Soopu.
26.
Mpʋɣʋlɛ Soopu cɔwɑ sɩ: 
Pʋwɛ! Amɑ n nyǝmɑ́ ɩcɑm sǝnɑʋ, n nyǝmɑ́ wei ɩ fɛɩnɑ tomɑ tɔ ɩ tem. 
Amɑ n nyǝmɑ́ lǝmɑɣɑsɛɛ fɛɩ tʋ kɛ lɑɣɑtʋ tɑsʋɣʋ, nɑ ń hʋlǝɣɩ nyǝm sɔsɔɔm. 
Aweɣe n yɔɣɔtǝɣɩ tɔmnɑɑ mpɛ? Nɑ ɑwe tɩɩ tʋnɑ-tǝɣɩ nyɑ́ tɑɑ? 
Sǝtɑɑ seliɣi pɑ tǝcɑɣɑlɛ tɑɑ kɛ́ hɑtoo lʋm tɛɛ. 
Mpi tɔ, Ɩsɔ nɑɑkɩ ɑtɛtǝlɛ tɑɑ kɛ́ tǝcɛɩcɛɩ. Pǝyele pǝ kɛɛlɑ pʋ́ʋ́ɣʋ́ sɔsɔɔʋ ŋkʋ kʋ tɔɔ kɛ́, pʋlʋ tɑ́ kenti-ɩ. 
Ɩnɩ ɩ pɔnɑ ɩsɔtɔnʋɣʋ kɛ yem tɑɑ, nɑ ɩ́ susi ɑntulinyɑ kɛ kpɛtɛ tɑɑ. 
Ɩnɩ ɩ hɑɣɑsǝnɑ tɛʋ lʋm kɛ ɩsɔŋmʋntʋ tɑɑ nɑ tǝ́ lɑ́ yuŋ, pǝ́cɔ́ tǝ kɑɑ yɑ. 
Ɩnɩ ɩ tɑkǝɣǝnɑ ɩ kumte tɔɔ kɛ́ ɩsɔŋmʋntʋ ɩsɩɩ sɑɑlɑɣɑ. 
Ɩ pɩɩ ŋmɑɑlɑɣɑ kɛ teŋku tɔɔ, nɑ ɩ́ cɔɔ nɑ ɩ́ tɑ. Hɑlǝnɑ pǝ́ sɩɩnɑ sǝkpɛtʋɣʋ nɑ nyɑɑlǝm pǝ tǝnɑɣɑ. 
Ye Ɩsɔ holɑɑ, sɔɣɔntʋ kpɑɑkɩ ɩsɔtɔnʋɣʋ ɑkelenɑɑ kɛ́ nɑ pɑ́ seliɣi. 
Ɩ toŋ kɛ ɩ selisiɣinɑ teŋku. Ɩlɛnɑ ɩ́ wɑkǝlɩ ɩsǝcɑʋ nɑ ɩ lɑɣɑtʋ. 
Ɩ feesiŋ kɛɛlɑ ɩsɔtɔnʋɣʋ tɔɔ. Ɩlɛnɑ ɩ niŋ nɑ́ɑ́ tʋlɩ tʋm sɔsɔ wei ɩ seekɑɣɑ tɔ. 
Pǝ tǝnɑɣɑ mpʋ ɩ tǝmɑ nyɑlǝmlɛ ntɛ́, nɑ tǝ́ nɩɩkɩ ɑ tɑŋ kɛ pǝcɔ pǝcɔ. Ɩlɛ ɑwe kɑ́ pǝsɩ ɩ toŋ kɔkɔtɛ sɔsɔɔlɛ kɛ nɩɩʋ?