1 Pǝlɛ pǝ wɑɑlɩ Yesu cɔɔkɑɣɑ Kɑlilee tɛtʋ tɑɑ. Ɩ luɣu fɛɩ Yutɑ tɛtʋ tɑɑ kɛ́ cɔɔʋ. Pǝ tɑɣɑ pʋlʋ tɔɔ, Yutɑ nyǝ́mɑ pɛɛkɑɣɑ ɩ kʋɣʋ. 2 Yutɑ nyǝ́mɑ ɑcimɑ wenɑ pɑ yɑɑ sɩ cokɑ ɑcimɑ tɔ ɑ wʋsɑɑ. 3 Ɩlɛnɑ ɩ newɑɑ tɔmɩ-ɩ sɩ: Kʋlɩ cǝnɛ nɑ ń polo Yutɑ nɑ nyɑ́ ɩfɑlɑɑ nɑ tǝmɑ nnɑ n lɑkɩ tɔ tɔtɔ. 4 Ye yʋlʋ cɑɑ sɩ pɑ́ nyǝmɩ-ɩ ɩɩ ŋmɛsǝɣɩ ɩ tǝmɑ. Ye n lɑkɩ tǝmɑ ɑnǝɣɩ mpʋ ɩlɛ, yele nɑ yǝlɑɑ tǝnɑ nyɩ-ŋ mɛɛ.

( 5 Pǝ tɑɣɑ pʋlʋ, Yesu newɑɑ mɑɣɑmɑɣɑ nɑ́ tɑ́ mʋ ɩ tɔm tɔtɔ.) 6 Ḿpʋ́ɣʋ́ Yesu cɔ-wɛ sɩ: Pǝ tɑ mɑɣɑtɑ-m nɑ pǝ́cɔ́. Amɑ ye mɛ, pɑɑ pǝlee pǝ mɑɣɑ-mɛɣɛ. 7 Pǝ tɑɣɑ pʋlʋ, ɑntulinyɑ nyǝ́mɑ tɑɑ kɑɑ kpɑnɑ-mɛ. Amɑ pɑ tɑɑ kpɑɑnɑ mɑ́. Mpi tɔ, mɑ hʋ́lǝ́ɣɩ́ sɩ pɑ kʋlɑpʋtʋ fɛɩ teu. 8 Mɩɩ kpɑ tǝnɑɣɑ ɑcimɑ. Ye mɑ, mɑ kɑɑ polo. Pǝ tɑɣɑ pʋlʋ, pǝ tɑ mɑɣɑtɑ mɑ́.

9 Yesu tɛmɑ-wɛɣɛ heeluɣu kɛ mpʋ ɩlɛnɑ ɩnɩ ɩ́ sɑɑlɩ Kɑlilee.

10 Yesu newɑɑ kɔmɑ nɑ pɑ́ kpɑ ɑcimɑ tɔɣɔʋ, ɩlɛnɑ Yesu mɑɣɑmɑɣɑ polo. Amɑ ɩ tɑ yele sɩ nɔɣɔlʋ ɩ́ nyɩ, ɩ polɑ ɩŋmɛlɑʋ kɛ́. 11 Yutɑ nyǝ́mɑ pɛɛkɑɣɑ-ɩ ɑcimɑ wɛɛ tɑɑ, nɑ pɑ́ tɔŋnɑ tǝmɑɣɑ pɔɔsʋɣʋ sɩ: Ɩlɛ leɣe ɩ wɛɛ?

12 Hɑlɩ sɑmɑɑ wɛlǝtɑɣɑ Yesu tɔm kɛ pɑ tɑɑ pɑ tike kɛ sɔsɔm. Lɛlɑɑ sɩ: Yʋlʋ kʋpɑŋ kɛ́. Lɛlɑɑ sɩ: Aɑɩ, ɩ kɛ́ yʋlʋtʋsʋlʋ kɛ́. 13 Pɑɑ nɑ mpʋ Yutɑ nyǝ́mɑ sɔɣɔntʋ tɔɔ nɔɣɔlʋ tɑɑ yɔɣɔtǝɣɩ tǝfoo.

