1 Pǝ kɔmɑ nɑ pǝ́ kɛɛsɩ ɩlɛ, Ɩsɔ lʋm sɔlʋ Yohɑɑnɩ kɔmɑ Yutɑ wʋlɑɣɑ tɛtʋ tɑɑ kɛlɛ nɑ ɩ́ niki wɑɑsʋ lɑpʋ. 2 Nɑ ɩ́ tɔŋ sɩ: Ɩ́ lɑɣɑsɩ tɔntɛ, ɩsɔtɑɑ Kɑwulɑɣɑ wʋsɑ kɔntɛ kɛ́.

3 Yohɑɑnɩ tɔm kɛ Ɩsɔ kʋyɔɣɔtʋtʋ tɛlǝsʋlʋ Ɩsɑyii kɑ yɔɣɔtɑɣɑ sɑɑ wei ɩ yɔɣɔtɑɑ sɩ:

4 Yohɑɑnɩ tɑkɑ yooyoonɑɑ hʋntʋ kunti, nɑ ɩ́ lǝlɑ tɔnʋɣʋ tɑmpɑlɑ kɛ ɩ tǝnɑɣɑ tɑɑ. Ɩ tɔɣɔnɑɣɑ ntɛ́ cǝlǝŋ nɑ tɑɑlɛ tɩɩŋ nim. 5 Ḿpʋ́ɣʋ́ Yosɑlɛm nyǝ́mɑ nɑ Yutɑ tɛtʋ tǝnɑ nyǝ́mɑ nɑ Yɑɑtɑnɩ nɔɣɔ tɛtʋ tǝnɑ nyǝ́mɑ sʋʋ pote kɛ ɩ kiŋ. 6 Nɑ pɑ́ kuliɣi pɑ ɩsɑɣɑtʋ tɔɔ kɛ́ yǝlɑɑ tɑɑ, nɑ Yohɑɑnɩ sɔɔkɩ-wɛɣɛ Ɩsɔ lʋm kɛ Yɑɑtɑnɩ pɔɣɔ tɑɑ.

7 Yohɑɑnɩ nɑwɑ Fɑlisɑnɑɑ pɑɣɑlɛ nɑ Sɑtusee nyǝ́mɑ pɑɣɑlɛ nɑ pɑ́ puki ɩ cɔlɔ sɩ ɩ́ sɔ-wɛɣɛ Ɩsɔ lʋm. Ɩlɛnɑ ɩ́ tɔ-wɛ sɩ: Akɑlɑ piyɑ mɛ, ɑwe kpɑɑlɑ-mɛ nɑ ɩ́ seeki Ɩsɔ pɑ́ɑ́nɑ́ nnɑ ɑ kɔŋ tɔ? 8 Ɩ́ lɑ mpɑ pɑ yelɑ ɩsɑɣɑtʋ tɔ pɑ kʋlɑpǝlɛ. 9 Ɩ́ tɑɑ tɛlǝsǝɣɩ lɔlɔ sɩ mǝ cɑɑ kɛlɛ Apǝlɑhɑm. Mɑ heeliɣi-mɛ sɩ ye pǝlɛ pǝ tɔɔ ɩlɛ, Ɩsɔ pǝsǝɣɩ nɑ ɩ́ lɑ́ nɑ pɛɛ ɑnɛ ɑ́ pǝsɩ Apǝlɑhɑm piyɑ. 10 Pɑ tɛmɑ lɑɑlɛ tʋɣʋ kɛ tɩɩŋ sɩ pɑ huɣu-ɩ nɑ ɩ tɛɛ kɛ́ te. Tʋɣʋ ŋku kɩɩ lʋlǝɣɩ pee kʋpɑnɑ tɔ, pɑɑ hu-kʋ nɑ pɑ́ tʋ kɔkɔ. 11 Mɑ ɩlɛ, lʋm kɛ mɑ sɔɔnɑ-mɛɣɛ Ɩsɔ lʋm sɩ pǝ́ hʋ́lɩ́ sɩ ɩ́ lɑɣɑsɑ tɔntɛ. Amɑ mɑ wɑɑlɩ wei ɩ kɔŋ tɔ, pʋntʋ kǝlɑ-m toŋ tǝcɑɣɑcɑɣɑ. Mɑ tɑ tɑlɑ mɑ́ hɩɩsɩ ɩ nɔɔhɛɛ tɑɑ ntɑŋkpɑlɑ mʋsʋɣʋ mɑɣɑmɑɣɑ. Ɩ́lɛ́ ɩ kɑ́ sɔ-mɛ nɑ Feesuɣu Nɑŋŋtʋ nɑ kɔkɔ. 12 Ɩ tɔkɑ ɩ kʋfɑlʋɣʋ kɛ ɩ niŋ tɑɑ. Ɩ kɑ́ fɑlɑ pǝ tǝnɑ tǝcɑɣɑcɑɣɑ, nɑ ɩ́ suu pee kɛ ɩ kpou tɑɑ. Amɑ ɩ kɑ́ tʋ lɔɔtʋ kɛ kɔkɔ ŋkɑ kɑɑ teŋ tɔ kɑ tɑɑ.

13 Ḿpʋ́ɣʋ́ Yesu lɩɩnɑ Kɑlilee nɑ ɩ́ kɔɔ Yɑɑtɑnɩ kɛ Yohɑɑnɩ cɔlɔ sɩ Yohɑɑnɩ ɩ́ sɔ-ɩ Ɩsɔ lʋm. 14 Amɑ Yohɑɑnɩ tɑ tisi. Hɑlǝnɑ ɩ́ tɔ sɩ: Pǝ nǝɣǝsǝnɑ ɩsɩɩ nɑ́ɑ́ sɔnɑ mɑ, nɑ ń mǝlɩ nɑ ń kɔŋ mɑ kiŋ nɑ?

15 Tǝnɑɣɑ Yesu cɔ Yohɑɑnɩ sɩ: Yele nɑ pǝ́ lɑ́ mpʋ. Pǝ wɛɛ sɩ tǝ yoosi pǝ tǝnɑ mpi Ɩsɔ yɔɣɔtɑɑ sɩ tǝ́ lɑ tɔɣɔ.

Ḿpʋ́ɣʋ́ Yohɑɑnɩ tisɑɑ. 16 Pɑ tɛmɑ Yesu kɛ́ Ɩsɔ lʋm sɔʋ ɩlɛnɑ ɩ́ lɩɩ lʋm tɑɑ. Tǝnɑɣɑ ɩsɔtɔnʋɣʋ hɛtɑ kpɑkpɑɑ, nɑ Yesu nɑ́ Ɩsɔ Feesuɣu ɩsɩɩ ɑlukuku nɑ kʋ tiiki ɩ tɔɔ. 17 Ɩlɛnɑ pɑ́ nɩɩ pǝ yɔɣɔtǝnɑ ɩsɔtɑɑ sɩ: Ɩnɛɣɛlɛ mɑ luɣu tɛɛ Pǝyɑɣɑ, mɑ lɑŋlɛ hɛɛnɑ-ɩ sɔsɔm.