1 Ḿpʋ́ɣʋ́ Yesu heelɑ sɑmɑɑ nɑ ɩ ɩfɑlɑɑ sɩ: 2 Ɩsɔ Tɔm sɛɣɛsǝlɑɑ nɑ Fɑlisɑnɑɑ tǝmlɛ ntɛ́ sɩ pɑ́ kɛ́ɛ́sɩ́ yǝlɑɑ kɛ Moisi kʋsǝsɩɩtʋ. 3 Ɩ́ kɑ́ nɩɩnɑ-wɛɣɛ teu nɑ ɩ́ lɑ pǝ tǝnɑ mpi pɑ heeliɣi-mɛ sɩ ɩ́ lɑ tɔ. Amɑ ɩ́ tɑɑ lɑ ɩsɩɩ mpɛ pɑ mɑɣɑmɑɣɑ pɑ lɑkɩ tɔ. Pǝ tɑɣɑ pʋlʋ tɔɔ, nti pɑ sɛɣɛsǝɣɩ tɔ, pǝ tɑɣɑ ntǝɣɩ pɑ lɑkɩ. 4 Pɑ kpɑkǝɣɩ sǝɣǝlɑ yuŋ nyǝnɑ nɑ pɑ́ sʋkǝɣɩ lɛlɑɑ. Pǝyele mpɛ pɑɑ cɑɑ sɩ pɑ́ tɩɩ tɑɑ-wɛɣɛ tɑɑʋ mɑɣɑmɑɣɑ. 5 Pɑ lɑkɩ pǝ tǝnɑɣɑ sɩ yǝlɑɑ ɩ́ nɑ-wɛ. Pǝ tɔɔ kɛ́ pɑ ŋmɑɑkɩ Ɩsɔ Tɔm loosi nɑ pɑ́ tʋɣɩ, nɑ pɑ́ kɔɔkɩ pɑ kpɑɩnɑɑ tǝcɛŋcɛŋ. 6 Acimɑ tɑɑ sɔsɑɑ sɔsɑɑ tǝcɑɣɑlɛ kɛ pɑ pɛɛkǝɣɩ nɑ pɑ́ cɑkɩ. Nɑ Yutɑ nyǝ́mɑ tǝkotilenɑɑ tɑɑ teeli teeli tǝcɑɣɑlɛ kɛ pɑ pɛɛkǝɣɩ. 7 Pɑ sɔɔlɑ pɑ́ sɛɛkɩ-wɛɣɛ sɑmɑɑ tɑɑ kɛ́ nɑ pɑ́ luŋiɣi nɑ pɑ́ yɑɑkɩ-wɛ sɩ tɑ cɑɑ tɑ cɑɑ. 8 Amɑ mɛ, ɩ́ tɑɑ yele nɑ pɑ́ yɑɑ-mɛ sɩ tɑ cɑɑ tɑ cɑɑ. Pǝ tɑɣɑ pʋlʋ tɔɔ, mǝ tǝnɑ ɩ wɛ teitei kɛ́, nɑ mǝ Sɔsɔ ntɛ́ kʋlʋm. 9 Ɩ́ tɑɑ yɑɑ ɑtɛ cǝnɛɣɛ nɔɣɔlʋ sɩ mǝ cɑɑ. Pǝ tɑɣɑ pʋlʋ tɔɔ, mǝ Cɑɑ wɛ kʋlʋm kɛ́ tǝkoŋ, nɑ ɩnǝɣǝlɛ wei ɩ wɛ ɩsɔtɑɑ tɔ. 10 Ɩ́ tɑɑ yele sɩ pɑ́ yɑɑ-mɛɣɛ sɔsɔ sɔsɔ. Pǝ tɑɣɑ pʋlʋ tɔɔ, mǝ Sɔsɔ wɛ kʋlʋm kɛ tǝkoŋ, ɩnǝɣǝlɛ Mesii. 11 Mǝ tɑɑ sɔsɔ ɩ́ pǝsɩ mǝ tǝmlɛ tʋ. 12 Wei ɩ́ kpɑɑsɑ ɩ tɩ pɑɑ tisi-ɩ, nɑ wei ɩ tisiɣi ɩ tɩ pɑɑ kʋsɩ ɩ nyʋɣʋ.

13 Ɩsɔ Tɔm sɛɣɛsǝlɑɑ nɑ Fɑlisɑnɑɑ, cɛsǝlɑɑ mɛ, mǝ tɔm wɛ wɑɩyo. Ɩ́ tǝkǝɣɩ yǝlɑɑ kɛ ɩsɔtɑɑ Kɑwulɑɣɑ. Mǝ mɑɣɑmɑɣɑ ɩɩ sʋʋkɩ, pǝyele ɩɩ yeki sɩ mpɑ pɛlɛ pɑ luɣu wɛɛ tɔ pɑ́ sʋʋ.

