1 Ḿpʋ́ɣʋ́ Ɩsɛɣɛlɩ nyǝ́mɑ tɛɛwɑ nɑ pɑ́ siki Yɑɑtɑnɩ kʋtɛsʋɣʋ tɔɔ kɛ́ Mowɑpʋ tɛtɛkǝlɛ tɑɑ kɛ́ Yeliko ɩsɛntɑɑ.

2-4 Tǝnɑɣɑ Sipɔɔ pǝyɑlʋ Pɑlɑkɩ wei ɩ tɔkɑɣɑ kɑwulɑɣɑ kɛ Mowɑpʋ kɛ wɑɑtʋ ɩnɩ tɔ, ɩ nɩɩwɑ ɩsǝnɑ Ɩsɛɣɛlɩ nyǝ́mɑ lɑpɑ Amolii nyǝ́mɑ tɔ. Ɩlɛnɑ sɔɣɔntʋ kpɑ ɩ́ nɑ ɩ sɑmɑɑ nɑ pɑ́ seliɣi sɩ, Ɩsɛɣɛlɩ nyǝ́mɑ kǝlɑ pɑɣɑlɛ. Mpʋɣʋlɛ Mowɑpʋ nyǝ́mɑ tɔmɑ Mɑtiyɑŋ nyǝ́mɑ kʋpɑɣɑlɑɑ sɩ: Ɩsɛɣɛlɩ nyǝ́mɑ cɑɑ pǝ tǝnɑɣɑ kpiisuɣu kɛ́, nɑ pɑ́ cɔɔnɑ-mɛ, ɩsɩɩ nɑɑŋ kuntuɣu nyɩɩtʋ tɔ.

5 Ɩlɛnɑ wulɑʋ tili ɩ yǝlɑɑ kɛ Peyɔɔ pǝyɑlʋ Pɑlɑɑm wei ɩ kɑ wɛ Petɔɔ kɛ Ɩfǝlɑtɩ pɔɣɔ tɔɔ tɔ ɩ kiŋ sɩ, pɑ́ heeli-ɩ sɩ: Yǝlɑɑ nɑpǝlɩ pɑ lɩɩnɑ Icipiti nɑ pɑ́ kɔɔ nɑ pɑ́ wɑɑsɩ mɑ tɛtʋ tɔɔ. 6 Hɑɩ, kɔɔ nɑ ń tǝŋsɩ-wɛɣɛ mpusi. Pɑ kǝlɑ-m toŋ. Ntɑnyɩ n kɑ́ pǝsɩ nɑ ń tɔɣɔnɩ-wɛɣɛ mɑ tɛtʋ tɑɑ. Mpi tɔ, mɑ nyǝmɑ sɩ, ye n tǝŋsɑ yʋlʋ kɛ mpusi, yɑɑ n koolɑ-ɩ kʋpɑntʋ, pǝ lɑkɩ kɛ́. 7 Ḿpʋ́ɣʋ́ Mowɑpʋ nɑ Mɑtiyɑŋ kʋpɑɣɑlɑɑ kpɛnnɑ mpi pɑɑ fɛlɩ pee nɑlʋ Pɑlɑɑm tɔ. Nɑ pɑ́ polo ɩ tɛ nɑ pɑ́ heeli-ɩ Pɑlɑkɩ kʋsǝlǝmʋtʋ. 8 Ntɛnɑ Pɑlɑɑm sɩ: Ɩ́ sʋʋ mɑ tɛ, nɑ kʋ femɑ, ɩlɛ mɑ tɛlǝsɩ-mɛɣɛ nti Tɑcɑɑ heelɑ-m tɔ. 9 Ɩlɛnɑ Tɑcɑɑ pɔɔsɩ-ɩ sɩ: Mʋʋlɑɑ mpɑ pɑ wɛnnɑ nyɑ́ tɛ? 10 Ntɛnɑ Pɑlɑɑm cɔ-ɩ sɩ: Mowɑpʋ wulɑʋ Pɑlɑkɩ tilinɑ yǝlɑɑ sɩ pɑ́ heeli-m sɩ 11 nɑpǝlɩ pɑ lɩɩnɑ Icipiti nɑ pɑ́ wɑtɩ-m. Ɩlɛ kɔɔ nɑ ń tǝŋsɩ-wɛɣɛ mpusi, nɑ mɑ pǝsɩ-wɛ nɑ mɑ́ tɔɣɔnɩ-wɛ. 12 Mpʋɣʋlɛ Ɩsɔ tɔmɑ Pɑlɑɑm sɩ: Tɑɑ tǝŋ-wɛ sɩ n tǝŋsǝɣɩ Ɩsɛɣɛlɩ nyǝ́mɑ kɛ mpusi yoo. Mpi tɔ, mɑ tɛmɑ-wɛɣɛ kʋpɑntʋ kooluɣu.

