1 Ḿpʋ́ɣʋ́ Sɑnǝpɑlɑ nɑ Topiyɑ nɑ Lɑɑlupu Kesɛm nɑ tɑ́ kolontunɑɑ lɛlɑɑ nɩɩwɑ sɩ, mɑ ŋmɑwɑ ɩcɑtɛ koluŋɑ, pǝ tɑ kɑɑsɩ kɑfɛɛʋ. Pǝyele wɑɑtʋ ɩnɩ tɔ, mɑ tɑ tʋtɑ kɑmpʋnɑɑ. 2 Ntɛnɑ Sɑnǝpɑlɑ nɑ Kesɛm pɑ́ tili nɑ pɑ́ yɑɑ-m sɩ mɑ́ nɑ-wɛ tǝ́ suli Kefilim kɛ Ono tɛtɛkǝlɛ tɑɑ. Pɑ tɑɑ kɑ wɛɛ kɛ́ sɩ pɑ lɑkɩ-m ɩsɑɣɑtʋ. 3 Amɑ mɑ cɔ-wɛ sɩ mɑ niŋ tɔkǝnɑ tǝmlɛ, mɑ kɑɑ pǝsɩ nɑ mɑ́ polo. Ye mɑ tɛɛwɑ tǝ sɑɑlǝɣɩ kɛ́.

4 Tɔm liɣiti kɛ́ pɑ yɑɑ-m nɑ mɑ́ɑ́ cɔ-wɛɣɛ kʋlʋmtʋ ntɩ. 5 Tɔm kɑkpɑsɩ nyǝm kɛ Sɑnǝpɑlɑ tilinɑ ɩ tɑɑpɑlɑɑ tɑɑ nɔɣɔlʋɣʋ tɑkǝlɑɣɑ kɛ nɔholo. 6 Nɑ pɑ́ ŋmɑɑ kɑ tɑɑ sɩ: Tǝ nɩɩnɑ nɩɩlɑɑ mpɑ pɑ tɑ kɛ Yutɑ nyǝ́mɑ tɔ, ɩsɩɩ Kesɛm-wɛ sɩ, nyɑnɑ nyɑ́ tɑɑpɑlɑɑ ɩ́ lʋkɩ kɛ́ sɩ ɩ́ kʋlɩ tɑ́ tɔɔ. Pǝ tɔɔ kɛ́ n ŋmɑɑkɩ koluŋɑ sɩ ń pǝsɩ pɑ wulɑʋ. 7 Hɑlɩ pɑ yɔɣɔtɑɑ tɔtɔ sɩ n kpɑwɑ Ɩsɔ kʋyɔɣɔtʋtʋ tɛlǝsǝlɑɑ, nɑ pɑ́ heeli-ŋ sɩ nyɑɣɑlɛ Yutɑ wulɑʋ. Ɩlɛ wulɑʋ sɔsɔ kɑɑ lɑŋ-tǝɣɩ nɩɩʋ kɛ nɔɔnɔɔ. Mpʋ tɔ, kɔɔ nɑ mɑ́ nɑ-ŋ tǝ nɑ́. 8 Ntɛnɑ mɑ́ cɔ-ɩ nɑ mɑ́ tilinɑ sɩ: Nyɑ́ mɑɣɑmɑɣɑ n loolinɑ pǝ tǝnɑɣɑ mpʋ. Nɑtǝlɩ tǝ tɑ kɛ tɑmpɑnɑ. 9 Pɔpɔtʋ fɛɩ leleŋ, pɑ tǝnɑ pɑ lʋpɑɣɑ sɩ pɑ nyɑɑsǝɣɩ-tʋ nɑ tɑ́ ɑpɑlʋtʋ yɔɔlɩ, ɩlɛnɑ tǝ́ yele tǝmlɛ.

Hɑɩ, Tɑcɑɑ, yele nɑ mɑ́ kɑɑsɩ mɑ tǝɣɩ mɑ tǝmlɛ tɑɑ.

