1 Ḿpʋ́ɣʋ́ Tɑcɑɑ tɔmɑ Moisi sɩ: 2 Tɛlǝsɩ Alɔŋ pǝyɑlʋ kɔtʋlʋ Ɩlɑsɑɑ sɩ, lǝsɩ cofolonɑɑ kɛ kɔkɔ tɑɑ nɑ ń yɑsɩ mɑmɑlɑ. Pɑ kɛ́ mɑ nyǝm kɛ́. 3 Cofolonɑɑ mpɛ pɑ kɛ́ Ɩsɔ nyǝ́mɑ kɛ́. Mpi tɔ, pɑ tɛmɑ-m-wɛɣɛ kɔtɑɣɑ lɑpǝnɑʋ. Amɑ mpɑ pɑ tɩ-wɛ tɔ pɑ sǝpɑ pɑ ɩsɑɣɑtʋ tɔɔ. Pǝ tɔɔ tɔ, pǝ wɛɛ sɩ pɑ́ hɛɛ-wɛ nɑ pɑ́ wɑɑsɩ kɔtɑɣɑ tǝlɑtɛ tɔɔ. Ɩlɛnɑ pɑ́ pǝsɩ Ɩsɛɣɛlɩ nyǝ́mɑ kɛ pʋlʋ kʋyʋsʋm.

4 Ḿpʋ́ɣʋ́ kɔtʋlʋ Ɩlɑsɑɑ kpɑɣɑ yǝlɑɑ mpɑ kɔkɔ nyɑɣɑ mpʋ tɔ, pɑ nyǝɣǝlʋɣʋ kʋsɛɛmʋɣʋ cofolonɑɑ. Nɑ ɩ́ lu-wɛ nɑ ɩ́ wɑɑsɩ kɔtɑɣɑ tǝlɑtɛ. 5 Mpʋ pǝ hʋlǝɣǝnɑ Ɩsɛɣɛlɩ nyǝ́mɑ sɩ, Alɔŋ lʋlʋɣʋ nyǝmɑ pɑɑsi kpɑɩ tʋ nɔɣɔlʋ ɩ fɛɩnɑ mpɑɑʋ sɩ ɩ́ tɑsɑ Tɑcɑɑ kɛ tulɑɑlʋ wɔpʋ. Ye wei ɩ́ lɑpɑ mpʋ, sǝm mpi Kolee nɑ ɩ wɑɑlɩ nyǝ́mɑ pɑ sǝpɑ tɔ, mpɩ pɩɩ kʋnɑ-ɩ. Ɩsɩɩ Tɑcɑɑ kɑ kpɑɑlʋɣʋ Alɔŋ nɑ Moisi nɔɣɔ tɔ.

6 Tɛʋ femɑ ɩlɛnɑ Ɩsɛɣɛlɩ nyǝ́mɑ tǝnɑ nɑɑlɩ Alɔŋ nɑ Moisi kɛ cɑɣɑnɑʋ sɩ: Ɩ́ kʋwɑ Tɑcɑɑ yǝlɑɑ.

7 Ḿpʋ́ɣʋ́ sɑmɑɑ kotinɑ Moisi nɑ Alɔŋ. Sɑɑ wei pɑ nyǝnnɑ Ɩsɔ cokǝle tɔɔ, ɩlɛnɑ pɑ́ nɑ́ nyɔɔsɩ nyɑlɑ timpi Tɑcɑɑ teeli nɑɑkɩ tɔ. 8 Ɩlɛnɑ Moisi nɑ Alɔŋ pɑ́ polo tǝ ɩsɛntɑɑ. 9 Ɩlɛnɑ Tɑcɑɑ tɔ Moisi sɩ: 10 Hɑtǝlǝnɑ yǝlɑɑ mpɛ, nɑ mɑ́ kpiisi-wɛɣɛ tɔm kʋlʋm. Tǝnɑɣɑ Moisi nɑ Alɔŋ pɑ hotɑ pɑ ɩsɛntɔɔ. 11 Nɑ Moisi tɔ ɩ tɑɑlʋ sɩ: Polo tǝcɑʋ nɑ ń kpɑɣɑ nyɑ́ cofolo nɑ ń hee kɔtɑɣɑ tǝlɑtɛ tɔɔ kɔkɔ. Tʋ́ tulɑɑlʋ kɛ́ pǝ tɔɔ, nɑ ń lɑ sɑmɑɑ kɛ ɩsɑɣɑtʋ hɩɩsʋɣʋ kɔtɑɣɑ. Mpi tɔ, Tɑcɑɑ mʋ pɑ́ɑ́nɑ́ kɛ́ hɑlɩ ɩ tɛmɑ niŋ tʋɣʋ.

12 Ḿpʋ́ɣʋ́ Alɔŋ kpɑɣɑ cofolo, ɩsɩɩ Moisi heeluɣu-ɩ tɔ. Ɩlɛnɑ ɩ́ cɔɔ sɑmɑɑ tɑɑ, nɑ ɩ́ nɑ́ sɩ pɑ tɔŋnɑ sǝpʋ. Ɩlɛnɑ ɩ́ wɔ tulɑɑlʋ, nɑ ɩ́ lɑ-wɛɣɛ ɩsɑɣɑtʋ hɩɩsʋɣʋ kɔtɑɣɑ. 13 Ḿpʋ́ɣʋ́ ɩ sǝŋɑ mpɑ pɑ tɛmɑ sǝpʋ tɔ, nɑ ɩsɛ nyǝ́mɑ pɑ hɛkʋ tɑɑ. Ɩlɛnɑ sǝm hɛɛ. 14 Kolee wɑɑlɩ nyǝ́mɑ mpɑ pɑ sǝpɑ lɔŋ tɔ pɑ pɑɑsi yǝlɑɑ iyisi nɑɑnʋwɑ nɑ liɣiti nɑ nɑsǝtoso nɑ nɩɩnʋwɑ (14.700) sǝpǝnɑ tɔtɔ. 15 Ntɛnɑ Alɔŋ mǝlɩ Moisi kiŋ kɛ Ɩsɔ cokǝle nɔnɔɣɔ kɛ sɑɑ wei sǝm hɛɛwɑ tɔ.

