Yontu.
47.
Kolee yontu nti tə wɛ yonyoolɑɑ nyʋɣʋ tʋ yontunɑɑ tɑɑ tɔɣɔlɔ. 
Yəlɑɑ mɛ mə́ tənɑ ɩ́ wilitiɣi, nɑ ɩ́ mɑkɩ niŋ tɑɑ kɛ́ tɑ́ Ɩsɔ. 
Mpi tɔ, pə tənɑ pə tɛɛ sʋʋkənɑ Tɑcɑɑ Ɩsɔtɑɑ Ɩsɔ Sɔsɔ kɛ́. Ɩnəɣəlɛ tɛtʋ tənɑ wulɑʋ sɔsɔ. 
Ɩnɩ ɩ tʋɣʋnɑ tɑ́ niŋ tɑɑ kɛ́ yəlɑɑ, nɑ ɩ́ tʋ tɑ́ nɔɔhɛɛ tɛɛ kɛ́ piitimnɑɑ. 
Yɑkɔpʋ nyə́mɑ tɑɣɑ ɩ sɔɔlɑɑ nɑ ɩ́ ləsɩ tɑ́ tɛtʋ nɑ tɑ́ lɑŋɑ hɛɛwɑ. 
Kɑwilitɑsɩ nɑ tutuɣu wulɑ kɛ Ɩsɔ Tɑcɑɑ kpɑnɑ ɩ kumte tɔɔ. 
Ɩ yoo Tɑcɑɑ kɛ yontu. Ɩnəɣəlɛ tɑ́ wulɑʋ, ɩ́ sɑmɩ-ɩ. 
Ɩsɔ kɛlɛ tɛtʋ tənɑ wulɑʋ. Ɩ́ sɑmɩ-ɩ nɑ yontu kʋpɑntʋ tɑɑ kʋpɑntʋ. 
Ɩsɔ cɑɣɑ ɩ kumte nɑŋŋ nyəntɛ tɔɔ kɛ́ nɑ ɩ́ tɔkɩ piitimnɑɑ tɔɔ kɛ́ kɑwulɑɣɑ. 
Piitimnɑɑ ɑwulumpiyɑ sɔɔsɑ Apəlɑhɑm Ɩsɔ yəlɑɑ tɔɔ. Mpi tɔ, ɩnɩ ɩ tənnɑ ɑtɛ ɑwulɑɑ nɑ pəsəlɑɑ tənɑ nɑ ɩ́ tɔkɩ pɑ tənɑ pɑ tɔɔ kɛ́ kɑwulɑɣɑ.