1 Pǝlɛ pǝ wɑɑlɩ kɛ́ mɑ nɑ́ ɩsɔtɑɑ tillu lɛlʋ nɑ ɩ́ lɩɩnɑ ɩsɔtɑɑ nɑ ɩ́ tiiki. Ɩ wɛnɑ pǝsʋɣʋ kɛ sɔsɔm kɛ́, nɑ ɩ teu nɑwɑ ɩsɩɩ kɔkɔ nɑ pǝ́ cɔɔ tɛtʋ tǝnɑ. 2 Ḿpʋ́ɣʋ́ ɩ yɔɣɔtǝnɑ nɔɣɔ sɔsɑɣɑ sɩ: Ɩ tɩɩ hotɑɑ, Pɑpiloni sɔsɔ tɩɩ hotɑɑ. Pǝnɛntɛ ɩ pǝsɑ ɑlɔɣɑɑ tǝcɑɣɑlɛ, nɑ ɑlɔɣɑɑ nɔɣɔ nɑ pɑ sukɑ, nɑ tɛtʋ sumɑsɩ nsi pɑɑ cɑɑ tɔ sɩ nɔɣɔ nɑ sɩ sukɑ tǝcɑɣɑlɛ ntɛ́ tǝnɑ. 3 Pǝ tɑɣɑ pʋlʋ, ɩnɩ ɩ nyɔɔsǝnɑ piitimnɑɑ tǝnɑ yǝlɑɑ kɛ ɩ sʋlʋm, ɩ ɑsilimɑ sɔsɔɔnɑ ɑnɩ ɑ sʋlʋm. Nɑ ɩ kiŋ kɛ ɑtɛ ɑwulɑɑ sɔsɑɑ lɑkɑɣɑ pɑ ɑsilimɑ kʋlɑpʋtʋ. Nɑ ɑtɛ pɑɣɑtǝlɑɑ pilinɑ ɩ wontu kʋpɑntʋ nti tǝ fɛɩ nyǝɣǝsʋɣʋ tɔ.

4 Ḿpʋ́ɣʋ́ mɑ nɩɩ pǝ yɔɣɔtǝnɑ ɩsɔtɑɑ, ɩlɛ pǝ tɑɣɑ ɩsɔtɑɑ tillu ɩnɩ ɩ nɔɣɔ. Pǝ tɔmɑɣɑ sɩ: Mɑ yǝlɑɑ, ɩ́ se ɩ kiŋ, nɑ pǝ tɑɑ kɔɔ nɑ ɩ ɩsɑɣɑtʋ tɑɑnɑ-mɛ, nɑ pǝ́ kɔɔ nɑ pǝ́ nɑɑsǝɣɩ nɑ pǝ kpɛŋnɑ-mɛ. 5 Pǝ tɑɣɑ pʋlʋ tɔɔ, ɩ ɩsɑɣɑtʋ kɑɑwɑɣɑ nɑ pǝ́ kɑlǝsǝnɑ ɩsɔtɔnʋɣʋ, Ɩsɔ tɔɔsɑ ɩ lɑkɑsɩ ɩsɑɣɑsɩ tɔɔ. 6 Ɩ́ lɛɛtɩ-ɩ mpi ɩ kɑ lɑpɑ-mɛ tɔ. Ɩ́ fɛlɩ-ɩ ɩsǝnɑ mpi ɩ kɑ lɑpɑ tɔɣɔ tɔm nɑɑlɛ. Ɩ́ suuli ɩ kɔpʋ kɛ sʋlʋm mpi pǝ kǝlɑ mpi ɩ puukɑɣɑ-mɛ tɔɣɔ toŋ kɛ tɔm nɑɑlɛ. 7 Ɩ́ tʋ-ɩ wɑhɑlɑ nɑ kʋnyɔŋ nɑ pǝ́ tɑlɑ ɩsɩɩ ɩ kɑ tʋɣʋ ɩ tǝɣɩ teeli nɑ ɩ́ kɑɑ wontu kʋpɑntʋ kɛ ɩsǝnɑ mpi tɔ. Ɩ yɔɣɔtɑ ɩ tɑɑ sɩ: Mɑ cɑɣɑɑ tǝkɑ kɛ́ ɩsɩɩ wulɑʋ, mɑ tɑ nyɩ leelutu, mɑ kɑɑ nyɩ mpi pɑ yɑɑ sɩ kʋnyɔŋ tɔ. 8 Pǝ tɔɔ kɛ́ kʋnɑɑsǝm mpi pǝ sɩɩwɑ sɩ pɩɩ nɑɑsǝnɑ tɔ, kʋyɑkʋ kʋlʋmʋɣʋ kɛ pɩɩ tii pǝ tǝnɑɣɑ ɩ tɔɔ tǝkpili. Mpǝɣǝlɛ kʋtɔmǝŋ nɑ sǝm nɑ nyɔɣɔsɩ. Kɔkɔ kɑ́ nyɑɣɑ ɩ tǝnɑ tǝlukɑ. Pǝ tɑɣɑ pʋlʋ, Tɑcɑɑ Ɩsɔ wei ɩ lɑkǝnɑ-ɩ tɔm tɔ ɩ wɛ tomɑ kɛ́.

