ɩ́ tɩɩ nyǝnǝɣɩ-m kpɑŋtʋ ntɔ, ɩ́ yɑɑ-m kpɑŋtʋ, ɩlɛnɑ pǝ́cɔ́ mɑ́ pǝsɩ nɑ mɑ́ sɑ mɑ tǝɣɩ pǝcɔ tɔtɔ. 17 Nti mɑ yɔɣɔtǝɣɩ ɩsǝntɔ tɔ pǝ tɑɣɑ ntǝɣɩ Tɑcɑɑ luɣu wɛɛ sɩ mɑ́ sɑ mɑ tɩ ɩnɩ. Mɑ yɔɣɔtǝɣɩ kɛ́ ɩsɩɩ kpɑŋtʋ. 18 Pǝ tɑɣɑ pʋlʋ tɔɔ, timpi yǝlɑɑ lɛlɑɑ sɑŋ pɑ tɩ nɑ yʋlʋhʋwɛɛ kɛ yem tɔ, ɩsɩɩ mɑ sɑmɑ mɑ tɩ tɔtɔ mɛɛ. 19 Mɛ mpɑ mɛ mǝ nɑ mǝ ɩsɛ tɔ, pɑɑ pɑ tɑ tɩɩ sǝlǝmɩ-mɛ sɩ ɩ́ mʋ kpɑŋtʋnɑɑ, ɩ́ mʋɣɩ-wɛɣɛ. 20 Ɩ́ yelɑɑ kɛ́ sɩ pɑ́ pǝsɩ-mɛɣɛ yomɑɑ, sɩ pɑ́ tɔkǝnɑ-mɛ, sɩ pɑ́ puɣusiɣi-mɛ, sɩ pɑ́ kpɑɑkɩ mǝ tɔɔ nɑ pɑ́ fɛlǝɣɩ, sɩ pɑ́ mɑkɩ mǝ nɔɔsɩ. 21 Tɑ́ ɩcɑntʋ tɔɔ kɛ́ tɑ́ tɑɑ lɑ mpʋ. Pǝ wɛ fɛɛlɛ sɩ mɑ́ yɔɣɔtǝɣɩ mpʋ.

Pɑɑ nɑ mpʋ tɔ, ye nɔɣɔlʋ mɑkɩ kɑŋkɑntɛ sɩ ɩ wɛnɑ mpi ɩ kɑ́ sɑŋnɑ ɩ tɩ tɔ, mɑ pǝsǝɣɩ nɑ mɑɑ mɑ́ kɑŋkɑntɛ tɔtɔ mɛɛ. Mɑ yɔɣɔtǝɣɩ kɛ́ ɩsɩɩ mɑ sʋʋ kpɑŋʋɣʋ. 22 Ntɔŋ pɑ kɛ́ Hepǝlɑ nyǝ́mɑ yɑɑ? Nɑ mɑ́ tɔtɔɣɔ te. Ntɔŋ pɑ kɛ́ Ɩsɛɣɛlɩ nyǝ́mɑ yɑɑ? Nɑ mɑ́ tɔtɔɣɔ te. Ntɔŋ pɑ kɛ́ Apǝlɑhɑm piyɑ yɑɑ? Nɑ mɑ́ tɔtɔɣɔ. 23 Ntɔŋ pɑ kɛ́ Kilisiti tǝmlɛ nyǝ́mɑ yɑɑ? Mɑ́ kɛ́ Kilisiti tǝmlɛ tʋ nɑ pǝ́ kǝlɩ-wɛ. Mɑ lɑpɑ tǝmlɛ nɑ pǝ́ kǝlɩ-wɛ. Pɑ tǝkɑ-m tɔm pɑɣɑlɛ nɑ pǝ́ kǝlɩ-wɛ. Pɑ mɑpɑ-m nɑ pǝ́ kǝlɩ-wɛ, sǝm nɔɣɔ tɑɑ kɛ́ mɑ wɛ tɑm. 24 Tɔm kɑkpɑsɩ kɛ Yutɑ nyǝ́mɑ mɑpɑ-m ɑkpɑtɛɛ pɔɣɔlɑɣɑfɛɩ nɩɩlɛ nɩɩlɛ. 