Mitheko
cha akarumiya
Malhove o uholhelha
Ikitabu yo Mitheko cha akarumiya phi ikitabu inohimiacha mwaha wo uchokholha milhoko cha attu yanrumelhenlhe Kuristo ni iphiro chenre aya wo uwanelha ukhuma Uyerusalemu mpaka Uyudea ni Usamariya ni ukhopelhelhe waya thoko Yesu chenre awe wo waalheelha owiittucha awe hinaya urwaa wiirimu (nlhako wo 1:8). Ilha ikitabu ilha ilhepiye ni ashinna Luka alhepilhe tho ikitabu yo Malhove Orera a Yesu Kuristo thoko alhepiye aya ni ashinna Luka. Yayo ashinna Luka ayo aari abwana mganga, onrie ulhepa rata kila ittu yaahimiacha aya. Nhina chechiyo ichitabu pilhi chiyo, ahoromolha nchina ni Nateofilo ntu o ilhapo yo Uyunani, nansho nrima aya wooniaka wiira ichitabu chonkhaye chiyo chaalhakelhiye wa milhoko cha attu yanrumelhenlhe Kuristo Ayunani ni Ayahudi (nlhako wo 1:1).
Ikitabu yo Mitheko cha akarumiya yaalhepiye veekinaka iyaakha yo 60-64 baada yo uyaria wa Kuristo ukhalhawaya inomalha Napaolo ahinaya uhiyereriya ukhuma ujeerani. Ashinna Luka ni ayo aheeta nkwaha vamoka ni akarumiya Napaolo ni veekinaka ikitabu yaalhepiye vaari aya Uantiokiya. Ikitabu yo Mitheko cha akarumiya ilha phi nothepiha uhimiacha chihimiye nhina Malhove Orera a Yesu Kuristo alhepiye ni ashinna Luka ichokholhaka Yesu vaarwaa awe wiirimu. Nnikwa wa ashinna Luka ulhepa ikitabu yo Mitheko cha akarumiya phi mmoka yoyo ni nnikwa aya wo ulhepa Malhove Orera a Yesu Kuristo. Athananne Nateofilo vamoka ni nlhoko wo nchereria wa attu anrumelhenlhe Kuristo wiira avarecheshe ittu yeettuchihiye aya, phi vavawo chilhempe aya rata mwaha unaacha ukumi wa Yesu ni uwanelha wo milhoko cha attu anrumelhenlhe Kuristo.
Ikitabu yo Mitheko cha akarumiya inoonivaha hii iphiro cho utwariha milhoko cha attu anrumelhenlhe Kuristo o upacha ni iphiro cho upisha nrima nhina Kuristo. Tho, makhalhelho a akarumiya anoononiha iphiro cho ukhulhuvelha machiri o Iphumu ya Nlhuku muuwanelhihani nttenga wo Malhove Orera wa attu akina.
Chiri nhina
Iphumu ya Nlhuku nowaaweelha akarumiya ni uchokholha milhoko cha attu yanrumelhenlhe Kuristo (nlhako wo 1:1-8:1).
Attu yanrumelhenlhe Kuristo anootwarushiya ni uchokholha uwanelha ukhopelhelhe wo Uyerusalemu (nlhako wo 8:2-12:23).
Napaolo anoweeta nkwaha waya wo upacha wo uhimiacha Malhove Orera (nlhako wo 12:4-14:28).
Milhoko chinokumaana Uyerusalemu waavia nlhove no upanga wa attu anonrumelhelha Kuristo (nlhako wo 15:1-35).
Napaolo anoweeta nkwaha aya wo nayelhi wo uhimiacha Malhove Orera (nlhako wo 15:36-18:2).
Napaolo anoweeta nkwaha aya wo neraru wo uhimiacha Malhove Orera (nlhako wo 18:23-20:38).
Napaolo anoovariya Uyerusalemu (nlhako wo 21-26).
Wo umalhihera, Napaolo anorweehiya Urumi (nlhako wo 27-28).
1
1 Munna Nateofilo,
Ikitabu yo upachera kaaholhenlhe aka ulhepa ilhe, kaalhempe yaachaka mwaha wonkhaye waapannge awe Yesu ni wiittuchiha toka vaachokhonlhe awe ntheko 2 mpaka nihuku naakushiye awe wiirimu. Nansho hinaya ukushiya wiirimu ahaalhehera wo ikuru yo Iphumu ya Nlhuku, akarumiya aathanlhe awe. 3 Wo mahuku makhumi macheshe toka vaahihimmwe awe ahaakhumelhelha wo iphiro chinchi uhimiechesha wiira hohihimmwa. Aheechooniha wa akarumiya awe, ni woopana mwaha unaacha Imwene ya Nlhuku. 4 Ikatema yaakumanne awe vamoka ahaalhehera wiira, “Nhithame va Yerusalemu, nansho mummweherereke Iphumu ya Nlhuku, mpochere izawadi ilhehiye ni Athithi uvahani. 5 Nayohana yaabatinze attu wo maashi, nansho yaviraka mahuku vakani, mwaattiva nnoowa mwaabatiiziya wo Iphumu ya Nlhuku.”
