Yontu.
52.
Tɑfiiti yontu nti tə wɛ yonyoolɑɑ nyʋɣʋ tʋ yontunɑɑ tɑɑ tɔɣɔlɔ. 
Tə tɑɑ kɛ́ pɑ kɛɛsəɣɩ ɩsənɑ Ɩtɔm tʋ Towɛkɩ tɑɣɑsɑ Sɑyuli sɩ Tɑfiiti polɑ Apimelɛkɩ tɛ. Yontu ntəɣəlɛ sɩ: 
Toŋ tʋ nyɑ́, n yɔɔləɣənɑ nyɑ́ ɩsɑɣɑtʋ kɛ mpʋ suwe? N tɑ nyɩ tɑɑ sɩ Ɩsɔ kʋpɑntʋ wɛ tɑm tɔɔ? 
Nyɑ́ nsəmlɛ nɑ lɔŋ ɩsɩɩ hʋnʋɣʋ, nɑ ń tʋsəɣənɑ lɛlɑɑ. 
N sɔɔlɑ ɩsɑɣɑtʋ nɑ pə́ kəlɩ kʋpɑntʋ, nɑ ń cɑɑkɩ pɔpɔtʋ nɑ pə́ kəlɩ tɑmpɑnɑ. 
Nɑ nyɑ́ lɑŋlɛ hɛɛnɑ tɔm tənɑ nti tə wɑkələɣɩ tɔɣɔ. Tə tənɑ tə kɛ́ kʋkɛkɛɛtʋ kɛ́. 
Pə tɔɔ kɛ́ Ɩsɔ kɑ́ wɑkəlɩ-ŋ tɑm tɔɔ. Ɩ kɑ́ ləsɩ-ŋ nyɑ́ tɛ nɑ ɩ́ tɛɛnɑ, nɑ ɩ́ kpɛsɩ-ŋ weesuɣu nyə́mɑ tɛ nɑ ɩ́ tɔɣɔnɩ-ŋ. 
Siɣisilɑɑ kɑ́ nɑ-ɩ nɑ sɔɣɔntʋ kpɑ-wɛ. Pɑɑ woŋɩ-ɩ nɑ pɑ́ tɔŋ sɩ: 
Ye yʋlʋ kisɑ Ɩsɔ kɛ kpʋlʋɣʋ tʋɣʋ nɑ ɩ́ hɑ ɩ təɣɩ liɣitee nnɑ ɩ wɑkəlɑ lɛlɑɑ nɑ ɩ hiki tɔ, ɩsənɑ ɩ tɛŋnɑ tɔɣɔlɛ. 
Amɑ mɑ wɛ Ɩsɔ təyɑɣɑ tɑɑ kɛ́ ɩsɩɩ tʋɣʋ hɛtʋ nyəŋkʋ. Ɩ kʋpɑntʋ tɑɑ kɛ́ mɑ́ hɑ mɑ təɣɩ tɑm tɔɔ. 
Mɑ sɑŋɩ-ŋ tɑm tɔɔ kɛ́ pə tənɑ mpi n lɑpɑ tɔ pə tɔɔ, nɑ mɑ́ kpɑɑləɣɩ nyɑ́ yəlɑɑ ɩsɛntɑɑ sɩ, n kɛ́ kʋpɑŋ.