1 Mo limixin di doma i do, “Kopmen tomoroa go i rooro.” Nedi limixin tangtangku. Lodoxoma atnedi i bilingot axap tino mi laxakapmek. La dira lok pam levempanga ik lok kapmek aleng tinotno, kopmen tara atdi na lok levempanga i nunuan.

2 Leeme Silok ik milik si boro vana at lebelen laxalibet, la i reven limixin axap, do ni naba epovo ri ven kaka taradi leklen la tara bok i lotu saparav i. 3 Ketla nedi axap digara oon soogong pam, lorooro atnedi axap ira mau axap pam. Kopmen tinotno tara atdi ik lok lempanga i lox avukat, kopmen tinotno tegesara.

4 Moroa i sue xeretna, “Kereva, kopmen dinaklen leventaangas nunuan? Kereva, nedi axap na dik lok laxakapmek, kopmen takleklen atdi? Dip kip pilo amisik limixin tarak, la kopmen tinotno dina ngising tia.”

5 Ketla melemu dinaba lingun aleng tino, at nom lanmarat kovisi di goxo suma i gano, atla ne Moroa naba sax epeseves levesi at limixin di munepen mi limixin teren. Moroa ira sok sisixe kepe vam di. Kuren la limixin me Israel dinaba sak tup tino midi.

6 Nia a vara aleng tinotno i do ne Moroa naba sak tiki tara boro Saion, kusu na lox asepsu limixin me Israel basinge limixin munepen midi. Melemu limixin me Israel dinaba lok momo do ne Moroa naba lox asang kobot amu manga di!