1 Ḿpʋ́ɣʋ́ Tɑcɑɑ tɔmɑ Moisi sɩ: Mǝlɩ Icipiti wulɑʋ tɛ́, mɑ́ yelinɑ sɩ ɩ́ nɑ ɩ tǝmlɛ nyǝ́mɑ pɑ́ lɑ lɑŋkpɩɩsǝŋ kɛ mpʋ nɑ mɑ́ lɑ́ kɔkɔlɔ nyǝm tǝnɑ nɑ pɑ́ nɑ́. 2 Mɑ lɑpɑ ḿpʋ́ɣʋ́ sɩ n kɑ́ kɛɛsɩ nyɑ́ piyɑ nɑ nyɑ́ sɑɑlǝnɑɑ kɛ ɩsǝnɑ mɑ lɑpɑ Icipiti tɑɑ kɛ́ kɔkɔlɔ nyǝm tɔ. Tǝnɑɣɑ ɩ́ kɑ́ nyǝnɑ sɩ mɑ kɛ́ Tɑcɑɑ.

3 Ḿpʋ́ɣʋ́ Moisi nɑ Alɔŋ pɑ polɑ Icipiti wulɑʋ tɛ́ nɑ pɑ́ heeli-ɩ sɩ: Hepǝlɑ nyǝ́mɑ tɑ́, tɑ́ Ɩsɔ Tɑcɑɑ tɔmɑ-tʋ sɩ tǝ́ kɔɔ tǝ́ pɔɔsɩ-ŋ sɩ pǝlee kɛ́ n kɑ́ lɔ́ nyɑ́ lɑŋkpɩɩsǝŋ nɑ ń yele ɩ yǝlɑɑ nɑ pɑ́ polo pɑ́ lɑpɩ-ɩ tǝmlɛ? 4 Ye n kɑmɑ nyʋɣʋ kɛ pǝ tɑɑ, cele ɩ kɑ́ kɔnɑ kʋtoloŋ kɛ nyɑ́ tɛtʋ tǝnɑ tɑɑ. 5 Kɩɩ wɑ́ɑ́sɩ tɛtʋ tɔɔ tǝwisiwisi, nɑ kʋ́ kuɣuli kʋnyɔnyɔm nɑ tɩɩŋ wei tɔmpɛɛ kɑ fɛɛwɑ tɔ. 6 Kʋtoloŋ kɑ́ mɑɣɑlɩ nyɑnɑ nyɑ́ tǝmlɛ nyǝ́mɑ nɑ Icipiti nyǝ́mɑ tǝnɑ tɛɛsɩ tɑɑ tǝpɑmpɑm. Too tɔ, nyɑ́ cɑɑnɑɑ nɑ pɛlɛ pɑ cɑɑnɑɑ tɑ keesitɑ kɔkɔlɔ ɩnɩ ɩ tɑkɑ hɑlǝnɑ sɑŋɑ.

Moisi tɛmɑ mpʋ ɩlɛnɑ ɩ́ lɩɩ Icipiti wulɑʋ tɛ́.

7 Icipiti wulɑʋ tǝmlɛ nyǝ́mɑ kotɑɑ nɑ pɑ́ tɔmɩ-ɩ sɩ: Tɑ cɑɑ, yʋlʋ ɩnɛ ɩ kɑ cɔɔsɩ-tʋ yoo. Pǝ tɔɔ tɔ, yele-wɛ nɑ pɑ́ polo pɑ́ lɑ́ pɑ Ɩsɔ Tɑcɑɑ kɛ tǝmlɛ. Ye pǝ tɑɣɑ mpʋ Icipiti nyǝ́mɑ tǝnɑ kɑ́ sɩ.

8 Tǝnɑɣɑlɛ pɑ tɑɣɑnɑ Moisi nɑ Alɔŋ kɛ yɑɑʋ kɛ Icipiti wulɑʋ tɛ́ nɑ ɩ́lɛ́ ɩ heeli-wɛ sɩ: Ɩ́ polo ɩ́ lɑ́ mǝ Ɩsɔ Tɑcɑɑ kɛ tǝmlɛ. Ɩ tɑɑ ɩ tɑɑ ɩlɛ sɩ: Awe nɑ ɑwe pɑɑ ponɑ?

9 Ntɛnɑ Moisi sɩ: Tɑ tǝnɑ tɩɩ ponɑ. Pǝ kpɑɣɑʋ ɩfepiyɑ nɑ tɑ́ kʋkpɑtǝlɑɑ nɑ tɑ́ pǝyɑlɑɑ nɑ tɑ́ pɛɛlɑɑ tɔ. Nɑ tǝ́ kpɛŋnɑ tɑ́ tɔlɑ tǝnɑ. Mpi tɔ, Tɑcɑɑ ɑcimɑ kɛ tǝ puki tɔɣɔʋ.

