1 Pǝnɛntɛ Tɑcɑɑ yɔɣɔtǝɣɩ sɩ:

Yɑkɔpʋ yǝlɑɑ mɛ ɑwe ŋmɑɣɑ-mɛ?

Ɩsɛɣɛlɩ nyǝ́mɑ mɛ ɑwe ŋmɑ-mɛ?

Ɩ́ tɑɑ nyɑnɑ pʋlʋ.

Mpi tɔ, mɑ yɑpɑ-mɛɣɛ.

Mǝ hǝlɑ kɛ mɑ yɑɑnɑ-mɛ.

Ɩ́ kɛ́ mɑ nyǝ́mɑ kɛ́.

2 Ye ɩ́ tɛsǝɣɩ lʋm mɑ wɛ mǝ wɑɑlǝɣɩ.

Pusi kɑɑ tɔɣɔ-mɛ.

Pǝyele ye ɩ́ tɔŋ kɔkɔ tɑɑ kɑ kɑɑ nyɑɣɑ-mɛ.

Kɔkɔ kɑɑ kʋ-mɛ.

3 Mpi tɔ, mɑɣɑlɛ Tɑcɑɑ mǝ Ɩsɔ.

Mɑ́ kɛnɑ Ɩsɛɣɛlɩ nyǝ́mɑ Nɑŋŋ tʋ.

Wei ɩ wɑɑsǝɣɩ-mɛ tɔ.

Icipiti nyǝ́mɑ kɛ mɑɑ fɛlɩ mǝ lonte.

Mɑɑ lɑɣɑsǝɣǝnɑ-mɛɣɛ Ɩtiyopii nɑ Sepɑ nyǝ́mɑ.

4 Mpi tɔ, ɩ́ kɛ-m pʋlʋ sɔsɔɔm kɛ́.

Mǝ nyʋɣʋ kʋlɑɑ, nɑ mɑ́ sɔɔlɑ-mɛ.

Mɑ cɛlǝɣɩ ɑpɑlɑɑ kɛ mǝ lonte.

Mɑ lɑɣɑsǝɣǝnɑ yǝlɑɑ kɛ nyɑ́ weesuɣu.

5 Mɑ wɛ mǝ wɑɑlɩ kɛ́, ɩ́ tɑɑ nyɑ́.

Mɑɑ kɔnɑ mǝ lʋlʋɣʋ nyǝ́mɑ nɑ tɛʋ kite.

Mɑɑ kɔnɑ-mɛ nɑ ilim tǝtʋlɛ.

6 Mɑɑ heeli ilim ntɔɣɔŋ sɩ: Kɔnɑ-wɛ.

Mɑɑ heeli ilim mpǝtǝŋ sɩ: Tɑɑ sɩɩ-wɛ.

Kɔnɑ mɑ piyɑ nɑ pooluŋ.

Lǝsɩ mɑ pɛɛlɑɑ nɑ tɛtʋ tǝnɑsɩ nɑ ń kɔnɑ.

7 Pɑ tǝnɑ mpɑ pɑ yɑɑkǝnɑ mɑ hǝtɛ,

nɑ mɑ ŋmɑ-wɛɣɛ mɑ teeli tɔɔ tɔ.

Mɑ́ lɑpǝnɑ-wɛ.

8 Ɩ́ yele nɑ mɑ yǝlɑɑ lɩɩ.

Pɑ kɛ́ yʋlʋmɑɑ kɛ́, pǝyele pɑ wɛnɑ ɩsɛ.

Pɑ kɛ́ ntɑmɑɑ kɛ́ pǝyele pɑ wɛnɑ ŋkpɑŋŋ.

9 Piitimnɑɑ tǝnɑ ɩ́ kpeɣeli, yǝlɑɑ ɩ́ koti.

Mǝ tɑɑ ɑwe kpɑɑlɑ tɔmnɑɑ mpɛ?

Mpɑ pɑ heelinɑ-tʋɣʋ kɑncɑɑlɑɣɑ nyǝntʋ ntɩ?

