1 Ty tsara’ Iehovà am’ Iirmeà

ty amy hasalikoañey.

2 Mandala t’Iehodà,

midegañe o lalam-bei’eo,

ie mibotrek’ an-kontoke ty amy taney;

vaho mionjoñe ty firoveta’ Ierosalaime.

3 Nirahe’ o roandriañeo o keleia’eo

hitoha rano:

ie pok’an-kadaha eo, tsy manjo rano; mimpoly am-binta kapaike,

salatse naho daba, misaron-doha,

4 O taneo mivarakivaraky,

tsy niavy an-tane ty orañe,

miolitsolitse ty mpiava, misaron-doha.

5 Miterak’ an-kivoke ey ka ty fanaloke,

fe aforintse’e, ie tsy aman’ ahetse.

6 Miereñereñe an-kaboan-diolio eñe

ty borìke ly, misefosefo hoe fosa;

milesa o maso’eo,

amy te tsy eo rongoñe.

7 Aa ndra te asisì’ o tahi’aio zahay,

ry Iehovà, mitoloña ty amy tahina’oy;

toe maro o fidisa-voli’aio,

naho anaña’o hakeo.

8 Ry fitamà’ Israele, t’i Mpandrombak’ aze an-tsan-kaoreañe,

manao akore te ihe ro manao

ambahiny an-taneo,

manahake ty mpitaveañe mañialo ao

te haleñe?

9 Mañino Rehe ro hoe ondaty daba,

hoe fanalolahy tsy maharombake?

F’ie añivo’ay Rehe, ry Iehovà,

vaho kanjieñe ami’ty tahina’o,

ko aforintse’o.

10 Hoe t’Iehovà am’ondaty retoañe:

Toe nitea’ iereo ty mirererere,

tsy kinala’ iareo o fandia’eo;

aa le tsy no’ Iehovà,

ho tiahi’e henane zao o hakeo’eo,

vaho ho lilove’e o tahi’ iareoo.

11 Le hoe t’Iehovà amako:

Ko ihalalia’o ty hasoa’ ondaty retoa,

12 Ie mililitse, tsy ho tsanoñeko

o fitoreo’eo;

ie mañenga soroñe naho enga

mahakama, tsy ho noko;

te mone ho mongoreko am-pibara,

naho an-kerè vaho an-kiria.

13 Le hoe raho: Ee Talè, Iehovà!

Inao ty filañona’ o mpitokio:

Tsy hizò fibara nahareo,

tsy ho tendreke hasalikoañe;

fa ho tolorako fierañerañañe

tsy modo ami’ty toetse toy.

14 Aa le hoe t’Iehovà amako:

Mandañitse ami’ty añarako o mpitokio* Ies 9:14, Iir 23:11-36, 27: 14,16, Iek 21:34, 22:28;

tsy nahitriko tsy nililiako, tsy nivolañako;

itokia’ iareo aroñarom-bande,

naho sahàtse, naho raha kafoake,

vaho ty famañahian-tro’ iareo avao.

15 Aa le hoe t’Iehovà:

O mpitoky mitoky ami’ty añarakoo:

Tsy niraheko, fe hoe ty asa’iareo:

Tsy ho an-tane atoy ty vi-lava

naho ty kerè.

Aa le ty fibara naho ty hasalikoañe

ty higadoña’ i mpitoky rey.

16 Le hahifik’ an-dala’ Ierosalaime ey

ondaty itokia’ iareoo,

ami’ty mosare naho amy fibaray;

le tsy hanam-pandeveñe,

ie naho o vali’eo, naho o ana-dahi’eo,

vaho o anak’ ampela’eo;

fa hadoako am’iereo ty haloloa’ iareo.

17 Le isaontsio o tsara zao:

Ehe te hitsiririàhan-drano maso

handro an-kaleñe o masokoo;

vaho ko ajihetse ;

amy te dinemo’ ty fanjevoañe ra’elahy

i somondrara anak’ ampela’ ondatikoy,

ami’ty fere mahatindry.

18 Zaho mb’an-kivok’ añe:

hehe ty zinamam-pibara,

ie mimoak’ an-drova ao,

ingo ty nanilofen-kerè!

mikariokariok’ amy taney

o mpitokio naho o mpisoroñeo

fa tsy mahafohiñe.

19 Vata’e nifarie’o hao t’Iehodà?

Heje’ ty arofo’o vintañe hao ty Tsione?

Ino ty nandafa’o anay

ho po-pijanganañe?

Ie nandiñe fanintsiñañe fe po hasoa,

naho fitsaitsaihañe, te mone hankàñe.

20 Iantofa’ay ry Iehovà, o halò-tsere’aio,

naho o tahin-droae’aio; toe anaña’o hakeo.

21 Ko malaiñ’anay Rehe, ty amy tahina’oy!

ko mavoe’o ty fiambesan’enge’o;

mahatiahia, ko ivaliha’o

i fañina’o ama’aiy!

22 Ahavian’orañe hao o raha

tsy jefa’ o kilakila’ndatioo?

O likerañeo hao ty mampikojojoake orañe?

Tsy Ihe hao, ry Iehovà

Andrianañahare’ay?

Tsy Ihe hao ty fitamà’ay?

Toe Ihe ro Mpanao ze he’e zao!