1 Tǝnɑɣɑ kotilɑɑ tǝnɑ kʋlɑɑ nɑ pɑ́ ponɑ-ɩ Pilɑtɩ ɩsɛntɑɑ. 2 Ḿpʋ́ɣʋ́ pɑ sʋʋ-ɩ tɔm tʋɣʋ kɛ tǝnɑ sɩ: Tǝ mɑɣɑnɑ ɑpɑlʋ ɩnɛ ɩ tʋsǝɣɩ tɑ́ yǝlɑɑ sɩ pɑ́ tɑɑ fɛlɩ Lom wulɑʋ sɔsɔ kɛ lɑmpuunɑɑ. Hɑlǝnɑ ɩ́ tɔŋ sɩ ɩnǝɣǝlɛ wulɑʋ sɔsɔ Kilisiti.

3 Ḿpʋ́ɣʋ́ Pilɑtɩ pɔɔsɑ Yesu sɩ: Nyɑɣɑlɛ Yutɑ nyǝ́mɑ wulɑʋ sɔsɔ ɩnǝɣɩ?

Ɩlɛnɑ Yesu cɔ Pilɑtɩ sɩ: Ntǝɣǝlɛ n yɔɣɔtɑ mpʋ.

4 Ḿpʋ́ɣʋ́ Pilɑtɩ heelɑ kɔtǝlɑɑ sɔsɑɑ nɑ sɑmɑɑ sɩ: Mɑɑ nɑɑ ɑpɑlʋ ɩnɛ ɩ kʋwɑkǝlǝtʋ se.

5 Amɑ kɔtǝlɑɑ sɔsɑɑ nɑ sɛɛsɑ ɩsǝlɛ sɩ: Ɩ sɛɣɛsǝɣɩ yǝlɑɑ kɛ́ sɩ pɑ́ kisi tɛtʋ sɔsɑɑ. Hɑtoo Kɑlilee kɛ ɩ cɑɑlɑ-tɩ, nɑ ɩ́ cɔɔ Yutɑ tɛtʋ tǝnɑ, hɑlɩ nɔɔnɔɔ kɛlɛ ɩ tɑlɑ cǝnɛ.

6 Pilɑtɩ nɩɩ kɔtǝlɑɑ sɔsɑɑ tɔm ntɩ, ɩlɛnɑ ɩ́ pɔɔsɩ sɩ: Apɑlʋ ɩnɩ Kɑlilee tʋ kɛ?

7 Pilɑtɩ kɔmɑ nɑ ɩ́ cɛkǝnɑ sɩ Yesu kɛ́ Helɔtɩ ɩfɑlʋ ɩlɛnɑ ɩ́ tɔ sɩ: Ɩ́ ponɑ-ɩ Helɔtɩ. Pǝ pɑmnɑ ɩ́lɛ́ ɩ kɑ wɛ Yosɑlɛm kɛ kʋyɛɛŋ ɩnɩ ɩ tɑɑ tɔtɔ. 8 Helɔtɩ nɑ́ Yesu ɩlɛnɑ ɩ lɑŋlɛ hʋlʋmɩ sɔsɔm. Pǝ tɑɣɑ pʋlʋ, ɩ kɑ nɩɩ ɩ tɔm, ɩlɛnɑ ɩ́ nyɩɩlɩ hɑtoo lɔŋ sɩ ɩ́ nɑ-ɩ. Nɑ ɩ tɛɛlɑɣɑɑ sɩ ɩ kɑ́ lɑpɩ-ɩ piti tǝmlɛ nɑtǝlɩ nɑ ɩ́ nɑ́. 9 Nɑ ɩ́ pɔɔsɑ-ɩ tɔmnɑɑ pɑɣɑlɛ. Amɑ Yesu tɑ cɔ-ɩ pɑɑ kʋlʋmʋɣʋ. 10 Kɔtǝlɑɑ sɔsɑɑ nɑ Ɩsɔ Tɔm sɛɣɛsǝlɑɑ nɑɑ wɛ tǝnɑ nɑ pɛlɛ pɑ́ suuki-ɩ ɩsɑɣɑtʋ nɑ ɩsǝlɛ kʋsɛɛmlɛ. 11 Helɔtɩ nɑ ɩ yoolɑɑ pɑ woŋɑɣɑ Yesu kɛ́ nɑ pɑ́ lɑkɩ-ɩ nyɑŋ kɛ sɔsɔm. Ḿpʋ́ɣʋ́ pɑ suu Yesu kɛ kɑcɔkɑ toko sɔsɔ nɔɣɔlʋ, ɩlɛnɑ pɑ́ mǝŋnɑ-ɩ Pilɑtɩ kiŋ. 12 Kʋyɑkʋ ŋkʋ kʋ mɑɣɑmɑɣɑ kɛ Helɔtɩ nɑ Pilɑtɩ pɑ ciikɑɑ. Pǝyele pɑɑ wɛnɑ tǝmɑ nɑ koloŋɑ kɛ́.

