1 Wɑɑtʋ wei Moisi nɑ Alɔŋ pɑ lǝsɑ Ɩsɛɣɛlɩ nyǝ́mɑ kɛ cɑɑsɩ cɑɑsɩ tɔ, ɩsǝnɑ pɑ tɔmɑ tɔɣɔlɔ: 2 Tɑcɑɑ kɑ heelɑ Moisi kɛ́ sɩ ŋmɑɑ timpi timpi ɩ́ sǝŋɑɑ tɔ, hɑlɩ lonɑ ɑnɩ ɑ hǝlɑ ntɔ.

3 Pǝnɑɣɑ ɩsɔtʋ kɑncɑɑlɑɣɑ nyǝŋ kʋyɑkʋ nɑɑnʋwɑ nɑ kɑkpɑsɩ wule, kɛ Ɩsɛɣɛlɩ nyǝ́mɑ kʋlɑ Tɛɛʋ ɑcimɑ tɛʋ kʋfemuɣu kɛ Lɑmsɛsɩ nɑ pɑ́ tɛɛkɩ Icipiti nyǝ́mɑ ɩsɛntɑɑ tǝkɑɑ sɩ, pǝ cɛpɑ-wɛ. 4 Nɑ pɛlɛ pɑ́ tɔŋɑ pɑ kɑncɑɑlɑɣɑ piyɑ mpɑ Tɑcɑɑ kʋwɑ tɔɣɔ pim. Ɩ lɑpɑ ḿpʋ́ɣʋ́ sɩ pɑ nyɩ sɩ ɩ kǝlɑ pɑ tɩɩŋ kɛ toŋ. 5 Pɑ kʋlɑ Lɑmsɛsɩ, ɩlɛnɑ pɑ́ siki Sukɔtɩ. 6 Pɑ kʋlɑ Sukɔtɩ, ɩlɛnɑ pɑ́ siki Ɩtɑm kɛ wʋlɑɣɑ tɛtʋ nɔɣɔ tɔɔ. 7 Pɑ kʋlɑ Ɩtɑm, ɩlɛnɑ pɑ́ polo Pi-Hɑhilotɩ kɛ Pɑɑlɩ-Sɛfʋŋ ɩsɛntɑɑ, nɑ pɑ́ siki Mikitɔɔlɩ pǝtɛɛ. 8 Pɑ kʋlɑ Mikitɔɔlɩ, ɩlɛnɑ pɑ́ tɛsɩ teŋku nɑ pɑ́ sʋʋ wʋlɑɣɑ tɛtʋ nɑ pɑ́ tɔ́ kʋyɛɛŋ toosoɣo Ɩtɑm wʋlɑɣɑ tɛtʋ tɑɑ, nɑ pɑ́ tɑlɑ Mɑlɑ. 9 Mɑlɑ kɛ pɑ kʋlɑɑ, nɑ pɑ́ polo Iliim, timpi hilɑ nɑɑnʋwɑ nɑ nɑɑlɛ, nɑ pɑɑŋ nɩɩtoso nɑ nɑɑnʋwɑ kɑ wɛɛ tɔ nɑ pɑ́ siki. 10 Pɑ kʋlɑ Iliim, ɩlɛnɑ pɑ́ siki teŋku kʋsɛɛm nɔɣɔ. 11 Pɑ kʋlɑ teŋku nɔɣɔ, ɩlɛnɑ pɑ́ siki Siŋ wʋlɑɣɑ tɛtʋ tɑɑ. 12 Pɑ kʋlɑ wʋlɑɣɑ tɛtʋ tɑɑ, ɩlɛnɑ pɑ́ siki Tɔfǝkɑ. 13 Pɑ kʋlɑ Tɔfǝkɑ, ɩlɛnɑ pɑ siki Alusi. 14 Pɑ kʋlɑ Alusi, ɩlɛnɑ pɑ́ siki Lefitim timpi pɑ lɑŋɑ lʋm kʋnyɔnyɔɔm tɔ.

