1 Saontsieñe te, ie mitsey valy t’indaty naho mifanarak’ ama’e i rakembay,

naho engae’ t’indaty ila’e,

ho mete hao te himpolie’e i valoha’ey?

Tsy haniva i taney hao?

F’ihe nanao hakarapiloañe ami’ty

mpikoko maro,

mbore te himpoly amako!

hoe t’Iehovà.

2 Ampiandrao mb’an-kaboañe liolio ey

o fihaino’oo le mahaisaha:

Aia rehe te tsy niolorañe?

Nitoboke añ’olon-dalañe eo nitsinginiotse am’iareo,

manahake ty Arabe* Arabe: hariva; liolio; kòake am-babangoañe añe;

vaho nandeora’o amy hatsimirira’o

naho ami’ty haloloa’o i taney.

3 Toly ndra nahànkañe i orañey,

naho tsy nahavy ora-mamaratse;

toe nanao laharan-kalalijake rehe,

mifoneñe tsy ho salatse.

4 Aa tsy nitoreova’o aniany

ami’ty hoe: Ry Aba,

Nirañeko Rehe te zaho nitora’e.

5 Ho tana’e nainai’e hao ty kabo’e?

ifahara’e pak’an-kamodoañe añe hao?

Inay ty saontsi’o,

fe nitoloñe’o raha raty

vaho i nipaia’oy avao ty norihe’o.

6 Le hoe t’Iehovà amako

tañ’andro Iosià, mpanjaka: Niisa’o hao

i nanoe’ Israele mpidisa-voliy?

Songa vinonje’e ze vohitse abo

naho ambane’ ze hatae mandrevake,

vaho nanao hakarapiloañe ao.

7 Le hoe raho, Ie fonga nanoe’e,

le himpoly amako; f’ie tsy nimpoly,

vaho nahatrea zay ka t’Iehodà

rahavave’e mpahay fañahy.

8 Le nitreako te ndra t’ie tsineiko reke-takelam-pisarahañe ty amo fonga fañarapiloa’ Israele mpidisa-volio,

le tsy nañembañe Iehodà,

rahavave’e mpiolay zay;

ie nimb’eo nañarapilo ka.

9 Ty amy fitsihelatsihela’ i reñeley,

fonga nileore’e i taney,

vaho niolora’e ze hatae naho vato;

10 Ie amy zay, mboe tsy nimpoly

amako ami’ty haliforan’arofo’e

i rahavave’e Iehodà mpamañahiy

fa an-kalitake avao, hoe t’Iehovà—

11 Le hoe t’Iehovà amako,

Niventè’ Israele mpidisa-voliy te

mbe ambone’ Iehodà

mpamañahiy ty havañona’e.

12 Akia, tseizo mañavaratse o tsara

zao ami’ty hoe:

Mimpolia ry Israele mpidisa-volio,

hoe t’Iehovà;

Tsy hibosehako, fa hitretrezako,

hoe t’Iehovà,

tsy ho tanako nainai’e ty farahiko.

13 Iantofo avao o hakeo’oo, o nandilara’o

am’ Iehovà Andrianañahare’oo,

ie naboele’o amy ze hene ambahiny ambane’ ze hatae mandrevake o sata’o,

naho tsy nihaoñe’o ty feoko,

hoe t’Iehovà.

14 Mimpolia ry anake mpidisa-volio,

hoe t’Iehovà;

fa Tañanjomba’areo raho,

naho hengaeko boak’an-drova ao

ty raik’ ama’ areo,

ty roe boak’ am-pifokoañ’ ao† Isa 27:12,

vaho haseseko mb’e Tsione‡ Fampitiahiañe natroatse mb’eo;

15 Le ho tolorako mpiarake

milahatse ami’ty troko,

hamahana’e hilala naho hihitse.

16 Ho tondroke t’ie nanaranake vaho

nanitsike i taney

amo andro añeo, hoe t’Iehovà,

te tsy hanao ty hoe ka iereo:

Ty vatam-pañina’ Iehovà;

tsy ho tendreke an-tsaiñe;

tsy ho saontsieñe;

tsy ho tiliheñe; vaho

tsy hanoeñe ka.

17 Amy andro zay, hatao’ iareo ty hoe

fiambesa’ Iehovà t’Ierosalaime;

le kila fifeheañe ty hifanontone

mb’amy tahina’ Iehovày

mb’e Ierosalaime mb’eo;

vaho tsy hañaveloa’ iareo ka

i fanjeharan-tron-kaloloañey.

18 Hiharo-lia ami’ty anjomba’ Israele

ty anjomba’ Iehodà amy andro zay,

vaho hindre lia boak’ an-tane

avaratse añe pak’ amy tane

natoloko an-droae’ areo ho lovay.

19 Le hoe raho:

Akore t’ie havotrako amo anakoo,

naho hatoloko tane soa,

ty lova loho fanjaka amo fifeheañeo?

Le ho tokave’oo ty hoe: Raeko, raho,

vaho tsy hivike ami’ty fañorihañe ahy.

20 Toe manahake ty rakemba misita-baly am-pamañahiañe ty namañahia’o ahy,

ry anjomba’ Israele!

hoe t’Iehovà.

21 Inay ty fiarañanañañe boak’

an-kaboañe maliolio eñe,

ty fangoihoia’ o ana’ Israele misolohoo,

amy te nimengohe’ iereo ty lala’ iareoy,

nandikofa’ iereo t’Iehovà

Andrianañahare’ iareo:

22 Mimpolia ry anake manjehatseo,

le ho jangañeko ty fanjehara’ areo.

Itoan-jahay mb’ama’o,

amy te Ihe ro Iehovà Andrianañahare’ay.

23 Toe sahàtse avao o vohitseo,

o fifandragaragàñe an-kaboañeo.

Toe am’ Iehovà Andrianañahe’ay

ty fandrombahañe Israele.

24 Fa nabea’ i hameñarañey mifototse ami’ty nahatora anay

o raha nitoloñan-droae’aio,

o lia-rai’eo, o mpirai-tro’eo, naho

o ana-dahi’eo vaho o anak’ampela’eo.

25 Antao hibabok’ an-keñatse,

hisaron-tsalatse;

fa nanao hakeo am’ Iehovà

Andrianañaharentika tika naho

o raentikañeo, boak’ ami’ty

naha-ajaja antika pake henane,

vaho tsy norihentika ty fiarañanaña’ Iehovà Andrianañaharentika.