1 Tɔʋ, ɩsɩɩ kɑɣɑnɑ pɑ tɛm lɑpʋ nɑ tǝ́ pǝsɩ yʋlʋpɑmɑ kɛ Ɩsɔ ɩsɛntɑɑ kɛ́ tɑ́ tɑɑ tɛmnɑʋ tɔɔ tɔ, tɑ́ nɑ-ɩ tǝ wɛnɑ tǝmɑ nɑ leleŋ kɛ Tɑcɑɑ Yesu Kilisiti tɔɔ. 2 Tǝ tɛmnɑ Ɩsɔ kɛ́ tɑ́ tɑɑ tɔɣɔ tǝ kpǝtǝnɑ Ɩsɔ kʋpɑntʋ tǝhikile kɛ Yesu Kilisiti tɔɔ kɛ́ timpi tǝ wɛ kɑɣɑnɑ kɛ ɩsǝntɔ tɔ. Nɑ tǝ yɔɔlǝɣɩ kɛ́. Mpi tɔ, tǝ nyǝmɑ́ sɩ tɩɩ pǝsɩ Ɩsɔ teeli nyǝ́mɑ. 3 Hɑlɩ tɑ́ mǝlɑɑ kɛ́ nɑ tǝ́ yɔɔlǝɣɩ, pɑɑ tǝ wɛʋ wɑhɑlɑ tɑɑ tɔ. Pǝ tɑɣɑ pʋlʋ, wɑhɑlɑ kɔŋnɑ nɑ suulu. 4 Nɑ suulu yekinɑ nɑ yʋlʋ kɑntǝlǝɣɩ wɑhɑlɑ tɑɑ, nɑ kɑntǝlʋɣʋ yekinɑ nɑ tɛɛlʋɣʋ kɔɔ. 5 Tǝ tɛɛlʋɣʋ mpʋ tɔ pǝ tɑ puɣusi-tʋ se. Pǝ tɑɣɑ pʋlʋ, Feesuɣu Nɑŋŋtʋ wei Ɩsɔ hɑ-tʋ tɔ ɩnɩ ɩ lɑpǝnɑ nɑ tɑ́ tǝnɑ tǝ́ nyɩ teu sɩ Ɩsɔ sɔɔlɑ-tʋ.

6 Tǝ tɑɑ pǝsǝɣɩ pʋlʋ tɔ Kilisiti sǝpǝnɑ ɑsɑɣɑɑ tɑ́, tɑ́ tɔɔ kɛ́ sɑɑ wei pǝ mɑɣɑ Ɩsɔ tɔ. 7 Amɑ sɩ yʋlʋ ɩ́ tisi nɑ ɩ́ sɩ siɣisulu tɔɔ tɔ, tǝcɑtǝtǝyɑʋ kɛ́. Ń tɑ tɩɩ nyǝm nɔɣɔlʋ nɑ́ wɛɛ wei ɩ pǝsǝɣɩ nɑ ɩ́ sɩ yʋlʋ kʋpɑŋ tɔɔ tɔ. 8 Pɑɑ nɑ mpʋ Ɩsɔ nɑ́ hʋlɑ-tʋɣʋ ɩsǝnɑ tǝnɑɣɑ ɩ sɔɔlɑ-tʋ tɔ. Kilisiti sǝpɑ tɑ́ tɔɔ pɑɑ nɑ tǝ kɛ́ ɑsɑɣɑɑ tɔ. 9 Ɩ sǝm tɔɔ kɛ́ tǝ pǝsɑ yʋlʋpɑmɑ kɛ kɑɣɑnɑɣɑ Ɩsɔ ɩsɛntɑɑ, ɩlɛ ɩsǝnɑɣɑ pɩɩ kpisi-tʋɣʋ yɑpʋ kɛ Ɩsɔ pɑ́ɑ́nɑ́ niŋ tɑɑ? 10 Tɑ́ nɑ Ɩsɔ tɩɩ wɛ koloŋɑ kɛ́. Amɑ ɩ Pǝyɑɣɑ sǝm tɑɑ kɛ́ ɩ lɑpɑ nɑ tɑ́ nɑ-ɩ tǝ́ ciiki. Tɔʋ, kɑɣɑnɑ tɑ́ nɑ Ɩsɔ tǝ wɛ leleŋ. Pǝ́cɔ́ ɩ Pǝyɑɣɑ nɑ́ wɛnɑ weesuɣu tɔtɔ, ɩlɛ kɑɑ wɑɑsɩ-tʋ nɑ pǝ́ kǝlɩ mpʋ. 11 Nɑ pǝ tɑ tɩɩ kɛʋ pǝ tǝnɑɣɑlɛ, tǝ tɔŋnɑ Ɩsɔ ɩlɛɣɛ yɔɔlǝnɑʋ kɛ Tɑcɑɑ Yesu Kilisiti wei ɩ lɑpɑ nɑ kɑɣɑnɑ tɑ́ nɑ Ɩsɔ tǝ́ ciiki tɔ ɩ tɔɔ.