15 Pɑ kʋlɑ Lefitim, ɩlɛnɑ pɑ́ siki Holɛpʋ wʋlɑɣɑ tɛtʋ tɑɑ. 16 Pɑ kʋlɑ Holɛpʋ, ɩlɛnɑ pɑ́ siki Kipǝloti-Tɑɑfɑ. 17 Pɑ kʋlɑ Kipǝloti-Tɑɑfɑ, ɩlɛnɑ pɑ́ siki Hɑselɔtɩ. 18 Pɑ kʋlɑ Hɑselɔtɩ, ɩlɛnɑ pɑ́ siki Litimɑ. 19 Pɑ kʋlɑ Litimɑ, ɩlɛnɑ pɑ́ siki Limɔŋ-Pɛlɛsɩ. 20 Pɑ kʋlɑ Limɔŋ-Pɛlɛsɩ, ɩlɛnɑ pɑ́ siki Lipinɑ. 21 Pɑ kʋlɑ Lipinɑ, ɩlɛnɑ pɑ́ siki Lisɑ. 22 Pɑ kʋlɑ Lisɑ, ɩlɛnɑ pɑ́ siki Kehɑlɑtɑ. 23 Pɑ kʋlɑ Kehɑlɑtɑ, ɩlɛnɑ pɑ́ siki Sefɛɛ pʋɣʋ. 24 Pɑ kʋlɑ Sefɛɛ pʋɣʋ, ɩlɛnɑ pɑ́ siki Hɑlɑtɑ. 25 Pɑ kʋlɑ Hɑlɑtɑ, ɩlɛnɑ pɑ́ siki Mɑkelo. 26 Pɑ kʋlɑ Mɑkelo, ɩlɛnɑ pɑ́ siki Tɑhɑtɩ. 27 Pɑ kʋlɑ Tɑhɑtɩ, ɩlɛnɑ pɑ́ siki Telɑ. 28 Pɑ kʋlɑ Telɑ, ɩlɛnɑ pɑ́ siki Mitikɑ. 29 Pɑ kʋlɑ Mitikɑ, ɩlɛnɑ pɑ́ siki Hɑsemonɑ. 30 Pɑ kʋlɑ Hɑsemonɑ, ɩlɛnɑ pɑ́ siki Moseloti. 31 Pɑ kʋlɑ Moseloti, ɩlɛnɑ pɑ́ siki Pene-Yɑkɑŋ. 32 Pɑ kʋlɑ Pene-Yɑkɑŋ, ɩlɛnɑ pɑ́ siki Hoo-Kitǝkɑtɩ. 33 Pɑ kʋlɑ Hoo-Kitǝkɑtɩ, ɩlɛnɑ pɑ́ siki Yotǝpɑtɑ. 34 Pɑ kulɑ Yotǝpɑtɑ, ɩlɛnɑ pɑ́ siki Apǝlonɑ. 35 Pɑ kʋlɑ Apǝlonɑ, ɩlɛnɑ pɑ́ siki Ɩsiyoŋ-Kepɛɛ. 36 Pɑ kʋlɑ Ɩsiyoŋ-Kepɛɛ, ɩlɛnɑ pɑ́ siki Kɑtɛɛsɩ kɛ Siŋ wʋlɑɣɑ tɛtʋ tɑɑ. 37 Pɑ kʋlɑ Kɑtɛɛsɩ, ɩlɛnɑ pɑ́ siki Hoo pʋɣʋ, kɛ Ɩtɔm tɛtʋ toŋɑ tɔɔ.

38-39 Ḿpʋ́ɣʋ́ Tɑcɑɑ yelɑɑ nɑ kɔtʋlʋ Alɔŋ kpɑ Hoo pʋɣʋ tɑɑ. Ɩlɛnɑ ɩ́ sɩ́ tǝnɑɣɑ ɩsɔtʋ kɑkpɑsɩ nyǝŋ kʋyɑkʋ kɑncɑɑlɑɣɑ nyǝŋkʋ wule, kɛ ɩ pǝnɑɣɑ nɩɩnʋwɑ nɑ hiu nɑ tooso (123) nyǝŋkɑ tɑɑ. Pɑ Icipiti tɑɑ lɩɩʋ pǝnɑɣɑ nɩɩlɛ nyǝŋkɑ ntɛ́. 40 Wɑɑtʋ ɩnǝɣɩ Kɑnɑɑŋ wulɑʋ wei pɑ yɑɑ sɩ, Alɑ nɑ ɩ kɑ wɛ ilim tǝlɩɩlɛ mpǝtǝŋ tɔɔ tɔ, ɩ nɩɩwɑ Ɩsɛɣɛlɩ nyǝ́mɑ tɑtɛ.

