Yontu.
97.
Tɑcɑɑ tɔkɩ kɑwulɑɣɑ, tɛtʋ tənɑ ɩ́ yɔɔlɩ. Tɛtʋnɑɑ mpɑ lʋm tɑmɑ kotɑɣɑ tɔ pɑ pɑɣɑlɛ ɩ́ yɔɔlɩ. 
Ɩsɔŋmʋntʋɣʋ nɑ səkpɛtʋɣʋ tɑmɑ-ɩ kotɑɣɑ, nɑ ɩ kumte nɑ́ɑ́ cɑɣɑ siɣisuɣu nɑ tɑmpɑnɑ təŋʋɣʋ tɔɔ. 
Kɔkɔ wɛ ɩ nɔɣɔ tɔɔ kɛ́ nɑ kɑ́ nyɑkɩ ɩ kolontunɑɑ nɑ kɑ́ cɔɔkənɑ-ɩ. 
Ɩ ŋmɛləsəɣɩ nyɑɑləm nɑ pə́ nɑɑkɩ ɑntulinyɑ, nɑ ɑtɛ yəlɑɑ nɑɑkɩ nɑ pɑ́ seliɣi. 
Tɛtʋ tənɑ tʋ ɩ́ kpətənɑ pɔɔŋ, ɩ hooki kɛ́ ɩsɩɩ keetu. 
Ɩsɔtɔnʋɣʋ kpɑɑləɣɩ ɩ tɑmpɑnɑ nɑ yəlɑɑ tənɑ nɑɑkɩ ɩ teu. 
Tɩɩŋ luŋlɑɑ nɑ mpɑ pɑ hʋləsəɣɩ tɩɩŋ nɑ lɑŋlɛ tɔ, pɑ tɔkɩ fɛɛlɛ kɛ́. Tɩɩŋ tənɑ həntəɣɩ Ɩsɔ kɛ́ ɑtɛɣɛ. 
Siyɔŋ ɩcɑtɛ nyə́mɑ nɩɩ-tɩ nɑ pɑ lɑŋɑ hʋlʋmɩ, nɑ Yutɑ ɑcɑlɛɛ nɑ́ɑ́ wɛ ɑyɔɔlɛɛ tɑɑ kɛ nyɑ́ hʋʋlɛ tɔɔ, hɑɩ, Tɑcɑɑ. 
Mpi tɔ, Tɑcɑɑ nyɑɣɑlɛ ɩsɔtɑɑ Ɩsɔ sɔsɔ kɛ tɛtʋ tənɑ tɑɑ. N kəlɑ tɩɩŋ tənɑɣɑ sɔsɔɔntʋ kɛ təcɑɣɑcɑɣɑ. 
Mpɑ mɛ ɩ́ sɔɔlɑ Tɑcɑɑ tɔ, mə tɑɑ ɩ́ kpɑnɑ ɩsɑɣɑtʋ. Ɩsɔ kentiɣi ɩ kʋpɑmɑ tɔɔ kɛ́, nɑ ɩ́ yɑkɩ-wɛɣɛ ɑsɑɣɑɑ niŋ tɑɑ. 
Tɑmpɑnɑ təŋlɑɑ tənnɑ nyɑɑləm, nɑ mpɑ pɑ lotu tɑɑ tewɑ tɔɣɔ lɑŋhʋlʋmlɛ. 
Siɣisilɑɑ, mə lɑŋɑ ɩ́ hʋləmənɑ Tɑcɑɑ, nɑ ɩ́ sɑ ɩ tənɑŋŋ wɛɛtʋ.