Yontu.
146.
Ɩ́ sɑ Tɑcɑɑ. Mɑɑ sɑ Tɑcɑɑ. 
Nyɑɣɑ mɑɑ sɑ mɑ weesuɣu tənɑ. Mɑɑ pʋɣʋləɣɩ-ŋ mɑ weesuɣu tənɑɣɑ. 
Ɩ tɑɑ hɑ mə təɣɩ yəlɑɑ sɔsɑɑ, pɑ kɛ́ yəlɑɑ kɛ́. Pɑɑ pəsəɣɩ yʋlʋ nyʋɣʋ yɑpʋ. 
Pɑ weesiŋ tɛŋ kɛ́ nɑ pɑ́ tɑɣɑnɩ tɛtʋ kɛ pəsʋɣʋ, nɑ pɑ təmɑ wenɑ ɑ pɛɛ pɑɑ tʋwɑ tɔ ɑ́ sɑɑlɩ yem. 
Leleŋ nɩɩlʋ ntɛ́ wei ɩ nyənəɣɩ Yɑkɔpʋ Ɩsɔ kɛ́ ɩ wɑɑsʋlʋ nɑ ɩ́ tɛɛləɣɩ ɩ Ɩsɔ Tɑcɑɑ tɔ. 
Ɩsɔ nyɑ́ lɑpənɑ ɩsɔtɑɑ nɑ ɑtɛ, nɑ teŋku nɑ ɩ tɑɑ nyəm tənɑ. Yʋlʋ pəsəɣɩ nɑ ɩ́ tʋ-ŋ nɑɑni kɛ tɑm tɔɔ kɛ́. 
N tɑɣɑnəɣɩ mpɑ pɑ muɣuliɣi tɔ pɑ tɔmnɑɑ. N hɑɑkɩ nyɔɣɔtʋnɑɑ kɛ tɔɣɔnɑɣɑ. N hɛtəɣɩ mpɑ pɑ hɔkɑɑ tɔ. 
Tɑcɑɑ nyɑ́ kuliɣinɑ yʋlʋmɑɑ ɩsɛ. N siɣisiɣi mpɑ pɑ pɑmɑ tɔ. N sɔɔlɑ siɣisilɑɑ. 
Tɑcɑɑ nyɑ́ kentiɣinɑ cɑɣɑlɑɑ tɔɔ, nɑ ń pɑɑsəɣənɑ suluwɑɑ nɑ leelɑɑ. Amɑ n wɑkələɣɩ mpi pə pəlɛ ɑsɑɣɑɑ tʋɣɩ tɔ. 
Tɑcɑɑ tɔkɩ kɑwulɑɣɑ kɛ tɑm tɔɔ kɛ́. Hɑɩ, Siyɔŋ nyə́mɑ mɛ mə Ɩsɔ wɛ tɑm tɔɔ kɛ́. Ɩ́ sɑ Tɑcɑɑ.