1 Sulɑmii pɛɛlɔ nyɑ́, kɔɔ, kɔɔ,

Kɔɔ, nɑ tǝ́ nyǝnɩ-ŋ.

Pepe tɔɔ kɛ́ ɩ́ nyǝnǝɣɩ Sulɑmii tʋ?

Ɩ wɛ kɛ́ ɩsɩɩ kpekɑ nɑɑlɛ pɑɑlɛ.

2 Awulumpu pɛɛlɔ nyɑ́,

ɑmɑ nyɑ́ nɔɔhɛɛ tewɑ nyɑ́ ntɑŋkpɑlɑ tɑɑ.

Nɑ nyɑ́ tǝnɑɣɑ nɑ́ɑ́ wɛ ɩsɩɩ lɩɩtʋ nti niŋ tǝmlɛ tʋ lupɑ tɔ.

3 Nyɑ́ lotu kulutɑɑ kɛ́.

Tǝ tɑɑ ɩɩ lɑŋǝɣɩ sʋlʋm sɔɔsʋŋ nyǝm.

Pǝyele tǝ cɑɣɑ kɛ́ ɩsɩɩ tɔɣɔnɑɣɑ pee huɣule kɛ yɑɑyenɑɑ hɛkʋ.

4 Nyɑ́ hǝlɑ nɑɑlɛ wɛ kɛ́ ɩsɩɩ nɑsɛm tompiyɑ.

5 Nyɑ́ luɣu nǝɣǝsǝnɑ ɩsɩɩ tuuŋ kelɑ ɑkele.

Nyɑ́ ɩsǝpee wɛ ɩsɩɩ Hɛsǝpɔŋ ɩcɑtɛ nɔɣɔ lɩɩnɑ.

Nɑ nyɑ́ mǝntɛ nɑ́ɑ́ sǝŋɑ ɩsɩɩ Lipɑŋ ɑkele,

wei ɩ tɔɔ pɑ feŋiɣinɑ Tɑmɑsɩ hɔɣɔlʋɣʋ tɔ.

6 Nyɑ́ nyʋɣʋ sǝŋɑɑ kɛ́ ɩsɩɩ Kɑmɛɛlɩ pʋɣʋ

nɑ nyɑ́ nyɔɔsɩ nɑ́ɑ́ wɛ ɩsɩɩ nyɑɑlʋɣʋ ŋku

pɑ lii ɑkpɑɑyɑlɑ tɔ.

Pǝ tɔkɑ wulɑʋ nɔɣɔlʋ kɛ nyɑ́ nyɔɔsɩ kpɑsɩ tɑɑ.

7 Mɑ sɔɔlʋɣʋ tʋ nyɑ́, ɑmɑ n tewɑɣɑ.

Nyɑ́ nyǝnʋɣʋ tɑɑ wɛ teu.

8 N sǝŋɑɑ kɛ́ ɩsɩɩ pɑ́ɑ́ʋ.

Nɑ nyɑ́ hǝlɑ nɑ́ɑ́ wɛ ɩsɩɩ kpɑkpɑtukuŋ.

9 Mɑ tʋ mɑ tɑɑ sɩ mɑɑ kpɑ pɑ́ɑ́ʋ ŋkʋ.

Nɑ mɑ́ sɛtɩ kʋ tukuŋ.

Nyɑ́ hǝlɑ ɑnɩ ɑ wɛ-m tɔtɔɣɔ ɩsɩɩ lɛsɛŋ tukuŋ.

Nyɑ́ feesiŋ wɛ-m sɔɔsʋŋ ɩsɩɩ tʋɣʋ pee.

10 Nyɑ́ kʋyɔɣɔtʋtʋ wɛ leleŋ kɛ́ ɩsɩɩ sʋlʋm kʋpɑm.

Pǝ kɛ́ mɑ kʋsɔɔlʋ sʋlʋm kɛ́.

Ɩsɩɩ pǝ kpeŋuɣu mpɑ pǝ kʋwɑ tɔ pɑ ntompee tɔɔ tɔ.

11 Mɑ kʋsɔɔlʋ tǝnnɑ-m nɑ ɩ kʋnyɩɩlʋɣʋ wɛ mɑ tɔɔ.

12 Mɑ kʋsɔɔlʋ nyɑ́, kɔɔ nɑ tǝ́ lɩɩ.

Tɩɩ sʋʋ ɑcɑlɛɛ tɑɑ kɛ́ ɑhoo.

13 Ɩlɛnɑ tǝ́ kpɑ lɛsɛŋ tɩɩŋ tɑɑlɛ kɛ tɑnɑŋ kʋpɑŋkʋ

nɑ tǝ nɑ́ sɩ pɑ tʋ hɛtʋ nɑ tǝ́ yɛɣɛlǝɣɩ?

Nɑ tɩɩŋ lɛlǝŋ tʋwɑ yɑɑ ɩ tɑ tʋ?

Tǝnɑɣɑ mɑɑ hʋlɩ-ŋ mɑ sɔɔlʋɣʋ tǝnɑ.

14 Tɩɩŋ wei ɩ kʋsǝɣɩ ɑpɑlɑɑ kʋnyɩɩlǝŋ tɔ ɩ sɔɔsʋŋ kpɑwɑ.

Tǝ wɛnɑ tɑ́ nɔnɔɔsɩ tɛɛ kɛ́ tɩɩŋ pee kʋpɑnɑ.

Pɑɑ kʋpǝnɛɛ pɑɑ kʋfɑnɑ.

Mɑ kʋsɔɔlʋ nyɑ́, nyɑɣɑ mɑ sɩɩ-yɛ.