14 Pǝ kɔmɑ nɑ ɑcimɑ hɑɣɑ hɛkʋ, ɩlɛnɑ Yesu polo nɑ ɩ́ sʋʋ Ɩsɔ tǝsɛɛlɛ tɑɑ nɑ ɩ́ sɛɣɛsǝɣɩ. 15 Ḿpʋ́ɣʋ́ pǝ lɑpɑ Yutɑ nyǝ́mɑ kɛ piti, nɑ pɑ́ tɔŋ sɩ: Ɩsǝnɑɣɑ pǝ lɑpɑ nɑ ɩ́ nyɩ pǝ tǝnɑɣɑ mpʋ pǝ́cɔ́ ɩ tɑ lɑ ceu?

16 Tǝnɑɣɑ Yesu cɔ-wɛ sɩ: Nti mɑ sɛɣɛsǝɣɩ ɩsǝntɔ tɔ, mɑ tɑ lu-tǝɣɩ kʋlupu. Amɑ wei ɩ tilɑ-m tɔ ɩnɩ ɩ hʋlǝnɑ-m-tɩ. 17 Ye wei ɩ sɔɔlɑ Ɩsɔ luɣu nyǝntʋ tǝŋʋɣʋ, pʋntʋ tike kɑ nyǝnɑ sɩ mɑ kʋsɛɣɛsǝtʋ lɩɩnɑ Ɩsɔ kiŋ yɑɑ mɑ mɑɣɑmɑɣɑ mɑ kɑŋkɑntɛ kɛ mɑ lɑkǝnɑ. 18 Wei ɩ lɑkǝnɑ ɩ kɑŋkɑntɛ tɔ, ɩ mɑɣɑmɑɣɑ ɩ sɑm kɛ ɩ pɛɛkǝɣɩ. Amɑ wei ɩ pɛɛkǝɣɩ ɩ tillu sɑm, pʋntʋ ntɛ́ tɑmpɑnɑ tʋ, pɔpɔtʋ fɛɩ ɩ kiŋ. 19 Ntɔŋ Moisi hʋlɑ-mɛɣɛ Ɩsɔ sɛɛʋ kʋsǝsɩɩtʋ tǝnɑ nɑ? Pǝ́cɔ́ pɑɑ mǝ tɑɑ kʋlʋm ɩɩ tǝŋǝɣɩ-tɩ. Aŋhɑ, nɑ ɩ́ cɑɑ ɩ́ kʋ-m suwe?

20 Ḿpʋ́ɣʋ́ sɑmɑɑ cɔwɑ Yesu sɩ: N nyǝnɑ ɑlɔɣɑɑ kɛ? Awe cɑɑ ɩ kʋ-ŋ?

21 Tǝnɑɣɑ Yesu cɔwɑ sɩ: Pǝ tɑɣɑ pʋlʋ, wule tǝlɩ mɑ lɑpɑ tǝmlɛ sɔsɔɔlɛ nɑtǝlɩ nɑ piti kpɑ mǝ tǝnɑ. 22 Moisi nɑ́ tʋ-mɛɣɛ pɛlʋɣʋ, (pǝyele pǝ tɑ tɩɩ kɛʋ Moisi kiŋ kɛ pǝ lɩɩnɑɑ. Amɑ hɑtoo mǝ cɑɑnɑɑ cɑɑnɑɑ kiŋ kɛ́,) nɑ pɑɑ kʋyɑkʋ kʋhɛɛsʋɣʋ wule ɩ́ pɛlǝɣɩ pǝyɑɣɑ kɛ́. 23 Ye ɩ́ pɛlǝɣɩ pǝyɑɣɑ kɛ kʋhɛɛsʋɣʋ wule sɩ pǝ tɑɑ kɔɔ nɑ ɩ́ yɔkɩ Moisi kʋsǝsɩɩtʋ. Pepe tɔɔ kɛ́ mɑ́ wɑɑ yʋlʋ pilimile tǝcu kɛ kʋhɛɛsʋɣʋ wule nɑ mɩɩ mʋ-m nɑ pɑ́ɑ́nɑ́? 24 Ɩ́ tɑɑ nyǝnǝɣɩ tɔɔ tike. Amɑ ɩ́ tǝŋǝɣɩ tɑmpɑnɑ nɑ pǝ́cɔ́ ɩ́ yɔɣɔtǝɣɩ.