13 Ḿpʋ́ɣʋ́ Pilɑtɩ kotɑ kɔtǝlɑɑ sɔsɑɑ nɑ ɩcɑtɛ nyʋɣʋ nyǝ́mɑ nɑ sɑmɑɑ, 14 nɑ ɩ́ tɔ-wɛ sɩ: Ɩ́ kɔnɑ-m ɑpɑlʋ ɩnɛ sɩ ɩ tolisiɣi yǝlɑɑ. Tɔʋ, ɩlɛ mɑ pɔɔsɑ-ɩ tɔmnɑɑ kɛ mǝ ɩsɛntɑɑ. Amɑ mɑ tɑ nɑ kɑwɑlɑsɩ nsi ɩ́ tʋ-ɩ tɔ sɩ tɑɑ nɑkǝlǝɣɩ ɩ kiŋ. 15 Helɔtɩ mɑɣɑmɑɣɑ nɑ́ tɑ́ nɑ ɩsɑɣɑtʋ kɛ Yesu kiŋ tɔtɔ, pǝ tɔɔ kɛ́ ɩ tɑɣɑnɑ-tʋɣʋ-ɩ mǝŋnɑʋ. Apɑlʋ ɩnɛ ɩ tɑ wɑkǝlɩ pʋlʋ mpi pǝ nǝɣǝsǝnɑ pɑ́ kʋ-ɩ pǝ tɔɔ tɔ. 16 Ɩlɛ mɑɑ yele nɑ pɑ́ mɑpɩ-ɩ ɑkpɑtɛɛ ɩlɛnɑ ɩ́ tɛɛ.

[ 17 Pɑɑ Tɛɛʋ ɑcimɑ wenɑ ɑ tɔɔ pǝ wɛɛ sɩ Pilɑtɩ ɩ́ tʋlɩ-wɛɣɛ sɑlǝkɑ tʋ nɔɣɔlʋɣʋ.]

18 Ḿpʋ́ɣʋ́ pɑ tǝnɑ pɑ kpɛntɑɑ nɑ pɑ́ koo sɩ: Yele pɑ́ kʋ ɩnɛ ɩnɩ, nɑ ń tʋlɩ-tʋɣʋ Pɑlɑpɑɑsɩ.

19 Yʋlʋkʋlɛ tɔm nɑ yoou nɑkʋlɩ kɩɩ lɑpǝnɑ ɩcɑtɛ tɑɑ nɑ pɑ́ tǝkɩ Pɑlɑpɑɑsɩ. 20 Pilɑtɩ sɔɔlɑ teu sɩ ɩ yeki Yesu, ɩlɛnɑ ɩ́ tɑsǝnɑ- wɛɣɛ yɔɣɔtǝnɑʋ. 21 Amɑ pɛlɛ pɑ mɑpɑ kɑpusi sɩ: Kɑmɩ-ɩ sǝm tesikɑ tɔɔ, kɑmɩ-ɩ sǝm tesikɑ tɔɔ.

22 Ḿpʋ́ɣʋ́ Pilɑtɩ tɑsɑ-wɛɣɛ yɔɣɔtǝnɑʋ kɛ tɔm tooso nyǝm sɩ: Ɩlɛ ɩsɑɣɑtʋ ntiɣi ɩ lɑpɑ? Mɑ tɑ nɑ nti tǝ tɔɔ pɑɑ kʋ-ɩ tɔ. Ɩlɛ mɑɑ yele nɑ pɑ́ mɑpɩ-ɩ ɑkpɑtɛɛ ɩlɛnɑ ɩ́ tɛɛ.