Yesu nootheshiya urwaa Wiirimu
(Mako 16:19-20; Luk 24:50-53)
6 Paahi akarumiya ikatema vaakumanne aya ni Yesu, yahonkoha, “Thithi, chani ilha ikatema ilha phi naahokolhoshera inyu umwene attu o Uisraeli?”
7 Yesu nkeerelha, “Mwaatti kuhii ntheko inyu uchuwelha ikatema yo ukhumelhelha waya, yeyo irii mu ikuru ya Athumwanaka vekha aya. 8 Nansho nnoowa mwaapochera machiri o Iphumu ya Nlhuku vanohalha aya uukhuruwelhani. Ni inyu nnoowa mwaakihimiechesha Uyerusalemu ni ilhapo yonkhaye yo Uyudea ni Usamariya ni kila vakittu velhaponi.” 9 Amalhiheke wulhumacha yayo, ahokushiya wiirimu attu onkhaye amwoonaka, nihute nkanankhuneelha ahimwoonaka tho.
10 Nansho vaathepa aya uweha wiirimu, Yesu vaarwaa awe, wo uhipicha attu elhi yaawanre ikuwo cho utakatifu twetwetwe yaheemelha ni waatameria. 11 Nkayeera, “Attu o Ugalilaya! Chani woonaka nheemelha mmwehaka wiirimu? Ulha Yesu kushiye ukhuma uwaninyu urwaa wiirimu ulha, noowa tho thoko chimoonilhe inyu arwaaka wiirimu chiyo.”
Namatiya anoothanlhiya ukhalha karumiya
(Mat 27:3-10)
12 Yamalhekeru akarumiya yahohokolhia Uyerusalemu ukhuma waari mwaako uneehaniya Mwaako wo Mizeituni waari imaili imoka, waatameriaka nkwaha wo Nihuku no Wiittuwa. 13 Vaaphilhe aya vawani nkayaakelha uchuumbani inupa yo nchulhu ugoroofani mwaakhalha aya. Yayo yaari Napeturo ni Nayohana vamoka ni Nayakhobo ni Naandorea ni Nafilipo ni Natomaso tho ni Nabatolomayo ni Namatayo ni nkina aari Yakhobo mwaamwanaa Naalufayo ni Nasimoni Nnenchi aakhwelha ilhapo yo Ukaanani ni Nayuda mwaana a ashinna Yakhobo. 14 Nkawakumaaniya akarumiya vamoka ni manyopani akina ni Amariamu anumwanawe Yesu ni ashihima awe unlhapelha Nlhuku wo nrima mmoka.
15 Nihuku nimoka Napeturo yaheemelha ni wulhumacha munlhokoni mwa attu aarumelhenlhe Athithi, yaaphiyelha attu imia imoka ni makhumi melhi, 16 nkayeera, “Ashilhoko aka munrumelhenlhe Yesu, wo woorihiya ni machiri o Iphumu ya Nlhuku, Adaudi aholhepa nlhove no waacha Nayuda nhina Malhove Matakatifu, ni nno nihokhumelhelha. Nayuda yaari akhunanihu, nansho phi yayo yaaholhenlhe attu yammanre Yesu. 17 Nayuda yaari amoka munkutironi mwihu, ukhalhawaya ahothanlhiya ni Yesu ulhutaana ni hii mu nthekoni wihu.”
18 Nayuda yahothuma imata wo nchurukhu waalhiviye aya wo uhilhoka waya. Nkayaawulhuwa wowo umatani uwo, nkayaaphwia nthunkwa ni marupo aya nkayaakhuma vathe. 19 Attu o Uyerusalemu veewilhe aya yoyo mwaha uyo, nkayeehana yeyo imata iyo wo nulhumo naya, Hakelidama, maana aya, “Imata yo Iphome.”
20 “Ukhalhawaya iholhepiya nhina ikitabu yo Izaburi,
‘Inupa awe ihiiyeke mathalha, riyoothe hikhalhe nhina mwaya.’
Tho iholhepiya,
‘Ntu nkina akusheke ntheko wo ushunga waapanga awe.’
21 “Paahi etu athanlhiyeke ntu mmoka o unikaviha ntheko wo uhimiechesha uhihimmwa wa Athithi Yesu. 22 Yoyo akhalheke ntu mmoka anttukana ihu toka nihuku Athithi Yesu vaabatiiziye aya ni Nayohana mpaka nihuku naakushiye aya wiirimu nne. Yoyo nookhalha o uhimiechesha uhihimmwa wa Yesu.”
23 Nkayaaromolhiya machina a attu elhi, o upacha yaari Nayusufu yeehaniya Nabarsaba tho yeehaniya Yusto. O nayelhi yaari Namatiya. 24 Yamalhiheke nkayanlhapelha Nlhuku, “Thithi, inyuva phi nochuwelha mirima cha attu onkhaye chiri aya! Paahi etu, nnooniheke mpani wa alha attu elhi alha munthanlhe phuuyi, 25 wiira akhalhe karumiya ntheko uhiilhe aya Nayuda, nkayaarwaa vakittu vaaphwanenlhe aya.” 26 Nkayoopa ikhura, nkaathanlhiya Namatiya yonchereriye munlhokoni mwa akarumiya khumi ni mmoka alhe.