25 Lom nyǝ́mɑ nɑ́ mɑpɑ-m tɔm tooso, pɑ yɑɣɑ-m pɛɛ kɛ tɔm kʋlʋm sɩ pɑ kʋɣʋ-m. Tɔm tooso kɛ́ lʋm lipɑ kpɩɩlǝŋ wei ɩ tɑɑ mɑ wɛɛ tɔ, mɑ cɑɣɑ ilim kʋlʋmǝm nɑ ɑhoo kʋlʋmɛɛ kɛ teŋku tɑɑ. 26 Mɑ cɔɔʋ kɑtɑtǝlɑɣɑ tɑɑ, pusi nɑ ŋmɩɩlɑɑ niŋ tɑɑ kɛ́ mɑ wɛɛ. Sǝm nɔɣɔ tɑɑ kɛ́ mɑ wɛ mɑ Yutɑ nyǝ́mɑ mɑɣɑmɑɣɑ hɛkʋ tɑɑ, nɑ sǝm nɔɣɔ tɑɑ kɛ́ mɑ wɛ kpɑɩ nyǝ́mɑ tɛ. Nɑ sǝm nɔɣɔ tɑɑ kɛ́ mɑ wɛ ɑcɑlɛɛ tɑɑ, nɑ sǝm nɔɣɔ tɑɑ kɛ́ mɑ wɛ wʋlɑɣɑ tɛtʋ tɑɑ. Nɑ sǝm nɔɣɔ tɑɑ kɛ́ mɑ wɛ teŋku tɑɑ. Nɑ sǝm nɔɣɔ tɑɑ kɛ́ mɑ wɛ tɑ́ tɑɑpɑlɑɑ kʋcɛsɑɑ kiŋ. 27 Pɑ yɑɑ sɩ kɑŋkɑŋsi tǝmɑ nɑ wɑhɑlɑnɑɑ sɔsɑɑ tɔ, mɑ́ nɑnɑ. Tɔm pɑɣɑlɛ kɛ mɑɑ kpǝtǝɣɩ ɩsǝlɛ. Nyɔɣɔsɩ nɑ lʋkɔtʋ tɔ, pɑɑ pɔɔsǝɣɩ. Mɑ kpisɑ kʋtɔɣɔʋ tɔɣɔʋ kɛ wulee wulee. Mɑ tɔɣɔ wɑhɑlɑ nɑ wɑtʋ, pɑɑ wontuɣu kʋtɑkʋɣʋ mɑ fɛɩnɑ. 28 Nɑ pǝ tɩɩ kɑɑsɑ mpi tɔ, mɑɑ yɔɣɔtǝɣɩ pǝ tɔm. Yesu sɛɛlɑɑ kpekɑ tǝnɑ tɔm nǝɣǝsɛɛ nɑ́ kʋɣʋ-m pɑɑ kʋyɑŋkuɣu. 29 Ye yʋlʋ nɔɣɔlʋ lɑpɑ ɩcɑm, mɑ́ lɑkɩ ɩcɑm tɔtɔɣɔ. Ye pǝ tʋ nɔɣɔlʋ kɛ ɩsɑɣɑtʋ lɑpʋ, pǝ wɩɩkɩ-m kɛ́ tǝsǝŋŋ.

30 Ye pǝ wɛɛ sɩ mɑ́ sɑ mɑ tǝɣǝlɔ, mɑ ɩcɑntʋ mɑ ɩcɑntʋ cɔlɔɣɔ mɑɑ sɑŋnɑ mɑ tɩ. 31 Tɑcɑɑ Yesu Cɑɑ Ɩsɔ nyǝmɑ́ sɩ mɑɑ looliɣi. Ɩnǝɣɩ pɑɑ sɑŋ tɑm. 32 Mɑɑ wɛ Tɑmɑsɩ tɔ, wulɑʋ sɔsɔ Aletɑsɩ sɩɩ kʋfǝnɛɛ wei kɛ tǝnɑ tɔ ɩ sɩɩ tɑŋlɑɑ kɛ koluŋɑ ŋkɑ kɑ cɔɔnɑ ɩcɑtɛ tɔ kɑ nɔɣɔ sɩ pɑ́ kpɑ-m. 33 Amɑ pɑ tʋ-m sɔɔtɔkʋ sɔsɔɔʋ tɑɑ nɑ pɑ́ tisi-m nɑ ɩcɑtɛ koluŋɑ ŋkɛ kɑ pǝtote. Mpʋ pǝ yelinɑ nɑ mɑ́ fiti ɩ niŋ tɑɑ.