1 Apɑlʋ nɔɣɔlʋ ɩ kɑ wɛnnɑ Fɑlisɑnɑɑ tɑɑ nɑ pɑ́ yɑɑ-ɩ sɩ Nikotɛm. Ɩ kɛ́ Yutɑ nyʋɣʋ nyǝ́mɑ tɑɑ lɛlʋ. 2 Ḿpʋ́ɣʋ́ ɩ polɑ Yesu kiŋ kɛ ɑhoo nɑɑlɩ nɑ ɩ́ yɔɣɔtɩ-ɩ sɩ: Tɑcɑɑ, tǝ nyǝmɑ́ sɩ Ɩsɔ kɔnnɑ-ŋ sɩ ń sɛɣɛsɩ-tʋ. Pǝ tɑɣɑ pʋlʋ, nɔɣɔlʋ fɛɩ wei ɩ pǝsǝɣɩ nɑ ɩ́ lɑ piti tǝmɑ ɩsɩɩ n lɑkʋɣʋ tɔ nɑ pǝ́ tɑ́ kɛnɑ Ɩsɔ toŋ.

3 Yesu cɔ-ɩ sɩ: Tɑmpɑnɑ kɛ mɑ heeliɣi-ŋ yoo, mɑɑ cɛsǝɣɩ, ye pǝ tɑ lɛlɩ yʋlʋ kɛ lʋlʋɣʋ, ɩ kɑɑ nɑ Ɩsɔ Kɑwulɑɣɑ.

4 Tǝnɑɣɑ Nikotɛm pɔɔsɑ-ɩ sɩ: Ɩsǝnɑɣɑlɛ pɩɩ tɑɣɑnɩ yʋlʋ kɛ lʋlʋɣʋ nɑ ɩ́ tɛmɑ sɔsɔ kɛ lɑpʋ? Amɑ ɩ kɑɑ pǝsɩ nɑ ɩ́ lɛlɩ ɩ too lotu tɑɑ kɛ́ sʋʋʋ nɑ pǝ́ tɑɣɑnɩ-ɩ lʋlʋɣʋ?

5 Yesu cɔ-ɩ sɩ: Tɑmpɑnɑ kɛ mɑ heeliɣi-ŋ yoo, mɑɑ cɛsǝɣɩ, ye pǝ tɑ lʋlɩ-ŋ nɑ lʋm nɑ Feesuɣu, n kɑɑ sʋʋ Ɩsɔ Kɑwulɑɣɑ. 6 Yʋlʋ kɛ yʋlʋ lʋlǝɣɩ. Amɑ Ɩsɔ Feesuɣu lʋlʋɣʋ wɛnɑ pǝ mpɑɑ, nɑ pǝlɛ pǝ wɛ yʋlʋ tɑɑ tɔm kɛ́. 7 Tɑɑ lɑ piti nɑ nti mɑ heelɑ-ŋ sɩ pǝ wɛɛ sɩ mǝ tǝnɑ pɩɩ lɛlɩ-mɛɣɛ lʋlʋɣʋ tɔ tǝ tɔɔ. 8 Nyǝnɩ, heelim mɑkɩ timpi pǝ luɣu wɛɛ tɔɣɔ, nɑ ń nɩɩkɩ pǝ tɑŋ. Pǝyele n tɑ nyɩ pǝ tǝlɩɩlɛ yɑɑ pǝ tǝpote. Wei Ɩsɔ Feesuɣu lʋlɑɑ tɔ ɩ wɛ mpʋ tɔtɔ.

9 Ḿpʋ́ɣʋ́ Nikotɛm tɔmɑ sɩ: Ɩsǝnɑɣɑlɛ mpʋ?