12 Yʋlʋ kʋlʋm tǝnnɑ ɩsɑɣɑtʋ sʋʋ yǝlɑɑ tǝnɑ. Ɩlɛnɑ ɩsɑɣɑtʋ nɑ́ɑ́ kɔnɑ sǝm. Nɑ sǝm nɑ́ɑ́ yɑ yǝlɑɑ tǝnɑ tɔɔ. Pǝ tɑɣɑ pʋlʋ, pɑ tǝnɑ pɑ lɑpǝnɑ ɩsɑɣɑtʋ tɔ pǝ tɔɔ. 13 Ɩsɑɣɑtʋ kɑ tɛmɑ ɑntulinyɑ tɑɑ kɛ́ wɛɛʋ nɑ pǝ́cɔ́ Ɩsɔ tʋ Moisi kɛ kʋsǝsɩɩtʋ. Amɑ ɩsɩɩ kʋsǝsɩɩtʋ tɑɑ fɛɩ ɩlɛ, Ɩsɔ tɑɑ nyǝnɩ-tɩ ɩsɩɩ pʋlʋ. 14 Pɑɑ nɑ mpʋ sǝm nɑɑ tɔɣɔ kɑwulɑɣɑ kɛ pǝ kpɑɣɑʋ Atɑm nɑ pǝ́ polo Moisi, hɑlǝnɑ pǝ́ cɑŋ pǝ́ kpɛŋnɑ mpɑ pɑ tɑɑ lɑ ɩsɑɣɑtʋ nti Atɑm lɑpɑ tɔ. Ɩsɔ kʋheelitu kɛ Atɑm nɑ́ kpɛɛsǝnɑɑ nɑ ɩ́ pǝsɩ ɩsɑɣɑʋ.