23 Amɑ pɑ tɑsɑ kiisuɣu nɑ toŋ nɑ ɩsǝlɛ kʋsɛɛmlɛ sɩ pɑɑ kɑmɩ-ɩ tesikɑ tɔɔ. Hɑlǝnɑ pɑ kɑkiisɑsɩ nsɩ sɩ nɩɩ Pilɑtɩ. 24 Tǝnɑɣɑ Pilɑtɩ tɔmɑ sɩ: Ɩ́ lɑ ɩsǝnɑ ɩ́ cɑɑ tɔ. 25 Ɩlɛnɑ ɩ́ tʋlɩ-wɛɣɛ wei pɑɑ tǝkɑ yʋlʋkʋlɛ nɑ yoou tɔɔ nɑ pɑ tɔŋɑɣɑ sɩ pɑ́ yele-ɩ tɔ, nɑ ɩ́ cɛlɛ-wɛɣɛ Yesu sɩ pɑ́ lɑnɑ-ɩ nti pɑ sɔɔlɑɑ tɔ.

26 Pɑ tɛɛkɑɣɑnɑ Yesu ɩlɛ pǝ pɑmnɑ Silɛɛnɩ tʋ wei pɑ yɑɑ sɩ Simɔŋ tɔ ɩ lɩɩnɑ tɑɑlɛ ntɛ́ nɑ pɑ́ suli-ɩ, nɑ pɑ́ kpɑ-ɩ nɑ pɑ́ sʋkɩ-ɩ Yesu tesikɑ sɩ ɩ́ tǝŋnɑ ɩ wɑɑlɩ.

27 Yǝlɑɑ sɑmɑɑ tuutuumɑ tǝŋɑɣɑ ɩ wɑɑlɩ nɑ ɑlɑɑ tɔtɔ, nɑ pɛlɛ pɑ́ kpɑ pɑ lɑŋɑ nɑ pɑ́ wiiki ɩ tɔɔ. 28 Ḿpʋ́ɣʋ́ Yesu pǝsǝnɑ ɑlɑɑ mpɛ pɑ tɔɔ nɑ ɩ́ tɔ-wɛ sɩ: Hɑɩ Yosɑlɛm ɑlɑɑ mɛ, ɩ́ tɑɑ wii-m. Amɑ ɩ́ wii mǝ nɑ mǝ piyɑ. 29 Pǝ tɑɣɑ pʋlʋ, kʋyɛɛŋ wɛɛ ɩ kɑ́ kɔɔ wei ɩ tɑɑ pɑɑ tɔ sɩ: Nyʋleleŋ nyǝ́mɑ ntɛ́ kɑɑlʋlɑsɩ, mpɑ pɑ tɑ tɩɩ mɔlɩ mɔlʋɣʋ mɑɣɑmɑɣɑ yɑɑ, mpɑ pɑ hǝlɑ pǝ tɑ mʋsɩ tɔ. 30 Wɑɑtʋ ɩnǝɣɩ pɑɑ wiikinɑ pɔ́ɔ́ŋ sɩ: Ɩ́ nyǝkɩ-tʋ. Nɑ pɑɑ tɔ pulɑsɩ sɩ: Ɩ́ tɑkɩ-tʋ. 31 Pɑ tɑ kpisi tɑlɛɛ, kɑcɑŋfɑnɑ tɑwʋsɩ nɑ?

32 Ḿpʋ́ɣʋ́ pɑ kpɛŋnɑ yǝlɑɑ ɑsɑɣɑɑ kɛ nɑɑlɛ tɔtɔ sɩ pɑ kʋɣɩ pɑ́ nɑ Yesu. 33 Pɑ kɔmɑ pɑ tɑlɑ timpi pɑ yɑɑ sɩ Nyʋmpɔɣɔlɑɣɑ tɔ, ɩlɛnɑ pɑ́ kɑ́ Yesu kɛ́ sǝm tesikɑ tɔɔ kɛ́ tǝnɑ, nɑ pɑ́ kɑ́ ɑsɑɣɑɑ mpɛ tɔtɔɣɔ tesikɑsɩ tɔɔ, lɛlʋ kɛ ɩ ntɔɣɔŋ tɔɔ, lɛlʋ kɛ ɩ mpǝtǝŋ tɔɔ. 34 Ḿpʋ́ɣʋ́ Yesu sɩ: Tɑcɑɑ, tɑɑ nyǝnɩ pɑ ɩsɑɣɑtʋ, pɑ tɑ nyɩ nti pɑ lɑkɩ tɔ.

