1 Ḿpʋ́ɣʋ́ Tɑcɑɑ tɔmɑ Moisi sɩ: 2 Tɛlǝsɩ Alɔŋ sɩ wɑɑtʋ wei n sɩɩkɩ fǝtǝlɑ sɔsɔ kɔkɔsɩ nɑɑtosompɔɣɔlɑɣɑ ɩnɩ tɔ, pɑɑsǝnɑ nɑ pǝ́ nɑɑkɩ fǝtǝlɑ sɔsɔ ɩnɩ ɩ lɔlɔ. 3 Ɩlɛnɑ Alɔŋ lɑ́ ɩsɩɩ Tɑcɑɑ kɛɛsʋɣʋ Moisi tɔ. 4 Wʋlɑ tike kɛ Moisi lɑpɑ nɑ pɑ́ lu fǝtǝlɑnɑɑ tǝsɩɩlɛ tǝnɑ. Pǝ kpɑɣɑʋ tǝ tɑpʋɣʋ, hɑlǝnɑ tǝ tomle nte tǝ nǝɣǝsǝnɑ ɩsɩɩ tʋɣʋ hɛtʋ tɔ. Ɩsɩɩ Tɑcɑɑ kɑ hʋlɑ-ɩ tɔ.

5 Ḿpʋ́ɣʋ́ Tɑcɑɑ tɔmɑ Moisi sɩ: 6 Fɑɣɑ Lefii nyǝ́mɑ nɑ pɑ mpɑɑ. Lɑ-wɛɣɛ nyɔɔŋ tɔɔ ɑsilimɑ kɛɛlʋɣʋ kɔtɑɣɑ. 7 Nmɩɩsɩ pɑ tɔɔ kɛ́ kɔtɑɣɑ lʋm, nɑ pɑ́ hʋ pɑ tɔɔ hʋntʋ tǝnɑ. Nɑ pɑ́ cɔtɔ pɑ wontu, ɩlɛnɑ pǝ́ kɛɛlɩ pɑ nyɔɔŋ tɔɔ ɑsilimɑ. 8 Ɩlɛnɑ pɑ́ kpɑɣɑ lɑtǝcɛ nɑ kɔtɑɣɑ mʋlʋm mpi pɑ nuɣutinɑ nim tɔ. Nɑ Moisi nɑ́ɑ́ kpɑɣɑ ɩsɑɣɑtʋ hɩɩsʋɣʋ lɑtǝcɛ nɑɑlɛ nyǝŋ. 9-10 Nɑ ɩ́ koti Ɩsɛɣɛlɩ nyǝ́mɑ tǝnɑ nɑ Lefii nyǝ́mɑ kpǝtǝnɑ Ɩsɔ cokǝle nɔnɔɣɔ. Nɑ Ɩsɛɣɛlɩ nyǝ́mɑ tǝnɩ pɑ tɔɔ kɛ́ niŋ. 11 Ɩlɛnɑ Alɔŋ hʋlɩ Lefii nyǝ́mɑ kɛ Ɩsɔ nɑ hɔɣɔlǝŋ tǝnɑ, ɩsɩɩ Ɩsɛɣɛlɩ nyǝ́mɑ lɑkʋɣʋ Ɩsɔ nyǝm tɔ. Ɩlɛnɑ pɛlɛ pɑ lɑkɩ Ɩsɔ kɛ tǝmlɛ. 12 Pǝ wɑɑlɩ ɩlɛnɑ Lefii nyǝ́mɑ tǝnɩ pɑ niŋ kɛ lɑtǝcɛnɑɑ nɑɑlɛ tɔɔ nɑ Alɔŋ lɑ-m lɛlʋ kɛ ɩsɑɣɑtʋ hɩɩsʋɣʋ kɔtɑɣɑ, nɑ lɛlʋ kɛ kɔtɑɣɑ ŋkɑ kɔkɔ lusɑ kɑ tǝnɑ tɔ. Ɩlɛ Lefii nyǝ́mɑ ɩsɑɣɑtʋ hɩɩsɑɑ kɛlɛ. 13 Ɩlɛnɑ ń sɩɩ Lefii nyǝ́mɑ kɛ Alɔŋ nɑ ɩ pǝyɑlɑɑ pɑ ɩsɛntɑɑ. Nɑ ń hʋlɩ-wɛ nɑ hɔɣɔlǝŋ tǝnɑ ɩsɩɩ Ɩsɛɣɛlɩ nyǝ́mɑ lɑkɩ tɔ. 14 Nɑ Lefii nyǝ́mɑ pǝsɩ Ɩsɔ nyǝ́mɑ nɑ pǝ́ fɑɣɑ pɑ nɑ pɑ tɛɛtʋnɑɑ. 15 Pǝlɛ pǝ wɑɑlɩ kɛ́ pɑɑ cɑɑlɩ pɑ tǝmlɛ kɛ cokǝle tɑɑ. Ɩsǝnɑ ɩ́ kɑ́ lɑ Lefii nyǝ́mɑ kɛ nyɔɔŋ tɔɔ ɑsilimɑ kɛɛlʋɣʋ kɔtɑɣɑ, nɑ ɩ́ hʋlɩ-wɛ nɑ hɔɣɔlǝŋ tǝnɑ ɩsɩɩ Ɩsɛɣɛlɩ nyǝ́mɑ lɑkɩ tɔɣɔlɛ. 