13 Tɛʋ femɑ ɩlɛnɑ Pɑlɑɑm tɔ Pɑlɑkɩ tillɑɑ sɩ: Ɩ́ kpe mǝ tɛ. Tɑcɑɑ kisɑɑ sɩ mɑ́ tɑɑ tǝŋ-mɛ.

14 Ɩlɛnɑ Mowɑpʋ kʋpɑɣɑlɑɑ mpɛ pɑ́ mǝlɩ nɑ pɑ́ heeli Pɑlɑkɩ sɩ: Pɑlɑɑm kisɑ-tʋɣʋ tǝŋʋɣʋ. 15 Ḿpʋ́ɣʋ́ Pɑlɑkɩ kʋsɑ tillɑɑ kʋfɑmɑ nɑ pɑ tɑɑ kɛ́ ɩ wɑɑlɩ nyǝ́mɑ. Pɛlɛ pɑ kǝlɑ kɑncɑɑlɑɣɑ nyǝ́mɑ kɛ pɑɣɑlɛ nɑ sɔsɔɔntʋ. 16 Nɑ pɑ́ polo pɑ heeli Pɑlɑɑm sɩ wulɑʋ tɔmɑ sɩ: Mɑ kpɑ nyɑ́ yule. Pɑɑ pǝ cɑɑlɑ-ŋ ɩsǝnɑ, polo nɑ nyɑnɑ-ɩ ɩ́ nɑ́. 17 Pǝyele ye n tǝŋsɑ mpɛ ɩnǝɣɩ mpusi, mɑɑ kʋsɩ nyɑ́ nyʋɣʋ nɑ mɑ́ hɑ-ŋ pǝ tǝnɑ mpi n sɔɔlɑɑ tɔ.

18 Ntɛnɑ Pɑlɑɑm cɔ tillɑɑ mpɛ sɩ: Pɑɑ ɩ kɑ́ hɑ-m ɩ liɣitee nɑ pǝ wʋlɑnɑɑ tǝnɑ, pǝ fɛɩ sɩ mɑ́ lɩɩ hǝm, nɑ mɑ́ pǝntǝnɑ mɑ Ɩsɔ Tɑcɑɑ. 19 Ɩlɛ pɑɑ nɑ mpʋ, ɩ́ sʋʋ cǝnɛɣɛ ɑhoo ɑnɛ nɑ mɑ́ nɑ́ nti Ɩsɔ kɑ́ tɑsɑ-m heeluɣu tɔ. 20 Ḿpʋ́ɣʋ́ Tɑcɑɑ tɔmɑ Pɑlɑɑm kɛ ɑhoo tɑɑ sɩ: Ntɔŋ nyɑ́ wɑɑlɩ kɛ́ yǝlɑɑ mpɛ pɑ kɔmɑ? Tǝŋ-wɛ, ɩlɛ nti mɑɑ hʋlɩ-ŋ tɔ, tǝ tike kɛ n kɑ́ lɑ.

