1 Unavinre ukati vakani, Yusufu ahohimerya wiira: Athumwanaa anawerennya ni ule ahorwaa waathotola, warwaawe vaa ahaakusa asaana awe eeli, Manasesi ni Farayimi. 2 Yakopi ahohimerya wiira: Mwamwanaa Yusufu howa wuuthotola. Isirayeli aheemananiha wunwa mpaka woorya wunkoma wankorini. 3 Ni ahomwiirela Yusufu: Nluku Okuru-Cothene hokiphwanya uPeteeli, ilapo yo uKanaa ni hokireeriha, 4 eeraka: Nloko naa nno ninahala uyaraca ni winciva ni mommo, cinkokhumelela ilapo cinci ca atthu ni kinkowuvahani ilapo ela ukhala yawinyu ukati wothene. 5 Vano, asaanaa eeli, Farayimi ni Manasesi waayarenlyaa Wiciipitu mi kihinaya uwa uno, ari awaka; toko ciryawe Rupeni ni Simiyoni. 6 Vano asaana anhalaa waayara ayo awaa, nanso mwanlattu wookhala nrukulu nimoca na Manasesi ni Farayimi na ayo anaahala waakhela mphantte wohiyeriya unaaca asunnaya. 7 Mi kikhumaka uPatani, keettaka ni iphiro kihocukula nlattu wokikhwela Rakeli ilapo yo uKanaa unahanle vakani uphiya uFarata. Kihonvitha ni iphiro yoorwaa uFarata, uneehaninya uPetelehemu.

8 Woonnyawe Isirayeli asaana a Yusufu, ahokoha eeraka: Ala tasipani? 9 Ala pha asaana Nluku akivahilyawe. Vano Isirayeli aheera: Waawane woono kawareerihe. 10 Miitho a Isirayeli yahoririyaca mwanlattu wo wuuluvala ni ule khoonaca ratta. Phimaana Yusufu ahaakusa asaanawe ayo ni weemesa vakhiviru waya athumwane. Vano Isirayeli ahaavaha alaahuma ni waakapatta, 11 ni ahomwiirela Yusufu: Akaacuwela wiira kinawoona tho ikhovyaa, nna vaa Nluku hokitthunihera woona asaanaa.

12 Vano Yusufu ahaatamiha wamweettoni wa athumwane ni ahooroma mpaka iyuuci awe uphiya vathi. 13 Vano Yusufu ahaakusa oyeeli, Farayimi ahomweesa moono nlopwana vakhiviru waya moono nthiyana wa Isirayeli, ni Manasesi ahomweesa moono nthiyana vakhiviru waya moono nlopwana wa Isirayeli ni oyeeli ahaaciserihaca wa Isirayeli. 14 Vaavale Isirayeli ahotaphula ntata no moono nlopwana nuuthatela wa muru wa Farayimi mwana omwankani, ni avirikanihaka myoono nnyo, ahokusa ntata no moono nthiyana nuuthatela wa muru wa Manasesi mwana omuulupale. 15 Vano ahonreeriha Yusufu eeraka:

17 Woonnyawe Yusufu athumwane yeesaka ntata no moono nlopwana wa muru wa Farayimi, khawancivenle. Phimaana ahovara ntata na athumwane apheelaka waakakhaniha naari wa muru wa Manasesi weesa wa Farayimi ni naari wa muru wa Farayimi weesa wa muru wa Manasesi. 18 Ni aheerela: Nhipanke commo paapa. Ula phi omuulupale, mweeseke ntata ninyu no moono nlopwana wa muru wawe vaa. 19 Nanso athumwane yahokhotta ni yahomwiirela coo: Mi kinacuwela, mwanaka, mi kinacuwela. Ni uyo naahala ukhalana uneethi mwinci ni naahala ukhala nkhuulupale. Nanso unokhalaru ciicammo, nhimaawe uyo phinhala utepa ukhala muulupale wompwaha munnaawe uyo ni uneethi awe unaahala ukhala mwinci.

20 Commo Yakopi ahaareerihaca wowaareeriha nenno nihuku nno eeraka:

21 Wahoolo Isirayeli ahomwiirela Yusufu: Kihanle vakani ukhwa, nanso Nluku nohala ukhala ni nyu ni naahala wuuturuselani ilapo ya amuci inyu okhalayi. 22 Vano we ukhala wiira uhaana iyuulupale yo wapwaha asunna ayo, kinawuvaha nttetthe uri myako wakhilyaka Amorewu ni ikatana ni myura caka.