1 Ḿpʋ́ɣʋ́ kʋyɑkʋ nɑkʋlɩ Ɩsɛɣɛlɩ nyǝ́mɑ kʋntǝnɑ Tɑcɑɑ, nɑ pɑ́ɑ́nɑ́ kpɑ-ɩ. Nɑ ɩ́ tisi kɔkɔ nɑ kɑ́ nyɑɣɑ tisikile kɛ pǝcɔ. 2 Ntɛnɑ sɑmɑɑ wiinɑ Moisi tǝkpɛɛ, nɑ ɩ́lɛ́ ɩ sǝlǝmǝnɑ-wɛɣɛ Tɑcɑɑ nɑ kɔkɔ te. 3 Ɩlɛnɑ pɑ́ hɑ lonte ntɛɣɛ hǝtɛ sɩ Tɑpelɑ. Nyɑɣɑʋ kɛ pɑ yɑɑ mpʋ nɑ pɑ tɛ tɑɑ. Mpi tɔ, tǝnɑɣɑ Tɑcɑɑ kɑ nyɑɣɑsɑ pɑ tǝsikile.

4 Ḿpʋ́ɣʋ́ kʋyɑkʋ nɑkʋlɩ luluɣu kpɑwɑ cɑɣɑlɑɑ. Ɩlɛnɑ pǝ kpɛnnɑ Ɩsɛɣɛlɩ nyǝ́mɑ mɑɣɑmɑɣɑ nɑ pɑ́ tɑɣɑnǝɣɩ kʋntʋɣʋ sɩ: Tɩɩ hiki nɑntʋ ntɛ́ nɑ tǝ́ tɔɣɔ? 5 Aɑ kɑɩ, yǝlɑɑ tɔɣɔ Icipiti tɑɑ kɛ́ tiinɑ kɛ fɑɑlɑɑ. Nɑ kɑɑmɑ mɑɣɑmɑɣɑ nɑ ɑ nǝɣǝsǝlɛnɑɑ mpɑ pɑ tɔkǝnɑ lɛŋ tɔ, nɑ kɑɑpǝnɑɑ kɛ wɑɑnɩ wɑɑnɩ. 6 Amɑ pǝ tɑɑ pʋlʋ fɛɩ cǝnɛ. Mɑnnɑ ɩnǝɣǝlɛ Mɑnnɑ, nɑ tǝ́ tɛŋ tɑɑsɩ.

7 Mɑnnɑ ɩnɩ ɩ kɑ nǝɣǝsǝnɑ kɛ́ ɩsɩɩ pee kʋhʋlʋmɛɛ nɑɑlɩ, ɩ wɛ ɩsɩɩ tʋɣʋ nɑkʋlɩ kʋ cǝlǝm. 8-9 Ahoo kɛ cɔlɔʋ kpɑɑkɩ tǝsikile, ɩlɛnɑ Mɑnnɑ hoti. Pǝ nyɑɑlǝɣɩ, ɩlɛnɑ sɑmɑɑ cɔɔ nɑ pɑ́ kuuki, nɑ pɑ́ nɑŋǝɣɩ yɑɑ pɑ́ sɔkɩ, nɑ pɑ́ tǝsǝɣɩ, yɑɑ pɑ́ tʋɣɩ kɑkɑlɑsɩ. Ɩ leleŋ wɛ kɛ ɩsɩɩ nim kɑkɑlɑɣɑ.

10 Mpʋɣʋlɛ Ɩsɛɣɛlɩ nyǝ́mɑ kotɑ pɑ tɛɛsɩ nɔnɔɔɔsɩ nɑ pɑ́ kʋntǝɣɩ, nɑ Moisi nɩɩ. Ɩlɛnɑ Tɑcɑɑ pɑ́ɑ́nɑ́ huu. 11 Nɑ Moisi lɑŋlɛ wɑkǝlɩ, nɑ ɩ́ pɔɔsɩ Ɩsɔ sɩ: Pepe tɔɔ kɛ́ mɑ nyʋɣʋ sǝpǝnɑ-ŋ, nɑ ń tʋ-m yǝlɑɑ pɑnɛ pɑ pɑɑsǝnɑʋ nɑ ń cɔɔsǝɣɩ-m mpʋ? 12 Anɩ pǝ tɑɣɑ mɑ lʋlǝnɑ-wɛ. Nɑ ń tɔŋ sɩ mɑ́ nʋkɩ-wɛ ɩsɩɩ ɑsɔnʋɣʋ nɑ mɑ́ ponɑ-wɛɣɛ tɛtʋ nti n kɑ sɩɩ pɑ cɑɑnɑɑ kɛ nɔɣɔ nɑ tuunɑʋ sɩ, n kɑ́ hɑ-wɛ tɔ. 13 Yɑɑ leɣe mɑ kpǝlǝɣɩ nɑntʋ nɑ mɑ́ cɛlɑ sɑmɑɑ ɩnɛ nɑ ɩ́ tɔɣɔ? Mpi tɔ, pɑ wiikinɑ-m sɩ mɑ́ cɛlɑ-wɛɣɛ nɑntʋ nɑ pɑ́ tɔɣɔ. 14 Mɑ tike mɑ kɑɑ pǝsɩ pɑ sǝɣǝlɑ, ɑ tɛɛ-m. 15 Ye tɑmpɑnɑ sɩ n cɑɑ ń lɑ-m kʋpɑntʋ, pǝ kǝlɑ teu sɩ ń kʋ-m nɑ mpi n kɑ lɑkɩ-m ɩsǝntɔ tɔ. Mɑ́ tɑɑ nɑ mɑ kʋnyɔntɔɣɔlɛ.