[ 14 Ɩsɔ Tɔm sɛɣɛsǝlɑɑ nɑ Fɑlisɑnɑɑ, cɛsǝlɑɑ mɛ, mǝ tɔm wɛ wɑɩyo. Ɩ lɛɛkǝɣɩ leelɑɑ kɛ pǝ tǝnɑ mpi pɑ wɛnɑ tɔ, nɑ ɩ́ sǝlǝmǝɣɩ Ɩsɔ nɑ pǝ́ tɑɣɑlǝɣɩ sɩ pǝ́ hʋ́lɩ́ sɩ mɛɣɛ kʋpɑmɑ. Pǝ tɔɔ kɛ́ ɩ́ kɑ́ tɛ nɑ ɩ́ nɑ́ kɑtɑtǝlɑɣɑ nɑʋ nɑpǝlǝɣɩ teu.]

15 Ɩsɔ Tɔm sɛɣɛsǝlɑɑ nɑ Fɑlisɑnɑɑ, cɛsǝlɑɑ mɛ, mǝ tɔm wɛ wɑɩyo. Ɩ́ cɔɔkɩ kɑteŋɑ tǝnɑ, nɑ pǝ́ kpɛŋnɑ teŋku tɔɔ sɩ ɩ́ hiki Ɩsɔ sɛɛlʋ kʋlʋm mɑɣɑmɑɣɑ tǝkoŋ. Nɑ ɩ́ tɩɩ hikɑ-ɩ kɔlɔ, ɩ́ lɑpɩ-ɩ ɩsɑɣɑʋ. Hɑlǝnɑ ɩ́lɛ́ ɩ́ nǝɣǝsǝnɑ tǝnɑɑsǝlɛ sɔsɔɔlɛ tɑɑ sʋʋʋ nɑ pǝ kǝlɩ ɩsɩɩ mɛɣɛ tɔm nɑɑlɛ.

16 Mpɑ mɛ ɩ́ hɔŋ lɛlɑɑ pǝyele mǝ ɩsɛ nɑɑ nɑɑ tɔ, mǝ tɔm wɛ wɑɩyo. Ɩ́ tɔŋ sɩ ye yʋlʋ tuunɑ Ɩsɔ tǝsɛɛlɛ sɔsɔɔlɛ pǝ wɛ ɩsɩɩ ɩ tɑ tuu kɛlɛ. Amɑ ye ɩ tuunɑ Ɩsɔ tǝsɛɛlɛ sɔsɔɔlɛ tɑɑ wʋlɑ ɩlɛ ɩ tuuwɑɣɑlɛ. 17 Amɑ mǝ kʋmɛlɛntʋ nɑ mǝ yʋlʋmlɛ tɔɔwɑ yoo. Pepe kǝlɑɑ? Wʋlɑ yɑɑ Ɩsɔ tǝsɛɛlɛ sɔsɔɔlɛ nte tǝ lɑpɑ wʋlɑ ɩnǝɣɩ kɑtɛ pʋlʋ tɔ? 18 Ɩ́ yɔɣɔtǝɣɩ tɔtɔ sɩ ye yʋlʋ ɩ́ tuunɑ kɔtɑɣɑ tǝlɑtɛ pǝ wɛ ɩsɩɩ ɩ tɑ tuunɑ kɛlɛ. Amɑ ye ɩ tuunɑ mpi pǝ mɑɣɑmɑɣɑ pɑ lɑpɑ kɔtɑɣɑ nɑ pǝ wɛ kɔtɑɣɑ tǝlɑtɛ ɩlɛ ɩ tuunɑɑ kɛlɛ. 19 Yʋlʋmɑɑ mɛ, pepe kǝlɑɑ? Kɔtɑɣɑ tǝlɑtɛ yɑɑ kɔtɑɣɑ nyǝm mpi kɔtɑɣɑ tǝlɑtɛ lɑkɩ nɑ pǝ́ pǝsɩ kɑtɛ pʋlʋ tɔ? 20 Ye yʋlʋ tuunɑ kɔtɑɣɑ tǝlɑtɛ, ɩ kpɛŋnɑ pǝ tǝnɑ mpi pǝ wɛ kɔtɑɣɑ tǝlɑtɛ tɑɑ tɔɣɔ nɑ ɩ́ tuunɑ. 21 Yʋlʋ ɩ́ tuunɑ Ɩsɔ tǝsɛɛlɛ sɔsɔɔlɛ, ɩ kpɛŋnɑ Ɩsɔ wei ɩ cɑkɩ Ɩsɔ tǝsɛɛlɛ ntɛ tǝ tɑɑ tɔɣɔ nɑ ɩ́ tuunɑ. 22 Yʋlʋ ɩ́ tuunɑ ɩsɔtɔnʋɣʋ, ɩ kpɛŋnɑ Ɩsɔ kumte nɑ Ɩsɔ wei ɩ cɑɣɑ tǝ tɔɔ tɔɣɔ nɑ ɩ́ tuunɑ.