9 Ɩ kiŋ kɛ ɑtɛ ɑwulɑɑ sɔsɑɑ lɑkɑɣɑ pɑ ɑsilimɑ kʋlɑpʋtʋ nɑ pɑ́ nɩɩkɩ ɩ leleŋ. Pɑɑ tɛ nɑ pɑ́ nɑ́ kɔkɔ nyɑkɩ-ɩ nɑ nyɔɔsɩ nsi sɩ kʋlǝɣɩ tɔ, ɩlɛ pɑɑ tʋlɩ nɔɔsɩ kɛ ɩ tɔɔ, nɑ pɑɑ kpɑ pɑ lɑŋɑ nɑ pɑ́ wii sɔsɔm. 10 Pɑɑ hɑtǝlǝnɑ-ɩ sɩ pǝ tɑɑ kɔɔ nɑ pɑ́ nɑ́ ɩ wɑhɑlɑ. Nɑ pɑɑ tɔ sɩ: Wɑɩyo, wɑɩyo. Pʋwɛ, Pɑpiloni ɩcɑtɛ sɔsɔɔlɛ nɑ toŋ nyǝntɛ tǝnɛ, kɑlǝfu kʋlʋm tɑɑ kɛlɛ pǝ tɛmɑ-ŋ nyɑ́ sɑlǝkɑ tʋɣʋ nɑ?