Pʋntʋnɑɑ ɩ́ hʋ́lɩ́ pɑ ɑseetɑ nyǝ́mɑ,

pɑ hʋ́lɩ́ pɑ tɑmpɑnɑ,

nɑ tǝ́ nɩɩ nɑ tǝ tisi sɩ ḿpʋ́ɣʋ́.

10 Mɛɣɛlɛ mɑ ɑseetɑ nyǝ́mɑ.

Tɑcɑɑ mɑ́ mɑ yɔɣɔtǝnɑ mpʋ.

Mǝ nɑ mɑ tǝmlɛ tʋ wei mɑ lǝsɑɑ tɔ.

Ɩlɛnɑ pǝ́ lɑ́ nɑ ɩ́ nyɩ-tɩ nɑ ɩ́ tɛ-m nɑ mǝ tɑɑ.

Nɑ ɩ́ cɛkǝnɑ sɩ mɑɣɑ.

Ɩsɔ nɔɣɔlʋ ɩ tɑɑ wɛɛ nɑ pǝ́cɔ́ pǝ́ tɑkɩ-m.

Pǝyele Ɩsɔ nɔɣɔlʋ ɩ kɑɑ lɩɩ mɑ wɑɑlɩ tɔtɔ.

11 Mɑɣɑlɛ Tɑcɑɑ, mɑ pɑɑsi,

wɑɑsʋlʋ nɔɣɔlʋ ɩ fɛɩ tɔtɔ.

12 Mɑ́ kpɑɑlǝnɑ, mɑ́ wɑɑsǝnɑ.

Mɑ heelɑ nti tɩɩ kɔɔ tɔ.

Pǝ tɑɣɑ mǝ hɛkʋ tɑɑ tʋɣʋ kpɑɩ nyǝŋkʋ nɑkʋlɩ.

Mɛɣɛlɛ mɑ ɑseetɑ nyǝ́mɑ. Mɑ́ kɛnɑ Ɩsɔ.

Tɑcɑɑ mɑ́ mɑ yɔɣɔtǝnɑ mpʋ.

13 Mɑɣɑlɛ Ɩsɔ kɛ́ hɑtoo tɑm tɔɔ.

Nɔɣɔlʋ ɩɩ fitiɣi pʋlʋɣʋ mɑ niŋ tɑɑ.

Awe kɑ wɑkǝlɩ mpi mɑ lɑkɩ tɔ?

14 Tɑcɑɑ Ɩsɛɣɛlɩ Ɩsɔ Nɑŋŋ tʋ wei ɩ wɑɑsǝɣɩ tɔ.

Ɩ yɔɣɔtǝɣɩ sɩ:

Mǝ tɔɔ kɛ́ mɑ tiliɣi nɔɣɔlʋ sɩ ɩ́ yoonɑ Pɑpiloni.

Mɑɑ yele nɑ lʋm tɔɣɔ Kɑlǝtee selɑɑ kpɩɩlǝŋ,

wei ɩ tɑɑ pɑ nɩɩkɩ leleŋ tɔ.

15 Mɑɣɑlɛ mǝ Nɑŋŋ tʋ Tɑcɑɑ.

Mǝ wulɑʋ wei ɩ ŋmɑwɑ Ɩsɛɣɛlɩ tɔ.

16 Mɑɣɑlɛ Tɑcɑɑ wei ɩ hɛɛ hɑpǝlɛ kɛ teŋku tɑɑ

nɑ mpɑɑʋ kɛ lʋm toŋ nyǝm tɑɑ tɔ mɑ yɔɣɔtɑɑ sɩ:

17 Ɩ lǝsɑ yoou kɛɛkɛnɑɑ nɑ pǝ kpɑɣɑnǝŋ.

Pɑ hǝntɑ pɑ tǝnɑ, pɑ temɑɣɑ.

Pɑ nyɑɣɑɑ kɛ́ ɩsɩɩ fǝtǝlɑ kponkpontuɣu.

18 Ɩ́ tɑɑ tɔɔsɩ kɑncɑɑlɑɣɑ nyǝntʋ tɔɔ.