21 Tɛʋ femɑ tɑnɑŋ, ɩlɛnɑ Pɑlɑɑm kpɛɛlɩ ɩ kpɑŋɑɣɑ nɑ ɩ́ tǝŋ Mowɑpʋ nyǝ́mɑ.

22 Tɛʋ femɑ tɑnɑŋ, ɩlɛnɑ Pɑlɑɑm kpɛɛlɩ ɩ kpɑŋɑɣɑ ɑlʋnyǝŋkɑ. Nɑ ɩ tǝmlɛ nyǝ́mɑ kɛ nɑɑlɛ, nɑ pɑ́ tǝŋ Mowɑpʋ nyǝ́mɑ. Amɑ Tɑcɑɑ mʋ pɑ́ɑ́nɑ́ nɑ ɩ tɛɛʋ mpɩ. Ɩlɛnɑ ɩsɔtɑɑ tillu tɑŋɩ-ɩ mpɑɑʋ tɑɑ. 23 Kpɑŋɑɣɑ nɑwɑ ɩsɔtɑɑ tillu kɛ mpɑɑʋ hɛkʋ tɑɑ nɑ ɩ́ kpɛɛwɑ ɩ lɑɣɑtɛ nɑ ɩ́ tɔkɑ ɩ niŋ tɑɑ, ɩlɛnɑ kɑ́ hɛlɩ. Nɑ Pɑlɑɑm mɑ-kɛ nɑ ɩ́ mǝlǝnɑ mpɑɑʋ tɑɑ. 24 Ḿpʋ́ɣʋ́ ɩsɔtɑɑ tillu tuusɑ lɔlɔ, nɑ ɩ́ sǝŋ mpɑɑʋ tɑɑ kɛ́ lɛsɛŋ tɑwɑ koloosi hɛkʋ. 25 Kpɑŋɑɣɑ nɑ-ɩ ɩlɛnɑ kɑ́ tiili kɑ tɩ nɑ koluŋɑ nɑ pǝ́ kʋ́ Pɑlɑɑm nɔɔhǝlɛ. Ɩlɛnɑ ɩ́ sʋʋ-kɛɣɛ mɑpʋ. 26 Ḿpʋ́ɣʋ́ ɩsɔtɑɑ tillu tɑsɑ pote nɑ ɩ́ sǝŋ timpi koloosi kpɩɩlɑ teu nɑ pǝ́ fɛɩ hɛlʋɣʋ nɑ ntɔɣɔŋ yɑɑ mpǝtǝŋ tɔ. 27 Kpɑŋɑɣɑ nɑ-ɩ, ɩlɛnɑ kɑ́ hǝntɩ. Tǝnɑɣɑ pɑ́ɑ́nɑ́ kpɑ Pɑlɑɑm nɑ ɩ́ hɔɔkɩ-kɛɣɛ kpɑ́tʋ́ɣʋ́. 28 Mpʋɣʋlɛ Tɑcɑɑ kulɑ kpɑŋɑɣɑ nɔɣɔ nɑ kɑ́ tɔ́ Pɑlɑɑm sɩ: Pepeɣe mɑ lɑpɑ-ŋ nɑ ń mɑ-m hɑlɩ tɔm tooso tǝnɑ? 29 Ntɛnɑ Pɑlɑɑm cɔ sɩ: N nyǝnɑ-m yem kɛ́ te. Ye mɑɑ tɔkɑ lɑɣɑtɛ ɩsǝntɔ mɑɑ tɛmɑ-ŋ kʋɣʋ kɛ kpɑkpɑɑ. 30 Kɛlɛnɑ kpɑŋɑɣɑ sɩ: Anɩ mɑ kɛ́ nyɑ́ kpɑŋɑɣɑ kɛ́, nɑ ń cɑkɩ-m tɑm. Too tɔ, mɑ tɛmɑ-ŋ ḿpʋ́ɣʋ́ lɑpʋ nɑ? Pɑɑlɑm sɩ: Aɑɩ yoo.