Ɩlɛnɑ pɑ́ tɔ tɛtɛ kɛ́ ɩ wontu tɔɔ nɑ pɑ́ tɑlɑ-tɩ. 35 Yǝlɑɑ sɑmɑɑ sǝŋɑ tǝnɑ nɑ pɑ́ nyǝnǝɣɩ. Yutɑ nyʋɣʋ nyǝ́mɑ woŋɑɣɑ-ɩ nɑ pɑ́ tɔŋ sɩ: Ye tɑmpɑnɑ ɩ kɛ́ Mesii wei Ɩsɔ lǝsɑɑ tɔ ɩ́ yɑ ɩ tɩ nyʋɣʋ, ɩsɩɩ ɩ kɑ yɑpʋ lɛlɑɑ tɔ ɩlɛ.

36 Yoolɑɑ nɑ́ woŋɑɣɑ-ɩ tɔtɔ nɑ pɑ́ ponɑ-ɩ lʋm kʋnyǝŋǝm nɑpǝlɩ, 37 nɑ pɑ́ tɔŋɩ-ɩ sɩ: Ye n kɛ́ Yutɑ nyǝ́mɑ Wulɑʋ sɔsɔ, wɑɑsɩ nyɑ́ tǝɣɩ nyɑ́ mɑɣɑmɑɣɑ.

38 Pɑɑ ŋmɑɑwɑ nɑ pɑ́ pusi ɩ nyʋɣʋ tɔɔ sɩ: Yutɑ nyǝ́mɑ Wulɑʋ sɔsɔ ntɔ.

39 Asɑɣɑɑ mpɑ pɑ kɑmɑ tesikɑ tɔɔ tɔ pɑ tɑɑ lɛlʋ nɑ́ tʋʋ-ɩ sɩ: Ɩsɩɩ sɩ Mesii kɛlɛ nyɑ́ yɑɑ? Yɑ nyɑ́ tɩ nyʋɣʋ nɑ ń kpɛntǝnɑ tɑ́ nɑ ń yɑ tɔtɔ.

40 Amɑ lɛlʋ nɑ́ kɑlǝnɑ ɩ́lɛ́ sɩ: Sɑlǝkɑ kʋlʋm ɩnǝɣɩ pɑ tʋ nyɑ́, ɩlɛ pepe tɔɔ kɛ́ nn see Ɩsɔ? 41 Pɑ tʋɣʋ tɑɣɑ sɑlǝkɑ ɩnɛ tɔ pǝ kɛɛsɑɑ kɛ́. Tɑ kʋlɑpʋtʋ fɛlǝɣǝnɑ-tʋ. Amɑ ɩnɛ ɩ́lɛ́, ɩ tɑ lɑ kɑwɑlɑɣɑ nɑkǝlɩ.

42 Ɩlɛnɑ ɩ́ tɔ Yesu sɩ: Yesu n kɔŋ ń kɔɔ nyɑ́ kɑwulɑɣɑ tɔɣɔʋ tɔ tɔɔsɩ mɑ tɔɔ.

43 Ḿpʋ́ɣʋ́ Yesu cɔ-ɩ sɩ: Tɔm tɑmpɑnɑ kɛ mɑ heeliɣi-ŋ, sɑŋɑ wʋlɛ tǝnɛ tǝ mɑɣɑmɑɣɑ mɑ́ nɑ-ŋ tɩɩ sʋʋ ɑlǝsɑnnɑ.

44 Tǝnɑɣɑ pǝ mǝlɑ yuɣu ɩsɩɩ ɑhoo, pǝyele pɩɩ wɛ ɩsɩɩ ilim sikuɣu tɑkɑ kɛ́. Ḿpʋ́ɣʋ́ sǝkpɛtʋɣʋ nyɑlɑ ɩcɑtɛ tɔɔ, hɑlǝnɑ pǝ tɑlɑ ilim hʋʋʋ wɑɑtʋ. 45 Pʋʋɣʋ ŋku kɩɩ kɑɣɑ Ɩsɔ tǝsɛɛlɛ sɔsɔɔlɛ tɑɑ tɔ kʋlɛ kʋ kɛɛsǝnɑ kʋ hɛkʋ tɑɑ nɑ kʋ fɑɣɑ huŋ nɑɑlɛ kɛ yem. 46 Ɩlɛnɑ Yesu kiisinɑ nɔɣɔ sɔsɔɣɑ sɩ: Mɑ Cɑɑ, kpɑɣɑ-m. Ɩ tɛmɑ ḿpʋ́ɣʋ́ yɔɣɔtʋɣʋ ɩlɛnɑ ɩ́ hɛɛ. 47 Lom yoolɑɑ nyʋɣʋ tʋ nɑ́ pǝ tǝnɑ mpi pǝ lɑpɑ mpʋ tɔ, ɩlɛnɑ ɩ́ sɑ Ɩsɔ nɑ ɩ́ tɔ sɩ: Tɑmpɑnɑ tɔɔ, yʋlʋ ɩnɛ ɩ kɑ kɛ́ yʋlʋpɑŋ kɛ́.