10 Ɩlɛnɑ Yesu cɔ-ɩ sɩ: Hɑlɩ mɛɣɛlɛ Ɩsɛɣɛlɩ sɛɣɛsǝlɑɑ sɔsɑɑ nɑ ń tɑ cɛkǝnɑ tɔm tǝnɛ? 11 Tɑmpɑnɑ kɛ mɑ heeliɣi-ŋ yoo, mɑɑ cɛsǝɣɩ, tǝ nyǝmɑ́ nti tǝ yɔɣɔtǝɣɩ tɔ nɑ nti tǝ nɑwɑ tɔ ntǝɣɩ tǝ kɛɛsǝɣɩ-mɛ. Pǝ nɑ pǝ mpʋ tɔ mɩɩ cɑɑ tɑ́ tɔm mʋɣʋ. 12 Ɩsǝnɑ pǝ tɔŋɑ lɑpʋ kɛ ɑtɛ cǝnɛ tɔɣɔlɛ mɑ heeliɣi-mɛ nɑ ɩɩ sɑŋ mʋɣʋ. Ɩlɛ ye mɑ kɛɛsɑ-mɛɣɛ ɩsǝnɑ pǝ wɛ ɩsɔtɑɑ tɔ, mǝ tɑɑ ɑweɣelɛ mʋlʋ? 13 Nɔɣɔlʋ tɑ kpɑtɑ ɩsɔtɑɑ ye pǝ tɑɣɑ Yʋlʋ Pǝyɑɣɑ mɑ́ wei mɑ lɩɩnɑ ɩsɔtɑɑ nɑ mɑ́ tii tɔ mɑ pɑɑsi. 14 Ɩsɩɩ Moisi kɑ tʋɣʋ nyǝɣǝlʋɣʋ kʋsɛɛmʋɣʋ tʋm kɛ tesikɑ nyʋɣʋ tɑɑ nɑ ɩ́ siki wʋlɑɣɑ tɛtʋ tɑɑ tɔ, mpʋ ɩnɩ tɔtɔɣɔ pǝ wɛɛ sɩ pɑɑ kpɑɑsɩ Yʋlʋ Pǝyɑɣɑ mɑ́. 15 Ɩlɛnɑ yǝlɑɑ mpɑ pɑ tǝnɑ pɑɑ mʋ mɑ tɔm tɔ pɑ́ hiki weesuɣu ŋku kɩɩ tɛŋ tɔ. 16 Pǝ tɑɣɑ pʋlʋ, Ɩsɔ sɔɔlɑ yǝlɑɑ tǝnɑɣɑ sɔsɔm, hɑlǝnɑ ɩ́ cɑŋ ɩ́ hɑ ɩ Pǝyɑɣɑ ɩkpɑmlɛ, sɩ pɑ tǝnɑ mpɑ pɑɑ tǝŋ kɑ tɔm tɔ, pɑ́ tɑɑ sɩ, ɑmɑ pɑ́ hiki weesuɣu ŋku kɩɩ tɛŋ tɔ. 17 Pǝ tɑɣɑ ɩsɩɩ yǝlɑɑ tɔm kʋɣʋ tɔɔ kɛ́ Ɩsɔ tilɑ ɩ Pǝyɑɣɑ. Amɑ pɑ nyʋɣʋ yɑpʋ tɔɔ kɛ́. 18 Pɑɑ kʋɣɩ wei ɩ tǝŋɑ kɑ tɔm tɔ pʋntʋ tɔm. Amɑ wei ɩɩ tǝŋǝɣɩ kɑ tɔm tɔ, pʋntʋ tɔm tɛmɑ sǝpʋ, ɩ tɑ tǝŋ Ɩsɔ Pǝyɑɣɑ ɩkpɑmlɛ tɔm tɔ pǝ tɔɔ. 19 Pɑ tɔm sǝpɑ timpi tɔɣɔlɛ sɩ fǝtǝlɑ wei ɩ nɑɑkɩ tɔ ɩ kɔmɑ ɑntulinyɑ tɑɑ, nɑ yǝlɑɑ sɔɔlɩ sǝkpɛtʋɣʋ nɑ pɑ́ kisi-ɩ pɑ lɑkɑsɩ ɩsɑɣɑsɩ tɔɔ. 20 Ye wei ɩ lɑkɩ ɩsɑɣɑtʋ ɩ tɑɑ kpɑɑkǝnɑ fǝtǝlɑ ɩnǝɣɩ. Ɩɩ kpǝtǝɣǝnɑ-ɩ sɩ pǝ tɑɑ kɔɔ nɑ ɩ́ lɑ nɑ pǝ́ nɑ́ ɩ ɩsɑɣɑtʋ tɔɔ. 21 Amɑ wei ɩ tǝŋǝɣɩ tɑmpɑnɑ tɔ ɩ kpǝtǝɣǝnɑ fǝtǝlɑ ɩnǝɣɩ sɩ ɩ́ lɑ nɑ pǝ́ nɑ́ tǝcɛɩcɛɩ sɩ Ɩsɔ nɩɩnɑʋ tɔɔ kɛ́ ɩ lɑkɩ mpʋ.

22 Pǝlɛ pǝ wɑɑlɩ kɛ́ Yesu nɑ ɩ ɩfɑlɑɑ pɑ kʋlɑ tǝnɑ nɑ pɑ́ polo Yutɑ tɛtʋ tɑɑ, nɑ ɩ́ nɑ-wɛ pɑ́ cɑɣɑ tǝnɑɣɑ wɛɛ nɑɑlɛ, nɑ ɩ sɔɔkɩ yǝlɑɑ kɛ Ɩsɔ lʋm. 23 Yohɑɑnɩ nɑ́ sɔɔkɑɣɑ yǝlɑɑ kɛ Ɩsɔ lʋm tɔtɔɣɔ Ayinʋŋ kɛ Sɑlim kiŋ. Lʋm kɑ wɛ tǝnɑɣɑ sɔsɔm kɛ́. Yǝlɑɑ kɔŋɑɣɑ Yohɑɑnɩ kiŋ nɑ ɩ́ sɔɔkɩ-wɛɣɛ Ɩsɔ lʋm. 24 Wɑɑtʋ ɩnɩ tɔ pɑ tɑ tǝkǝtɑ Yohɑɑnɩ kɛ sɑlǝkɑ.