11 Atɛ tɑɑtǝlɑɑ nɑ́ tʋlɑ nɔɔsɩ kɛ tǝ tɔɔ tɔtɔ nɑ pɑ́ kpɑ pɑ lɑŋɑ nɑ pɑ́ wii sɔsɔm. Mpi tɔ, nɔɣɔlʋ ɩɩ tɑsǝɣɩ pɑ tɑɑtǝlɛ kɛ yɑpʋ. 12 Pɑɑ wʋlɑnɑɑ, pɑɑ nyǝɣǝlʋɣʋ kʋhʋlʋmʋɣʋ, pɑɑ liɣitee pɛɛ. Pɑɑ lɩɩtʋ, pɑɑ kpoŋkpontu toŋ nyǝntʋ pɔɔŋ kʋpɑŋ, pɑɑ tɔɔ wontu kʋpɑmpɑntʋ kʋsɛɛmtʋ, pɑɑ nti tǝ sɛɛ teu tǝkeŋkeŋ tɔ, pɑɑ silikinɑɑ, pɑɑ tɑɑsɩ nsi sɩ fɛɩ yem yem tɔ, pɑɑ tuu kelɑ nɑ tɑɑsɩ kɑtɛ nyǝnsɩ, nɑ nyǝɣǝlʋɣʋ kʋsɛɛmʋɣʋ nɑ nyǝɣǝlʋɣʋ mɑɣɑmɑɣɑ nɑ pǝlɛ nte pɑ yɑɑ sɩ mɑɑpǝlɩ tɔ. 13 Pɑɑ ɑfɛʋnɑɑ, pɑɑ kʋkʋsʋm, pɑɑ tulɑɑlʋ miili, pɑɑ tulɑɑlʋ kʋfǝɣǝtʋ, pɑɑ sʋlʋm, pɑɑ nim, pɑɑ mʋlʋm, pɑɑ tɔɣɔnɑɣɑ pee, pɑɑ nɑɑŋ, pɑɑ heeŋ, pɑɑ kpɑɣɑnǝŋ nɑ kɛɛkɛnɑɑ, pɑɑ yomɑɑ nɑ yǝlɑɑ weesiŋ mɑɣɑmɑɣɑ. 14 Tɑɑtǝlɑɑ mpɛ pɑ tɔmɑ ɩcɑtɛ sɔsɔɔlɛ ńtɛ́ sɩ: Mpi pǝ tǝnɑ n nyɩɩlɑɣɑ tɔ pǝ sɑɑlɑ yem. Nyɑ́ toŋ nɑ nyɑ́ leleŋ tǝnɑ tʋ-ŋ lʋm, n kɑɑ tɑsɑ-wǝɣɩ keesuɣu. 15 Tɑɑtǝlɑɑ mpɑ pɑ tɑɑtɑ ɩcɑtɛ sɔsɔɔlɛ tɑɑ nɑ pɑ́ pili tɔ, pɑɑ tɛ nɑ pɑ́ hɑtǝlǝnɑ-tɛ sɩ pǝ tɑɑ kɔɔ nɑ pɑ́ nɑ́ tǝ wɑhɑlɑ. Pɑɑ tʋlɩ nɔɔsɩ nɑ pɑɑ kpɑ pɑ lɑŋɑ nɑ pɑ́ wii sɔsɔm. 16 Pɑɑ tɔ sɩ: Wɑɩyo, ɩcɑtɛ sɔsɔɔlɛ tǝnɛ tǝ tɔm wɛ wɑɩyo. Ńtɛ́ tǝ suukɑɣɑnɑ kpoŋkpontu toŋ nyǝntʋ pɔɔŋ kʋpɑŋ nɑ wontu kʋpɑntʋ nti tǝ sɛɛwɑ tɔ, nɑ wontu nti tǝ sɛɛwɑ tǝkeŋkeŋ tɔ. Nɑ ńtɛ́ tǝ tʋkɑɣɑnɑ wʋlɑ nɑ liɣitee pɛɛ nɑ lɩɩtʋ pǝ tɩɩ fɛɩ. 17 Nɑ kɑlǝfu kʋlʋm tɑɑ kɛlɛ tǝ ɑpititu tɛmɑ-tɛɣɛ lʋm tʋɣʋ.

Kpɩɩlǝŋ tɑɑ sɔsɑɑ sɔsɑɑ nɑ ɩ sʋʋlɑɑ nɑ ɩ sɑɑlɑɑ, nɑ pɑ tǝnɑ mpɑ pɑ tɔkǝnɑ teŋku tɔ, pɑ sǝŋɑ pooluŋ tɑɑ, 18 nɑ pɑ́ nɑ́ tǝ kɔkɔ nyɔɔsɩ. Ɩlɛnɑ pɑ́ mɑkɩ kɑpusi nɑ pɑ́ tɔ sɩ: Pɑ tɑ nɑtɑ ɩcɑtɛ nɑ tǝ tɑlɑ ɩcɑtɛ sɔsɔɔlɛ tǝnɛ. 19 Ḿpʋ́ɣʋ́ pɑ cosɑ tɛtʋ nɑ pɑ́ pǝlɩ pɑ nyɔɔŋ tɑɑ, nɑ pɑ́ tʋlɩ nɔɔsɩ nɑ pɑ́ kpɑ pɑ lɑŋɑ nɑ pɑ́ wii sɔsɔm. Nɑ pɑ́ mɑkɩ kɑpusi sɩ: Wɑɩyo, ɩcɑtɛ sɔsɔɔlɛ tǝnɛ tǝ tɔm wɛ wɑɩyo. Pɑ tǝnɑ mpɑ pɑ wɛnɑ kpɩɩlǝŋ kɛ teŋku tɑɑ tɔ tǝ toŋ kɛ pɑ kʋlǝnɑɑ. Kɑlǝfu kʋlʋm tɑɑ kɛlɛ pǝ tǝnɑ pǝ tɛmɑ-tɛɣɛ lʋm tʋɣʋ.

