1 Mizotsoa, mitoboha an-debok’ ao,

ry anak’ampela’ i Bavele;

mitozoha an-tane eo

tsy amam-piambesatse,

ry anak’ampela’ i Kasdý;

fa tsy hatao mitrotrotrotro

ndra sakoly ka rehe.

2 Rambeso i vato fandisanañey

naho lisano i tsakoy;

afaho o lamba marerarera’oo,

voloso o mireparepao,

aonjono ty an-kitso’o eo,

itsaho o sakao.

3 Haboake ty fibongia’o;

ho trea ty fimeñara’o;

hamale fate raho

vaho tsy eo ty hanebañe ahy.

4 I Mpijeba’ay, Iehovà’ i Màroy

ty tahina’e, i Masi’ Israeley.

5 Mitoboha am-pitsiñañe ao,

akia mb’an-kamoromoroñañe ao,

ry anak’ampela’ o Kasdio,

tsy hatao mpanjakam-pifeheañe ka rehe.

6 Niboseke am’ondatikoo raho,

vinetako i lovakoy,

vaho natoloko am-pità’o,

fa tsy niferenaiña’o, nanoe’o mavesatse amo antetseo ty joka’o.

7 Ie nanoe’o ty hoe,

Ho mpanjaka-­ampela nainai’e raho,

le tsy nahaja’o an-troke ao o raha zao,

vaho tsy nitiahi’o ty figadoña’e.

8 Aa le tsanoño izao,

ty mpañori-kadrao,

ty mpiaiñ’añoleñañe,

ty manao an-tro’e ao ty hoe:

Tsy hitoboke ho remavoin-draho,

hamoeako ty fahamotsoan’ anake.

9 Fa hivotrak’ama’o ami’ty andro raike

o raha roe zao:

ty hamotsoan’anake,

naho ty ha-remavoiñe;

am-pañaranañe pea t’ie hifetsake

ndra te tsifotofoto’ o famoreha’oo,

naho maozatse ty fisikilia’o.

10 Natao’o mahasoa-aro ty halò-tsere’o, ihe nanao ty hoe:

Tsy eo ty mahatrea ahy.

Songa nampikeloke azo ty hihi’o

naho ty hilala’o;

ie nanao ty hoe an-troke ao: Zaho ro ie,

vaho tsy ie naho tsy zaho avao.

11 Aa le hifetsake ama’o ty raty;

tsy ho lefe’o troboeñe hisitaha’e;

hidoiñe ama’o ty hankàñe;

tsy ho lefe añeferañe;

hivovò ama’o ty fiànto, aolo’ te apota’o.

12 Mijadòña arè amo fisikilia’oo,

naho amo fitozantozam-pamoreha’oo,

o nitoloñe’o ampara’ ty nahakede azoo;

ke ho tambeza’e, he hahafitroboe’o.

13 Ie nimokore’ o fikililia’oo;

angao hiongake henaneo arè

o mpañandroo, naho

o mpañorike vasiañeo, naho

o mpahay volañeo,

handrombak’ azo amo hifetsak’ ama’oo.

14 Heheke, fa manahake ty ahetse iereo,

ho forototoen’ afo;

ie tsy haharombake ami’ty

haozara’ i firebareba’ey;

tsy ama’e ty vaen’ afo hitaraña’e,

toe tsy ho afo hamindroañe.

15 Hoe zay iereo ama’o, o nifanehafa’oo;

songa hirererere mb’an-toe’e mb’eo

o nitrao-balibalike ama’o

boak’ ami’ty naha-ajaja azoo,

tsy ho amam-pandrombake rehe.