25 Yosɑlɛm nyǝ́mɑ nɑpǝlɩ pɑ yɔɣɔtɑɣɑ sɩ: Pǝ tɑɣɑ wei pɑ pɛɛkɑɣɑ sɩ pɑ kʋɣɩ tɔɣɔlɛ? 26 Ɩ́ nyǝnɩ ɩ́lɛ́ ɩ mǝlɑɑ nɑ ɩ́ yɔɣɔtǝɣǝnɑ-wɛ nɑ ɩɩ nyɑŋnɑ pʋlʋ, nɑ pɑ́ sumɑ. Ɩsɩɩ tɑ́ sɔsɑɑ mpɛ pɑ tɛŋ pɑ tɑɑ sɩ ɩ kɛ́ Mesii kɛlɛ yɑɑ? 27 Tǝ nyǝmɑ́ sɩ wɑɑtʋ wei Mesii kɑ́ kɔɔ tɔ, nɔɣɔlʋ ɩɩ nyǝŋ ɩ tɛ. Tɔfɔ ye pǝ kɑɑsɑ ɩnɛ ɩlɛ, tǝ nyǝmɑ́ ɩ́lɛ́ ɩ tǝlɩɩlɛ mɛɛ.

28 Yesu tɔŋnɑ sɛɣɛsʋɣʋ kɛ ḿpʋ́ɣʋ́ Ɩsɔ tǝsɛɛlɛ tɑɑ, ɩlɛnɑ ɩ́ pɔɔsɩ-wɛ nɑ nɔɣɔ sɔsɑɣɑ sɩ: Mɛ sɩ ɩ́ nyǝmɑ-m, nɑ ɩ́ nyǝmɑ́ mɑ tǝlɩɩlɛ yɑɑ? Aɑɩ, mɑ tɑ kɔɔ mɑ mɑɣɑmɑɣɑ mɑ kɔntɛ se. Amɑ wei ɩ tilɑ-m tɔ ɩ wɛɛ nɑ ɩ kɛ́ tɑmpɑnɑ tʋ. Ɩlɛ mǝ tɑ nyǝmɩ-ɩ. 29 Amɑ mɑ, mɑ nyǝmɑ-ɩ, pǝ tɑɣɑ pʋlʋ tɔɔ, ɩ kiŋ kɛ mɑ lɩɩnɑɑ, nɑ ɩnɩ ɩ tilinɑ-m.

30 Yǝlɑɑ luɣu lɑpɑ sɩ pɑ́ kpɑ-ɩ, ɩlɛ nɔɣɔlʋ tɑ tʋ niŋ kɛ ɩ tɔɔ, ɩ wʋlɛ tɑ tɑtɑ tɔ pǝ tɔɔ. 31 Pɑɑ nɑ mpʋ sɑmɑɑ ɩnɩ ɩ tɑɑ pɑɣɑlɛ mʋ Yesu tɔm nɑ pɑ́ tɛ pɑ tɑɑ. Hɑlǝnɑ pɑ́ tɔŋ sɩ: Mesii ɩ kɔmɑ ɩ kɑ́ lɑ piti tǝmɑ nɑ ɑ kǝlɩ ɩnɛ ɩ nyǝnɑ nɑ?