31 Ḿpʋ́ɣʋ́ Tɑcɑɑ kulɑ Pɑlɑɑm ɩsɛ nɑ ɩ́ nɑ́ ɩsɔtɑɑ tillu sǝŋɑ mpɑɑʋ hɛkʋ tɑɑ, nɑ ɩ lɑɣɑtɛ kɛ ɩ niŋ tɑɑ. Tǝnɑɣɑlɛ ɩ hotɑ ɩ lotu tɔɔ kɛ́ ɑtɛ. 32 Ntɛnɑ ɩsɔtɑɑ tillu pɔɔsɩ-ɩ sɩ: N mɑpɑ nyɑ́ kpɑŋɑɣɑ kɛ tɔm tooso suwe? Mɑ kɔmɑɣɑ sɩ mɑ kɑkɩ-ŋ mpɑɑʋ. Mpi tɔ, mɑ nyǝmɑ́ sɩ n puki tǝlete kɛ́. 33 Amɑ nyɑ́ kpɑŋɑɣɑ nɑ-m nɑ kɑ́ hɛlɩ-m tɔm tooso. Ye pǝ tɑɣɑ mpʋ mɑɑ kʋ-ŋ nɑ mɑ yele-kɛ nɑ kɑ weesuɣu. 34 Ḿpʋ́ɣʋ́ Pɑlɑɑm tɔmɑ ɩsɔtɑɑ tillu sɩ: Mɑ tɑɑ nyɩ sɩ n tɑŋɑ-m mpɑɑʋ tɑɑ sɩ mɑ́ tɑɑ polo. Mɑ tɔm sǝpɑ. Ye nyɑ́ lɑŋlɛ tɑ hɛɛnɑ mɑ pote ńtɛ́ mɑ mǝlǝɣɩ nɔɔnɔɔ. 35 Ɩlɛnɑ ɩsɔtɑɑ tillu sɩ: Tǝŋ-wɛ. Amɑ nti mɑ heeliɣi-ŋ tɔ, tǝ tike kɛ ń kɑ́ yɔɣɔtɩ. Ntɛnɑ Pɑlɑɑm tǝŋ tillɑɑ mpɛ.

36 Wɑɑtʋ wei Pɑlɑkɩ nɩɩwɑ Pɑlɑɑm kɔntɛ ɩlɛnɑ ɩ́ polo ɩ sǝŋʋɣʋ kɛ Mowɑpʋ ɩcɑtɛ nte tǝ wɛ tɛtʋ toŋɑ kɛ Alǝnɔŋ lɔɔʋ nɔɣɔ tɔ. 37 Nɑ Pɑlɑkɩ pɔɔsɩ-ɩ sɩ: Pepe tɔɔ kɛ́ n tɑ kɔɔ kpɑkpɑɑ kɛ wɑɑtʋ wei mɑ tilɑ tɔm kɑncɑɑlɑɣɑ nyǝm tɔ? Yɑɑ n hʋʋkɩ sɩ mɑ kpisiɣi nyɑ́ nyʋɣʋ kʋsʋɣʋ? 38 Ḿpʋ́ɣʋ́ Pɑlɑɑm cɔwɑ sɩ: Tɔʋ pǝnɛntɛ mɑ kɔmɑ yɑɑ. Amɑ mɑɑ lɑkɩ mɑ luɣu nyǝntʋ kɛ́. Nti Ɩsɔ kɑ́ tʋ-m tɔ tǝ tike kɛ mɑɑ yɔɣɔtɩ.

39 Ḿpʋ́ɣʋ́ pɑ nɑɑlɛ pɑ polɑ Kiliyɑtɩ-Husoti. 40 Nɑ Pɑlɑkɩ lɑɑ nɑɑŋ nɑ heeŋ nɑ ɩ́ hɑ ɩ wɑɑlɩ nyǝ́mɑ nɑ Pɑlɑɑm.

41 Tɛʋ femɑ ɩlɛnɑ Pɑlɑkɩ nɑ Pɑlɑɑm pɑ́ kpɑ Pɑmɔtɩ-Pɑɑlɩ timpi pǝ loosiɣi ɩsɛɣɛlɩ tǝsikile hɔɣɔlʋɣʋ tɔ.