Pǝyele ɩ́ tɑɑ pɑɑsǝnɑ kʋpǝm tɔm.

19 Yɑɑsi kʋfɑlʋ kɛ mɑ cɑɑkɩ lɑpʋ,

hɑlɩ yɑɑsi ɩnɩ ɩ cɑɑkɩ lɑpʋ.

Ɩ tɑ nyǝmɩ-ɩ?

Mɑɑ hɛɛ mpɑɑʋ kɛ wʋlɑɣɑ tɛtʋ tɑɑ,

nɑ mɑ́ yele nɑ pusi sɔsɔɔnsɩ kpe.

20 Tɑɑlɛ wontu kɑ́ sɑ-m.

Pǝ kpɑɣɑʋ tɑɑlɛ hɑsɩ nɑ tɑɑtɑɑnɑɑ tɔ.

Mpi tɔ, mɑɑ tʋ́ pusi sɔsɔɔnsɩ kɛ wʋlɑɣɑ tɛtʋ tɑɑ

sɩ mɑ yǝlɑɑ kʋlǝsɑɑ ɩ́ nyɔɔ.

21 Yǝlɑɑ mpɑ mɑ ŋmɑwɑ mɑ tɩ tɔ,

pɑɑ sɑ-m kɛ́.

22 Ḿpʋ́ɣʋ́ Tɑcɑɑ yɔɣɔtɑɑ sɩ:

Yɑkɔpʋ pǝ tɑɣɑ mɑɣɑ n yɑɑwɑ.

Ɩsɛɣɛlɩ kɑwɑ mɑ tɔm.

23 Pǝ tɑɣɑ mɑɣɑ n lɑpɑ kɔtɑɣɑ ŋkɑ kɔkɔ

lusɑ kɑ tǝnɑ tɔɣɔ nyɑ́ ɩwɛɛsɩ.

Pǝ tɑɣɑ mɑ hǝtɛ tɑɑ kɛ n lɑpɑ nyɑ́ kɔtɑsɩ.

Mɑ tɑ wiinɑ-ŋ sɩ ń lɑ-m kɔtɑsɩ.

Pǝyele mɑ tɑ cɑɑlɩ-ŋ tulɑɑlʋnɑɑ tɔɔ.

24 N tɑ yɑ-m tulɑɑlʋ nɑ liɣitee.

Pǝ́cɔ́ n tɑ hɑɣɑsɩ-m nyɑ́ kɔtɑsɩ nim.

Amɑ nyɑ́ ɩsɑɣɑtʋ kɛ n cɑɑlǝnɑ-m.

N tʋ-m wɑhɑlɑ nɑ nyɑ́ kʋpǝntǝŋ.

25 Amɑ mɑ mɑ tike mɑ hɩɩsǝɣǝnɑ mǝ ɩsɑɣɑtʋ

kɛ mɑ sɔɔlɑ-mɛ tɔ pǝ tɔɔ.

Mɑ kɑɑ tɑsɑ mǝ kɑwɑlɑɣɑ tɔɔ kɛ́ tɔɔsʋɣʋ.

26 Mpʋ tɔ, kɛɛsɩ nyɑ́ tɔm.

Tǝ́ sʋʋ hʋʋlɛ tɑɑ.

Kɛɛsɩ mpi pǝ hʋlǝɣɩ sɩ n wɛnɑ tɑmpɑnɑ tɔ.

27 Nyɑ́ cɔsɔ pǝntɑɑ.

Nyɑ́ tɔm tɛlǝsǝlɑɑ kʋlɑ mɑ tɔɔ.

28 Pǝ tɔɔ kɛ́ mɑ nyǝnɑ Ɩsɔ tǝsɛɛlɛ

nyʋɣʋ nyǝ́mɑ kɛ tɛtɛlɑtɑɑ.

Mɑ yelɑ Yɑkɔpʋ nɑ pǝ́ wɑkǝlɩ-ɩ.

Mɑ yelɑɑ nɑ pɑ́ tʋʋ Ɩsɛɣɛlɩ.