32 Pǝ kɔmɑ nɑ Fɑlisɑnɑɑ nɩɩ nti sɑmɑɑ miitiɣi Yesu tɔɔ tɔ, ɩlɛnɑ pɑ́ nɑ kɔtǝlɑɑ sɔsɑɑ pɑ́ tili filisinɑɑ sɩ pɑ́ polo pɑ́ kpɑ-ɩ. 33 Tǝnɑɣɑ Yesu tɔmɑ sɩ: Pǝ kɑɑsɑ-m wɛɛ nɑɑlɛɣɛ mǝ hɛkʋ kɛ́, ɩlɛnɑ mɑ́ mǝlɩ wei ɩ kɑ tilɑ-m tɔ ɩ kiŋ. 34 Ɩ́ kɑ́ pɛɛkɩ-m ɩ́ kɑɑ nɑ-m. Pǝ tɑɣɑ pʋlʋ, ɩ́ kɑɑ pǝsɩ nɑ ɩ́ kɔɔ timpi mɑɑ wɛɛ tɔ.

35 Tǝnɑɣɑ Yutɑ nyǝ́mɑ pɔɔsɑ tǝmɑ sɩ: Leɣe Yesu kɑ́ polo nɑ tǝ́ kɑɑ nɑ-ɩ? Ɩ kɑ́ polo Yutɑ nyǝ́mɑ mpɑ pɑ yɑwɑ nɑ pɑ́ polo tuu Kǝlɛɛkɩ ɑcɑlɛɛ tɑɑ tɔ pɑ kiŋ nɑ ɩ́ pɑɑsǝnɑ Kǝlɛɛkɩ nyǝ́mɑ yɑɑ ɩsǝnɑ? 36 Ye pǝ tɑɣɑ mpʋ, ntiɣilɛ ɩ yɔɣɔtǝɣɩ mpʋ sɩ: Tɩɩ pɛɛkɩ-ɩ tǝ kɑɑ nɑ-ɩ? Tǝ kɑɑ pǝsɩ nɑ tǝ́ polo timpi ɩ kɑ wɛɛ tɔ?

37 Acimɑ kʋyɑkʋ kɑntǝkɑɣɑ nyǝŋkʋ ŋku kʋ kɛ kʋyɑkʋ sɔsɔɔʋ tɔ kʋ wule, Yesu sǝŋɑ ɩsɔ nɑ ɩ́ kpɑɑlɩ sɩ: Ye lʋkɔtʋ ɩ́ wɛnɑ wei, pʋntʋ ɩ́ kɔɔ mɑ kiŋ nɑ ɩ́ nyɔɔ. 38 Wei ɩ́ mʋ mɑ tɔm weesuɣu lʋm pusi kɑ́ lɩɩkǝnɑ ɩ tɑɑ nɑ pǝ́ kpeŋ, ɩsɩɩ pɑ yɔɣɔtʋɣʋ Ɩsɔ Tɔm tɑɑ tɔ.

39 (Mpɑ pɑ mʋ Yesu pɑɑ kɔɔ pɑ́ hiki Ɩsɔ Feesuɣu ŋku tɔ, kʋ tɔm kɛ ɩ yɔɣɔtɑɣɑ. Mpi tɔ, wɑɑtʋ ɩnɩ Ɩsɔ Feesuɣu tɑɑ kɔntɑ. Pǝ tɑɣɑ pʋlʋ, Yesu tɑɑ sʋʋtɑ ɩ teeli tɑɑ tɔ pǝ tɔɔ).

