1  ✡ Mat 13:55; Apa 15:13; Gar 1:19; 1Pi 1:1Jemus, God ge Ayapan Iesu Keriso nauwawa eniwa, dam 12 gumbo kaiwa kaiwa veni. Mu at da ampa ampa tene wakeyawa.

2  ✡ Rom 5:3-5Tatangwanen, yaigiwa gina ubeube uwapewa, ye anoya me degadega painauwa. 3  ✡ 1Pi 1:7Kuiyawa ye anoyana, anotumat yeuma ageyau aupe ipewa, me gumbe iyai waketanwa matai auya. 4 Iyai waketanwa kweya nau ape. Me ge ye yauboriya onanape, sira dividivi undag ye daneyap wakeya. 5  ✡ Pro 2:3-6Ye bira da anoano meuma oma den ane ipewa, God gumbe nun waya. Bira bira undag vemewa me mumpe, me imive aivine gumbe mumpe, sira pui den yumunkapa mumpe. 6 Megara nun wayawa, anopipanum gumbe onan anotumat atanit di. Kuiyawa anopipanum ayawa me poeman yawarat mina, taig toivi yawarat toivi auge aure aivi mina. 7 Apan mame divi da Ayapan gumbe oma ane autan oya den anope. 8 Me imug imug duwam aivi abnawa, sira undag me aiviwa yai den wakepe.

9 Kayakayawan tatawa me nau painau aiviwa membovit waiyape. 10  ✡ Ais 40:6-7Tawara abnawa me kayakayawan aiviwa membovit waiyape. Kuiyawa me matai munnoga ben uba mina onanape. 11 Kum dauwag taig amipam topewa, wayo toyaipe. Ben uba ururuwag aikpe sira oraimina yavetewa wakukampe. Ebu desirom meib tawara abnawa nau meuma yapave matai inanatpe.

12 Yaigiwa gumbe iyai wakeiviwa apan me matai waribiyape. Kuiyawa me ageyau gumbe oraimina ape. Me inaiinai keret meuma aupe. God agi wane bira God baigan apewa inaiinai keretawa wampe.

13 Amaorot uwapewa, bira da den wape God ne amaorot anegivi. Kuiyawa kukaeba oma den ane God gumbe amaorot ape, sira God bira da gumbe amaorot den ape. 14 Megara iyayapan desirom desirom ano kukaeba meuma aiviwa gumbe amaorot aupe. 15 Ano kukaeba anoiviwa me ape kukaeba ape. Kukaeba koka apewa sira bo uwape.

16 Tatangwanen nonenmagawa. Uga mumawa gumbe anopipanum den aya. 17 Dividivi oraiwa ge ano painauwa undag opa gumbe aig omome. Mamunwa me kwimin eyawa gumbe aig omome. Mamunwa me gugup mina sira den tobiyape. 18  ✡ Jon 1:13Mamunwa me imive gae natawa gumbe nu barau nunne. Undag me wadne danowo nu yoma magawa namuirenwa atu.

19 Tatangwanen nonenmagawa, ye yaug anoyana. Megara ye desirom desirom tatevit anoya, ekekenut waya sira ekekenut danowa piriwaya. 20  ✡ Ekr 7:9Kuiyawa apan danawa piriwapewa God oraivitwa den aupe. 21  ✡ 1Ko 3:8; 1Pi 2:1Miyot undag ge kukaeba obiren tam itan teya ampe. Gae wait daneyap veriya. Mokona ag gae me memeyu auya. Me oma ane ye guwewa waita yempe.

22  ✡ Mat 7:26; Rom 2:13Gembo anopipanum ag gae anoege mekut oraimina onan. Gae waiviwa a. 23 Da bira gae anope, go gae waiviwa divi da den apewa, me apan me ginangawa geyu danave membovit yavivi mina. 24 Membovit yavivi, ivi di aipewa, me ginangawa aninin tatevit imiwa atataine. 25  ✡ Rom 8:2; Jms 2:12Megara apan da Gwangwan oraivitwa temtem yaviviwa meib wakeigimpe. Gwangwan oraivitwa me ui onan wakeigimtanwa wampe. Me danave wakeigimpewa, me anonewa tate den imiwa atataipe. Sira me anonewa me ape. Apan mame divi anewa me gumbe waribiyape.

26  ✡ Sam 141:3Bira da membo anotumat inaiinaiba yaug anone. Megara me pednawa den tobodne membo ugayanewa, anotumat inaiinai meuma natawa onan. 27 Mamunwa God namive esine ge miyot onan anotumat inaiinaiba me mame. Tanam ge kwapura mu danadawai muma danave mukut wakeemewa amaramumpe, sira piyu egave membovit muinigimpe.