23 Ɩsɔ Tɔm sɛɣɛsǝlɑɑ nɑ Fɑlisɑnɑɑ, cɛsǝlɑɑ mɛ, mǝ tɔm wɛ wɑɩyo. Ye ɩ hikɑ nyɩɩtʋ nti pɑ yɑɑ sǝmɑntɩ nɑ fenuwili nɑ kumɛŋ, ɩ́ lǝsǝɣɩ pǝ hɔɣɔlǝŋ nɑɑnʋwɑ tɑɑ kʋlʋm nɑ ɩ́ cɛlǝɣɩ Ɩsɔ. Pǝ kɑɑsɩ nɑ ɩ́ lɔɔkǝnɑ mǝ lumɑsɩ wɑɑlɩ kɛ́ kʋsǝsɩɩtʋ tɑɑ sɔsɔɔntʋ. Tǝlɛɣɛlɛ siɣisuɣu nɑ kʋpɑntʋ nɑ tɑmpɑnɑ tǝŋʋɣʋ. Pǝ́cɔ́ tǝlɛɣɛ pǝ mʋnɑ ɩ́ sɛɛsǝnɑ ɩsǝlɛ. Ɩlɛ ɩ́ tɑɑ sɔɔ hɔɣɔlǝŋ nɑɑnʋwɑ tɑɑ kʋlʋm ɩnɩ ɩ tɔɔ. 24 Mpɑ mɛ ɩ́ hɔŋ lɛlɑɑ, pǝyele mǝ ɩsɛ nɑɑ nɑɑ tɔ, ye ɩ nɑ mǝ lʋm tɑɑ kɛ́ kɑcɔkɑ ɩ́ lǝsǝɣɩ kɛ́. Amɑ ye yooyoo ɩlɛ, ɩ́ kpɛntǝnɑ nɑ ɩ́ li.

25 Ɩsɔ Tɔm sɛɣɛsǝlɑɑ nɑ Fɑlisɑnɑɑ, cɛsǝlɑɑ mɛ, mǝ tɔm wɛ wɑɩyo. Iyisi nɑ nyǝnɑsɩ wɑɑlɩ kɛ́ ɩ́ nyɑɑlǝɣɩ tǝlɑilɑi, nɑ sɩ tɑɑ sunɑ mǝ kʋŋmɩɩlǝm nɑ mǝ ɩsɑɣɑtʋ hʋwɛɛ. 26 Fɑlisɑnɑɑ yʋlʋmɑɑ mɛ, pǝ wɛɛ sɩ iyɑɣɑ tɑɑ kɛ́ ɩ́ kɑ́ nyɑɑlɩ nɑ ɩ́ kpɛnnɑ wɑɑlɩ, nɑ pǝ tǝnɑ pǝ́ lɑ tǝnɑŋŋ.

27 Ɩsɔ Tɔm sɛɣɛsǝlɑɑ nɑ Fɑlisɑnɑɑ, cɛsǝlɑɑ mɛ, mǝ tɔm wɛ wɑɩyo. Ɩ́ wɛɛ kɛ́ ɩsɩɩ pǝlɑɑŋ wei pɑ hʋlǝsɑɑ nɑ ɩ nyǝnʋɣʋ wɛ teu, nɑ ɩ tɑɑ sunɑ mʋwɑ nɑ kʋsɔɣɔtʋ ntɩ tǝ tǝnɑ tɔ. 28 Mpʋ tɔtɔɣɔ ɩ́ wɛɛ, yʋlʋ ɩ́ nyǝnɑ-mɛɣɛ ɩsɛntɔɔ, ɩ tɔŋ kɛ́ sɩ ɩ́ kɛ́ kʋpɑmɑ. Amɑ mǝ tɑɑ ɩlɛ, cɛsʋɣʋ nɑ ɩsɑɣɑtʋ pǝ mɑɣɑlǝnɑ.