16 Ḿpʋ́ɣʋ́ Tɑcɑɑ tɑsɑɑ sɩ: Mǝ kɛnɑ mɑ nyǝm. Mpi tɔ, mɑ lɛɛtɑ-mɛɣɛ Ɩsɛɣɛlɩ nyǝ́mɑ kɑncɑɑlɑɣɑ ɑpɑlʋpiyɑ lonɑ kɛ́. 17 Kʋyɑkʋ ŋku mɑ kʋwɑ Icipiti tɑɑ yǝlɑɑ kɑncɑɑlɑɣɑ ɑpɑlʋpiyɑ tɔ, pǝ kpɑɣɑʋ wɑɑtʋ ɩnɩ tɔ kɑncɑɑlɑɣɑ ɑpɑlʋpiyɑ tǝnɑ pǝsɑ mɑ nyǝm kɛ́. Pɑɑ yǝlɑɑ nyǝnsɩ, pɑɑ tɔlɑ nyǝnsɩ. 18 Lefii nyǝ́mɑ kɛ mɑ lɛɛtɑ Ɩsɛɣɛlɩ kɑncɑɑlɑɣɑ ɑpɑlʋnyǝnsɩ lonte. 19 Nɑ sɑmɑɑ tilinɑ-wɛɣɛ Alɔŋ nɑ ɩ pǝyɑlɑɑ pɑ kiŋ nɑ pɑ́ lɑkɩ tǝmɑ nɑ pɑ nɔɣɔ kɛ cokǝle tɑɑ, nɑ Tɑcɑɑ hɩɩsɩ sɑmɑɑ ɩsɑɣɑtʋ. Pǝ́ tɑɑ kɔɔ nɑ pɑ́ kpǝtǝnɑ Ɩsɔ cokǝle nɑ ɩ́ wɑkǝlɩ-wɛ. 20 Ḿpʋ́ɣʋ́ Moisi nɑ Alɔŋ nɑ Ɩsɛɣɛlɩ nyǝ́mɑ tǝnɑ, pɑ lɑpɑ teitei ɩsɩɩ Tɑcɑɑ kɑ kɛɛsʋɣʋ-wɛɣɛ Lefii nyǝ́mɑ tɔm tɔ. 21 Pɑ cɔtɑ pɑ wontu nɑ pɑ́ sɔ lʋm. Nɑ Alɔŋ hʋlɩ-wɛɣɛ Ɩsɔ nɑ hɔɣɔlǝŋ tǝnɑ ɩsɩɩ Ɩsɛɣɛlɩ nyǝ́mɑ lɑkɩ tɔ. Nɑ ɩ́ lɑ-wɛɣɛ ɩsɑɣɑtʋ hɩɩsʋɣʋ kɔtɑɣɑ, nɑ ɑsilimɑ kɛɛlʋɣʋ nyǝŋkɑ. 22 Pǝ wɑɑlɩ kɛ́ Lefii nyǝ́mɑ cɑɑlɑ pɑ tǝmlɛ kɛ Ɩsɔ cokǝle tɑɑ. Nɑ Alɔŋ nɑ ɩ pǝyɑlɑɑ pɑ́ feŋiɣi-wɛ. Ɩsǝnɑ pɑ lɑpɑ nti Tɑcɑɑ kɑ heelɑ Moisi tɔɣɔlɛ. 23 Ḿpʋ́ɣʋ́ Tɑcɑɑ tɑsɑ Moisi kɛ heeluɣu sɩ: 24 Mpi pǝ kɛ́ Lefii nyǝ́mɑ nyǝntʋ tɔɣɔlɔ. Pɑɑ Lefii tʋ wei, ye ɩ wɛnɑ pɩɩsɩ hiu nɑ kɑkpɑsɩ nɑ wɑɑlɩ kɛ mpʋ, wɑɑtʋ ɩnǝɣɩ ɩ kɑ cɑɑlɩ Ɩsɔ cokǝle tɑɑ tǝmlɛ. 25 Ɩlɛnɑ pɑ́ cɛpɩ-ɩ ɩ pɩɩsɩ nɩɩlɛ nɑ nɑɑnʋwɑ nyǝŋkɑ tɑɑ. 26 Ye pɑ cɛpɑ wei, ɩ pǝsǝɣɩ nɑ ɩ́ sǝnɑ ɩ tɛɛtʋnɑɑ kɛ Ɩsɔ cokǝle tǝmlɛ yɑɑ. Amɑ pɑ kɑɑ tʋ-ɩ ɩ mɑɣɑmɑɣɑ ɩ nyǝntɛ kɛ́. Ɩsǝnɑ Moisi kɑ́ lɑkɩ Lefii nyǝ́mɑ tǝmlɛ tɔm tɑɑ tɔɣɔlɛ.