Yontu.
142.
Tɑfiiti yontu nti tə wɛ yonyoolɑɑ nyʋɣʋ tʋ tɑkəlɑɣɑ tɑɑ tɔɣɔlɔ. Sələmʋɣʋ ŋku ɩ kɑ sələmɑ kʋkpɑmʋɣʋ pʋʋɣʋ tɑɑ tɔ. 
Tɑcɑɑ mɑ wiikinɑ-ŋ nɑ nɔɣɔ sɔsɑɣɑ, nɑ mɑ́ tɛkəɣɩ-ŋ niŋ nɑ mɑ nɔɣɔ. 
Nyɑɣɑ mɑ hʋləɣɩ mɑ kʋsələmətʋ, nɑ mɑ́ hʋləɣɩ-ŋ mɑ lɑŋwɑkəllɛ. 
Pɑɑ mɑ lɔwɑ ɑpɑlʋtʋ, nyɑ́ nyəmnɑ mɑ təpote. Pɑ nyəpɑ-m kɑtɔkɑ kɛ mpɑɑʋ ŋku mɑɑ təŋ tɔ kʋ tɑɑ. 
Nyənɩ ntɔɣɔŋ tɔɔ nɑ ń nɑ́ nɔɣɔlʋ tɑ nyə-m. Mɑ kpʋlʋɣʋ tətʋlɛ lepɑ-m. Nɔɣɔlʋ ɩɩ nəɣəsəɣɩ mɑ tɔm. 
Tɑcɑɑ nyɑɣɑ mɑ yɑɑkɩ. Mɑ yɔɣɔtəɣɩ sɩ nyɑɣɑlɛ mɑ kpʋlʋɣʋ tətʋlɛ, nyɑɣɑlɛ mɑ pɑɑ tete kɛ weesiŋ nyə́mɑ tɛtʋ tɑɑ. 
Ke ŋkpɑŋŋ nɑ ń nɩɩ mɑ wulɑ. Mpi tɔ, mɑ kəlɑ ɩcɑntʋ. Yɑ-m mɑ wɑhɑlɑ tʋlɑɑ niŋ tɑɑ. Pə tɑɣɑ pʋlʋ, pɑ kəlɑ-m toŋ. 
Ləsɩ-m mɑ sɑləkɑ tɑɑ, nɑ mɑ́ sɑ́ nyɑ́ hətɛ. Wɑɑtʋ wei n kɑ́ lɑ-m kʋpɑntʋ tɔ, siɣisilɑɑ kɑ́ tʋ-m hɛkʋ.