29 Ɩsɔ Tɔm sɛɣɛsǝlɑɑ nɑ Fɑlisɑnɑɑ, cɛsǝlɑɑ mɛ, mǝ tɔm wɛ wɑɩyo. Ɩ́ tɑɣɑnǝɣɩ Ɩsɔ kʋyɔɣɔtʋtʋ tɛlǝsǝlɑɑ pǝlɑɑŋ kɛ teu tǝmɑmmɑm, nɑ ɩ́ lɑkɩ kɑcɔkɑ kɛ mpɑ pɑ tǝŋɑ tɑmpɑnɑ tɔ pɑ pǝlɑɑŋ. 30 Nɑ ɩ́ tɔŋ sɩ: Ye tɩɩ wɛ wɑɑtʋ wei tɑ cɑɑnɑɑ kʋkɑɣɑ Ɩsɔ kʋyɔɣɔtʋtʋ tɛlǝsǝlɑɑ mpɛ tɔ, tǝ tɑɑ tǝŋ-wɛ nɑ tǝ́ kʋ-wɛ. 31 Nɑ ḿpʋ́ɣʋ́ ɩ́ hʋlǝɣǝnɑ sɩ ɩ́ kɛ́ mpɑ pɑɑ kʋwɑ Ɩsɔ kʋyɔɣɔtʋtʋ tɛlǝsǝlɑɑ mpɛ tɔ pɑ piyɑ. 32 Mpʋ tɔ, pɑ ɑkpɑɑ kɛ ɩ́ tǝŋǝɣɩ, nɑ mpi pɛlɛ pɑɑ cɑɑlɑɑ nɑ pɑ́ sɩɩ tɔ mpǝɣɩ ɩ́ tɛɛsǝɣɩ. 33 Tʋmɑɑ piyɑ mɛ, ɑkɑlɑnɑɑ mɛ. Ɩ́ tɔŋ tɔ, ɩ́ tɑ́ kɛ́ tǝnɑɑsǝlɛ sɔsɔɔlɛ tɑɑ sʋʋlɑɑ ntɛ? 34 Pǝ tɔɔ kɛ́ mɑ heeliɣi-mɛ sɩ ɩ́ nɩɩ yoo. Mɑɑ tili Ɩsɔ kʋyɔɣɔtʋtʋ tɛlǝsǝlɑɑ nɑ lɑɣɑtʋnɑɑ nɑ ɩsɛkullɑɑ kɛ mǝ kiŋ. Ɩ́ kɑ́ kʋ lɛlɑɑ kɛ kʋkʋɣʋ, nɑ ɩ́ kɑ́ lɛlɑɑ kɛ sǝm tesikɑsɩ tɔɔ. Ɩ́ kɑ́ mɑ lɛlɑɑ kɛ ɑkpɑtɛɛ kɛ mǝ tǝkotilenɑɑ tɑɑ nɑ ɩ́ tǝŋ nɑ ɩ́ pɛɛkɩ-wɛɣɛ ɑcɑlɛɛ tɑɑ. 35 Mpɑ pɑɑ kʋwɑ yem kɛ tulum tɔ, mǝ nyɔɔŋ tɑɑ kɛ́ pɑ kʋlɑɑ ɩsɑɣɑtʋ kɑ́ mǝlɩ. Pǝ kpɑɣɑʋ yʋlʋpɑŋ Apɛɛlɩ kʋɣʋ nɑ pǝ́ polo Pɑlɑsii pǝyɑlʋ Sɑkɑlɩ wei ɩ́ kʋ kɑtɛ tɑɑ kɑtɛ nɑ kɔtɑɣɑ tǝlɑtɛ pǝ hɛkʋ tɔ ɩ nyǝm tɔ. 36 Tɑmpɑnɑ kɛ mɑ heeliɣi-mɛ yoo mɑɑ cɛsǝɣɩ, kɑɣɑnɑ nyǝ́mɑ nyɔɔŋ tɑɑ kɛ́ pɩɩ tɛnɑ.

37 Hei Yosɑlɛm, Yosɑlɛm, nyɑ́ tɑɑ kɛ́ pɑ kʋɣɩ Ɩsɔ kʋyɔɣɔtʋtʋ tɛlǝsǝlɑɑ, nɑ nyɑ́ tɑɑ tɔtɔɣɔ pɑ yooki Ɩsɔ tillɑɑ kɛ pɛɛ nɑ pɑ́ kʋɣɩ. Tɔm pɑɣɑlɛ kɛ mɑ sɔɔlɑɑ sɩ mɑ kpeɣeliɣi nyɑ́ tɑɑ yǝlɑɑ tǝnɑ tǝkotokoto ɩsɩɩ kɑntuɣu pɑpʋɣʋ kʋ piyɑ tɔɔ tɔ. Amɑ pɑ kisɑɑ. 38 Tɔʋ, mǝ tǝyɑɣɑ kɑ́ tǝkɩ kɑɑʋ tǝkpɑtɑɑ, nɔɣɔlʋ kɑɑ pɑɑsǝnɑ-kɛ. 39 Pǝ tɔɔ kɛ́ mɑ heeliɣi-mɛ tǝfoo sɩ, pǝ kpɑɣɑʋ sɑŋɑ tɔ ɩ́ kɑɑ tɑsɑ-m keesuɣu. Hɑlǝnɑ pǝ tɑlɑ wʋlɛ nte ɩ́ kɑ́ tɔ sɩ: Ɩsɔ ɩ́ sǝnɑ Tɑcɑɑ tillu tɔ.