20 Tɔʋ, ɩsɔtɔnʋɣʋ nyɑ́, pǝ wɑkǝlɑ-tɛ tɔ, pɑɑnɑ-tɛ ɩlɛ. Ɩsɔ yǝlɑɑ mɛ, nɑ tillɑɑ nɑ Ɩsɔ kʋyɔɣɔtʋtʋ tɛlǝsǝlɑɑ, ɩ́ pɑɑnɑ-tɛ. Pǝ tɑɣɑ pʋlʋ, ɩsɑɣɑtʋ nti tɩɩ lɑpɑ-mɛ tɔɣɔ Ɩsɔ hʋʋnɑ-tɛ.

21 Ḿpʋ́ɣʋ́ ɩsɔtɑɑ tillu toŋ tʋ nɔɣɔlʋ kpɑɣɑ pǝlɛ sɔsɔɔlɛ, tǝ tɔɔʋ wɛ ɩsɩɩ nɑmlɛ, nɑ ɩ́ pɛtɩ teŋku tɑɑ. Ɩlɛnɑ ɩ́ tɔŋ sɩ: Ɩsǝntɔɣɔ pɑɑ pɛtɩ Pɑpiloni ɩcɑtɛ sɔsɔɔlɛ kɛ tuu pǝ tɛɛ nɑ pɑ́ɑ́nɑ́ sɔsɔɔnɑ, nɑ pɑ kɑɑ tɑsɑ-tɛɣɛ keesuɣu. 22 Nɑ pɑ kɑɑ tɑsɑ nɩɩʋ kɛ Pɑpiloni nyɑ́ nyɑ́ tɑɑ kɛ́ sɑŋkʋnɑɑ nɑ cǝmǝŋ nɑ hǝsɩ nɑ ɑkɑntɛɛ pǝ tɑŋ. Pɑ kɑɑ tɑsɑ nɑʋ kɛ tǝmlɛ lɑtʋ nɔɣɔlʋɣʋ tǝmlɛ nɑtǝlɩ tǝ tɑɑ. Nɑ pɑ kɑɑ tɑsɑ nɩɩʋ kɛ nɑmlɛ kpɑ́lʋ́ɣʋ́. 23 Fǝtǝlɑ kɑɑ tɑsɑ mʋɣʋ kɛ nyɑ́ tɑɑ, pǝ́cɔ́ pɑ kɑɑ tɑsɑ ɑkpɑɣɑlɛ ɑyɔɔlɑ tɑŋ nɩɩʋ kɛ nyɑ́ tɑɑ. Nyɑ́ tɑɑ tɑɑtǝlɑɑ hǝtɛ kɑ yɑɑnɑ ɑntulinyɑ tɑɑ kɛ́ lɔŋ, nɑ nyɑ́ puɣusɑ yǝlɑɑ tǝnɑ nɑ nyɑ́ topotopo tǝmɑ pɛɛkʋɣʋ.

24 Pɑ nɑwɑ Ɩsɔ kʋyɔɣɔtʋtʋ tɛlǝsǝlɑɑ nɑ Ɩsɔ yǝlɑɑ pɑ cɑlǝm, nɑ pɑ tǝnɑ mpɑ pɑ kʋ tɛtʋ tɔɔ tɔ pɑ cɑlǝm kɛ Pɑpiloni tɑɑ tɔɣɔ pɑ tʋ-tɛɣɛ sɑlǝkɑ.