1 Mina vixan toxompixan maxat ti Leeme Silok. Neni gara lok pam lempanga maraanu! Neni gara sak tup mi limixin munepen mi lolos kaala axa ren. 2 Leeme Silok ga vaase asu i do ni ga sak tup mi limixin munepen min. La neni ga vaase aronga larabung mixin axap mi mo lolos teren ti lox asepmus limixin. 3 Neni ga lox epovo laxakaape ren ti limixin me Israel la i ruturun amisik tidi la ik lox asuusu labalamu lexen tidi. Limixin at lengkot axap digara ven pam ne Moroa atnedi ga sak tup mi limixin munepen min.

4 Nemi axap limixin at na lavatbung menemen, minak pixan sosoro ri Leeme Silok. Mina emi asu rin mi lempixan la luxupkup sosoro! 5 Minak pixan mi lengkompixan emi asu ri Leeme Silok! Minak sak lerengteng maraanu ro at lempat taaleng! 6 Minat mas lempat tu mi lengkongkidi, la minap kup mi lososoro ri Leeme Silok, ni Loorong Silok atdik.

7 Laras eburu mi lempanga dik lok keneng taram, mina vaas mi luxupkup. Lavatbung menemen mi lempanga axap dik lok mavana ram, minak pixan! 8 Laradan sen, mina pasa leventingen nimi. Lengkong kaana, minak pixan eburu mi lososoro at lemeren Leeme Silok, 9 atla i vot kusu nam gomgonga lavatbung menemen. Neni nabam gomgonga limixin at lavatbung menemen mi lodoxoma mokmokso la levelinga ruturun.