48 Sɑmɑɑ wei ɩ tǝnɑ ɩ kɔmɑ nyǝnʋɣʋ tɔ ɩ nɑ́ pǝ tǝnɑ mpi pǝ lɑpɑ mpʋ tɔ, ɩlɛnɑ pɑ́ kpɑ pɑ lɑŋɑ nɑ pɑ́ mǝlɩ kpente. 49 Yesu cewɑɑ tǝnɑ, nɑ ɑlɑɑ mpɑ pɑ tǝŋɑɣɑ-ɩ hɑtoo Kɑlilee tɔ pɑ sǝŋɑ tɑ́ɑ́lǝ́ḿ tɔɔ nɑ pɑ́ nyǝnǝɣɩ mpi pǝ lɑkɩ tɔ.

50-51 Yutɑ ɩcɑtɛ Alimɑtee ɑpɑlʋ nɔɣɔlʋɣʋ pɑ yɑɑkɑɣɑ Yosɛɛfʋ. Apɑlʋ ɩnɛ ɩ kɛ́ yʋlʋpɑŋ nɑ ɩ́ tǝŋǝɣɩ tɑmpɑnɑ nɑ ɩ keŋɑɣɑnɑ Ɩsɔ Kɑwulɑɣɑ tɔɔ. Mpɛ pɑ kotɑɣɑnɑ kotuɣu sɔsɔɔʋ ŋkʋ. Amɑ ɩ tɑɑpɑlɑɑ kotuɣu nyǝ́mɑ lɛlɑɑ tʋ nti tǝ pǝlɛ nɑ pɑ́ lɑ tɔ tǝ tɑ mɑɣɑ-ɩ. 52 Ḿpʋ́ɣʋ́ ɩ kʋlɑɑ nɑ ɩ́ polo Pilɑtɩ kiŋ nɑ ɩ́ sǝlǝmɩ-ɩ sɩ ɩ kpɑkǝɣɩ sǝtʋ. 53 Ɩlɛnɑ ɩ́ polo nɑ ɩ́ tisi sǝtʋ kɛ tesikɑ tɔɔ nɑ ɩ́ cɑɑ kpoŋkpontu toŋ nyǝntʋ pʋŋkɑhʋlʋŋɑ nɑ ɩ́ tɑkɩ-ɩ, nɑ ɩ́ pimi-ɩ pǝlɑɑʋ ŋku pɑɑ hulɑ kʋkpɑmʋɣʋ tɑɑ nɑ pɑ tɑ pintɑ nɔɣɔlʋ tɔ kʋ tɑɑ. 54 Alǝsimɑ wule ntɛ́ pǝ tǝnɑ pǝ hɔlɑ mpʋ, nɑ kʋyɑkʋ kʋhɛɛsʋɣʋ cɑɑkɩ cɑɑlʋɣʋ.

55 Alɑɑ mpɑ pɑ tǝŋɑɣɑ Yesu kɛ́ hɑtoo Kɑlilee tɔ pɑ́ nɑ Yosɛɛfʋ pɑ polǝnɑ. Pɑ wiilɑ pǝlɑɑʋ tɑɑ nɑ pɑ́ nɑ́ ɩsǝnɑ pɑ hɩɩsɑ sǝtʋ tɔ. 56 Ɩlɛnɑ pɑ́ kpe nɑ pɑ́ tɑɣɑnɩ nimnɑɑ nɑ tulɑɑlʋnɑɑ mpɑ pɑɑ sɑɣɑlɩ sǝtʋ tɔ.

Amɑ pɑ hɛɛsɑ kʋyɑkʋ kʋhɛɛsʋɣʋ wule ɩsɩɩ kʋsǝsɩɩtʋ tɑɑ wɛʋ tɔ.