10 Mpʋɣʋlɛ Icipiti wulɑʋ pǝsǝnɑ-wɛ sɩ: Mǝ tɑɑ sɩ mɑɑ yele mǝ nɑ mǝ piyɑ nɑ ɩ́ tɛɛ yɛɛ? Ɩsɔ ɩ́ sɩɩ-mɛ yɑɑ. Mɑ nyǝmɑ́ mǝ tɑɑ lɑɣɑtʋ kɛ́ té. 11 Pǝ kɑɑ lɑ mpʋ. Apɑlɑɑ mɛ, mǝ tike ɩ́ kɑ́ ponɑ nɑ ɩ́ lɑ́ mǝ Ɩsɔ kɛ́ tǝmlɛ. Mpi ɩ kɑ sǝlǝmɩ tɔɣɔlɛ.

Ɩlɛnɑ pɑ́ tɔɣɔnɩ Moisi nɑ Alɔŋ kɛ Icipiti wulɑʋ tɛ, nɑ pɛlɛ pɑ́ lɩɩ.

12 Tǝnɑɣɑ Tɑcɑɑ tɔmɑ Moisi sɩ: Hʋ́lɩ́ nyɑ́ kpɑ́tʋ́ɣʋ́ kɛ Icipiti tɛtʋ tɔɔ nɑ kʋtoloŋ lɩɩ nɑ kʋ wɑ́ɑ́sɩ-tɩ nɑ kʋ́ tɔɣɔ kʋnyɔnyɔm tǝnɑ mpi tɔmpɛɛ kɑ fɛɛwɑ tɔ.

13 Ḿpʋ́ɣʋ́ Moisi hʋlɑ ɩ kpɑ́tʋ́ɣʋ́ kɛ Icipiti tɛtʋ tǝnɑ tɔɔ. Ɩlɛnɑ Tɑcɑɑ yele nɑ heelim lɩɩnɑ tɛʋ kite nɑ pǝ́ mɑ́ ilim mpɩ nɑ ɑhoo tǝnɑ. Pǝ kɔmɑ nɑ pǝ́ nyɑɑlɩ ɩlɛ kʋtoloŋ tɑpɑɣɑlɛ. 14 Kʋ kɔmɑ tuutuumɑ kɛ́, nɑ kʋ wɑ́ɑ́sɩ tɛtʋ tǝnɑ tɔɔ. Too tɔ, pɑ tɑ nɑtɑ kʋtoloŋ ɩsɩɩ mpʋ pǝ tɑkɑ. Pǝ́cɔ́ pɑ kɑɑ tɑsɑ kʋ tɑkɑ kɛ́ nɑʋ tɔtɔ. 15 Kʋ wɑɑsɑ tɛtʋ tǝnɑɣɑ nɑ tǝ́ mǝlɩ piliŋ, nɑ kʋ́ tɔɣɔ nyɩɩtʋ nɑ tɩɩŋ wei tɔmpɛɛ kɑ yelɑɑ tɔ ɩ pee tǝnɑ. Pǝ tɑ sɔɔ tʋɣʋ nɑkʋlɩ kʋ hɑtʋ yɑɑ nyɩɩliyɑ.

16 Ḿpʋ́ɣʋ́ Icipiti wulɑʋ yɑɑ Moisi nɑ Alɔŋ kɛ lɔŋ nɑ ɩ́ heeli-wɛ sɩ: Mɑ wɑkǝlǝnɑ mǝ Ɩsɔ Tɑcɑɑ nɑ mǝ mɑɣɑmɑɣɑ tɔtɔ. 17 Hɑɩ, mɑ wiikinɑ-mɛ sɩ ɩ́ tɑsɑ-m suulu hʋlʋɣʋ kɛ tɔm kʋlʋm. Ɩ́ sǝlǝmɩ mǝ Ɩsɔ sɩ ɩ́ hɑtǝlǝnɑ-m sǝm pǝnɛ.