16 Ḿpʋ́ɣʋ́ Tɑcɑɑ tɔmɑ Moisi sɩ: 17 Heeli Ɩsɛɣɛlɩ kpekɑ nyɔɔŋ nyǝ́mɑ sɩ pɑɑ wei ɩ́ kɔnɑ kpɑ́tʋ́ɣʋ́. Pǝ kpɛntǝɣɩ kpɑtǝŋ nɑɑnʋwɑ nɑ nɑɑlɛ kɛlɛ. Ɩlɛnɑ ɩ́ ŋmɑɑ pɑɑ mpɑ pɑ kpekǝle hǝtɛ kɛ pɑ nyǝŋkʋ tɔɔ. 18 Amɑ Alɔŋ hǝtɛ kɛ ɩ́ kɑ́ ŋmɑɑ Lefii nyǝ́mɑ nyǝŋkʋ tɔɔ. Ɩlɛnɑ pɑɑ kpekǝle tʋ wei ɩ́ wɛɛnɑ ɩ nyǝŋkʋ. 19 Ɩlɛnɑ Tɑcɑɑ sɩ: Moisi sɩɩ kpɑtǝŋ ɩnǝɣɩ Ɩsɔ cokǝle tɑɑ kɛ́ ɑtɑkɑɑ kiŋ, kɛ timpi mɑ́ nɑ-mɛ tǝ suliɣi tɔ. 20 Nɑ mɑ́ lǝsɑ wei, ɩ́lɛ́ ɩ kpɑ́tʋ́ɣʋ́ nɛɣɛtǝɣǝnɑ ntɛ́. Ɩlɛnɑ mɑ́ sɩɩ tǝnɑɣɑ kɛ kʋntǝnɑʋ mpi Ɩsɛɣɛlɩ nyǝ́mɑ kʋntǝɣǝnɑ-mɛ tɔ.

21 Mpʋɣʋlɛ Moisi tɛlǝsɑ Ɩsɛɣɛlɩ nyǝ́mɑ kɛ tɔm ntɩ. Nɑ kpekɑ nyɔɔŋ nyǝ́mɑ kɔnɑ-ɩ pɑ kpɑtǝŋ nɑ Alɔŋ nyǝŋkʋ kɑ wɛ hɛkʋ tɑɑ. Ɩlɛnɑ pǝ́ lɩɩ kpɑtǝŋ nɑɑnʋwɑ nɑ nɑɑlɛ. 22 Ɩlɛnɑ Moisi sɩɩ kpɑtǝŋ ɩnǝɣɩ Ɩsɔ cokǝle tɑɑ kɛ́ ɑtɑkɑɑ ɩsɛntɑɑ. 23 Tɛʋ femɑ, nɑ Moisi sʋʋ tǝ tɑɑ, ɩlɛ ɩ mɑɣɑnɑ Lefii kpekǝle tʋ Alɔŋ kpɑ́tʋ́ɣʋ́ nɛɣɛtɑɑ kɛlɛ. Nɑ kʋ́ tʋ́ hɛtʋ. Hɑlǝnɑ kʋ́ lʋlɩ pee nɑ ɑ́ pɩɩwɑ. 24 Ḿpʋ́ɣʋ́ Moisi kuu kpɑtǝŋ tǝnɑ, nɑ ɩ́ ponɑ Ɩsɛɣɛlɩ nyǝ́mɑ nɑ pɑɑ wei ɩ́ nɑ. Ɩlɛnɑ pɑɑ nyʋɣʋ tʋ wei ɩ́ kpɑɣɑ ɩ nyǝŋkʋ. 25 Ntɛnɑ Tɑcɑɑ tɑsɑ Moisi kɛ heeluɣu sɩ: Polo ń sɩɩ Alɔŋ kpɑ́tʋ́ɣʋ́ kɛ ɑtɑkɑɑ kiŋ, nɑ pǝ́ tɔɔsɩ Ɩsɛɣɛlɩ nyǝ́mɑ kɛ pɑ kɑɑnɩɩtʋ. Ɩlɛnɑ pɑ kʋntʋɣʋ sɩɩ tǝnɑɣɑ. Ɩlɛ pɑ kɑɑ tɑsɑ sǝm. 26 Ḿpʋ́ɣʋ́ Moisi lɑpɑ teitei kɛ́ mpʋ.

27 Ḿpʋ́ɣʋ́ Ɩsɛɣɛlɩ nyǝ́mɑ tɔmɑ Moisi sɩ: Nyǝnɩ ɩsǝnɑ tɑ tǝnɑ tǝ sǝkɩ nɑ tǝ́ tɛŋ tɔ. 28 Tɑ́ tɑɑ wei ɩ́ kpǝtǝnɑ Ɩsɔ tǝcɑɣɑlɛ, ɩ́lɛ́ ɩ sɩ. Tɑ́ tǝnɑ tɩɩ sǝnɑ ntɛ́?