1 Yahanle mahuku meeli uphiya isukuhuulu yo Pasikuwa ni nihuku ninliyaya mikatthe coohimiropo, oolupale a mayasataka ni mayowantikha yanawaavya mananna untthuka wo makhuce nuumwiiva. 2 Yanawiira: Itthu ila ihiiriye mahuku osukuhuulu wiira atthu ayo ahipanke ipokoho.

3 Yesu nari uPetaniya, nonkomile wameeca mpani mwawe Simoni omakunttula, ahowa nthiyana, acisile iphotiri yo nluku ya alapasturo inheliya makhura oonukhela yeehaninya narttu, anthumihiya ncurukhu mwinci, napwesile iphotiri, aheetthela makhura mmuru mwaYesu. 4 Nanso akina yahonyonyinya, yiirelanaka ayayooru: Ariheliyeni ciicammo makhura ala? 5 Yanawoorya uthumihiya ni ncurukhu iminya tharu, mpaka wakawela atthu oothwenya. Ni yahonkuphula nthiyana ule. 6 Yesu nanso aheera: Nhiyeke. Munkuphulelaka isiyani? Hokipankela itthu yooreera; 7 Kontha, atthu oothwenya phinakhalaneenyu, ni mwatthunaka nnawoorya waapankela cooreera, nanso miyano akinkhala ni nyu mahuku othene. 8 Ale ahopanka itthu yoonryaya. Ahoottiha ni makhura irutthu aka ahoolelihaka uvithiya waka kihinaaya ukhwa. 9 Khweeli kinawuhimeryani, wiira mwiilaponi mothene unhalaya ulalyaa Nhupi Wooreera, inaahala tho uhimiya itthu yapankilyawe wiira upuweleliye.

10 Vano, Yutta Iskariyoti, mmoca mwaale khumi na eeli, akenle woolupale a mayasataka wiira amulume makhuce Yesu. 11 Weewilyaya moolumo ale, cahaatteela mirima ni yahovanela ummaha nsurukhu. Yutta anawavya ukati wontumiha Yesu.

12 Nihuku noopacera no mikatthe coohimiropo, ukati waveleelihiya mwakhontwa o Pasikuwa, owiitthuca yahonkoha Yesu: Nnotthuna ulokiheriya vayi nipuro noonlya Pasikuwa? 13 Ahaaruma owiitthuca eeli ni aheerela: Murwee uparasa. Nnaahala umphwanya ntthu oocisa mwaapu wo maasi. Muntthare, 14 ni unkelaawe, munhimerye mwaneene inupa: Mwalimu nakoha: Inupa inhalaka umaka iri vayi, kinlyaka Pasikuwa ni owiitthuca aka? 15 Ni naahala wuthonyerani nsana nuulupale uculu nooreerihiya ni nowaaya; mwanilokihere nenno. 16 Akhumaka owiitthuca awe, yahorwaa uparasa, ni yahophwanya toko cahimeriyaya; ni yahontthonkomaniha Pasikuwa.

17 Wiila waya, Yesu ahophiya na owiitthuca awe khumi na eeli. 18 Anonkomacile alyaka, Yesu aheera: Khweeli kinawuhimeryani, mmoca mwa nyu, nolya ni mi, naahala ukuuluma makhuce. 19 Yahanca ucukulaca, yiirelanaka ayayoru: Kahi thi mi? 20 Yesu ahaakhula: Phi mmoca mwa nyu khumi na eeli, nokilyana nttiisi nimoca. 21 Nlattu, Mwanawe Pinattamu narwa, toko cantikhelyawe, nanso natakhaliya ntthu nohala unthumiha! Phatari ahiyariye.

22 Walyaya, Yesu ahokusa nkatthe ni nareerihile, ahomyaniha ni ahaavaha owiitthuca awe, eeraka: Nkuseke, nlyeke, ila phi irutthu aka. 23 Wahoolo ahokusa ikikhompe, ahosukuru ni ahaavaha ni othene yahowurya. 24 Ni ahaahimerya: Ila phi iphome aka, iphome yo waatana wonaanano, invuviheriya atthu enci. 25 Khweeli kinawuhimeryani wiira akinhala tho uwurya yowiima ila yo viteera mpaka nihuku ninhalaka uwurya tho wumweneni wa Nluku. 26 Aneepile ncipo, yahokhumaca arwaka umwako wo Olivera.

27 Yesu ahaahimerya: Nyu othene, uhiyu ula, nnaahala uhiya ikupalelo nlattu wo miyano, kontha ihantikhiya:

28 Nanso kinonwelenle, kimmowuhoolelani wokela uKalileya. 29 Peturu aheera: Hata othene ahiye ikupalelo aya, nanso mi, mena. 30 Yesu ahomwaakhula: Khweeli kinawuhimeryani, ilelo uhiyu ula, nthupi uhinaya wiipa imaara piili, unakikhotta imaara tharu. 31 Nanso Peturu ahopwahera wakhula ni ikuru eeraka: Hata kilamuliye ukhwa ni nyu, akinookhottani. Ni othene yahoolumaca ciicale.