16 Ntɛnɑ Tɑcɑɑ cɔ Moisi sɩ: Koti yǝlɑɑ mpɑ lɛlɑɑ tʋɣʋnɑ nɑ pɑ́ kɛ́ nyʋɣʋ nyǝ́mɑ tɔɣɔ nɩɩtoso nɑ nɑɑnʋwɑ. Ɩlɛnɑ nyɑnɑ-wɛ ɩ́ kɔɔ ɩ sǝŋ Ɩsɔ cokǝle nɔnɔɣɔ. 17 Ɩlɛ mɑɑ tii nɑ mɑ́ nɑ-ŋ tǝ́ yɔɣɔtɩ tǝnɑ, nɑ mɑ́ tʋ-wɛɣɛ nyɑ́ lǝmɑɣɑsǝlɛ. Ɩlɛnɑ pɑ́ sǝnɑ-ŋ nɑ ń tɑɑ sǝɣǝlɩ sɑmɑɑ sǝɣǝlɑ kɛ nyɑ́ tike. 18 Ɩlɛnɑ ń tɛlǝsɩ yǝlɑɑ sɩ, ɩ́ tɑɣɑnɩ mǝ tǝɣɩ cele tɔɔ. Mɑɑ hɑ-mɛɣɛ nɑntʋ nɑ ɩ́ tɔɣɔ. Mpi tɔ, mɑ nɩɩ ɩsǝnɑ luluŋ pɩɩ-mɛ, nɑ ɩ́ kʋntǝɣɩ, nɑ ɩ́ tɔŋ sɩ mǝ nɩɩkɑɣɑ leleŋ kɛ Icipiti tɔ. 19 Pǝ tɑɣɑ kʋyɑkʋ kʋlʋmʋɣʋ yɑɑ nɑɑlɛ yɑɑ kɑkpɑsɩ yɑɑ nɑɑnʋwɑ tike kɛ ɩ́ kɑ́ tɔɣɔ-tɩ. 20 Amɑ ɩsɔtʋ tǝcu kɛ́, hɑlǝnɑ tǝ lɩɩ-mɛɣɛ sɔŋ. Mpi pǝ tɔɔ ɩ́ lɔwɑ Tɑcɑɑ mɑ wei mɑ wɛ mǝ hɛkʋ, nɑ ɩ́ kʋntǝɣɩ mǝ Icipiti tɑɑ lɩɩʋ tɔɔ tɔ.

21 Tǝnɑɣɑlɛ Moisi nɔɣɔ tǝkpɑʋ sɩ: Yoolɑɑ pɑnɛ pɑ tɑ sɛkɩ iyisi nɑsǝtoso (600.000). Nɑ ń mɑɣɑsǝɣɩ sɩ n kɑ́ cɛlɑ-wɛɣɛ nɑntʋ kɛ ɩsɔtʋ nɑ? 22 Pɑɑ tǝ kʋwɑ tɑ nɑɑŋ, nɑ tɑ heeŋ, nɑ tɑ pǝ́ŋ tǝnɑ. Yɑɑ tǝ kpɑwɑ teŋku tɑɑ tiinɑ tǝnɑ pɩɩ hɑŋǝɣǝnɑ-wɛ.

23 Ntɛnɑ Tɑcɑɑ sɩ: Mɑ tomɑ tɑ tɔɔ? N kɑ́ nɑnɑ nyɑ́ ɩsǝpǝle kɛ nɔɔnɔɔ sɩ, pɩɩ lɑ mpʋ yɑɑ pǝ kɑɑ lɑ?

24 Ḿpʋ́ɣʋ́ Moisi lɩɩwɑ nɑ ɩ́ tɛlǝsɩ Ɩsɛɣɛlɩ sɑmɑɑ kɛ Tɑcɑɑ kʋyɔɣɔtʋtʋ. Pǝ wɑɑlɩ kɛ́ ɩ kotɑ Ɩsɛɣɛlɩ nyʋɣʋ nyǝ́mɑ nɩɩtoso nɑ nɑɑnʋwɑ, nɑ ɩ́ pɩɩlɩ-wɛ nɑ ɩ cɔɔnɑ Ɩsɔ cokǝle. 25 Ɩlɛnɑ Tɑcɑɑ tii ɩsɔŋmʋntʋɣʋ tɑɑ, nɑ ɩ́ yɔɣɔtǝnɑ Moisi, nɑ ɩ́ tʋ́ nyʋɣʋ nyǝ́mɑ mpɛ pɑ tɑɑ kɛ́ Moisi lǝmɑɣɑsǝlɛ. Nɑ pɑ́ sʋʋ yɔɣɔtʋɣʋ ɩsɩɩ Ɩsɔ kʋyɔɣɔtʋtʋ tɛlǝsǝlɑɑ. Ɩlɛ pǝ tɑ leeli kɛ́.