Atɑm ɩnɛ ɩnɩ ɩ nǝɣǝsǝnɑ wei ɩ kɑɑ ɩ kɔɔ tɔɣɔ. 15 Amɑ pɑ tɑ lɩɩ kʋlʋm. Pǝ tɑɣɑ pʋlʋ tɔɔ, mpi Ɩsɔ hɑwɑ fɑɑlɑɑ tɔ pǝ fɑɣɑnɑ ɩsɑɣɑtʋ nti Atɑm lɑpɑ tɔɣɔ. Mpi tɔ, yʋlʋ kʋlʋm ɩnɛ ɩ ɩsɑɣɑtʋ tɔɔ yǝlɑɑ pɑɣɑlɛ sǝpɑ. Amɑ Ɩsɔ pɛɛlɛɛ nɑ́ temɑ pɑɣɑlɛ nɑ pǝ́ tɛɛ ḿpʋ́ɣʋ́ sɔsɔm, nɑ pǝ kɑɑsɩ kʋcɔɔʋ ŋku ɩ lɑpɑ fɑɑlɑɑ nɑ yʋlʋ kʋlʋm Yesu Kilisiti kiŋ tɔ kʋlɛ kʋ tɔɔwɑ sɔsɔm tɔtɔ. 16 Amɑ yʋlʋ kɑɑ kpɑɣɑ mpi Ɩsɔ kʋcɔɔʋ lɑkɩ tɔ nɑ ɩ́ mɑɣɑsǝnɑ mpi yʋlʋ kʋlʋm ɩsɑɣɑtʋ lɑkɩ tɔ. Pǝ tɑɣɑ pʋlʋ tɔɔ, ɩsɑɣɑtʋ kʋlʋmtʋ lɑpǝnɑ nɑ pɑ́ hʋʋnɑ yǝlɑɑ nɑ pɑ tɔm sɩ. Amɑ Ɩsɔ fɑɑlɑɑ kʋcɔɔʋ nɑ́ tɑɣɑnɑ ɩsɑɣɑtʋ pɑɣɑlɛ nɑ pǝ́ lɑ teu. 17 Kʋlʋm ɩsɑɣɑtʋ tɔɔ kɛ́ sǝm tɔɣɔ kɑwulɑɣɑ mɛɛ, nn kʋlʋm ɩnɩ ɩ tike ɩ tɔɔ kɛ́. Amɑ nti Yesu Kilisiti tike kɔnɑ-tʋ tɔ tǝlɛ tǝ kǝlɑ ḿpʋ́ɣʋ́ tɔɔʋ tǝcɑɣɑcɑɣɑ. Pǝ wɛɛ sɩ pɑ tǝnɑ mpɑ pɑ hikɑ Ɩsɔ pɛɛlɛɛ kɛ sɔsɔm sɔsɔm nɑ ɩ́ lɑ nɑ pɑ́ pǝsɩ kʋpɑmɑ kɛ fɑɑlɑɑ tɔ, Kilisiti tɔɔ pɑɑ hiki weesuɣu nɑ pɑ́ tɔɣɔ kɑwulɑɣɑ.

18 Ɩsɩɩ yʋlʋ kʋlʋm ɩsɑɣɑtʋ sʋsɑ yǝlɑɑ tǝnɑɣɑ tɑsǝkǝlɛ tɑɑ tɔ, mpʋ tɔtɔɣɔ yʋlʋ kʋlʋm tǝmlɛ kʋpɑntɛ kɑ́ fiti yǝlɑɑ tǝnɑɣɑ hʋʋlɛ pɔɔlɛ tɑɑ nɑ pɑ́ tʋlɩ-tɩ. 19 Ɩsɩɩ yǝlɑɑ tǝnɑ lɑpʋ ɑsɑɣɑɑ kɛ yʋlʋ kʋlʋm kpɛɛsʋɣʋ tɔɔ tɔ, mpʋ tɔtɔɣɔ yǝlɑɑ pɑɣɑlɛ kɑ́ lɑ kʋpɑmɑ kɛ Ɩsɔ ɩsɛntɑɑ kɛ́ yʋlʋ kʋlʋm nɩɩnɑʋ tɔɔ.

20 Kʋsǝsɩɩtʋ kɔmɑɣɑ sɩ ɩsɑɣɑtʋ ɩ́ huki. Amɑ timpi ɩsɑɣɑtʋ hukɑɑ tɔ, Ɩsɔ pɛɛlɛɛ nɑ́ tɛɛ-tǝɣɩ tɔɔʋ kɛ sɔsɔm. 21 Nɑ ɩsɩɩ ɩsɑɣɑtʋ lɛɛ sǝm kɛ yǝlɑɑ tǝnɑ tɔ, mpʋ tɔtɔɣɔ Ɩsɔ pɛɛlɛɛ nɑ́ lɛɛ-tʋɣʋ siɣisuɣu sɩ pǝ́ ponɑ-tʋɣʋ weesuɣu ŋku kɩɩ tɛŋ tɔ kʋ tɑɑ kɛ́ Tɑcɑɑ Yesu Kilisiti tɔɔ.