41 Ɩsɛɣɛlɩ nyǝ́mɑ kʋlɑ Hoo pʋɣʋ ɩlɛnɑ pɑ́ siki Sɑlǝmonɑ. 42 Pɑ kʋlɑ Sɑlǝmonɑ, ɩlɛnɑ pɑ́ siki Punoŋ. 43 Pɑ kʋlɑ Punoŋ, ɩlɛnɑ pɑ́ siki Opoti. 44 Pɑ kʋlɑ Opoti, ɩlɛnɑ pɑ́ siki Ye-Apɑlim kɛ Mowɑpʋ toŋɑ tɔɔ. 45 Pɑ kʋlɑ Ye-Apɑlim, ɩlɛnɑ pɑ́ siki Tipoŋ-Kɑtɩ. 46 Pɑ kʋlɑ Tipoŋ-Kɑtɩ, ɩlɛnɑ pɑ́ siki Alǝmoŋ-Tipǝlɑtɑyim ɩsɛntɑɑ. 47 Pɑ kʋlɑ Alǝmoŋ-Tipǝlɑtɑyim, ɩlɛnɑ pɑ́ siki Apɑlim pulɑsɩ tɑɑ kɛ́ Nepo pʋɣʋ ɩsɛntɑɑ. 48 Pɑ kʋlɑ Apɑlim pulɑsɩ, ɩlɛnɑ pɑ́ siki Mowɑpʋ tɛtɛkɑ tɑɑ kɛ́ Yɑɑtɑnɩ kiŋ kɛ Yeliko ɩsɛntɑɑ. 49 Tǝnɑɣɑ pɑ sikɑ pɑ cokɑ kɛ Pɛtɩ-Yesimɔtɩ nɑ Apɛɛlɩ-Sitim pǝ hɛkʋ tɑɑ.

50 Ḿpʋ́ɣʋ́ Tɑcɑɑ tʋwɑ Moisi kɛ Mowɑpʋ tɛtɛkɑ tɑɑ kɛ́ Yɑɑtɑnɩ pɔɣɔ nɔɣɔ kɛ Yeliko ɩsɛntɑɑ sɩ: 51 Tɛlǝsɩ Ɩsɛɣɛlɩ nyǝ́mɑ sɩ ye ɩ́ tɛsɑ Yɑɑtɑnɩ nɑ ɩ́ sʋʋ Kɑnɑɑŋ nyǝ́mɑ tɛtʋ tɑɑ. 52 Pǝ wɛɛ sɩ ɩ́ tɔɣɔnɩ tɛtʋ nyǝ́mɑ tǝnɑ nɑ ɩ́ yɔkɩ pɛɛ yɑɑ nyǝɣǝtʋ lɛɛsǝŋ wei ɩ́ lɑɑkɩ tɔ, nɑ pǝ tǝkɔtǝlɛnɑɑ. 53 Nɑ ɩ́ lɛɛkɩ pɑ tɛtʋ ntɩ nɑ ɩ́ cɑɣɑ. Mpi tɔ, mɑ hɑ-mɛɣɛ tǝɣɩ. 54 Tɛtɛ kɛ́ ɩ́ kɑ́ tɔ nɑ ɩ́ tɑlǝnɑ tɛtʋ ntǝɣɩ mǝ kpekɑ nɑ mǝ lʋlʋŋ, nɑ ɩ́ kɛɛsǝnɑ mǝ pɑɣɑlɛ. 55 Pǝ wɛɛ sɩ ɩ́ tɔɣɔnɩ tɛtʋ nyǝ́mɑ tǝnɑɣɑ. Tɔfɔ kʋkɑɑsɑɑ mǝlǝɣɩ mǝ kolontunɑɑ kɛ́ nɑ pɑ́ nɑɑsǝɣɩ-mɛ, ɩsɩɩ sɔwɑ kɛ ɩsǝpee tɑɑ, nɑ nyǝmɑ́ tǝpilɑ kɛ mǝ kɔŋkɔmǝŋ tɑɑ. 56 Ɩlɛ mɛɣɛ mɑɑ lɑnɑ, ɩsɩɩ mɑɑ sɩɩʋ sɩ mɑɑ lɑ-mɛ tɔ.