25 Ḿpʋ́ɣʋ́ Yohɑɑnɩ ɩfɑlɑɑ tɑɑ lɛlɑɑ nɑ Yutɑ tʋ nɔɣɔlʋ pɑ sʋʋ hɔm kɛ Ɩsɔ sɛɛʋ kɔtɑsɩ nsi yʋlʋ tɑɣɑnǝɣǝnɑ ɩ tɩ tɔ sɩ tɔɔ. 26 Ḿpʋ́ɣʋ́ pɑ polɑ Yohɑɑnɩ kiŋ nɑ pɑ́ pɔɔsɩ-ɩ sɩ: Tɑcɑɑ, n tɔɔsɑ yʋlʋ wei ɩ tɔm n kɑ heelɑ-tʋ nɑ nyɑ́ nɑ-ɩ ɩ́ kɑ wɛ Yɑɑtɑnɩ wɑɑlɩ tɔ ɩ tɔɔ? Nyǝnɩ pǝnɛntɛ ɩnɩ ɩ sɔɔkǝnɑ ntɛɣɛ yǝlɑɑ kɛ Ɩsɔ lʋm, nɑ pɑ tǝnɑ pɑ́ puki ɩ kiŋ.

27 Ɩlɛnɑ Yohɑɑnɩ cɔ-wɛ sɩ: Yʋlʋ ɩɩ hikiɣi pʋlʋɣʋ yem nɑ Ɩsɔ tɑ́ hɑ-ɩ-wɩ. 28 Mǝ mɑɣɑmɑɣɑ ɩ́ pǝsǝɣɩ nɑ ɩ́ lǝsɩ mɑ ɑseetɑ sɩ mɑ yɔɣɔtɑɑ sɩ mɑ tɑ kɛ Mesii. Amɑ mɑ tɛɛ ɩ nɔɣɔ kɛ kʋtɛɛ. 29 Akpɑɣɑlʋ tǝnnɑ ɑsɑsɑɑlʋ. Amɑ ɑkpɑɣɑlʋ tɑɑpɑlʋ sǝŋɑ tǝnɑ nɑ ɩ́ kemɑ ŋkpɑŋŋ. Pǝ kɔmɑ nɑ ɩ́ nɩɩ ɑkpɑɣɑlʋ nɔɣɔ, ɩlɛ ɩ lɑŋlɛ hʋlʋmɩ sɔsɔm. Mpʋ ɩnɩ tɔtɔɣɔ mɑ lɑŋlɛ hʋlʋmɑɑ, nɑ pǝnɛntɛ pǝ mɑɣɑ-m teu. 30 Pǝ wɛɛ sɩ Yesu ɩ́ pɩɩkǝnɑ nɑ mɑɑ sǝkɩ.

31 Wei ɩ lɩɩnɑ ɩsɔtɑɑ tɔ ɩnɩ ɩ kǝlǝnɑ pǝ tǝnɑ. Nɑ wei ɩ́lɛ́ ɩ wɛ ɑtɛ cǝnɛ tɔ, ɩ kɛ́ ɑtɛ nyǝŋ kɛ́, nɑ ɑtɛ nyǝntʋ kɛ ɩ yɔɣɔtǝɣɩ. Amɑ wei ɩ lɩɩnɑ ɩsɔtɑɑ tɔ ɩnɩ ɩ kǝlǝnɑ pǝ tǝnɑ. 32 Nɑ ɩ yɔɣɔtǝɣɩ mpi ɩ nɑwɑ nɑ ɩ́ nɩɩ tɔ pǝ tɔm, ɑmɑ nɔɣɔlʋ ɩɩ mʋɣɩ ɩ tɔm. 33 Ɩlɛ wei ɩ́ tɩɩ mʋ ɩ tɔm, pʋntʋ tisinɑ ntɛ́ sɩ Ɩsɔ yɔɣɔtǝɣɩ tɑmpɑnɑ. 34 Wei Ɩsɔ tilɑɑ tɔ pʋntʋ yɔɣɔtǝɣɩ Ɩsɔ tɔm kɛ́. Pǝ tɑɣɑ pʋlʋ, Ɩsɔ cɛlǝɣɩ-ɩ ɩ Feesuɣu tǝnɑɣɑ. 35 Tɑcɑɑ sɔɔlɑ ɩ Pǝyɑɣɑ nɑ ɩ́ tʋ pǝ tǝnɑɣɑ kɑ niŋ tɑɑ. 36 Ye wei ɩ́ nɩɩnɑ Pǝyɑɣɑ ɩ tɛmɑ weesuɣu ŋku kɩɩ tɛŋ tɔɣɔ hikuɣu. Amɑ wei ɩ́ kisɑ Ɩsɔ Pǝyɑɣɑ kɛ nɩɩnɑʋ tɔ ɩ lɑŋɑɑ kɛ́, nɑ Ɩsɔ mʋnɑ-ɩ nɑ pɑ́ɑ́nɑ́ kɛ tɑm kɛ́ ḿpʋ́ɣʋ́.