18 Moisi lɩɩ Icipiti wulɑʋ tɛ́ ɩlɛnɑ ɩ́ wiinɑ Ɩsɔ kɛ́ kʋtoloŋ tɔm. 19 Ḿpʋ́ɣʋ́ Tɑcɑɑ kɛɛ heelim nɑ pǝ́ mɑkǝnɑ toŋ nɑ ilim tǝtʋlɛ tɔɔ nɑ pǝ́ pɑɑlɩ kʋtoloŋ nɑ pǝ́ pǝlɩ kʋ tǝnɑɣɑ sǝsǝncɑɑsɩ teŋku tɑɑ. Pǝ tɑ sɔɔ pɑɑ kʋlʋmʋɣʋ kɛ Icipiti tɛtʋ tɔɔ. 20 Ḿpʋ́ɣʋ́ Tɑcɑɑ tʋ Icipiti wulɑʋ kɛ lɑŋkpɩɩsǝŋ nɑ ɩ́ kisi sɩ Ɩsɛɣɛlɩ nyǝ́mɑ ɩ́ tɑɑ tɛɛ.

21 Ḿpʋ́ɣʋ́ Tɑcɑɑ heelɑ Moisi sɩ: Kʋsɩ nyɑ́ kpɑ́tʋ́ɣʋ́ nɑ ɩsɔtɑɑ nɑ sǝkpɛtʋɣʋ tɑɑ sǝkpɛtʋɣʋ nyɑlɑ Icipiti tɛtʋ tǝnɑ tɑɑ. Hɑlǝnɑ yǝlɑɑ tokiɣinɑ-kʋ.

22 Moisi kʋsɑ-kʋɣʋ mpʋ ɩlɛnɑ sǝkpɛtʋɣʋ yuŋ nyǝŋkʋ nɑkʋlɩ kʋ nyɑlɑ Icipiti tɛtʋ tǝnɑ tɔɔ kɛ́ kʋyɛɛŋ tooso tǝcu. 23 Kʋyɛɛŋ tooso ɩnɩ ɩ tɑɑ nɔɣɔlʋ tɑ keesi ɩ tɔɣɔntǝlɛ. Pǝyele nɔɣɔlʋ tɑ lɑɣɑsɩ lonte. Amɑ kʋ tɑɑ fɛɩ Ɩsɛɣɛlɩ nyǝ́mɑ hɔɣɔlʋɣʋ. 24 Ḿpʋ́ɣʋ́ Icipiti wulɑʋ yɑ́ɑ́ Moisi nɑ ɩ́ heeli-ɩ sɩ: Mɑɑ yele-mɛ nɑ ɩ́ polo ɩ́ sɛɛ mǝ Ɩsɔ ɩsɩɩ ɩ sǝlǝmʋɣʋ tɔ. Nɑ ɩ́ tɩɩ nɔkɑɑ ɩ́ kpɛnnɑ mǝ ɑlɑɑ nɑ mǝ piyɑ. Amɑ mǝ tɔlɑ tike kɑɑ lɩɩnɑ hǝm. 25 Mpʋɣʋlɛ Moisi sɩ: Ɩlɛnɑ ń cɛlɛ-tʋɣʋ tɔlɑ nnɑ tɩɩ lɑ Tɑcɑɑ kɛ kɔtɑɣɑ ŋkɑ kɔkɔ lusɑ kɑ tǝnɑ tɔ nɑ ciikuɣu nyǝnsɩ nɑ? 26 Pǝ wɛɛ kɛ́ sɩ tǝ́ kpɑɣɑ tɑ tɔlɑ tǝnɑ, tǝ kɑɑ sɔɔ hʋntʋɣʋ. Tɩɩ tɑlɑ tǝnɑ tɔɣɔ tɩɩ nyɩ tɔlɑ ɩsǝnɑ, nɑ nnɑ ɑ́ tɑkɑ tɑ́ Ɩsɔ cɑɑ sɩ tǝ́ lɑpɩ-ɩ kɔtɑɣɑ tɔ. 27 Ɩlɛnɑ Tɑcɑɑ tɑsɑ Icipiti wulɑʋ kɛ lɑŋkpɩɩsǝŋ kɛ tʋɣʋ nɑ ɩ́ kisi sɩ Ɩsɛɣɛlɩ nyǝ́mɑ ɩ́ tɑɑ tɛɛ. 28 Hɑlǝnɑ ɩ́ tɔɣɔnɩ Moisi kɛ kʋtɔɣɔnʋ sɩ ɩ́ lɩɩ ɩnɩ ɩ tɛ. Nɑ ɩ́ tɔmɩ-ɩ sɩ: Lɑ lɑɑkɑlɩ, ye pǝ cǝpɑ-ŋ nɑ ń tɑsɑ cǝnɛɣɛ mǝlʋɣʋ mɑɑ kʋ-ŋ. 29 Mpʋɣʋlɛ Moisi sɩ: Awusɑ, n tɩɩ yɔɣɔtɑɑ kɛ́, mɑɑ tɑsǝɣɩ mǝlʋɣʋ.