32 Yahorwaa nipuro neehaninya Yetsemani, ni Yesu ahaahimerya owiitthuca awe: Munkome vava mi kiswaliki. 33 Ahonkusa Peturu, Yakopu, ni Yohani, ni ahanca woova ni ucukula. 34 Ahaahimerya: Nnepa aka unacukula, icuku yo nokhwa. Nkhale vava ni nrontte. 35 Apwahaka vakani, ahowuluwela vathi ni ahoswali wiira wooryanyaa, ukati ula ukipwahe. 36 Ni ahohimya: Apa, Tiithi; Nyu nnawoorya cothene. Nkitamihe mmahuvihoni! Nanso, cihipankiye cintthunaka, nanso cintthuneenyu. 37 Uturuwa wawe, aphwanyile arupaka, ni ahomwiirela Peturu: Simoni unarupa? Khawoonrye wiliphila iwora imoca? 38 Mwiliphile ni nswaliki wiira nhithokociye. Nrima unatthuna ratta, nanso irutthu khinlipa. 39 Ahorwaa tho uswalini, akulelaka moolumo yaayo. 40 Ahoturuwa, ni ahaaphwanya arupaka kontha miitho aya yahocara ikhove. Ni khayoona yomwakhula. 41 Ahowa imaara yoneeraru mpaka waahimerya: Mpaka nna nnaarupa ni nnamumula tho? Wahotosa! Ukati uhophiya. Mwanawe Pinattamu naahala urwehiya mmatatani mwaatthu ookosakosa. 42 Muunwe, Nrwee! Kitumihile uyo hophiya.

43 Yesu oolumacaka nanlelo phaphilyawe Yutta, ari mmoca mwaale khumi na eeli, ni mphwinko muulupale wakhumile woolupale a mayasataka, mayowantikha ni mahumu ni warina ikatana ni ikopo. 44 Namakhuce ahaahimerya ikanyero eeraka: Nohalaaka unkoha isalaama, phi yooyo, mumvare ni munkuse natthukiye ratta. 45 Uphiya wawe, ahomwaattamerya ni ahomwiirela: Mwalimu! Ni ahonkoha isalaama. 46 Yahommara Yesu, ni yahontthuka. 47 Vano, mmoca mwaale eemenle wonwo, ahokumiha ikatana ahorakaliha ipottha ya nkhulupale a mayasataka, ahonthikila nnyaru. 48 Yesu ahaahimerya: Nkhumile ni ikatana ni ikopo uwa ukitthuka, toko mayohukha. 49 Kaari ni nyu mahuku othene mpani mwa Nluku, kiitthucihaka ni khamwakitthukile. Nanso wiira citthariheleliye toko caantikhiyaya. 50 Vano, anhiyaka, othene yahotthawa.

51 Ni ahontthara mmirawo mmoca eekhunenle ikuwo. Yahommara, 52 nanso ahiyaka ikuwo ile, ahotthawa pwitipwiti.

53 Yahonrweha Yesu wankhulupale a mayastaka wathukumannyaya othene oolupale a mayasataka, mayowantikha ni mahumu. 54 Peturu ahontthara uttayittayi mpaka nhina ipuwa ya nkhulupale a mayasataka. Peturu wonkomilyawe wamoca ni ananteko ootthaka mooro. 55 Vano, oolupale a mayasataka ni mayothukumana othene yaavya osaahiti, wowiira amwiive Yesu, nanso khayaaphwanyile. 56 Enci yaanahimya cowootha, nanso cahimilyaya khaweerana. 57 Ahaawo yeemenle ni uromola yowootha ila yiiraka: 58 Hi nihomwiiwa ahimyaka: Kinhala ukwanyula inupa ila, itekiye ni matata a atthu, ni mahuku mararu kinaahala uteka ikina yoohitekiya ni matata a atthu. 59 Nanso, hata ciicammo usaahiti aya khaweeranne. 60 Vano, muulupale o mayasataka aheemela iriyari aya atthu yathukumanne ni ahonkoha Yesu: Khunakhula itthu nhina osaahiti ommahaya atthu ala? 61 Yesu nanso ahomaala ni khaakhunle itthu. Muulupale a mayasataka ahonkoha tho: We uri Kristu, Mwana a Nluku Ooreerihiya? 62 Yesu ahaakhula: Kiri mi, ni nnaahala umoona Mwanawe Pinattamu nonkomile moono nlopwana wa Nluku Okuru, ni awaka mmahutteni o wirimu. 63 Vano, muulupale a mayasataka ahaahula coowara cawe ni aheera: Nimphavela tho vayi osaahiti? 64 Mwanamwiiwa ukufuru nwo. Nneera cani? Na atthu othene yahonhukhumu ukhwa. 65 Wahoolo, akina yaanapacera unsuwela, yahonkhunela wiitho ni ikuwo nuumwaatta yiiraka: Uhimyace nnapiyu! Ni mayorontta yahonkusa nuumwaattakaca.

66 Peturu neemenle vate wapuwani, ahophiya nanteko mwanthiyana a muulupale a mayasataka, 67 ni umoona wawe Peturu ootthaka mooro, ahomwehecesa ni ahomwiirela: We khweeli wari ni Yesu o Nasaree. 68 Ule nanso ahoruna, eeraka: Akinoncuwela, hata akineeweha inhimyaa iyo. Wahoolo ahokhumela vate iluwani, ni nthupi waheepa. 69 Nanteko mwanthiyana, umoona wawe tho, ahaahimerya atthu yaatamananyawe: Ula phi mmocaru. 70 Nanso ahoruna imaara yonapiili. Ukati vakani tho, ale yaari mmo, yahonhimerya Peturu: Khweeli we phi mmocaru, kontha uri nkalileya. 71 Nanso aholapha ni aholupela eeraka: Akinoncuwela ntthu nnomwaacenyu. 72 Ni nenna nna nthupi waheepa imaara yonapiili. Vano, Peturu ahoopuwela itthu yahimilyawe Yesu: Nthupi uhinaya wiipa imaara piili, we unaahala ukiruna imaara tharu. Ni vava ahopacera wunla.