10 Ḿpʋ́ɣʋ́ kʋyɑkʋ nɑkʋlɩ mɑ polɑ Telɑyɑ pǝyɑlʋ Semɑyɑ tɛ, Metɑpɛlɩ sɑɑlɩ kɛlɛ. Mpi tɔ, ɩ tɑ pǝsɩ nɑ ɩ́ kɔɔ mɑ tɛ. Kɛlɛnɑ ɩ́ tɔ-m sɩ: Tǝ́ sʋʋ Ɩsɔ tǝsɛɛlɛ tɑɑ nɑ tǝ́ tǝkɩ tɑ tɔɔ kɛ́ teu. Ye pǝ tɑɣɑ mpʋ, mɑ kolontunɑɑ kɑ́ kɔɔ ɑhoo nɑ pɑ́ kʋ-m. 11 Ɩlɛnɑ mɑ́ɑ́ cɔ-ɩ sɩ: Mɑ tɛɛ mɑ́ se. Pǝlɛ pǝ pɑɑsi ye mɑ sʋʋ Ɩsɔ tǝsɛɛlɛ tɑɑ, mɑ kɑɑ lɑ yʋlʋ. Aɑɩ, mɑ kɑɑ sʋʋ tǝnɑ.

12 Mɑ nyǝ́mɑ teu sɩ pǝ tɑɣɑ Ɩsɔ heelinɑ-ɩ nti ɩ heelɑ-m mpʋ tɔ. Sɑnǝpɑlɑ nɑ Topiyɑ pɑ fɛlǝnɑ-ɩ liɣitee sɩ ɩ́ yɔɣɔtɩ mpʋ. 13 Pǝ tɔɔ kɛ́ pǝ fɛɩ sɩ sɔɣɔntʋ ɩ́ kpɑ-m nɑ mɑ́ tǝŋ ɩ sɛɣɛsɛɛ nɑ mɑ́ pǝntǝnɑ Ɩsɔ nɑ pǝ́ kʋ́ mɑ nyʋɣʋ nɑ pǝ́ tʋ́-m fɛɛlɛ.

14 Hɑɩ, mɑ Ɩsɔ, tɔɔsɩ nti Topiyɑ nɑ Sɑnǝpɑlɑ nɑ Ɩsɔ kʋyɔɣɔtʋtʋ tɛlǝsʋlʋ ɑlʋ nyǝŋ Noyɑtiyɑ nɑ Ɩsɔ kʋyɔɣɔtʋtʋ tɛlǝsǝlɑɑ lɛlɑɑ pɑ lɑpɑ tɔ. Nɑ ɩsǝnɑ pɑ cɑɑ pɑ́ tʋ-m sɔɣɔntʋ tɔ.

15 Ḿpʋ́ɣʋ́ koluŋɑ tɛmɑ pɑ ɩsɔtʋ wei pɑ yɑɑ sɩ Ɩluuli tɔ ɩ kʋyɛɛŋ hiu nɑ kɑkpɑsɩ wule. Koluŋɑ tǝmlɛ kʋyɛɛŋ lɩ́ɩ́ nɩɩlɛ nɑ nɑɑnʋwɑ nɑ nɑɑlɛ. 16 Wɑɑtʋ wei tɑ kolontunɑɑ mpɑ pɑ cɔɔnɑ-tʋ tɔ pɑ nɩɩ-tɩ, ɩlɛnɑ sɔɣɔntʋ kpɑ-wɛɣɛ sɔsɔm. Ḿpʋ́ɣʋ́ pɑ pɔpɔtʋ tɛmɑ nɑ pɑ́ cɛkǝnɑ sɩ Ɩsɔ toŋ tɑɑ kɛ́ tǝ lɑpǝnɑ tǝmlɛ ńtɛ́.

17 Wɑɑtʋ ɩnɩ ɩ tɑɑ kɛ́ Yutɑ nyʋɣʋ nyǝ́mɑ nɑ Topiyɑ pɑ ŋmɑɑkɑɣɑ tǝmɑɣɑ tɑkǝlɑsɩ kɛ sɔsɔm. 18 Ɩlɛ tɑmpɑnɑ tɔɔ Yutɑ nyǝ́mɑ pɑɣɑlɛ lɑŋɑ kɑ hɛɛnɑ-ɩ kɛ́. Mpi tɔ, Yutɑ tʋ Alɑ pǝyɑlʋ Sekɑniyɑ kɑ hɑ-ɩ ɩ pɛɛlɔ. Pǝyele ɩ mɑɣɑmɑɣɑ ɩ pǝyɑlʋ Yohɑnɑŋ kɑ kpɑɣɑ Pelekiyɑ pǝyɑlʋ Mesulɑm pɛɛlɔ. 19 Pɑ sɑŋɑɣɑ-ɩ mɑ kiŋ kɛ́, nɑ pɑ́ tɑɣɑsǝɣɩ-ɩ mɑ tɔm. Topiyɑ mɑɣɑmɑɣɑ nɑ́ ŋmɑɑkɑɣɑ-m tɑkǝlɑsɩ kɛ́ sɩ sɔɣɔntʋ ɩ́ kpɑ-m.