40 Sɑmɑɑ ɩnɩ ɩ tɑɑ yǝlɑɑ nɩɩ mpʋ, ɩlɛnɑ pɑ́ tɔ sɩ: Ɩnǝɣǝlɛ Ɩsɔ kʋyɔɣɔtʋtʋ tɛlǝsʋlʋ wei tɔ.

41 Ḿpʋ́ɣʋ́ lɛlɑɑ sɩ: Mesii kɛ́. Nɑ lɛlɑɑ nɑ́ɑ́ tɔŋ sɩ: Kɑlilee kɛ Mesii kɑ́ lɩɩnɑ? 42 Ɩsɔ Tɔm tɑkǝlɑsɩ tɑɑ wɛɛ sɩ: Mesii kɑ wɛɛ Tɑfiiti lʋlʋɣʋ tɑɑ tʋ kɛ́. Pɛtǝlɛhɛm timpi Tɑfiiti kɑ wɛɛ tɔɣɔ ɩ kɑ́ lɩɩnɑ.

43 Ḿpʋ́ɣʋ́ sɑmɑɑ fɑɣɑ Yesu tɔɔ. 44 Pɑ tɑɑ lɛlɑɑ luɣu lɑpɑ sɩ pɑ́ kpɑ Yesu. Amɑ nɔɣɔlʋ tɑ tʋ niŋ kɛ ɩ tɔɔ.

45 Ḿpʋ́ɣʋ́ filisinɑɑ mǝlɑ kɔtǝlɑɑ sɔsɑɑ nɑ Fɑlisɑnɑɑ pɑ kiŋ nɑ pɛlɛ pɑ́ pɔɔsɩ-wɛ sɩ: Pepe tɔɔ kɛ́ ɩ́ tɑ́ kɔnɑ-ɩ?

46 Tǝnɑɣɑ filisinɑɑ cɔwɑ sɩ: Tuu tɔ yʋlʋ nɔɣɔlʋ ɩ tɑ yɔɣɔtǝtɑ ɩsɩɩ ɩnɩ. 47 Ḿpʋ́ɣʋ́ Fɑlisɑnɑɑ pɔɔsɑ-wɛ sɩ: Ɩ kpɛnnɑ-mɛ nɑ ɩ́ puɣusi tɔtɔɣɔ? 48 Wulee ɩ́ keesɑ tɑ́ sɔsɑɑ yɑɑ Fɑlisɑnɑɑ tɑɑ nɔɣɔlʋ nɑ pʋntʋ tǝŋǝɣɩ-ɩ? 49 Sɑmɑɑ wei ɩ tɑ nyɩ Moisi kʋsǝsɩɩtʋ kɛ mpʋ tɔ, sɔntɔ nyǝ́mɑ kɛ́.

50 Fɑlisɑnɑɑ tɑɑ lɛlʋ wei pɑ yɑɑ sɩ Nikotɛm nɑ ɩ́ kɑ polɑ Yesu kiŋ kɛ ɑhoo tɔ, ɩ́lɛ́ ɩ tɔmɑ-wɛ sɩ: 51 Anɩ ɩ nyǝmɑ́ sɩ, tɑ kʋlɑpʋtʋ tɑɑ pǝ fɛɩ sɩ tǝ kʋ yʋlʋ tɔm kɛ mpʋ, nɑ tǝ tɑ́ cɑɣɑ nɑ tǝ nɩɩ pǝ tǝnɑ nɑ tǝ cɛkǝnɑ mpi ɩ wɑkǝlɑɑ tɔ.

52 Ḿpʋ́ɣʋ́ Fɑlisɑnɑɑ cɔwɑ Nikotɛm sɩ: Sɛsɛ Kɑlilee nyǝ́mɑ mpɛɣɛlɛ nɑ nyɑɣɑ? Wiili Ɩsɔ Tɔm tɑɑ nɑ ń nɑ́, tuu tɔ Ɩsɔ kʋyɔɣɔtʋtʋ tɛlǝsʋlʋ nɔɣɔlʋ tɑ tɛntɑ lɩɩʋ nɑ Kɑlilee se.

[ 53 Pǝlɛ pǝ wɑɑlɩ kɛ́ pɑ yɑwɑ nɑ pɑɑ wei ɩ́ mǝlɩ ɩ tǝyɑɣɑ.