26 Amɑ nyʋɣʋ nyǝ́mɑ mpɛ pɑ tɑɑ nɑɑlɛ, Ɩlǝtɑ nɑ Metɑ pɑ tɑ polo Ɩsɔ cokǝle kiŋ. Amɑ tǝsikile tɑɑ kɛ́ pɑ sɑɑlɑɑ. Nɑ Ɩsɔ tʋ́ ɩ lǝmɑɣɑsǝlɛ kɛ pɑ tɑɑ nɑ pɑ́ yɔɣɔtǝɣɩ, ɩsɩɩ Ɩsɔ kʋyɔɣɔtʋtʋ tɛlǝsǝlɑɑ. 27 Ntɛnɑ ɩfepu nɔɣɔlʋ ɩ́ kpɑɣɑ ɑsewɑ nɑ ɩ́ polo ɩ́ heeli Moisi kɛ nti Ɩlǝtɑ nɑ Metɑ pɑ lɑkɩ tɔ.

28 Mpʋɣʋlɛ Nuŋ pǝyɑlʋ Yosuwee wei ɩ lɑkɑɣɑ Moisi tǝmlɛ kɛ tuu ɩ pǝcɑɑtʋ tɔ, ɩ tɔmɑ sɩ: Mɑ cɛ heeli-wɛ sɩ pɑ́ su.

29 Ntɛnɑ Moisi sɩ: N lɑkɩ-m ɩsɛsɛɛmlɛ kɛ́? Hɑlɩ pǝ cɑɣɑ mɑɣɑ ɩsɩɩ Tɑcɑɑ ɩ́ tʋ́ ɩ lǝmɑɣɑsǝlɛ kɛ Ɩsɛɣɛlɩ nyǝ́mɑ tǝnɑ tɑɑ, nɑ pɑ́ lɑ Ɩsɔ kʋyɔɣɔtʋtʋ tɛlǝsǝlɑɑ.

30 Ɩlɛnɑ Moisi nɑ Ɩsɛɣɛlɩ nyʋɣʋ nyǝ́mɑ mpɛ pɑ́ mǝlɩ tǝsikile.

31 Ḿpʋ́ɣʋ́ Tɑcɑɑ kʋsɑ heelimuɣu nɑ teŋku tɔɔ. Nɑ pǝ́ kɔnɑ lɛɛsɩ tuutuumɑ kɛ tǝsikile hɔɣɔlʋɣʋ, nɑ pǝ́ polo ɩsɩɩ kʋyɑkʋ kʋlʋmʋɣʋ tɔntɛ, nɑ pǝ́ cɔɔ tǝsikile. Nɑ sɩ́ kɑɑ huɣule ɩsɩɩ mɛɛtǝlɩ kʋlʋm. 32 Ntɛnɑ sɑmɑɑ kuu-sǝɣɩ kʋyɑkʋ ŋkʋ, nɑ pǝ ɑhoo nɑ pǝ tɛʋ kʋfemuɣu. Pɑɑ wei ɩ kɑ tɔɔsɑ pǝcɔ tɔ, pǝ lɩɩkɩ-ɩ kiloonɑɑ iyisi iyisi kɛ́. Ḿpʋ́ɣʋ́ pɑ lemɑ-sǝɣɩ ilim nɑ pǝ cɔɔnɑ tǝsikile. 33 Amɑ Tɑcɑɑ mʋ pɑ́ɑ́nɑ́ nɑ ɩ́ kʋ́ Ɩsɛɣɛlɩ nyǝ́mɑ kɛ ɩsɑɣɑkʋɣʋ, kɛ wɑɑtʋ wei pɑ suukɑɣɑ nɑntʋ kɛ pɑ nɔɔsɩ tɑɑ tɔ. 34 Ntɛnɑ pɑ́ hɑ lonte ntɛɣɛ hǝtɛ sɩ Kipǝloti-Tɑɑfɑ. Pǝ hʋwɛɛ ntɛ́ sɩ luluɣu pǝlɑɑʋ nɑ pɑ tɛ tɑɑ. Mpi tɔ, tǝnɑɣɑ pɑ pimɑ yǝlɑɑ mpɑ luluɣu kʋwɑ tɔ.

35 Ɩsɛɣɛlɩ nyǝ́mɑ lɩɩ Kipǝloti-Tɑɑfɑ ɩlɛnɑ pɑ́ tɛɛ Hɑselɔtɩ nɑ pɑ́ siki.