1 Imaara yonayeeli nuulumo na Mwaneene Nluku nahowa waYona niiraka: 2 Wunwe ni urwee isitati yuulupale cinenne yo Ninive waahimyacere atthu o Ninive moolumo yuuhimyacenryaka. 3 Yona aheetthenkaca, ahonwa toko cakhanlyawe oohimeriya na Mwaneene Nluku. Ahorwaa uNinive. Ninive yaari isitati yuulupale cinenne yeettiya mahuku mararu uttupulaniha iriyariru. 4 Yona ahophiya uNinive. Aheetta nihuku nimoca akhalaka uwaahimyaca eeraka: Anhala mahuku arupayini Ninive ukwanyulaciya.

5 Vano atthu othene uNinive yahonkupali Nluku ni yahorukunusa mirima, ciicammo yaholeehana untthuka ramatani ukhuma atthu oolupale, mpaka acikani, othene yahommwaraca nakotto athoonyiheraka wiira ahorukunusa mirima caya. 6 Mwene o Ninive weewilyawe ni uyo ahonwa wahiceni wawe phurulaka ikuwo cawe cothene nuummwara nakotto phunkomaka wattuurani. 7 Ciicammo Mwene na ahooleli awe yahokumiha nlamulo nowahimyacera atthu othene unsitati wiira: Hikhale nohala ulya hata uwurya ukhuma atthu, inama coohuwiya, toko imope ni ikhontwaa, cihivahiye coolya ni maasi wala cihihuleliye cirwaka ulawiha coolya. 8 Atthu othene (ni inama cothene) amware nakotto anlapele Nluku ni ikuru, arukunuse mirima caya ni uhiya coopanka caya coonanara cothene. 9 Atthuna commo Nluku nahala unoonela ikiriri, ni urusiya wawe unahala uvira ni khaninhala ukhwa.

10 Nluku ahoona mananna cakhanlyaya oorukunusa mirima caya akhalaka oohiya coonanara caya ni Nluku khaahuvihile tho atthu ayo.